لوکا 14
14
حضرت عیسیٰ سی شابّادّی جاگّا پھانچوگا زادس۔
1شابّادّی آرام چوچیسی جاگشیگّا حضرت عیسیٰ سی فریسی پے سپونبوجیگی کھانگپا دونتانّگا سکیودس، فریسی پاگونّی کھونّگا ژیبچا چوستے ستیندوگس۔ 2حضرت عیسیٰ سی لدُونلا کانگلاگ ثانگسکھانّی میجیگ یودپین۔ 3حضرت عیسیٰ سی فریسی پاگون تانگ شریعتی عالِم گونلا مولس، ”شابّادّی جاگّا چھوسٹھیمس نانگجین نادنے پھانچوگنا ڈیگستے اینّوگا یا مانوگ؟“ 4اِین نانگ کھونگونی چانگ لان ماتانگس۔ کھونگی کھوا چھاگسیا زادتے پھانچوگا زادس، یانگ کھو کھورانگی کھانگپا لامچوگا زادس۔ 5تینے حضرت عیسیٰ سی کھونگونلا مولس، ”کالتیس شابّادّی جاگّا کھیوجا چیگی ٹھوگو یا لانگتو چھودونگی نانّگا بودنا، کھیوجے تینّامالّا کھو پھینگ می پھینّگا؟“ 6یانگسکیار کھونگونی لان ماتانگس۔
7ڈونپوگونّی ڈالگوا ژالکھانبو حضرت عیسیٰ سی زیگسّاچیگ کھونگی ای رومسپو شادّا زادس، 8”میجیگی کھیورانّگا باگستونّی ڈونلا بودنا، ڈالگویکا مادوگ، چی گیُوس، ڈون تانگکھانبوے کھیرانگی سانگ کھاگچان ڈونپوجیگ بودتے یودڈو۔ 9کالتیس یودنا کھیوجا نییسکوا ڈون تانگکھانبو یونگستے کھیورانّگا ’ کھیرانگ دوگکھانّی ناسّا ای میبوا تونگ‘ زیرنا کھیرانگ ٹھیلبا چھین یانگ کھیرانگ ڈالّی جوگا چھاگوساین۔“
10”اینّانگ کھیورانّگا ڈونلا بودنا سونگتے ڈالّی جوگا دوگ۔ ڈونلا بودکھانبو یونگستے کھیورانّگا، ’دزاو ڈالگوا سکیود‘ زیرین۔ تینے جانما ڈونپو تشانگمے لدُونلا کھیورانّگا سیوا تھوبین۔ 11ٹاگپو ستانکھان تشانگما پاسمو چوا زادِین یانگ کھورانگ پاسمو بورکھانبوا سیوا سالّا زادِین۔“
12تینے حضرت عیسیٰ سی ڈون تانگکھانبوا مولس، ” کھیرانگی دزارا یا گونگزان تانگ زانے رانگی دزاوگون، یا فونو یا نو، یا نینڈونگ یا کھییمتشیس چھوگپوگونلا مابود۔ کالتیس بودنا، کھونگونی کھیورانّگا ڈون لانتانگستے کھیرانگی ٹینلان لوگثیدچیس اینوگ۔ 13اِین نانگ کھیرانگی ڈون تانگ زانے نیالباچان، لوسّکیونبا، جاؤ تانگ جارا گُونلا بُود۔ 14تینے کھیورانّگا برکت سالین۔ کھونگونی ڈون لانتانگ ماتھوبنانگ خُدے می ٹانگپوگون سونتیا لانگچوگّا زاد زانے کھیورانّگا شزدے سالین۔“
ڈون چھینموجیگی رومس۔
15تیبو تشورتے ڈونپو چیگی حضرت عیسیٰ سی زیرس، ”خُدے گیالثیدّی نانّگا ڈون زاکھانگون برکت چان اینوگ۔“
16اِین نانگ حضرت عیسیٰ سی لانسالس، ”میجیگی ڈون چھینمو تانگچیس ڈالڈیگ چوستے ڈونپو مانگپوا بودس۔ 17دونتانگ ڈوبّاچیگ بودتے یودکھانگونلا، ’یونگشیگ، دونتانگ ڈوبتے یود‘ زیرتے بودّا کھورانگی یوگپوگون لامچوگس۔ 18اِین نانگ کھونگ تشانگمے نیادتاگچیس گوزوگستے ٹانگپو می بوے زیرس، ’نگے داگسارانگ ژینگجیگ نیوسپین، تیبوا ستالا چھاگوسّاد، جوجو نگا گونگسپا سال۔‘ 19ژانجیگی زیرس، ’نگے لانگتو چھا ثنا نیوسپین، تیگون ژینگیکا کولتے ستالا چھاگوسّاد، جوجو نگا گونگسپا سال۔‘ 20ژانجیگی زیرس، نگے داگسارانگ ناما چوسپین نگا یونگنیانچیس میراگ۔“
21”تینے یوگپوبو لوگتے یونگستے سپونبوا تیگون شاد۔ سپونبوا ثو ماثانٹے یونگس یانگ یوگپوا زیرس، ’گیوگسپا ڈونگکھیرّی لام تانگ ثانگ گُونلا سونگتے نیالباچان، لوسّکیونبا، جارا تانگ جاؤ گُون کھیونگ۔‘ 22یوگپوے زیرس، ’سپونبولے، نیرانگی مولکھان نانگجین چوسپین، اِین نانگ تارُوانگ ناسّا ستونگپا دوگ۔‘ 23تینے سپونبوے یوگپوبوا زیرس، نگے کھانگپا گانگچوگچیسلا ڈونگکھیرنے پھیلوگی لام تانگ ثانگ گُونلا سونگتے تیرو یودکھانگون بودتے کھیونگ۔ 24نگے کھیورانّگا زیرّاد، ڈونلا بودکھانگونّی نانگنے چیگّانگ نگے ڈالڈیگ چوسکھانّی ڈونّی کھارجی نیانگچیسّی سکابس میتھوب۔“
حضرت عیسیٰ سی لوبٹوگس گیورچیسلا چیتشانگما پھانگوس۔
25میتشوگس چھینموجیگ حضرت عیسیٰ سی ستینگرانگنے یونگس، یانگ کھونگونی چھوگسلا گیورتے کھونگی مولس، 26”نگے ستینگرانگنے یونگدوگ اِین نانگ رانگی ابا، اما، ناما، ٹھوگو، مینگثینگ ماتشاد رانگی ثوگّانگ نگے سانگ مانّگا یاشا چوکھانبو نگے لوبٹوگس گیور مینیان۔ 27یانگ رانگی ردوگنگالّی کیانگشینگ کھورتے نگے ستینگنے ماڈانگسکھانبو نگے لوبٹوگس گیور مینیان۔“
28”کالتیس کھیوجا چیگی کھانگپا ٹاگپوجیگ سیگاین سامنا، سنگونلا دُوگستے تیبو سیگچیسّی گھوسدومی پینے کھورانگی لاگا دوگّا میدوگ میستا؟ 29تے مانّا ماگلدان تینگستے کھانگپا گانگپو ڈوب میتھوب، تینے تیبو تھونگکھان تشانگمے ہابگود تانگستے زیرین 30’ای می بوے کھار سیگچیس چوسپا اِین نانگ ڈوب ماتھوب‘۔“
31”یا ماگمی ستونگچو یودکھانّی گیالپوے، ماگمی ستونگنییشو ٹھیدتے یونگکھانّی گیالپوے گیابگالّا ماگتانّگا چھے سانگ سنگونلا کھوے لاگا تے گیالپوبوا پھامکالچیسّی کھیود دوگّا میدوگ ستا میستا؟ 32کالتیس کھیود میدنا کھوے تارُونگ تھاگرینّگا یودکھانّی ٹاوا جیدے پھیا نانگڈیگ چوچیسلا تھوسمیگون کالین ۔ 33تینّا تسوگسلا کھیوجاگونّی یودکھان تشانگما سپانگ ماسپانگنا کھیوجا نگے لوبٹوگس گیور مینیان۔
34تشا پھانتھوگسچان اینوگ، اِین نانگ کالتیس تشی ٹوت پو یولنا تیبو کازوگی لوگستے کھیونگین؟ 35تے تشا جینگی نانّگا یا لودلانگ میپھان، تیبو پھیلوگا پھانگین۔ نامچھوگ یودکھانگونّی نگے زیرکھانلا نیونشیگ۔“
Currently Selected:
لوکا 14: LBJNT
Highlight
Share
Copy
Want to have your highlights saved across all your devices? Sign up or sign in
Ladakhi Bible by The Love Fellowship is licensed under Creative Commons Attribution-ShareAlike 4.0 License.
