Génesis 24
24
Abraham la slehbe yihnam Isaac
1Mamalix te Abraham, ayix bayel ya'bilal a; a'botix bayel bendición yu'un Jehová ta stojol spisil. 2Te Abraham hich la yalbe te jtuhl ya'bat, te mach'a mamalix ta stojol spisil yantic ay ta sna, te scuentahinej spisil te biluquetic yu'un: Ac'a tal ac'ab ta ye'tal ca', 3ya jc'an te yac awal ta jamal ta stojol Jehová, te Dios yu'un te ch'ulchan soc te Dios yu'un te bahlumilal, te ma ba yac alehbon yihnam te jnich'an ta stojol te yantsil-nich'nabic te cananeohetic te ayon ta yohlilique. 4Ya me xbahat ta jlumal ta banti ay quermanotac, tey ya xc'oht alehbon yihnam a te jnich'an Isaac, xchi.
5Hich joc'obot yu'un te ya'bat: ¿Ha xan teme ma sc'an ya st'unon tal te ach'ix, ya bal quic' bahel te anich'an ta q'uinal banti loc'at tal? xchi.
6Hich halbot yu'un te Abraham: ¡Ma'uc, ma me xawic'bon bahel tey a te jnich'ane! 7Te Jehová, te Dios yu'un te ch'ulchan, te la yic'on loq'uel tal ta sna te jtat soc ta slumal te quermanotac, te la sc'oponon soc te hich la yalbon ta jamal: Ya ca'be ats'umbal te q'uinal ini, te xchihe, ya sticon te ch'ul a'bat yu'un te ya xnahilij bahel awu'un, yu'un tey ya xc'oht alehbe yihnam a te jnich'ane. 8Teme ma sc'an ya st'unat tal te ach'ixe, tey ya xlaj sc'oblal a te bin la awalbon ta jamal. Ha nax ma me xawic'bon bahel tey a te jnich'ane, xchi.
9Ha yu'un te a'bat la yac' tal sc'ab ta ye'tal ya' te yajwal, ha te Abraham, la yal ta jamal te hich ya spas. 10Te a'bat la yic' lajuncoht camello yu'un te yajwal, hich baht, soc yich'oj bahel bayel ta chahp tsahbil mahtaniletic yu'un te yajwale. C'oht ta pueblo yu'un Nacor ta Mesopotamia. 11Ta sti'il te pueblo la ya'be spahcan sbahic te camellohetic ta jun pozo, tibilix a, ha yorahil a te ya xloq'uic tal ta yich'el ya'alic te ach'ixetique. 12Hich la yal: Jehová, Diosat yu'un te cajwal Abraham, ya calbat wocol te yacuc acoltayon yo'tic, soc yacuc ac'uxultaybon te cajwal Abraham. 13Ilawil, ayonix ta pozo, ya xloq'uic tal ta yich'el ya'alic te yantsil-nich'nabic te winiquetic yu'un te pueblo ini. 14Ac'a te mach'a ach'ixil te ya calbe: Awocoluc, cohtesa aq'uib yu'un ya cuch'bat awa'al, teme ya cute, teme ya sjac': Uch'an hiche, soc ya ca'be yuch' ha' te camellohetic awu'un, teme xchihe, ha'uc me te mach'a atsahojix yu'un te awa'bat Isaac. Hich ya jna' a te yac ac'uxultaybon te cajwal, xchi.
15Ma to xlaj yo'tan ta sc'oponel Dios a, yac ta loq'uel tal te Rebeca te yantsil-nich'an Betuel, ha te yal te Milca te yihnam Nacor, te yihts'in Abraham, sq'uechoj tal ta snehquel te sq'uibe. 16Buen t'ujbil ach'ix, ma to tabiluc ta winic. Co bahel ta sloq'uib ha', la snojes sq'uib, loc' talel. 17Te a'bat ahnimal baht sc'opon: Awocoluc, a'bon cuch' jtebuc awa'al te ay ta aq'uib, xchi.
18La sjac' te ach'ixe: Uch'an, tatic, xchi.
Ora la scohtes te sq'uib, la ya'be yuch' te ha'e. 19C'alal laj yo'tan ta ya'beyel yuch' ha', la yalbe: Ya jloq'uesbe tal yuch' ha' te camellohetic awu'un, chican ban c'alal ya sc'an ya yuch'ic, xchi.
20Ora la scohcombe ya'lel sq'uib ta canoa, ahnimal baht slic tal ha' yan buelta ta pozo; la sloq'uesbe ha' yu'un spisil te camellohetic yu'une. 21Te winic xcham yo'tan yu'un te ach'ixe, ma ba c'opoj, yu'un la sc'an ya yil teme Jehová yac'oj te ay scuentahil te namal behel yu'une. 22C'alal laj yo'tan ta yuch'el ha' te camellohetic, te winic la ya'be jun ch'ocowil pasbil ta oro te j'ohlil siclo yalal,#24.22 5.5 gramos soc cheb xan staq'uinal snuc' sc'ab pasbil ta oro te lajuneb siclo yalal.#24.22 110 gramos 23Hich la sjoc'obe: ¿Mach'a yantsil-nich'anat? Awocoluc, halbon ca'iy teme jochol sna te atat banti ya xhu' ya xwayotcotic, xchi.
24La yal te ach'ix: Ho'on yantsil-nich'anon Betuel te yal Milca, te la yalataybe snich'an Nacor, xchi. 25Soc la yal xan: Ay ac soc bayel ha'mal, soc ay lugar banti ya xwayat, xchi.
26Te winic la squejan sba, la yalbe wocol te Jehová, 27hich la yal: Bayel yutsil sc'oblal te Jehová te Dios yu'un te cajwal Abraham, te ma ba la yihquitay te sc'uxul yo'tan soc te smelelil sc'op ta stojol te cajwal, te la stojobteson tal ta sbehlal te sna yermanotac te cajwal, xchi.
28Ahnimal baht te ach'ix, c'oht yalbe ya'iy spisil mach'atic ay ta sna te snane. 29Ay jtuhl sbanquil te Rebeca, Labán sbihil, ahnimal loc' bahel ta banti ay te winic te ay ta sloq'uib ha'. 30Te c'alal la yil te ch'ocowil soc te staq'uinal snuc' sc'ab te yihts'in, soc te la yal: Hich la yalbon te winic, te xchihe, baht te banti ay te winique, teq'uel c'oht sta ta banti ay te camellohetic ta sts'ehl te sloq'uib ha'. 31Hich c'oht yalbe: Conic, ha'at te awich'oj bendición yu'un te Jehová. ¿Bin yu'un te teq'uelat li'i? La jchahpanix te jna soc banti ya x'ayin te camellohetic awu'un, xchi.
32Hich tal ta sna te winique, te Labán la scohtesbe yihcats te camellohetic, la yac'ticlambe ac soc ha'mal, soc la ya'be ha' yu'un ya spoc yoc a te winic soc te smohloltac te sjoquinejique. 33La spahchambe tal swe'el, pero la yal te winique: Ma ba ya xwe'on ha to teme ya calbat awa'iy te c'op talemon yu'une, xchi.
C'opojan hiche, xchi te Labán.
34Hich la yal te winic: Ho'on ya'baton Abraham. 35Bayel bendición a'bibil yu'un Jehová te cajwal, soc muc'ubtesbot sc'oblal yu'un; a'bot tuminchijetic, wacaxetic, plata soc oro, a'bat ants-winiquetic, camellohetic soc burrohetic. 36Te Sara te yihnam te cajwal me'elix a te la ya'be squerem-nich'an te cajwal, te ha la ya'be hilel spisil te bin ay yu'une. 37Soc te cajwal hich la yac'on ta yalel ta jamal: Ma me xalehbon yihnam te jnich'an ta stojol te yantsil-nich'nabic te cananeohetic, te ayon ta yohlilique. 38Ya me xbahat ta sna te jtat soc te quermanotac, tey me xalehbon yihnam a te jnich'ane, xchi. 39Pero la jcalbe: ¿Ha xan teme ma sc'an ya st'unon tal te ach'ix? xchihon. 40La sjac': Te Jehová, te mach'a behenemon ta stojol, ya me yac' sjoquinat te ch'ul a'bat yu'un soc ya yac' te lec ya xc'oht te behel awu'une. Ya me alehbon yihnam te jnich'an ta banti ay quermanotac ta sna te jtate. 41Teme c'ohat tey a ta banti ay te quermanotac, teme ma sc'an ya ya'bat te ach'ixe, libre ya xcolat yu'un te bin la jcalbat te yac awal ta jamal, xchi.
42Ha yu'un nax hulon ta pozo, hich la jcal: Jehová, Diosat yu'un te cajwal Abraham, teme yac awac' te lec ya xc'oht te behel cu'une, 43li' ayonix ta pozo ini, teme ay ach'ix ya xtal ta yich'el ya'al, teme ya calbe: Awocoluc, a'bon cuch' jtebuc ya'lel aq'uib, teme ya cut, 44soc teme hich ya yalbon: Uch'an, soc ya jloq'uesbe tal yuch'ic ha' te camellohetic, teme xchihe, ha'uc me te mach'a tsahbil yu'un Jehová yu'un te snich'an te cajwal, xchihon ta sc'oponel Dios. 45Ma to xlaj jc'opombel Dios ta co'tan a, loc' tal te Rebeca, sq'uechoj tal sq'uib ta snehquel; co bahel ta pozo, la slic loq'uel tal ya'al. Hich la jcalbe: Awocoluc, a'bon cuch' a te awa'al, xchihon. 46Ora la scohtes te sq'uib, hich la yalbon: Uch'an, soc ya jloq'uesbe yuch'ic ha' te camellohetic awu'un, xchi. Hich la jcuch' ha', soc la ya'be yuch' ha te camellohetic cu'une. 47Ha yu'un la joc'obe: ¿Mach'a yantsil-nich'anat? xchihon. Ho'on yantsil-nich'anon Betuel te snich'an Nacor te alatayot yu'un te Milca, xchi. Ha yu'un la jca'be ch'ocowil ta sni' soc staq'uinal snuc' sc'ab. 48Soc la jquejan jba ta yalbeyel wocol te Jehová; la jcalbe yutsilal sc'oblal te Jehová te Dios yu'un te cajwal Abraham te bin ut'il la stojobteson ta be ta sc'ambeyel te yantsil-nich'an snich'ajun te cajwal yu'un ya yihnamin te snich'ane. 49Ha yu'un te ha'exe, teme yac ac'uxultayic te cajwal, halbonic ca'iy ta jamal, pero teme ma'uque, jamal xawalbonic ca'iy hiche, yu'un hich ya jnop bin ya sc'an ya jpas, xchi.
50La sjaq'uic te Labán soc te Betuel: Yu'un Jehová ini; ma xhu' ya calbatcotic teme lec o ma lecuque. 51Li' ay te Rebeca, ic'a bahel hiche, ha'uc yihnam ya xc'oht te snich'an te awajwal, hich te bin ut'il yaloj te Jehová, xchihic.
52C'alal la ya'iy te ya'bat Abraham te bin la yalic, la spahcan sba ta lum ta stojol Jehová. 53Soc la sloq'ues mahtaniletic pasbilic ta oro soc ta plata, soc c'u'ul pac'aletic, la ya'be te Rebeca. Soc la ya'be t'ujbil mahtaniletic te sbanquil soc te snane. 54Patil we' te winic soc te mach'atic sjoquinej tal, bahtic ta wayel. C'alal hahch ta sab hich la yal te winique: Ac'awonic suhtel ta stojol te cajwal, xchi.
55La sjac' te sbanquil soc te snan: Ac'a sjoquinotcotic lajunebuc xan c'ahc'al te ach'ixe, patil ya xhu' ya xbaht, xchihic.
56Pero la yal te winique: Ma xahalajteson, yu'un te Jehová la yac' te lec c'oht te behel cu'une. Ac'awonic suhtel ta banti ay te cajwal, xchi.
57Hich la sjaq'uic: Ya quic'cotic tal te ach'ix, ya joc'obecotic, xchihic. 58Hich la yiq'uic tal te Rebeca, la sjoc'obeyic: ¿Ya bal ajoquin bahel te winic ini? xchihic.
Yacuc, ya xbohon, xchi.
59Hich la yaq'uic bahel te Rebeca te yihts'in soc te ants te coltesot ta yalalil to, te ya'bat Abraham soc te smohloltac. 60La ya'beyic bendición te Rebeca, hich la yalic:
Ha'at quihts'inatcotic,
ha'uc me nanil ya xc'ohat yu'un tsobol ta mil,
soc te ats'umbal ya yu'untaybeyic
spuertahul te scontratac, xchihic.
61Hich hahch bahel te Rebeca soc te ach'ixetic yu'un, mohic ta camellohetic, la st'unic bahel te winique. Hich te a'bat la yic' bahel te Rebeca.
62Te Isaac loq'uemix talel ta pozo ‘Te mach'a cuxul te ya yilon’, te xchi sbihile, como nahinem ta Neguev. 63Ta jun stibiltayel q'uinal baht ta aquiltic ta snopilanel ta yo'tan. La shach sit, la yil yac ta talel te camellohetique. 64Ha nix hich te Rebeca la shach sit, c'alal la yil te Isaac, co ta scamello, 65la sjoc'obe te a'bat: ¿Mach'a a te winic yac ta talel ta aquiltic ta jtojoltic? xchi.
Ha te cajwal, xchi te a'bat.
Hich te Rebeca la smuc sit ta rebozo.
66Te a'bat la yalbe ya'iy te Isaac spisil bin c'ohem ta pasel. 67Te Isaac la yic' ochel te Rebeca ta snahilpac' te snan, ha te Sara, hich la yic' yihnamin, c'ux la ya'iy ta yo'tan. Hich muc'ub q'uinal la ya'iy te Isaac te bin ut'il chamen te snane.
Currently Selected:
Génesis 24: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.
