لوکا 15
15
لُوگ ستورکھانّی رومس۔
1ٹھالنینکھانگون تانگ دِیگپاچانگون حضرت عیسیٰ سی لابجاگون نیانّالا یونگس۔ 2اِین نانگ فریسی پاگون تانگ شریعتی عالِم گونّی باگابوگے شادین زیرس، ”ای می بوے دِیگپاچانگونلا گاسوس جْوس تے کھونگون نیامپو زان زادّوگ۔“
3تینے حضرت عیسیٰ سی کھونگونلا ای رومسپو شادّا زادس، 4”کھیوجا چیگّا لُوگ گیا یودکھانبوے نانگنے لُوگ چیگ ستورنا، جان گُوبچوگورگُو بُو تھانگستونّگا بورتے ستورکھانبو تھوبتھوب تشوگپا ژالّا کھو میچھا؟ 5تھوبّاچیگ، گامو نیامپو جینگبیکا کھورتے 6کھانگپا کھیرین۔ تینے کھوے کھورانگی دزاو تانگ کھییمتشیس گُون بودتے زیرین، ’نگا نیامپو گامو سکیدپو چوس چیازیرنا نگے لُوگ ستورکھانبو تھوب۔‘ 7نگے کھیوجا زیرّاد، تینّا تسوگسلا نامکھے نانّگا می ٹانگپو دِیگپے کانے گیودپا چوگوسمید سامکھان گُوبچوگورگُو سانگ گیودپا چوکھانّی دِیگپاچان چیگی پھیا مانّگا گامو چوین۔“
پینے ستورکھانّی رومس۔
8”بوموجیگّا مولّی پینے رچُو یودکھانبوے نانگنے چیگ ستورنا، کھوے اوت دُوگستے کھانگپا لدوستے پینے ستورکھانبو تھوبتھوب تشوگپا گیالّا چوستے میتسالّا؟ 9تھوبّاچیگ، کھییمتشیس تانگ دزاوگون بودتے زیرین، ’نگا نیامپو سکیدپو چوس چیازیرنا نگے پینے ستورکھانبو تھوب۔‘ 10نگے کھیوجا زیرّاد، تینّا تسوگسلا گیودپا چوکھانّی دِیگپاچان چیگی پھیا خُدے فرشتاگونّیانگ گامو چوین۔“
بُوژا ستورکھانّی رومس۔
11حضرت عیسیٰ مسیح تارُوانگ مولس، ”میجیگّا بُوژا نیس یودپین۔ 12بُوژا چھونگونبوے ابا زیرس، ’ابا نگے سکالّے نورسکالبو سال۔‘ تینے ابے کھورانگی نوربو بُوژا نیسکوے نانّگا گوس۔ 13جاگ کھاچیگی ستینگنے، بُوژا چھونگونبو نور تشانگما کھورتے، تھاگرینگی یولجیگّا سونگ۔ کھوے نور تشانگما سامبا ماتانّگا سچودپا نگانپے نانّگا گودلا تانگس۔ 14نور یودکھان تشانگما سکیاگ تشارّاچیگ، تے یولّا موگے ثانٹے یونگس، یانگ کھوا ستوگری تانگ کھیاگری تھونگ۔ 15تینے کھو لاس ژالّا تے یولّی میجیگیکا سونگ، یانگ کھوے ژینگیکا پھاگّونلا زان تانّگا کھو لامچوگس۔ 16کھوے پھاگی زانبو زوستے کھورانگی ٹودپا ڈانگچوگچیسّی دودپا چوس، اِین نانگ کھوا سوینگ چانگ ماتانگس۔“
17”تینے کھوا سامبا یونگستے زیرس، نگے ابے لاپا مانگپوے ڈانگس ڈانگس زوستے لاگلوس بورّادپین، اِین نانگ نگا ایکا ستوگری تھونگتے شیچیس راگ۔ 18نگا نگارانگی ابیکا لوگستے سونگتے زیرین، نگے خُدے تانگ نیرانگی گیابگالّا دِیگپا چوستے اینوگ۔ 19نگا نیرانگی بُوژا این زیرچیسّی اوسپا مان، نیرانگی لاپاجیگ تسوگسلا نگا بورّا زاد۔ 20تینے کھو لانگستے کھورانگی ابا یودسا سونگ۔“
”کھو ابانے تارُونگ تھاگرینّگا یودتیانگ ابے کھوے بُوژا یونّگا تھونگ یانگ کھوے سیمس سنینگرجے گانگس۔ ابا بانگتانگستے سونگ یانگ بُوژا ٹھیلتے پوگ تانگس۔ 21بوتشے کھوا زیرس، ’ابالے، نگے خُدے تانگ نیرانگی گیابگالّا دِیگپا چوستے اینوگ۔ نگا نیرانگی بُوژا این زیرچیسّی اوسپا مان۔‘ 22اِین نانگ ابے یوگپوگون بودتے زیرس، ’گیوگسپا چوس، تشانگمیسانگ رینچان کوس کھیونگستے کھوا سکون، لاگپا سیرّی سی سود تانگ کانگپا پابُو سکون۔ 23بیتو گیاگسپا کھیونگستے سود، نگاتانگونّی ڈون تانگستے گامو سکیدپو چوین، 24چیازیرنا نگے ای بُوژا بُو شیتے اینپین، تا سونتے اینوگ۔ ستورتے اینپین، تا تھوبتے اینوگ۔‘ یانگ کھونگونی گامو سکیدپو چوچیس گوزوگس۔“
25”تینّا توسلا بُوژا چھینموبو ژینگنے لوگتے کھانگپے نیمو لیبّاچیگ، کھوا لو تانگ سیس تانگکھان تشور۔ 26کھوے، یوگپوجیگ بودتے چی چھین اینوگ زیرتے ٹیس، 27یوگپوبوے لانتانگس، ’نیرانگی نو لوگستے یونگس یانگ کھو کھامزانگ ٹھانگسپو لیب پاسانگ نیرانگی ابے بیتوگیاگسپابو سادتے گامو سکیدپو چوین اینوگ‘۔“
28” فونو ثو یونگستے نانگکوگا ماسونگ۔ تینے ابا پھیلوگا یونگستے کھوا جوجو نانّگا یونگ زیرس۔ 29اِین نانگ بوتشے ابا زیرس، ’نگے ایزام لومانگپو نیرانگی یوگپو چوستے نیرانگیکا نامکھا مانیانس، نگا نگارانگی دزاوگون نیامپو گامو چوالا نیرانگی ریگوجیگّانگ ماتانگس۔ 30اِین نانگ نیرانگی ای بُوژا کابوے زوگستسونگماگون نیامپو نیرانگی نور تشانگما گودلا تانگستے لوگستے یونّگاچیگ، نیرانگی کھوے پھیا بیتوگیاگسپابو سادس‘۔“
31”تینے ابے کھوا زیرس، ’نگے بُوژا کھیرانگ توسگیون نگا نیامپو اینوگ، یانگ نگے اینکھان تشانگما کھیرانگی اینوگ۔ 32اِین نانگ نگاتانگونّی گامو سکیدپو چوگوس چیازیرنا ای کھیرانگی نو شیتے اینپین، تا سونتے اینوگ۔ کھو ستورتے اینپین، تا تھوبتے اینوگ‘۔“
Currently Selected:
لوکا 15: LBJNT
Highlight
Share
Copy
Want to have your highlights saved across all your devices? Sign up or sign in
Ladakhi Bible by The Love Fellowship is licensed under Creative Commons Attribution-ShareAlike 4.0 License.
