Matej 27
27
O Isus anglo baro Sudo
1A rano sabalje dogovorisajle e šorutne sveštenikura thaj e starešine e narodose sar te mudaren e Isuse. 2Gija phanglje le, inđarde le thaj predije le ko rimsko upravitelji o Pontije Pilat.
O Juda mudarol pe
3Kana dikhlja o Juda, kova so izdajisada e Isuse, kaj osudisade le ko mudaripe, pokajisajlo thaj irisada e tranda srebrenjakura e šorutne sveštenikurenđe thaj e starešinenđe. 4Vaćarda: “Grešisadem! Izdajisadem e nevinone manuše!”
Von phende lese: “So amenđe tičil pe gova? Pe tute ačhol gova odgovornost.” 5Vov čhudija e srebrenjakura ano sveto than e hrameso thaj iklilo. Tegani đelo thaj obesisada pe.
6E šorutne sveštenikura lije e srebrenjakura thaj phende: “Naj šukar te čhuva len ani hramsko kasa, golese kaj si kale parencar poćindo o rat.”
7Dogovorisajle te ćinen gole srebrenjakurencar i njiva e lončaresi thaj gothe te aven limora paše abandžije. 8Golese i njiva dži ađive akhardol “Ratvali njiva”.
9Gija pherdilo kova so vaćarda o proroko Jeremija:
“Lije e tranda srebrenjakura,
gaći e Izraelcura odlučisade te poćinen paše leso džuvdipe,
10thaj dije len paši njiva e lončaresi,
sar so vaćarda manđe o Gospod.”
O Isus anglo Pilat
11O Isus ačhilo anglo rimsko upravitelji o Pilat savo pučlja le: “Tu li san o caro e Jevrejengo?”
O Isus vaćarda lese: “Tu vaćare korkoro.”
12Kana tužisade le e šorutne sveštenikura thaj e starešine, o Isus khanči ni vaćarda. 13Tegani pučlja le o Pilat: “Šune li so vaćaren protiv tute?” 14A o Isus ni vaćarda ni jekh lafi, gija o rimsko upravitelji o Pilat but čudisajlo.
E Varava mučhen, a e Isuse čhuven ko krsto
15Ko baro đive ki Pasha sasa o adeti o upravitelji te mučhol andaro phanglipe po jekhe phangle save e manuša manđen. 16E Isusesa sasa jekh phanglo so akhardola Varava kas savore džanen. 17Kana e manuša ćidije pe, o Pilat pučlja len: “Kas manđen te mukhav tumenđe? E Varava il e Isuse so si akhardo Hrist?” 18Vov džanglja kaj tari ljubomora dije le e Isuse.
19Kana o Pilat bešlo ki sudsko stolica, e Pilatesi romni bičhalda haberi lese: “Ačhav tut taro sudo gole pravednikostar, golese kaj erat ano suno but mučisaljem paše leste!”
20A e šorutne sveštenikura thaj e starešine pherde e manušen te roden te mučhol e Varava a e Isuse te mudarol. 21O Pilat pučlja: “Kas manđen te mukhav tumenđe tare kala duj džene?”
Von phende: “E Varava!”
22A o Pilat pučlja len: “A so te ćerav e Isusesa so si akhardo Hrist?”
Savore vaćarde: “Čhu le ko krsto!”
23A o Pilat pučlja: “Sose? Savo bilačhipe ćerda?”
Von andare sa o glaso dije vika: “Čhu le ko krsto.”
24Al kana dikhlja o Pilat kaj khanči ni pomožil thaj sa pobut bunin pe, lija o paj thaj thoda pe vasta angle manuša vaćarindoj: “Me naj sem bango pašo rat kale manušeso! Pe tumende ačhol gova odgovornost.”
25Sa e manuša phende lese: “Leso rat nek perol pe amende thaj pe amare čhave!”
26Tegani mukhlja lenđe o Pilat e Varava, a e Isuse dija te šibin thaj dija te čhuven le ko krsto.
E vojnikura maren muj e Isusesa
27Tegani e vojnikura e Pilatese inđarde e Isuse ke upraviteljesi palata thaj trujal leste ćidije celo četa vojnikura. 28Von uljarde le thaj učharde le ano lolo ogrtači#27,28 Kava lolo ogrtači si šej savo phiravena samo e carura., 29khuvde lese venco tare kangre thaj čhute lese po šoro. Dije le trska ano desno va, pele pe koča angle leste thaj marde muj lesa vaćarindoj: “Te ave sasto, carona e Jevrejengo!” 30Čhungarde le, lije i trska thaj marde le po šoro. 31Kana ačhade te maren muj lesa, uljarde lestar o lolo ogrtači thaj urade le ane leso fostano. Tegani inđarde le te čhuven le ko krsto.
E Isuse čhuven ko krsto
32Kana iklile, resle jekhe manuše andari Kirina savo akhardola Simon thaj terisade le te inđarol o krsto e Isuseso. 33Avile dži ko than so akhardola Golgota, so si “Kokalo e šoreso”. 34Dije le te pijol mol mešimo khančesa so si ćerko. Al kana probisada, ni manglja te pijol.
35Kana čhute le ko krsto, [čhudije kocka te bi ulavena lese fostanura maškar peste.] 36Tegani bešle gothe thaj arakhlje le. 37Upral pe leso šoro čhute tabla kaj pisil lesi krivica: “Kava si o Isus, o Caro e Jevrejengo.”
38Tegani čhute lesa dujen razbojnikuren, jekhe tari desno rig thaj dujtone tari levo. 39E manuša save nakhle, vređisade le thaj vrtisade šorencar 40vaćarindoj: “Tu so phađe o Hram thaj paše trin đive vazde le, spasi korkoro tut! Te san Čhavo e Devleso, ulji taro krsto!”
41A gijate marde muj e Isusesa i e šorutne sveštenikura, e učitelja tare Mojsijaso zakon thaj e starešine. Vaćarde: 42“Averen spasisada a korkore pes našti? Vov si o caro e Izraeleso! Nek uljol akana taro krsto thaj ka pača ane leste! 43Pouzdisajlo ano Dol, akana vov nek spasil le, te manglja le. Korkoro phenda: ‘Me sem e Devleso Čhavo!’” 44Gijate vređisade le i e razbojnikura save sesa ke krstura.
E Isuseso meripe
45A tare opaš o đive dži ke trin o sato ki sa i phuv učharda o kalipe. 46A paše o trito sato dija vika o Isus andaro baro glaso: “Eli! Eli! Lama sabahtani?” (so si: “Devla mingreja! Devla mingreja! Sose mukhljan man?”)
47Kana nesave save ačhile gothe šunde gova, phende: “Vov akharol e proroko e Ilija!” 48Thaj sigate jekh lendar prastija thaj lija o sunđeri, bolda le ano šut, čhuta pi trska thaj kanisada e Isuse te pijol. 49A avera vaćarde: “Ač te dikha, da li ka avol o Ilija te spasil le.”
50A o Isus vadži jekh drom dija vika andaro baro glaso thaj mukhlja pi duša.
51Thaj tari jekh drom i zavesa pharadili ano sveto than e hrameso, ke opaš odupral natele. I phuv tresisada thaj e stene pharile. 52E limora putajle thaj but telura e Devlese manušenđe uštile andare mule. 53Thaj kana iklile andare limora palo uštipe e Isuseso, avile ano sveto foro o Jerusalim thaj sikadile pherdonenđe.
54Kana o rimsko kapetano thaj kola so lesa arakhlje e Isuse dikhlje kaj i phuv tresil pe thaj sa so sasa, darajle but thaj vaćarde: “Čače kava manuš sasa Čhavo e Devleso!”
55Gothe sesa but džuvlja, save gova dikhlje odural. Von džana palo Isus tari Galileja thaj kandena le. 56Maškare lende sesa i Marija Magdalena, i Marija i dej e Jakovesi thaj e Josifesi thaj i dej e Zevedejese čhavenđi.
E Isuseso prahope
57Kana peli i rat, avilo jekh barvalo manuš taro foro Arimateja, so akhardola Josif, savo i vov sasa sikado e Isuseso. 58Vov đelo ko Pilat thaj molisada le pašo telo e Isuseso. Tegani o Pilat naredisada te den le o telo. 59O Josif lija o telo, paćarda le ano nevo laneno čaršafi 60thaj čhuta le ano piro nevo limori savo sasa čhindo ani stena. Phanglja o vudar taro limori bare baresa thaj đelo. 61Gothe sesa i Marija Magdalena thaj i dujto Marija, save bešle anglo limori.
I straža aračhol o limori
62A theara đive, ko savato, ćidije pe e šorutne sveštenikura thaj e fariseja ko Pilat 63thaj phende lese: “Gospodarona! Dijam amen gođi kaj kava xoxavno dok sasa džuvdo, vaćarda: ‘Pale trin đive ka uštav tare mule.’ 64Golese vaćar te aračhol pe o limori dži ko trito đive, te ma aven lese sikade, te čoren le thaj te vaćaren e manušenđe kaj uštilo tare mule. Te gova desisajlo o poslednjo xoxaipe ka avol po baro tare anglune!” 65O Pilat vaćarda lenđe: “Isi tumen stražara! Džan thaj aračhen o limori sar džanen.” 66Von đele thaj osigurisade o limori gija so čhute pečato po bar thaj čhute stražaren.
Currently Selected:
Matej 27: GSP
Highlight
Share
Copy
Want to have your highlights saved across all your devices? Sign up or sign in
