ACT 27
27
Pol amasindugu gu Rome
1Va tuungu dyo re diguyende mu dibatu gu Itali, Pol ne bisi tsugu bamosi bayakusu gu Sulyus yivuunde gi kame migole mi Rome. Yandi abile gu nguunge yi migole mikadyanzili yivuunde giginene gi Rome. 2Yetu dipeke gu dibatu di Adramite#27.2 Adramite: divule dive tuungu mubu gu museengi wu Asi., diyendenge gu tselu biseni bi museengi wu Asi. Kere diyende. Aristarke mwisi museengi wu Masedwane yi divule di Tesalonike, abile netu. 3Ne ngwaali yine dipule gu Sidon. Sulyus akyelenge Pol bweedi, asiingise yandi mu wuyende labe bambaatsi baandi mu wudile bibile naandi ne nzale. 4Kere vane, yetu dibeyende te mavuge mabile maginzeme mu nziletu, ne vane divyoge gu tselu yi mabagele yi niingi yi Sipre. 5Kere yetu disabugu mubu wu Silisi ne wu Panfili, ne dipule gu Mira gu museengi wu Lisi. 6Vane, yivuunde gi kame migole mi Rome adagise dibatu di Alekesandi diyendenge gu Itali re anakige yetu gu dyo. 7Mu mbili batsufu digoogulenge dekedeke, ne dipule ke mupage ve wusu divule di Knide. Te vakambusu yetu ne divuge mu wuyende tselwene, divyoge yi niingi yi Krete, tselu yi mabagale yi divule di Salmoné 8Digogule mu tuungu ke mu page ne dipule ve mbure yikatsitsu re «Biseni Bibinyi», ve mbare divule di Lasé.
9Te divyose mbili makyesi, ne digaangu ne wome mu wubekoonde wuyenze dibatu, mumbare wisi wu wumine kugi bile wumevyoge, ne dikyesi di mikunge miminene dikeke bebele. Re disine Pol alubuse bayenzitsi ba dibatu ne ayambile re: 10«Bambaatsi bami, magonelabe re ga dikoondenge ke mweendu, dirungule wutsyemuse mifune ne dibatu nisi myonyu myetu.» 11Te yivuunde gi kame migole mi Rome abile ne gitu givyogilile nde mu wuyenzenge ne mu fumu dibatu, sage mu mabigu mayambilenge Pol. 12Ne gaandi iseni gibile yetu gisebile giyelimine mu wuvyose dikyesi di mosu, re mu dyo mbili batu bababile gu dibatu bayulusunu mu wuburuge vane. Baroonde wupule gu Feniks iseni gi Krete ga diyelimine; baroonde wusweme vane mu wuvyose dikyesi di mosu ne mu wurine mikunge miminene.
Mukunge gu mubu
13Ma divuge di tselu yi taandu diruge, ne bange dibatu bataase ke re diroonde yawu digusupugu. Yawu badute nyuundu, kere diyendenge mu tuungu niingi yi Krete. 14Te pesu dikyesi divyoge, mukunge wumunene wuruge gu tselu yi mikoongu mi niingi. 15Dibatu dipepe: gusenoonge wugagene ne mukunge ne yetu dilalegene. 16Yetu divyoge gu taandu ma niingi yi nduge Koda yiswege yetu ma pesu. Ne vane, ne mbili maguge, yetu dirungule wuboonge mbuungu yikayobuli. 17Badyanzitsi babenakige yo gu dibatu ne bakate dibatu dyotsu ne mikudu. Bayulu wome wuvakeme gu musegi wu tuungu tseengi yi Libi. Bavere yipevu giginene gi mwiri#27.17 Yipeve giginene gi mwiri: nde yirini gi mwiri gi tsire gi kobugu mu dibatu re dikeyendenge pesupesu ne mure dibatu dikereyiteme ne mingibe. gu mubu, ne yetu dipepe ne divuge. 18Ne ngwaali yine, mukunge wukoondenge ke wutsukimise yetu ne ngudi, re disine badyanzitsi bavere mifune gu mubu. 19Wisi wu mureru, batiremuse gu mubu, bivaave bikilu bi mudyanzu wu dibatu. 20Mu mbili Batsufu, disebelabe nisi dyuumbi, nisi banyetsi, mukunge wubilenge ke wumunene. Yetu ditsyemugulu gitu gi wuyobulu.
21Divyose mbili batsufu gugayi yivave. Ne vane Pol ateleme va wusu batu bootsu, ayambile re: «Bambaatsi bami, mbe yenu diyululu me, mbe diseburugu gu Krete; ne mbe disanyamesene bivaave bine byootsu. 22Te ne mapape, magoneloonge yenu mu wugwaare mumbare gusaandi mutu vaganegarenu wukefu, dibatu dyo piinze re diketsyemugu. 23Ne dibati didi, Nzambyami, yi magonedyanzile, atsesindigile me kimandi moosi. 24Atseyambile me re: “Pol, yiyayulu wome! Bweedi re yitsuundusu ne Sesar, ne Nzambi mu diroonde dyandi mu yu agusise yu monyu ne gaandi gu bootsu babagoneyende nagu gu munyalu.” 25Bambaatsi bami, kagu gwaaranu! Mane gitu mu Nzambi: nungyenze, matseyambulu me ne Nzambi magusupugu. 26Diguveru ve tuungu niingi moosi.»
27Bile mu digumi di mabati ne mabati mamane, gu bepepusu yetu ne mukunge gu mubu wu Mediterané. Bebele ne murime dibati, badyanzitsi ba dibatu bayabe nde re digonegogule gu simu. 28Bagulumuse gyumbu giginene gi tuungu ne mukudu ne badagise re maambe mayi madoonge mu magumi mareru ma matage ne matage tsaambu; ma ve wusu babekoonde wuvere ne badagise magumi mabeyi ma matage ne matage poombu gu tsi maambe. 29Bayulu wome re dibatu dikeregubegane mu mamanyi mamanene. Re disine bavere nyuundu tsiyine gu manzime ne baviingile ke re wisi wu babisi wugi. 30Badyanzitsi basundise mbuungu yikayobuli gu mubu ne nufure wuyambile re: «Yetu dikesundise nyuundu gu wusu dibatu.» Te baroonde nde wurine dibatu. 31Pol ayambile yivuunde gi kame migole mi Rome ne migole re: «Ga batu babe basagwaare gu dibatu, yenu disakeyobulu.» 32Ne vane, migole batabule mikudu mi mbuungu ne banyangumuse yo gu mubu.
33Wisi ne ginene gi, Pol atsitse yawu bootsu gu wuyi, ne ayambile re: «Nemunyi guke digumi di tsufu ne tsufu tsiyine tsimatsiinge yenu ne wuviingile, gugayi. 34Kagu magonetsitse yenu gu wuboonge biyi, mumbare yenu dine nzale wuyi ne ginene yobulu. Gusaandi mutu va ganegerenu wuketsyemuse dinange nisi dimoosi di muru wandi.» 35Mu mabigu mane, Pol aboonge dipe ne agabusile Nzambi dinyi va wusu batu bootsu, kere agabe dyo ne ayi. 36Ne vane, bootsu bagwaare ne bayi. 37Mu ditalu dyotsu gubile kame beyi tsi batu ne magumi tsaambu ne batu basamunu gugare dibatu. 38Ve yikure yawu, bavere biwuyi bisale gu mubu mure dibatu dikeleenge.
Dibatu ditoondeme
39Ve gi wisi, babayenzenge dibatu basebeyabe mutambe, te balabilile muvuve ne ilale gi musegi. Baroonde wuyenze dibatu vane, ga dinoonge. 40Re dibaandu banyangule banyuundu ne banyangumuse tsyo gu mubu. Mu dikyesi dyene banyangule mikudu mi batiimbi tsikasuungigi dibatu. Kere bamakise tsaande ve yulu dibatu. Ne vane divuge disindige yo, ne bagogule gu tselu yi ilale gi musegi. 41Te bapule ve musegi gu vakeme dibatu. Muru wu dibatu wunyingene gu musegi, wuseberungulenge wupupe, kere mingibe mine kale mibule matine. 42Migole baroondenge wuboke bisi tsugu mure nisi wumoosi akereriine nusaange. 43Te yivuunde gi kame migole mi Rome aroonde wuyobule Pol, ne akale migole mu wuvage dyaambu dituunge yawu. Arume babayabenge wusaange mu wupoteme mareege gu maambe mu wuyende gu simu. 44Bamosi balaande yawu ve yulu batiimbi konane ve yulu birini bi dibatu. Mu disuge dyene, bapule gu simu ne yawu bootsu bayobulu.
Currently Selected:
ACT 27: SNQ
Highlight
Share
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
