ACT 28
28
Pol gu niingi yi Malte
1Ve mane wuyobugu yetu, diyulu re Malte re dine di niingi. 2Bisi guune basaangile yetu time bweedi: ve nogenge fule gubile mosu, babaange mbaawu yiyinene ne bayake yetu bootsu va tuungu yo. 3Pol atole bisotsu bi kanyi ne avere byo gu mbaawu. Te ne gyusule gi mbaawu, mbisi yivate gugare bisotsu ne yikage yandi mu dikake. 4Ve labe bisi niingi mbisi yileleme mu dikake di Pol, bayambilenge yawu ne yawu re: «Mutu wuwu nungyenze kebile nde muboongi. Nisi natserunde yandi difu gu mubu, nzambyetu yi bumbaanze asasiinge re abili monyu.» 5Nane Pol aseyulu pyavi: agubule ke dikake re nyoge yilage gu mbaawu. 6Bisi niingi bataase ke re Pol agurande manyuru konane re agufu kisule. Bavure wuviingile, te balabe re Pol asadile dyaambu di bwaanzi, ne vane bakaluse mataase ne bayambile re: «Yandi nde nzambi!»
7Bebele ne mburene, gubile ndagu yi kumeke yi mareege yi niingi. Dine dyandi Publyuse. Ayake yetu ne yinyunge gyotsu ne alatse yetu tsufu yireru gu ndagwandi. 8Tayi Publyuse abile gu taangi, abile ne yidine ne muvaanzu wu maluungu. Pol ayende gu labe yandi, asaambile nusunzile yandi makake ne abeeluse yandi. 9Kere vane, babeetsi bootsu ba niingi bayitse gu wulabe Pol ne yawu gaandi babeelugu. 10Batu baritsige yetu mbili digobe. Ve pule dikyesi di mweendu, balagene netu ne byootsu bibile netu ne nzale mu munyalu.
Pol amepule gu Rome
11Ve vyoge migweli mireru, yetu diyende mu dibatu diburungu gu divule di Alekesandi. Dine di dyo re Kastor ne Poluks, dyo divyose dikyesi di mosu gu yiseni gi niingi. 12Dipule gudivule di Sirakuse ne divyose tsufu yireru. 13Vavene dilaande yi tuungu, re dipule gu Regyo. Ne ngwaali yine, divuge di taandu diruge ne yetu dipule gu Putiyoli va vyoge tsufu beyi. 14Gu divule dyene, yetu didagise bakeriti, batsitse yetu mu wuvyose tsonu moosi gu mbugawu. Nane re nayende yetu gu Rome. 15Bakeriti ba Rome bayulu tsaangu yi mwiitsu wetu, ne baruge mu wubengusunu yetu, dikabu dimoosi diyende gu Dikase di Apiyus ne dina gu diimbu di Ndagu Yireru. Ve Pol alabe yawu, agabusile Nzambi dinyi, ne agwaare. 16Ve pule yetu gu Rome, Pol asiingusu wubile gu ndagu yiyapiinze, ne mugole wumoosi wu wukyele yandi.
Pol agoneloonze musamu wumunyi gu Rome
17Tsufu yireru ne wuvyoge, Pol atsitse bakumeke ba Basifu ba Rome gu mbugandi. Ve duge yawu, ayambile yawu re: «Baane ba tayi, masevage dyaambu dibive gu yitsuku gyetu, konane gu kotu yi mikoku myetu, ne mane masunzu gu tsugu gu Serusalem ne wugabu mu makake ma bisi Rome. 18Yawu badume me banzidu ne baroonde wunyangumuse me, mumbare baselabe disine dingyenze diwukilise me ne difu. 19Te bivuunde bi Basifu basesiinge, vane re ve tombe me wutsuundusu ne Sesar. Nane maseroonde wufurigile yitsuku gyami. 20Re dibaandu matseroonde wulabe yenu ne wuyambile nenu. Yenu diyatsi nyi wugoneviingulu ne yitsuku gi Israel, makatu ne bapaange babe re mu yandi.» 21Bakumeke ba Basifu bayagule yandi re: «Yetu disadile mugaande nisi wumoosi wutsitse gu Sudé mu dyaambu dyagu, mwaane tayi nisi wumoosi asaburugu guune gu wunyigule yetu konane gu wuyambilile yu maambu mabive. 22Te yetu digoneroonde re yisupuli yetu magonetaase yu, mumbare disetsiimbu re mu bambure tsyotsu batu bagoneyambilile yine dikabu dyagu ke maambu mabive.»
23Bakumeke ba Basifu ne Pol basoole wisi wubengunu, ne wisi wene baruge gu mbugandi. Diyakene didi, baruge mbili. Baande yipali nguu ne tsisige, Pol ayambile yawu mavindugulu, ne aloonze yawu ne mu dyaambu di Bufumu bu Nzambi. Ayambile yawu mu Sesu ne amaange wukaluse mataase mawu. Mu dyo araange mugage wu Muyise ne migaande mi babigitsi. 24Bane basiinge mayambilenge yandi, te bamosi babuse wusiinge. 25Mu dikyesi di mweendu, baseyulusunu yawu ne yawu. Pol ayambile yawu ke re: «Dinyunyi Disuungeme dibile ne miluunge ve yambile dyo mikoku myenu, gu mune wu mubigitsi Isayi! Ayambile re: 26“Yende gu labe yitsuku gigi, ne yambile gyo re:
Yenu diguyulu bweedi, te yenu disakeditige;
yenu digubemine bweedi, te yenu disakelabe.
27Nungyenze, yitsuku gigi gisegoneroonde wuyulu;
batsevaange maru mawu,
batsetsimise miisu mawu,
Babile ne wome wulabe ne miisu mawu,
wuyulu ne maru mawu,
wuditige gu mirime myawu.
Babile ne wome wugyelugu gu me.
Re disine disarungule me wubeeluse yawu.#28.27 Isayi 6.9-10.”»
28Pol akoonde wuyambile re: «Kagu yabanu dyo, Nzambi asindige Musamu Wumunyi wu wuyobulu gu yawu babasaandi Basifu. Yawu baguyululu yandi!» [29#28.29 Mbili migaande gugu mine mabigu maame: Ve mane yandi wuyambile nane, Basifu bayende ne wutswaake mbili, yawu ne yawu.]
30Pol abepake bilime bibeyi bifwiimbe gu ndagu yi futenge yandi badole. Ayakenge bootsu babayitsenge gulabe yandi. 31Atsamune musamu wu Bufumu bu Nzambi ne aneenzenge mu dyaambu di Fumu Sesu Wusoolu ne Nzambi ne gitu gyotsu, guga mikobuku.
Currently Selected:
ACT 28: SNQ
Highlight
Share
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
