San Marcos 13

Jesús la yal te ya xjihn te Templo

1Yac ta loq'uel ta Templo a te Jesús, halbot yu'un jtuhl jnopojel yu'un: Maestro, ¡ilawil, mero muc' te tonetic, soc c'ax muc' te nahetique! xchi.

2La yal te Jesús: ¿Chican bal yac awil te muc'ul nahetic ini? Mayuc junuc ton cajal ya xhil ta sba yan ton, spisil me ya yich' wuyel cohel, xchi.

Señahiletic ta nopol slajibal c'ahc'al

3Te Jesús la shuhcan sba ta Wits yu'un Olivohetic ta banti snuhp'usitayej sba soc te Templo. Te Pedro, Jacobo, Juan soc Andrés stuquelic la sjoc'obeyic: 4Hala ca'iycotic, ¿bin ora te hich ya xc'oht ta pasele? Soc ¿bin señahil ya xchicnaj te c'alal nopol ya xc'ohtix ta pasel spisil ini? xchihic.

5Te Jesús hich hahch yalbe: Tsahtaya me abahic, ma me ayuc mach'a ya slo'loyex; 6como ay tsobol ya xtalic ta scuenta jbihil, te hich ya yalic: Ho'on Cristohon, xchihic, hich ya slo'loyic tsobolic. 7Pero te c'alal yac awa'iyic te ay guerrahetic soc te ya xchicnaj ta halel te ya xhahch guerrahetic, ma me xnihc awo'tanic yu'un; como hich me ya xc'oht ta pasel, pero ma to ha'uc te slajibal c'ahc'ale. 8Como talel c'axel me ya xhahch scontrahin sbahic te nacionetic, soc ya me scontrahin sbahic te jujuchahp banti scuentahinejic; ya xtal nihquel ta bayuc soc wi'nal; ha shahchibal to nax sc'uxul.

9Tsahtaya me abahic; ya me x'ac'otex ta stojol jchahpawanejetic soc yac awich'ic majel ta sinagogahetic; ya xtehc'anotex ta stojol gobernadoretic soc ta stojol ajwaliletic ta ho'on jcuenta, yu'un testigohetic ya xc'ohex cu'un ta stojolic. 10Ya sc'an te nahil ya yich' halel te lec yach'il c'op ta spisil nacionetic. 11Pero te c'alal ya yiq'uex bahel yu'un ya yaq'uex ta c'abal, ma me xc'opoj awo'tanic yu'un te bin ya xc'oht awalic, ha me xawalic te bin ya x'ac'otex ta yalel ta hich ora, como ma ha'uquex te ya xc'opojex, ha ya xc'opoj te Ch'ul Espíritu. 12Te banquilal ya me yac' ta milel yihts'in, te tatil ya yac' ta milel te snich'ane; soc ay al-nich'anetic te ya xhahch scontrahinic sme'static soc ya me smilic. 13Ya me yil-o'tantayex spisil ants-winiquetic ta jcuenta; pero te mach'a ya xcuhch yu'un c'alal ta slajibal, ya me xcol.

14Te c'alal yac awilic te bin ihlobtic sba te ya xjinawan te ay ta banti ma xhu' ya x'och sc'oblale, (te mach'a ya yil te hune, ac'a sna'be scuentahil), te mach'atic ayic ta sq'uinal Judea ac'a ahnuquic bahel ta witsiltic. 15Te mach'a ay ta ba na ma me xco bahel, ma me x'och bahel ta sloq'uesel sbiluc. 16Te mach'a ay ta sq'uinal, ma me suht xan bahel ta stamel smuc'ul-c'u'. 17¡Ay me swocolic te antsetic te swoloj yalic soc te ay jchu'alaletic yu'unic ta hich ora! 18C'oponahic Dios te manchuc yorahil sic a te ya x'ahnex bahel, 19como mayuc hich wocol c'ohem ta pasel yalel c'alal pastay yu'un Dios te bahlumilal c'alal ora, soc mayuc hich ya xc'oht xan ta pasel. 20Te manchuc ya xpehc'ambot sc'ahc'alel yu'un te Cajwaltic, mayuc mach'a ya xcol te hichuque. Pero ha ta scuenta te mach'atic tsahbilic yu'un te ya spehc'ambe sc'ahc'alele.

21Ha yu'un teme ay mach'a ya yalbeyex: Ilawil, li' ayix te Cristo, o: Ilawil, lum aye, teme xchihe, ma me xach'uhunic. 22Como ya me xchicnaj lotil cristohetic soc lotil jalwanejetic te ya yaq'uic ta ilel señahiletic soc jchahp a'teliletic yu'un ha ya slo'loyic a te mach'atic tsahbilic, te yacuc xhu' yu'unique. 23Tsahtaya me abahic hiche, nahil me la jcalbeyex spisil.

Ya xcha'tal te Nich'anil ay ta scuenta winic

24Pero ta hich ora, te c'alal c'axemix a te wocole, ya me x'ihc'ub te c'ahc'al, ma xyac' sts'anabul te u, 25ya me xlaj ch'ay cohel tal ta ch'ulchan te eq'uetic soc ya me syuc' sbahic te bintic ay ta sjamalil ch'ulchan. 26Ta hich ora ya me yilic te Nich'anil ay ta scuenta winic te yac ta talel ta tocal soc bayel yu'el soc yutsilal. 27Ya me sticon bahel te ch'ul a'batetic yu'un ta stsobel tal te mach'atic tsahbilic yu'un ta schanebal ic', c'alal ta sjehchelul bahlumilal c'alal ta sjehchelul ch'ulchan.

28Nopahic bin ut'il ay te sloc'ombahil c'op yu'un te higuera: C'alal ya x'uhnenub te sc'ab soc ya xloc' tal te ya'binal, yac ana'ic te nopolix yorahil ha'alel q'uinal. 29Ha nix hich, te c'alal yac awilic te yaquix ta c'ohel ta pasel ini, na'ahic me te nopolix yorahil, ayix ta ti'nahil. 30Jamal ya calbeyex te ma to xchamic a te jcaj ts'umbalil ini te ya xc'oht ta pasel spisil ini. 31Ya xlaj ch'ulchan soc bahlumilal, yan te jc'ope ma xlaj stuquel.

32Pero mayuc mach'a ya sna' bin c'ahc'alil soc bin ora ya xc'oht ta pasel, ni ha'uc te ch'ul a'batetic ta ch'ulchan, o te Nich'anil, ha nax stuquel te Tatile. 33Ila me abahic, wic'sitaya me abahic soc c'oponahic Dios, como ma na'biluc awu'unic bin ora hich ya xc'oht ta pasel. 34Hich c'ohem te bin ut'il jtuhl winic te baht ta namal, la yihquitay hilel sna, la ya'be hilel ya'tel te a'batetic yu'un, jujutuhl te bin ya spasic, soc la yalbe te jcanan-ti'nahil te ya me swic'sitay sba. 35Ha yu'un te ha'exe, wic'sitaya abahic, como ma na'biluc awu'unic bin ora ya xhul te yajwal na, teme ta yihc'ubel q'uinal, ta ohlil ahc'abal, ta sba-oq'uelan mut, o ta sacubel q'uinal, 36scuenta yu'un teme repente nax ya xtal, ma ba wayalex a ya xhul stahex. 37Te bintic ya calbeyex, ha nix hich ya calbe spisilic: Wic'sitaya me abahic, xchi.

Currently Selected:

San Marcos 13: TZH

Highlight

Copy