چھاگلاسگون 4
4
حضرت پطرؔس تانگ حضرت یُوؔحنّا ٰ ژوکسپے لدُونلا کھیرس۔
1حضرت پطرؔس تانگ یوحنّانی میمانگسلا لابجا سالین یود زانے اِمام گُون، بیت المقدِس ثونگکھانّی ماگسپون تانگ صدُوقی پاگون تیرو یونگس۔ 2تے اُسکیونگونلا ثو یونگستے یودپین۔چیازیرنا رسُول گُونی میتشوگسلا حضرت عیسیٰ سی گیُودتے شیکھانگون سونتیا لانّگا زادچیسّی لابجا سالّادپین۔ 3کھونگونی حضرت پطرؔس تانگ حضرت یُوؔحنّا ٰ زومستے ستینگماجاگ تشوگپا تسونکھانّگا کاگچوگس، چیازیرنا مونڈیگ سونگ تشارتے یودپین۔ 4اِین نانگ کھونگی چھوس تشورکھان مانگپوے حضرت عیسیٰ مسیح یکا ایمان کھیونگس، ایمان چانگونّی ٹانگسکا ستونگ رثنا زامشیگ یودپین، کابوے نانّگا بومو تانگ ٹھوگوگون ماتھیا اینوگ۔
5تینے ستینگماجاگا یولّی سپونبوگون، اُسکیونگون تانگ شریعتی عالِم گون یروشالیمّا دزوم۔ 6اِمامِ اعظمی حنّا، کائفاس، اِمام چھینموے نین۔ حضرت یُوؔحنّا ٰ، اسکندریہ تانگ جانگون تیٹھوا یودپین۔ 7کھونگونی حضرت پطرؔس تانگ حضرت یُوؔحنّا ٰ ژوکسپے لدُونلا بودتے ٹیس، ” کھیرانگونّی سوی وانگی نانّگا یا سوی مینگ کھورتے تے لاسگون چوستے این؟“
8تینے ہلژخمہ رُوح بوے گنگستے حضرت پطرؔس سی لانتانگس، میگونّی مالِک تانگ اُسکیونگ گُون، 9نگاجے کھونگسکھانّی می پھانچوگستے لاس زانگپو چوچیسپوے، دیرینگ نگاجا ٹیوا ٹیادا؟ کھو کازوگی گیال، گیوسچھا میراگا ؟ 10ای بُو کھیوجا تانگ بنی اِسرائیل پا تشانگمے شیسگوس، حضرت عیسیٰ مسیحاناصرة پا کھیوجے کیانگشینگیکا کیانگس اِین نانگ خُدے کھونگ شیکھانگونّی ٹونے سونتیا لانّگا زادسکھانّی ستوبسچان مِنتخسی نانّگا ای میبو پھانتے کھیوجے لدُونلا لانگستے اینوگ۔ 11کھونگی سکورلا شوقبُو بوے نانّگا مولتے اینوگ،
کا ردوابو کھانگپا سیگکھانگونّی پھانمیتھوگس تھیس،
تینّا ردوابو کھانگپے ٹُوردوابو گیور
کا بو تشانگمیسانگ کھاگچان ردوابو اینوگ#4:11 زابور شوقبُوئ 118۔ 22 ۔
12حضرت عیسیٰ مسیحاماستوگس جان سوجیگ گیُودتے نگاتانّگا تھارپا میتھوب، دُنیا گانگپوے نانّگا جان سوجیگّا خُدے تے مینگبو سالّا مازادس، کا بو گیُودتے نگاتانگونلا تھارپا تھوبین۔ 13تینے کھونگونی حضرت پطرؔس تانگ حضرت یُوؔحنّا ٰ ماسیلکھان، کھاسپا می مان اِین نانگ ما سپوسپا نیامپو گواہ تانگچیس تھونگتے ہالاس، یانگ کھونگ نیسکو حضرت عیسیٰ سی ٹوپا اینکھانبو ہاگو۔ 14کھونگونی پھانچوگکھانّی میبو کھونگ نیامپو لانگستے یودپا، کھونگونلا حضرت پطرؔس تانگ یوحنّانی گیابگالّا چانگ زیر مانیان۔ 15تیبویپھیا کھونگ نیسکو یہُودی پے تشوگسدونے پھیلوگا پھینگس، یانگ کھونگونی ٹابس چوستے چیگ تانگ چیگّا ٹیس، 16”نگاتانگونّی ای می نییسکوا چی چوین؟ تے ستاسپو ماچونگ نگاتانگی زیر مینیان چیازیرنا کھونگونی معجزہ ستانکھانبو یروشالیم پا تشانگمالا گیُوس اینوگ۔ 17اِین نانگ حضرت عیسیٰ سی سکورلا لونبو میمانگسّی نانّگا تارُوانگ می گیاسچیسّی پھیا نگاتانگی کھونگ نییسکوا تانیپھارلا حضرت عیسیٰ سی مینگ کھورتے چھوسشاد میچھوگ زیرتے کاتانگین۔“ 18تینے کھونگ نیسکو نانّگا بودتے حضرت عیسیٰ سی سکورلا سوانگ سپیرا یا چھوسشاد میچھوگ زیرتے کا تانگس۔
19اِین نانگ حضرت پطرؔس تانگ یوحنّانی کھونگونلا مولس، ”کھیوجے چی سامّاراگ، خُدے سکوندونلا کا بو ٹانگپو اینوگ، کھونگی کا کھانیانچیسپو اینّوگا یا کھیوجے؟ 20نگاجے تھونگکھان تانگ تشورکھانگون میگونلا ماشادّادوگ نیانچیس مید۔“
21تے چونگکھانبو تھونگتے می تشانگمے خُدا ستودپا پھولپا، میگونّی ہیلینگس ماپھینّگا یہُودی پے ژوکسپے کھونگ نییسکوا چھادپا کازوگشیگ چادچیسپو تھاگچاد مانیان۔ تینّابویپھیا کھونگونی سپانگپودتے کھونگ نیسکو پھودتانگس۔ 22معجزہ زادتے پھانچوگکھانّی میبوا لو ژیبچو سانگ مانّگا چھادپین۔
ایمان چانگونّی سپوسپے پھیا دُعا۔
23کھونگ نیسکو پھودتے ستینگنے جان ایمان چان فونو گونّی ٹوا سونگ یانگ اِمام کُنی چھونمو تانگ اُسکیونگ گُونی زیرکھان تشانگما کھونگونلا شادس۔ 24کھونگونی تیبو تشورّاچیگ تشانگمے سکاد چھینموے نانّگا خُدا دُعا جوس، ”کیے مسیح، نیرانگ ای نامکھا، دُنیا، گیاتشو تانگ تیگونّی نانّگا یودکھان تشانگما زادتے این۔ 25ہلژخمہ رُوح گیُودتے نیرانگی یوگپو نگاجے اتا اپو گیالپو داؤد ّی ژالنے مولس،
’گیالکھاگگونلا ثو ثانٹے چیا یونّگانوگ۔
میگونّی گومیچھودچیسّی جوسنگان چیا لدینّگانوگ۔
26خُدے تانگ کھونگی لدامّا زادکھانّی مسیح گیابگالّا،
دُنیائی گیالپوگون رماگی پھیا ڈالڈیگ دوگ،
یانگ وانگثولپاگون دزومستے دوگ۔‘ #4:26 زابور شوقبُوئ 2۔ 1، 2
27تانتانلا ای گیالسے نانّگا گیالپو ہیرودِیس تانگ رومی کالون پنطیُس پیلاطُس، یہُودی مانکھان گُون تانگ بنی اِسرائیل پاگون نیامپو دزومستے نیرانگ ای لدامّا زادکھان ہلژخمہ جابستوگپا حضرت عیسیٰ سی گیابگالّا جوسنگان لدینگس۔ 28کھونگونی مسیحا چوسکھانبو نی نیرانگی وانگ تانگ تھوگّونگس نانگجین سنگونلا تھاگچادّا زادتے اینپین۔ 29تا کیے مسیح، کھونگونی لدامجاگ تانگسکھانبو سانّا زادتے نگاجا نیرانگ ای یوگپوگونلا نیرانگی ہلژخمہ کا ہامپا نیامپو شادچیسّی شید سال۔ 30نیرانگی چھاگ کیانّگا زادتے گیالچوگچیس، نیرانگی ہلژخمہ جابستوگپا حضرت عیسیٰ سی تشان وانگچانّی نانّگا معجزہ ستاگس تانگ معجزہ چوا زاد۔“
31دُعا چو تشارّاچیگ کھونگون دزومستے یودکھانّی نانگبو سکولّا زادس۔ تشانگما ہلژخمہ رُوح بوے گنگستے خُدے حُکم ہامپا نیامپو شادس۔
ایمان چانگونّی نورگون گوستے تانگس۔
32ایمان چان تشانگما سنینگ سیمس تھونتے سوجیگیانگ رانگی نوربو نگارانگی این مازیرّا چیتشانگما جانماگون نیامپو گوادپین۔ 33رسُول گُونی ستوبس چھینمو نیامپو حضرت عیسیٰ مسیح شیکھانگونّی ٹونے سونتیا جانگسکھانبوے گواہ تانگس یانگ تشانگمیکا شزدے چھینمو بابس۔ 34کھونگونی ٹونے گھوسدومچان سوانگ میدپین، چیازیرنا جینگ یا کھانگپا یودکھانگونّی تیگون تسونگستے 35رسُول گُونی جابسّی لدُونلا تے پینیگون پھولّادپین۔ تینے کھونگونی گھوسدوم نانگجین تیبو تشانگمالا گوستے سالّادپین۔
36نور تسونگکھانگونّی نانگنے کُپُرؔس سی یولنے بنی اِسرائیل میریگس لاوی پا حضرت یُوسفؔ زیرکھانجیگ کابوا رسُول گُونی برنباس مینّگا تاگس (تیبوے تونبو ”سیمسّتوبستانگکھانّیبو“ زیرتے اینوگ)۔ 37کھوے رانگی جینگبو تسونگس یانگ پینیبو کھیونگستے رسُول گُونی جابسّی لدُونلا پھولس۔
Currently Selected:
چھاگلاسگون 4: LBJNT
Highlight
Share
Copy
Want to have your highlights saved across all your devices? Sign up or sign in
Ladakhi Bible by The Love Fellowship is licensed under Creative Commons Attribution-ShareAlike 4.0 License.
