ଯୋହନ 2
2
ଯୀଶୁ ଏଜୁକାଙ୍ଗ୍ ଅଙ୍ଗୁର୍ ରାସ୍ କିତାନ୍।
1-2ଗାଲିଲୀ ଜିଲ୍ଲାନି କାନ୍ନା ସହର୍ତାକେ ର ବିବାଆଜି ମାଚାତ୍। ଯୀଶୁ ଆରେ ଚେଲାହିରିଙ୍ଗ୍ ପା ହେ ବିବାଇଞ୍ଜ କାବୁର୍ ହିଜି ମାଚାର୍। ରିଦିନ୍ ପାଚେ ଯୀଶୁ ବିବାଇଞ୍ଜ ହାଚାନ୍। ହେବେ ତା ତେହି ମରିୟମ ମାଚାତ୍। 3ହେ ବିବାଇଞ୍ଜ ଅଙ୍ଗୁର୍ ରାସ୍ ୱିସ୍ତାତ୍। ହେଦାଙ୍ଗ୍ କାଜିଙ୍ଗ୍ ଯୀଶୁଙ୍ଗ୍ ତେହି ୱେଚ୍ଚାତ୍, “ବିବାଇଞ୍ଜ ଅଙ୍ଗୁର୍ ରାସ୍ ହିଲେତ୍।”
4ଯୀଶୁ ୱେଚ୍ଚାନ୍, “ଏ ଆୟା, ଏନେଙ୍ଗ୍ ଇନା କିଦେଙ୍ଗ୍ ଇ ବିଷୟରେ ନାଙ୍ଗେଙ୍ଗ୍ ଇଞ୍ଜ୍ନାୟା? ନା ସମୟ୍ ନଙ୍ଗୟ୍ ପାତେକ୍ ୱାଉତେ।”
5ଯୀଶୁ ତେହି ହେବାକିନାକାରିଙ୍ଗ୍ ୱେଚ୍ଚାତ୍, “ଯୀଶୁ ଇନେସ୍ ଲେକେ ୱେଚ୍ଚାନାନ୍ ଏପେଙ୍ଗ୍ ହେଲେକେ କିୟାଟ୍।”
6ହେ ବାହାତାକେ ଚଅଗଟା କାଲ୍କୁତାଙ୍ଗ୍ ରସ୍ତି ଏଜୁଙ୍ଗ୍ ଇଟ୍ନି କୁଣ୍ଡ୍କୁ ମାଚିକ୍। ହେବେ ର କୁଣ୍ଡିତାକେ ପାକାପାକି ଶହେ ଲିଟର୍ ଏଜୁଙ୍ଗ୍ ଆସ୍ତି ମାଚିକ୍। ଯିହୁଦିର୍ ନିୟମ୍ନି ବିଦିତାଙ୍ଗ୍ ହେ କୁଣ୍ଡ୍କୁକାଙ୍ଗ୍ ଏଜୁଙ୍ଗ୍ ଇଡ଼୍ଜି ନୁସ୍କିଆ ଆଦେଙ୍ଗ୍ ବାଉରାଆଜି ମାଚାର୍। 7ଯୀଶୁ ହେବାକିନାକାରିଙ୍ଗ୍ ୱେଚ୍ଚାନ୍, “ହେ କୁଣ୍ଡ୍କୁକାଙ୍ଗ୍ ଏଜୁଙ୍ଗ୍ ବାର୍ତି କିୟାଟ୍।” ହେୱାର୍ କୁଣ୍ଡ୍କୁକାଙ୍ଗ୍ ଏଜୁଙ୍ଗ୍ ବାର୍ତିକିତାର୍। 8ତାପାଚେ ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ନଙ୍ଗୟ୍ ଇବେତାଙ୍ଗ୍ ଇଚୁଡ଼ିଙ୍ଗ୍ ଏଜୁଙ୍ଗ୍ ଉନ୍ନ୍ଦିଅୱାଟ୍। ଇ ଏଜୁଙ୍ଗ୍ ଅଜି ଭଜିକିନି ମାଲିକ୍ ଲାଗାୟ୍ ହାଲାଟ୍।” ଲାଗିଙ୍ଗ୍ ହେୱାର୍ ହେ ଏଜୁଙ୍ଗ୍ ଆସ୍ତି ହେ ମାଲିକ୍ତାକେ ହାଚାର୍।
9ତାପାଚେ ଭଜିକିନି ମାଲିକ୍ ହେ ଏଜୁକାଙ୍ଗ୍ ୱେଣ୍ତାନ୍। ହେ ଏଜୁଙ୍ଗ୍ ନଙ୍ଗୟ୍ ଅଙ୍ଗୁର୍ ରାସ୍ ଆତାତ୍। ହେୱାନ୍ ପୁନ୍ୱାଦାଙ୍ଗ୍ ମାଚାନ୍ କି ଇଲେଗ୍ଦି ଅଙ୍ଗୁର୍ ରାସ୍ ଇମେତାଙ୍ଗ୍ ୱାତାତ୍? ମାତର୍ ହେ ଏଜୁଙ୍ଗ୍ ହେବାକିନି ମାନାୟାର୍ ନେ ପୁନ୍ଞ୍ଜି ମାଚାର୍। ତାପାଚେ ଭଜିକିନି ମାଲିକ୍ ବରଙ୍ଗ୍ କୁକ୍ତାନ୍। 10ହେୱାନ୍ ବରଙ୍ଗ୍ ୱେଚ୍ଚାନ୍, “ୱିଜାକାର୍ ପାର୍ତୁମ୍ ହାର୍ଦି ଅଙ୍ଗୁର୍ ରାସ୍ ଉଣ୍ଡେଙ୍ଗ୍ ହିଦ୍ନାର୍। ଆରେ ମାନାୟାରିଙ୍ଗ୍ ମାନ୍ ବାଙ୍ଗାଆତିସ୍ ମାମୁଲ୍ ଅଙ୍ଗୁର୍ ରାସ୍ ହିନାଦେର୍। ମାତର୍ ଏପେଙ୍ଗ୍ ନଙ୍ଗୟ୍ ପାତେକ୍ ହାର୍ଦି ଅଙ୍ଗୁର୍ ରାସ୍ ଇଡ଼୍ତାଦେର୍ନା।”
11ଯୀଶୁ ଇଲେକେ ଗାଲିଲୀ ଜିଲ୍ଲାନି କାନ୍ନା ସହର୍ତାକେ ଚାନିଆଆନି କାମାୟ୍ ଆରମ୍ କିଜି ଜାର୍ ଗୌରବ ଚଚ୍ଚାନ୍। ଆରେ ତା ଚେଲାହିର୍ ତାବେ ପାର୍ତି କିତାର୍।
12ତାପାଚେ ଯୀଶୁ ତା ତେହି, ଟଣ୍ଡାହିର୍ ଆରେ ଚେଲାହିର୍ କପୁର୍ନାହୁମ୍ ସହର୍ତାକେ ହାଚାର୍, ଆରେ ହେବେ ହେୱାର୍ ଅଲପ୍ଦିନ୍ ମାଚାର୍।
ଯୀଶୁ ଯିରୁଶାଲାମ ସହର୍ନି ଈଶ୍ୱର ମାନି ମନ୍ଦିର୍ତାକେ ହାଚାନ୍
(ମାଥି. ୨୧:୧୨,୧୩; ମାର୍କ. ୧୧:୧୫-୧୭; ଲୁକ. ୧୯:୪୫,୪୬)
13ହେପାଦ୍ନା ଯିହୁଦିର୍ ନିସ୍ତାର୍ ପାର୍ବୁ ଆନିଦିନ୍ ଲାଗେ ଆଜି ୱାଜି ମାଚାତ୍। ଲାଗିଙ୍ଗ୍ ଯୀଶୁ ଯିରୁଶାଲାମ ସହର୍ତାକେ ହାଚାନ୍। 14ହେ ଈଶ୍ୱର ମାନି ମନ୍ଦିର୍ ହାକ୍ଡ଼ିତାକେ ମାନାୟାର୍ କଡିଙ୍ଗ୍, ମେଣ୍ଢାଙ୍ଗ୍ ଆରେ ପାର୍ୱାଙ୍ଗ୍ ବେପାର୍ କିଜି ମାଚାର୍। ଆରେ କେତ୍ଜାଣ୍ତିଙ୍ଗ୍ ଟେବୁଲ୍ ଲାଗାୟ କୁଚ୍ଚି, ମାନାୟାର୍ ଡାବୁଙ୍ଗ୍ ବାଦ୍ଲାଇ କିଜି ବେପାର୍ କିଜି ମାଚାର୍। ହେଦାଙ୍ଗ୍ କାଜିଙ୍ଗ୍ ଯୀଶୁ ର ଡରିତାକେ କର୍ଡା ରସ୍ତି ମେଣ୍ଢାଙ୍ଗ୍ ଆରେ କଡିଙ୍ଗ୍ ହୁଦାଙ୍ଗ୍ ୱିଜାରିଙ୍ଗ୍ ମନ୍ଦିର୍ ହାକ୍ଡ଼ିତାଙ୍ଗ୍ ହପ୍ତାନ୍। 15ହେ ମନ୍ଦିର୍ତାକେ ଡାବୁଙ୍ଗ୍ ବାଦ୍ଲାଇ କିନାକାର୍ ଡାବୁକାଙ୍ଗ୍ ଡ଼ିଉତାନ୍, ଆରେ ଟେବୁଲ୍ତିଙ୍ଗ୍ ଉଲ୍ଟାଇ କିତାନ୍। 16ତାପାଚେ ଯୀଶୁ ପାର୍ୱା ପନାକାରିଙ୍ଗ୍ ହାଲ୍ଜି ୱେଚ୍ଚାନ୍, “ଇ ଜିନିଷ୍ ୱିଜୁ ଇବେତାଙ୍ଗ୍ ଅୱାଟ୍। ନା ଆବା ଈଶ୍ୱର ମାନି ମନ୍ଦିର୍ତିଙ୍ଗ୍ ବେପାର୍ବାଟ୍ କିନି ଇଲ୍ ରହ୍ମାଟ୍।”
17ହେପାଦ୍ନା ଯୀଶୁ ଚେଲାହିର୍ ସାସ୍ତର୍ତାକେ ଲେକାଆତି ଇବେଣ୍ ମାନ୍ତ ଏତୁକିତାର୍, “ଇନେସ୍ ନାଣି କାଚାଆଜି ମାନାତ୍ ହେଲେକେ ଈଶ୍ୱର ମାନି ମନ୍ଦିର୍ତିଙ୍ଗ୍ ହେବା କିଦେଙ୍ଗ୍ ନାମାନ୍ ବିତ୍ରେ ନାଣି ଲେକେ କାଚାଆନାତା।”
18ହେବେତାଙ୍ଗ୍ ଯିହୁଦି ନେତାର୍ ଯୀଶୁଙ୍ଗ୍ ୱେଚ୍ଚାର୍, “ମାଙ୍ଗେଙ୍ଗ୍ ଚିନା ଲେକେ ର ଚାନିଆଆନି କାମାୟ୍ କିଜି ଚଚ୍ଚା। ଆରେ ପାର୍ମାଣ୍ କିଜି ୱେଚ୍ଚା ଯେ ଇୱିଜୁ କିଦେଙ୍ଗ୍ ନା ଆଦିକାର୍ ମାନାତ୍।”
19ଯୀଶୁ ୱେଚ୍ଚାନ୍, “ଏପେଙ୍ଗ୍ ଇ ଈଶ୍ୱର ମାନି ମନ୍ଦିର୍ତିଙ୍ଗ୍ ବାଡ଼୍ହାଇ କିୟାଟ୍। ଆରେ ଆନେଙ୍ଗ୍ ଇଦାଙ୍ଗ୍ ତିନ୍ଦିନ୍ତାଙ୍ଗ୍ ଆରେରଗ ରସ୍ତି ହିଦ୍ନାଙ୍ଗ୍।”
20ହେବେତାଙ୍ଗ୍ ଯିହୁଦି ନେତାର୍ ୱେଚ୍ଚାର୍, “ଇ ଈଶ୍ୱର ମାନି ମନ୍ଦିର୍ ରସ୍ତେଙ୍ଗ୍ ମାନାୟାର୍ ଚାଲିଶ୍ ଚଅ ବାହ୍ରୁ ରସ୍ତି ମାଚାର୍। ଆରେ ଏନେଙ୍ଗ୍ ଇନାକା ଇଦାଙ୍ଗ୍ ତିନ୍ଦିନ୍ତାଙ୍ଗ୍ ରହ୍ନାଇ?” 21ମାତର୍ ଯୀଶୁ ଜାର୍ ଗାଗାଡ଼୍ନି ବିଷୟରେ ୱେଚ୍ଚି ଈଶ୍ୱର ମାନି ମନ୍ଦିର୍ ବିଷୟରେ ୱେଚ୍ଚି ମାଚାନ୍। 22ଯୀଶୁ ହାଃତିତାଙ୍ଗ୍ ଆରେରଗ ଜିବୁନ୍ଆଜି ନିଙ୍ଗ୍ତି ପାଚେ ତା ଚେଲାହିର୍ ଯୀଶୁ ୱେଚ୍ଚି କାତାତିଙ୍ଗ୍ ମାନ୍ତ ଏତୁକିତାର୍। ଲାଗିଙ୍ଗ୍ ତା ଚେଲାହିର୍ ହେୱାନ୍ ବିଷୟରେ ଇନାକା ଦରମ୍ ସାସ୍ତର୍ତାକେ ଲେକାଆଜି ମାଚାତ୍ ଆରେ ଯୀଶୁ ଇନାକା ୱେଚ୍ଚି ମାନ୍ଞ୍ଚାନ୍, ହେ ୱିଜୁ କାତାତିଙ୍ଗ୍ ପାର୍ତି କିତାର୍।
ଯୀଶୁ ମାନାୟାର୍ ମାନ୍ବିତ୍ରେନି କାତା ପୁନ୍ଞ୍ଜି ମାଚାନ୍
23ଯୀଶୁ ନିସ୍ତାର୍ ପାର୍ବୁ ମାନି କିଦେଙ୍ଗ୍ ଯିରୁଶାଲାମ ସହର୍ତାକେ ମାନିହିଙ୍ଗ୍ କେତେକ୍ ହେନି ମାନାୟ୍ ଚାନିଆଆନି କାମାୟ୍ କିତାକା ହୁଡ଼୍ଜି ହେୱାନିଙ୍ଗ୍ ପାର୍ତି କିତାର୍। 24ମାତର୍ ଯୀଶୁ ହେୱାରିଙ୍ଗ୍ ଆହା କିୱାତାନ୍, ଇନେସ୍କି ହେୱାନ୍ ହେ ମାନାୟ୍ନି ମାନ୍ବିତ୍ରେନି ବାବ୍ନା ପୁନ୍ଞ୍ଜି ମାଚାନ୍। 25ହେୱାନ୍ ମାନାୟାରିଙ୍ଗ୍ ହାର୍ଦାଙ୍ଗ୍ ପୁନ୍ଞ୍ଜି ମାଚାନ୍। ଲାଗିଙ୍ଗ୍ ମାନାୟାର୍ ବିଷୟ ପୁଞ୍ଜେଙ୍ଗ୍ ଆରେ ହେୱାନିଙ୍ଗ୍ ଇମ୍ଣାକାନ୍ ଦର୍କାର୍ ହିଲାତାତ୍।
Currently Selected:
ଯୋହନ 2: PEGNT
Highlight
Share
Copy
Want to have your highlights saved across all your devices? Sign up or sign in
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
