Génesis 23
23
Cham te Sara
1Te Sara cuxaj huqueb shucwinic (127) ha'bil; hich ay te jayeb ha'bil cuxaje. 2Te Sara cham ta Quiriat-arba, (te Hebrón yan sbihil), te ay ta sq'uinal Canaán. Te Abraham tey la smel yo'tan soc tey la yoq'uetay a te Sara.
3Te Abraham la stehc'an hahchel sba ta banti ay te chamen ants yu'un, baht sc'opon te snich'nab Het, hich la yalbe: 4Ho'on jyanlumon soc jmelmonelon ta awohlilic. A'bon q'uinal yu'un muquenal, yu'un tey ya jmuc a te mach'a chamen cu'un, xchi.
5Ha yu'un te snich'nab Het hich la sjac'beyic sc'op te Abraham: 6Tatic, a'iya awa'iy te bin ya calbatcotic. Ha'at ich'bilat ta muc' cu'uncotic; muca te mach'a chamen awu'un ta banti mero lequil muquenal cu'uncotic. Mayuc mach'a ya yal te ma ba ya ca'batcotic amuquenal, ma ba ya jcomatcotic te yac amuc te mach'a chamen awu'un, xchihic.
7Ha yu'un te Abraham la stehc'an hahchel sba soc la snijan sba ta stojol te yajwal te q'uinal, ha te snich'nab Het. 8Hahch sc'opon, hich la yal: Teme yu'un yac awa'bon jmuc te mach'a chamen cu'un, a'iybon awa'iy hiche te jc'ope, c'opojanic cu'un ta stojol Efrón te snich'an Zohar, 9te yacuc schombon te ch'en yu'un Macpela te ay ta sti'il te sq'uinale; te yacuc schombon ta mero stojol scuenta muquenal cu'un ta awohlilic, xchi.
10Te Efrón te heteo-winic tey ay a ta yohlil te snich'nab Het, ha la sjac'be sc'op te Abraham ta stojol te snich'nab Het soc spisil te mach'atic yacalic ta ochel bahel ta yochibal te pueblo, hich la yal: 11Ma'uc, jtatic, a'iya me awa'iy te jc'ope; ya ca'bat te q'uinal soc te ch'en te tey ay a. Ta stojol spisil te jlumal ya ca'bat. Muca te mach'a chamen awu'une, xchi.
12Ha yu'un te Abraham la snijan sba ta stojol te yajwal te q'uinal, 13soc la sjac'be sc'op te Efrón ta stojol te yajwal te q'uinal, hich la yal: Awocoluc, a'iya me awa'iy te bin ya cal. Ya ca'bat te stojol te q'uinale; ich'a, hich ya jmuc tey a te mach'a chamen cu'un, xchi.
14La sjac' te Efrón: 15Tatic, a'iya me awa'iy: jbahc' (400) ta sehp plata te stojol te q'uinale; pero ¿yu'un bal bayel sc'oblal ta jtojoltic? Muca tey a te mach'a chamen awu'un, xchi.
16Te Abraham la schap soc te Efrón, la sp'is te jayeb taq'uin halbot yu'un ta stojol te snich'nab Het, ha te jbahc' (400) ta sehp plata hich te bin ut'il ay ta tuhunel yu'un te jchombajeletique. 17Ha yu'un te sq'uinal Efrón te ay ta Macpela, ta stojol banti ya xloc' tal c'ahc'al yu'un Mamre, te q'uinal soc te ch'en tey ay a, soc spisil te'etic tey ayic a, 18la yu'untay te Abraham ta stojol te snich'nab Het soc spisil te mach'atic yacalic ta ochel bahel ta yochibal te pueblo.
19Patil te Abraham la smuc te Sara te yihnam ta ch'en ay ta sq'uinal Macpela te ay ta stojol banti ya xloc' tal c'ahc'al yu'un Mamre, (te Hebrón yan sbihil), te ay ta sq'uinal Canaán. 20Hich te q'uinal soc te ch'en tey ay a, te chombot yu'un te snich'nab Het, la yich' te Abraham yu'un muquenal.
Currently Selected:
Génesis 23: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.
