ଯୋହନ 1
1
ଈଶ୍ୱର ମେହି ମାନାୟ୍ ରୁପ୍ ଆଜି ପୁର୍ତିତାକେ ୱାତାନ୍
1ଇ ପୁର୍ତିନି ୱିଜୁ ଉବ୍ଜା ଆୱି ଆଗେ ର ମାନାୟ୍ ମାଚାନ୍। ହେ ମାନାୟ୍ତିଙ୍ଗ୍ ବେଣ୍ ଇଞ୍ଜି ୱେଚ୍ଚି ମାଚାର୍। ହେ ମାନାୟ୍ ଈଶ୍ୱର ଲାହାଙ୍ଗ୍ ମାଚାନ୍। ଆରେ ହେ ମାନାୟ୍ ଈଶ୍ୱର ମାଚାନ୍। 2ହେୱାନ୍ ପୁର୍ତି ଉବ୍ଜା ଆୱି ଆଗେ ଈଶ୍ୱର ହୁଦାଙ୍ଗ୍ ମାଚାନ୍। 3ହେୱାନ୍ ପୁର୍ତିନି ୱିଜୁ ବିଷୟତିଙ୍ଗ୍ ଉବ୍ଜାଇ କିତାନ୍ନା। ହେୱାନିଙ୍ଗ୍ ପିସ୍ତି ପୁର୍ତିନି ୱିଜୁ ବିଷୟ ଉବ୍ଜାଣ୍ ଆୱାତାତ୍ନା। 4ହେୱାନ୍ ୱିଜୁ ଜିବୁନ୍ନି ମୁକ୍ଯ। ହେୱାନ୍ନେ ରକାନ୍ ୱିଜାକାରିଙ୍ଗ୍ ଅଜଡ଼୍ ହିଦ୍ନାନ୍। 5ହେ ଅଜଡ଼୍ ମାଜ୍ଗାତାକେ ଅଜଡ଼୍ ଆନାତ୍। ମାତର୍ ମାଜ୍ଗା ଅଜଡ଼୍ତିଙ୍ଗ୍ ଡାବାଇ କିଦେଙ୍ଗ୍ ଆଡ୍ୱାତାତ୍ନା।
6ଈଶ୍ୱର ଯୋହନ ତର୍ଦି ରକାନିଙ୍ଗ୍ ପକ୍ଚି ମାନ୍ଞ୍ଚାନ୍। 7ହେୱାନ୍ ମାନାୟାରିଙ୍ଗ୍ ହେ ଅଜଡ଼୍ ବିଷୟରେ ୱେଚ୍ଚେଙ୍ଗ୍ ୱାଜିମାଚାନ୍। ଇନେସ୍କି ମାନାୟାର୍ ତା ବେଣ୍ ୱେନ୍ଞ୍ଜି ହେ ଅଜଡ଼୍ ବିଷୟରେ ପାର୍ତି କିଦେଙ୍ଗ୍ ଆଡ୍ନାର୍। 8ଯୋହନ ନିଜେ ହେ ଅଜଡ଼୍ ହିଲ୍ୱାତାନ୍। ମାତର୍ ହେୱାନ୍ ମାନାୟାରିଙ୍ଗ୍ ଅଜଡ଼୍ ବିଷୟରେ ୱେଚ୍ଚେଙ୍ଗ୍ ୱାଜିମାଚାନ୍। 9ହେ ସତ୍ ଅଜଡ଼୍ ପୁର୍ତିତାକେ ୱାଜି ମାଚାତ୍। ଆରେ ହେ ଅଜଡ଼୍ ମାନାୟ୍ତିଙ୍ଗ୍ ଅଜଡ଼୍ ହିଦ୍ନାନ୍।
10ହେୱାନ୍ ପୁର୍ତିତାକେ ମାଚାନ୍। ଆରେ ପୁର୍ତିତିଙ୍ଗ୍ ହେୱାନ୍ ଉବ୍ଜାଇ କିତାନ୍, ମାତର୍ ପୁର୍ତିନି ମାନାୟାର୍ ହେୱାନିଙ୍ଗ୍ ଚିନ୍ କିଦେଙ୍ଗ୍ ଆଡ୍ୱାତାର୍। 11ହେୱାନ୍ ଜାର୍ ଲକ୍ବାକ୍ତାକେ ୱାତାନ୍, ମାତର୍ ତା ଜାର୍ ଲକ୍ବାକ୍ ହେୱାନିଙ୍ଗ୍ ଆହ୍ୱାତାର୍। 12ଇମ୍ଣାକାର୍ ହେୱାନିଙ୍ଗ୍ ଆସ୍ତାର୍, ଆରେ ତାବେ ପାର୍ତି କିତାର୍, ହେୱାନ୍ ହେୱାରିଙ୍ଗ୍ ଈଶ୍ୱର ମେହି ଆଦେଙ୍ଗ୍ ଆଦିକାର୍ ହିତାନ୍। 13ହେୱାର୍ ଜେକନି ହିମ୍ଣାଙ୍ଗ୍ ଲେକେ ଜନମ୍ ଆୱାତାର୍। ହେୱାର୍ ଆବା ଆୟାର୍ ଇଚାତାଙ୍ଗ୍ ଜନମ୍ ଆୱାଦାଙ୍ଗ୍, ଈଶ୍ୱର ଇଚାତାଙ୍ଗ୍ ଜନମ୍ ଆଜି ମାଚାର୍।
14ହେ ବେଣ୍ ମାନାୟ୍ ରୁପ୍ ଆତାତ୍, ଆରେ ମା ହୁଦାଙ୍ଗ୍ ବାହାକିତାତ୍। ହେୱାନ୍ ଦୟା ଆରେ ସତ୍ ବିଷୟ ବାର୍ତି ମାଚାତ୍। ଆବା ଈଶ୍ୱର ର ମେହିତାକେ ଇନେସ୍ ଲେକେ ଗୌରବ ମାନାତ୍, ହେଲେକେ ଗୌରବ ଆପେଙ୍ଗ୍ ହୁଡ଼୍ତାପ୍।
15ଯୋହନ ମାନାୟାରିଙ୍ଗ୍ ତା ବିଷୟରେ ୱେଚ୍ଚାନ୍, “ଆନେଙ୍ଗ୍ ଇନେର୍ ବିଷୟରେ ୱେଚ୍ଚି ମାନ୍ଞ୍ଚାଙ୍ଗ୍, ହେ ମାନାୟ୍ ଇୱାନ୍। ହେୱାନ୍ ନା ପାଚେ ୱାନାନ୍। ମାତର୍ ହେୱାନ୍ ନାବେତାଙ୍ଗ୍ ବେସି ଗାଜାକାନ୍, ଇନେସ୍କି ହେୱାନ୍ ନା ଆଗେ ମାଚାନ୍।”
16ହେୱାନ୍ ଦୟା ଆରେ ସତ୍ତାଙ୍ଗ୍ ବାର୍ତିଆଜି ମାଚାନ୍। ହେଦାଙ୍ଗ୍ କାଜିଙ୍ଗ୍ ଆପେଙ୍ଗ୍ ହେୱାନ୍ତାଙ୍ଗ୍ ବେସି ଆଶ୍ରିବାଦ୍ ଜପି ଆଶ୍ରିବାଦ୍ ପାୟାଆତାପ୍। 17ଈଶ୍ୱର ମାଙ୍ଗେଙ୍ଗ୍ ମୋଶା ଲେକିକିତି ନିୟମ୍ନି ସାସ୍ତର୍ତାଙ୍ଗ୍ ହିତ୍ତାନ୍ନା। ମାତର୍ ଯୀଶୁ ଖ୍ରୀଷ୍ଟତାଙ୍ଗ୍ ଦୟା ଆରେ ସତ୍ ବିଷୟ ହିତ୍ତାନ୍ନା। 18ଈଶ୍ୱରତିଙ୍ଗ୍ ଇନାୱେଡ଼ାଙ୍ଗ୍ ଇନେର୍ ପା ହୁଡ଼୍ୱାତାର୍ନା। ମାତର୍ ଈଶ୍ୱର ଲାଗାୟ୍ ମାନି ରକାନ୍ ଇଞ୍ଜି ମେହି ଯୀଶୁ ନେ ତା ବିଷୟରେ ୱେଚ୍ଚାନ୍ନା।
ଯୀଶୁ ବିଷୟରେ ଡୁବନ୍ହିନି ଯୋହନ ମାନାୟାରିଙ୍ଗ୍ ୱେଚ୍ଚାନ୍
(ମାଥି. ୩:୧-୧୨; ମାର୍କ. ୧:୧-୮; ଲୁକ. ୩:୧-୧୮)
19ଯିରୁଶାଲାମ ସହର୍ତାଙ୍ଗ୍ ଯିହୁଦିର୍ କେତ୍ଜାଣ୍ ପୁଜାରି ଆରେ ଈଶ୍ୱର ମନ୍ଦିର୍ତ ହେବାକିନି ଲେବିୟରିଙ୍ଗ୍, ଡୁବନ୍ହିନି ଯୋହନ ଲାଗାୟ୍ ଏନେଙ୍ଗ୍ ଇନେର୍? ଇଦାଙ୍ଗ୍ ୱେନ୍ବିନି କାଜିଙ୍ଗ୍ ଯିହୁଦି ନେତାର୍ ହେୱାରିଙ୍ଗ୍ ପକ୍ତାର୍। 20ଡୁବନ୍ହିନି ଯୋହନ ହେୱାରିଙ୍ଗ୍ ସତ୍ ୱେଚ୍ଚାନ୍, “ଆନେଙ୍ଗ୍ ଖ୍ରୀଷ୍ଟ ଆକାୟ୍।”
21ଯିହୁଦିର୍ ଡୁବନ୍ହିନି ଯୋହନତିଙ୍ଗ୍ ୱେନ୍ବାତାର୍ “ଏନେଙ୍ଗ୍ ଇନେର୍? ଏନେଙ୍ଗ୍ ଇନାକା ଏଲିୟ?” ହେବେତାଙ୍ଗ୍ ହେୱାନ୍ ୱେଚ୍ଚାନ୍, “ଆକାୟ୍, ଆନେଙ୍ଗ୍ ଏଲିୟ ଆକାୟ୍।” ଯିହୁଦିର୍ ୱେନ୍ବାତାର୍, “ଏନେଙ୍ଗ୍ ହେ ଭବିଷ୍ଯତବକ୍ତା?” ଯୋହନ ୱେଚ୍ଚାନ୍, “ଆକାୟ୍ ଆନେଙ୍ଗ୍ ହେ ଭବିଷ୍ଯତବକ୍ତା ଆକାୟ୍।” 22ତାପାଚେ ଯିହୁଦିର୍ ୱେନ୍ବାତାର୍, “ଲାଗିଙ୍ଗ୍ ଏନେଙ୍ଗ୍ ଇନେର୍? ଏନେଙ୍ଗ୍ ନି ବିଷୟରେ ୱେଚ୍ଚା, ମାଙ୍ଗେଙ୍ଗ୍ ପକ୍ତିତି ମାନାୟାରିଙ୍ଗ୍ ୱେଚ୍ନାପ୍। ଏନେଙ୍ଗ୍ ନି ବିଷୟରେ ଇନାକା ଇଞ୍ଜ୍ନାୟା?”
23ଡୁବନ୍ହିନି ଯୋହନ ହେୱାରିଙ୍ଗ୍ ୱେଚ୍ଚାନ୍,
“ଯିଶାୟ ଭବିଷ୍ଯତବକ୍ତା ୱେଚ୍ଚିଲେକେ, ଆନେଙ୍ଗ୍ ହେ ମାନାୟ୍ ବିଷୟରେ ଟାଙ୍ଗ୍ରାବାହାତାକେ ଗାଜାକାଟ୍ କିଜି ୱେଚ୍ଚି ମାଚାଙ୍ଗ୍,
ମାପୃ ହାଜି ହାଣ୍କୁ କିୟାଟ୍।”
24ଆରେ କେତେକ୍ ପାରୁସିଦଳ୍ନି ମାନାୟାର୍ ଡୁବନ୍ହିନି ଯୋହନତାକେ ୱାତାର୍। 25ଆରେ ହେୱାର୍ ଡୁବନ୍ହିନି ଯୋହନତିଙ୍ଗ୍ ୱେନ୍ବାତାର୍, “ଏନେଙ୍ଗ୍ ୱେଚ୍ନାୟା ଯେ ଏନେଙ୍ଗ୍ ଖ୍ରୀଷ୍ଟ ଆକାୟ୍। ଆରେ ଇଞ୍ଜ୍ନାୟା ଏଲିୟ ଆକାୟ୍କି ହେ ଭବିଷ୍ଯତବକ୍ତା ପା ଆକାୟ୍, ଲାଗିଙ୍ଗ୍ ଏନେଙ୍ଗ୍ ଇନେକିଦେଙ୍ଗ୍ ମାନାୟାରିଙ୍ଗ୍ ଡୁବନ୍ ହିନାୟା?”
26ଡୁବନ୍ହିନି ଯୋହନ ୱେଚ୍ଚାନ୍, “ଆନେଙ୍ଗ୍ ତ ମାନାୟାରିଙ୍ଗ୍ ଏଜୁକାଙ୍ଗ୍ ଡୁବନ୍ ହିନାଙ୍ଗା। ମାତର୍ ମିହୁଦାଙ୍ଗ୍ ଇବେ ଇଲେଗ୍ଦି ମାନାୟ୍ ରକାନ୍ ମାନାନ୍ ହେୱାନିଙ୍ଗ୍ ଏପେଙ୍ଗ୍ ପୁନ୍ୱାତାଦେର୍ନା। 27ହେୱାନ୍ ନା ପାଚେ ୱାନାନା। ଆନେଙ୍ଗ୍ ଚାକର୍ ଲେକେ ଆଜି ତା କାଲ୍ନି ପାଣ୍ଡାୟ୍ ଗାଟି ରିକ୍ତେଙ୍ଗ୍ ପା ସାମାନ୍ ଆକାୟ୍।” 28ଇ ୱିଜୁଗଟ୍ନା ବେତାନି ସହର୍ ହେ ପାଡ଼୍କା ଯର୍ଦ୍ଦନ ନାଗୁଡ଼୍ତ, ଡୁବନ୍ହିନି ଯୋହନ ମାନାୟାରିଙ୍ଗ୍ ଡୁବନ୍ହିଜି ମାଚାନ୍।
ଈଶ୍ୱରତି ମେଣ୍ଢାହିମ୍ଣା
29ତା ଆର୍କାତ୍ ନାଞ୍ଜିଙ୍ଗ୍ ଡୁବନ୍ହିନି ଯୋହନ ଯୀଶୁଙ୍ଗ୍ ତା ଲାଗାୟ୍ ୱାନାକା ହୁଡ଼୍ତାନ୍। ଆରେ ୱେଚ୍ଚାନ୍, “ଏହେଁ ହୁଡ଼ାଟ୍ ଈଶ୍ୱରତି ମେଣ୍ଢାହିମ୍ଣା। ହେୱାନ୍ ପୁର୍ତିନି ପାପ୍ ୱିଜୁ ପିଣ୍ଜି ଅନାନ୍। 30ଆନେଙ୍ଗ୍ ଇନେର୍ ବିଷୟରେ ନା ପାଚେ ୱାନାନ୍ ଇଞ୍ଜି ୱେଚ୍ଚି ମାନ୍ଞ୍ଚାଙ୍ଗ୍, ହେ ମାନାୟ୍ ଇୱାନ୍। ହେୱାନ୍ ମାତର୍ ନାବେତାଙ୍ଗ୍ ବେସି ଗାଜାକାନ୍, ଇନେସ୍କି ହେୱାନ୍ ନା ଆଗେ ମାଚାନ୍। 31ହେୱାନ୍ ଖ୍ରୀଷ୍ଟ ଇଞ୍ଜି ଆନେଙ୍ଗ୍ ନିଜେ ପା ହେୱାନିଙ୍ଗ୍ ପୁନ୍ୱାଦାଙ୍ଗ୍ ମାଚାଙ୍ଗ୍। ଇନେସ୍ କିଜି ଇସ୍ରାଏଲ ଜାତିନି ମାନାୟାର୍ ହେୱାନିଙ୍ଗ୍ ପୁଞ୍ଜେଙ୍ଗ୍ ଆଡ୍ନାର୍, ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ମିଙ୍ଗେଙ୍ଗ୍ ଏଜୁକାଙ୍ଗ୍ ଡୁବନ୍ ହିଦ୍ନାଙ୍ଗା।”
32ତାପାଚେ ଡୁବନ୍ହିନି ଯୋହନ ୱେଚ୍ଚାନ୍, “ସରଗ୍ ଜପିତାଙ୍ଗ୍ ପାର୍ୱା ଲେକେ ଆଜି ପବିତ୍ର ଆତ୍ମା ୱାଜି ତା ଜପି କୁଚ୍ଚାକା ଆନେଙ୍ଗ୍ ହୁଡ଼୍ତାଙ୍ଗ୍। 33ଆନେଙ୍ଗ୍ ପା ତାଙ୍ଗେଙ୍ଗ୍ ପୁନ୍ୱାଦାଙ୍ଗ୍ ମାଚାଙ୍ଗ୍। ମାତର୍ ଈଶ୍ୱର ନାଙ୍ଗେଙ୍ଗ୍ ମାନାୟାରିଙ୍ଗ୍ ଏଜୁକାଙ୍ଗ୍ ଡୁବନ୍ ହିଦେଙ୍ଗ୍ ପକ୍ଚିମାଞ୍ଚାନ୍। ହେୱାନ୍ ନାଙ୍ଗେଙ୍ଗ୍ ୱେଚ୍ଚାତାନ୍, ‘ନା ଆତ୍ମା ରକାନ୍ ମାନାୟ୍ ଜପି ୱାଜି ମାନାକା ହୁଡ଼୍ନାୟ୍। ଆରେ ଇମ୍ଣି ମାନାୟ୍ ପବିତ୍ର ଆତ୍ମାତାଙ୍ଗ୍ ମାନାୟାରିଙ୍ଗ୍ ଡୁବନ୍ ହିନାନ୍, ହେୱାନ୍ନେ ରକ୍ଷାକିଦ୍ନାକାନ୍।’ 34ଆନେଙ୍ଗ୍ ହେଦାଙ୍ଗ୍ ହୁଡ଼୍ତାଙ୍ଗ୍। ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ଇଞ୍ଜ୍ନାଙ୍ଗା ଯେ ହେୱାନ୍ନେ ଈଶ୍ୱର ମେହି।”
ଯୀଶୁ ପାର୍ତୁମ୍ ଚେଲାହିଙ୍ଗ୍ ବାଚିକିତାନ୍
35ତା ଆର୍କାତ୍ ନାଞ୍ଜିଙ୍ଗ୍ ଡୁବନ୍ହିନି ଯୋହନ ଆରେ ତା ଚେଲାହିର୍ ଆରେରଗ ହେ ହାଜ୍ଦ ନିଲ୍ଚି ମାଚାର୍। 36ହେପାଦ୍ନା ଯୀଶୁ ହାଜ୍ଦିଙ୍ଗ୍ ହାଲ୍ଜି ମାଚାନ୍, ଡୁବନ୍ହିନି ଯୋହନ ହେୱାନିଙ୍ଗ୍ ହୁଡ଼୍ଜି ୱେଚ୍ଚାନ୍, “ହୁଡ଼ାଟ୍! ଇୱାନ୍ ହେ ଈଶ୍ୱରତି ମେଣ୍ଢାହିମ୍ଣା।” 37ତାପାଚେ ହେ ରିକାର୍ ଚେଲାହିର୍ ଡୁବନ୍ହିନି ଯୋହନ ବେଣ୍ ୱେନ୍ଞ୍ଜି, ହେୱାର୍ ଯୀଶୁ ପାଚେ-ପାଚେ ହାଚାର୍।
38ଯୀଶୁ ବୁଲାଆଜି ହେ ରିୟାର୍ ତାପାଚେ ପାଚେ ୱାନାକା ହୁଡ଼୍ତାନ୍। ଲାଗିଙ୍ଗ୍ ଯୀଶୁ ହେୱାରିଙ୍ଗ୍ ୱେନ୍ବାତାନ୍, “ଏପେଙ୍ଗ୍ ଇନାକା ଇଚା କିନାଦେରା?” ହେୱାର୍ ୱେଚ୍ଚାର୍, “ଗୁରୁ, ଏନେଙ୍ଗ୍ ଇମେତାକେ ମାନାୟ୍?”
39ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ନା ହୁଦାଙ୍ଗ୍ ୱାଡ, ଏପେଙ୍ଗ୍ ହୁଡ଼୍ନାଦେର୍।” ଲାଗିଙ୍ଗ୍ ହେ ରିୟାର୍ ଯୀଶୁ ହୁଦାଙ୍ଗ୍ ହାଚାର୍। ଆରେ ତା ମାନି ବାହା ହୁଡ଼୍ତାର୍। ହେପାଦ୍ନା ମିକାହାରେସ୍ ଚାର୍ଟା ଆଜିମାଚାତ୍। ହେନାଞ୍ଜ୍ ହେୱାର୍ ଯୀଶୁ ହୁଦାଙ୍ଗ୍ ମାଚାର୍।
40ଡୁବନ୍ହିନି ଯୋହନତାଙ୍ଗ୍ କାତା ୱେନ୍ଞ୍ଜି ଇମ୍ଣି ରିୟାର୍ ଚେଲାହିର୍ ଯୀଶୁ ପାଚେ-ପାଚେ ହାଲ୍ଜି ମାଚାର୍, ହେ ରିକାର୍ ବିତ୍ରେତାଙ୍ଗ୍ ଆନ୍ଦ୍ରିୟ ରକାନ୍ ମାଚାନ୍। ହେ ଆନ୍ଦ୍ରିୟ ଶିମୋନ ପିତର ଟଣ୍ଡାହି ମାଚାନ୍। 41ଆନ୍ଦ୍ରିୟ ଆଗେ ତା ଟଣ୍ଡାହି ଶିମୋନ ଲାଗାୟ୍ ହାଚାନ୍। ହେୱାନ୍ ଶିମନତିଙ୍ଗ୍ ୱେଚ୍ଚାନ୍, “ଆପେଙ୍ଗ୍ ଖ୍ରୀଷ୍ଟଙ୍ଗ୍ ହୁଡ଼୍ତାପ୍ନା।”
42ତାପାଚେ ଆନ୍ଦ୍ରିୟ ଶିମୋନ ପିତରତିଙ୍ଗ୍ ଯୀଶୁ ଲାଗାୟ୍ ତାହିୱାତାନ୍। ଯୀଶୁ ହେୱାନିଙ୍ଗ୍ ଇଟ୍କାଡ଼୍ କିଜି ହୁଡ଼୍ଜି ୱେଚ୍ଚାନ୍, “ଏନେଙ୍ଗ୍ ଯୋହନ ମେହି ଶିମୋନ। ନିଙ୍ଗେଙ୍ଗ୍ କେପା#୧:୪୨ କେପା ଆରାମିକ୍ ବେଣ୍ତାଙ୍ଗ୍ କେପା ତର୍ ଇନାର୍। କେପାଙ୍ଗ୍ ଗ୍ରୀକ୍ ବେଣ୍ତାଙ୍ଗ୍ ପିତର ଇଞ୍ଜି ଇନାର୍। କେପା ଆରେ ପିତର ଅର୍ତ କାଲ୍। ତର୍ଦାଙ୍ଗ୍ ହିର୍ବିୟା ଆନାତ୍।”
ଯୀଶୁ ପିଲିପ ଆରେ ନିତନିୟେଲତିଙ୍ଗ୍ ଚେଲାହି କିଦେଙ୍ଗ୍ ହିର୍ବାତାନ୍
43ତା ଆର୍କାତ୍ ନାଞ୍ଜିଙ୍ଗ୍ ଯୀଶୁ ଗାଲିଲୀ ଜିଲ୍ଲାତ ହାଞ୍ଜେଙ୍ଗ୍ ଉପାୟ୍ କିତାନ୍। ହେୱାନ୍ ପିଲିପ ତର୍ଦି ର ମାନାୟ୍ତିଙ୍ଗ୍ ଗିଟାଆତାନ୍, ଆରେ ହେୱାନିଙ୍ଗ୍ ୱେଚ୍ଚାନ୍ “ନା ପାଚେ ୱା।” 44ପିଲିପ ବେଥ୍ସାଇଦା ସହର୍ନି ମାନାୟ୍ ମାଚାନ୍। ଆନ୍ଦ୍ରିୟ ଆରେ ପିତର ପା ଇ ସହର୍ନି ମାନାୟ୍ ମାଚାର୍।
45ପିଲିପ ନିତନିୟେଲ ତର୍ଦି ମାନାୟ୍ତାକେ ହାଚାନ୍। ପିଲିପ ହେୱାନିଙ୍ଗ୍ ୱେଚ୍ଚାନ୍, “ମୋଶା ଲେକିକିତି ନିୟମ୍ନି ସାସ୍ତର୍ତାକେ ଆରେ ଭବିଷ୍ଯତବକ୍ତାର୍ ତା ସାସ୍ତର୍ତାକେ ଇମ୍ଣି ମାନାୟ୍ ବିଷୟରେ ଲେକିକିଜି ମାଚାର୍, ଆପେଙ୍ଗ୍ ହେ ମାନାୟ୍ତିଙ୍ଗ୍ ହୁଡ଼୍ତାପ୍ନା। ହେୱାନ୍ ଆନାନା ନାଜରିତ ସହର୍ନି ଯୀଶୁ। ହେୱାନ୍ ଯୋଷେପ୍ ମେହି।”
46ନିତନିୟେଲ ପିଲିପତିଙ୍ଗ୍ ୱେଚ୍ଚାନ୍, “ନାଜରିତ ସହର୍ତାକେ ଇନାୱେଡ଼ାଙ୍ଗ୍ ପା ହାର୍ଦି ବିଷୟ ୱାୱାତାତ୍ନା।” ଲାଗିଙ୍ଗ୍ ପିଲିପ ହେୱାନିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ୱାଜି ହୁଡ଼ାଟ୍।”
47ଯୀଶୁ ନିତନିୟେଲତିଙ୍ଗ୍ ତାପଣ୍ ୱାନାକା ହୁଡ଼୍ତାନ୍। ଆରେ ହେୱାନ୍ ପିଲିପତିଙ୍ଗ୍ ୱେଚ୍ଚାନ୍, “ଏହେଁ ହୁଡ଼ାଟ୍! ଇୱାନ୍ ରକାନ୍ ଇସ୍ରାଏଲ ଜାତିନି ମାନାୟ୍। ହେୱାନ୍ତାକେ ଇନାକା ବାଟ୍ପାଣିଆ ବୁଦି ହିଲେତ୍।”
48ନିତନିୟେଲ ହେୱାନିଙ୍ଗ୍ ୱେନ୍ବାତାନ୍, “ଏନେଙ୍ଗ୍ ନାଙ୍ଗେଙ୍ଗ୍ ଇନେସ୍ କିଜି ପୁନ୍ଞ୍ଚାଇ?” ଯୀଶୁ ହେୱାନିଙ୍ଗ୍ ୱେଚ୍ଚାନ୍, “ପିଲିପ ନିଙ୍ଗେଙ୍ଗ୍ ନା ବିଷୟରେ ୱେଚ୍ଚି ନା ଲାଗାୟ୍ କୁକ୍ଚି ତାସିୱାୱି ଆଗେ, ଆନେଙ୍ଗ୍ ନିଙ୍ଗେଙ୍ଗ୍ ତଗାମାର୍ ତାରେନ୍ ହୁଡ଼୍ଜି ମାନ୍ଞ୍ଚାଙ୍ଗ୍।”
49ତାପାଚେ ନିତନିୟେଲ ଯୀଶୁଙ୍ଗ୍ ୱେଚ୍ଚାନ୍, “ଏ ଗୁରୁ, ଏନେଙ୍ଗ୍ ଈଶ୍ୱର ମେହି। ଏନେଙ୍ଗ୍ନେ ଇସ୍ରାଏଲ ଜାତିନି ରାଜା।”
50ଯୀଶୁ ନିତନିୟେଲତିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ନିଙ୍ଗେଙ୍ଗ୍ ୱେଚ୍ଚାତାଙ୍ଗ୍ ଯେ ନିଙ୍ଗେଙ୍ଗ୍ ତଗାମାର୍ ତାରେନ୍ ହୁଡ଼୍ଜି ମାନ୍ଞ୍ଚାଙ୍ଗ୍। ହେଦାଙ୍ଗ୍ କାଜିଙ୍ଗ୍ ନାଙ୍ଗେଙ୍ଗ୍ ଏନେଙ୍ଗ୍ ପାର୍ତି କିଦ୍ନାୟା। ମାତର୍ ଏନେଙ୍ଗ୍ ହେଦାଙ୍ଗ୍ତିଙ୍ଗ୍ ପିସ୍ତି ଆରେ ଗାଜା ବିଷୟ ହୁଡ଼୍ନାୟ୍।” 51ଯୀଶୁ ହେୱାନିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, ଏପେଙ୍ଗ୍ ସରଗ୍ ଜେୟାଆନାକା ଆରେ ଈଶ୍ୱର ଦୁତ୍କୁକାଙ୍ଗ୍ ଆରେ ଆନେଙ୍ଗ୍ ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା ଜପିତାଙ୍ଗ୍ ଦୁତ୍କୁକାଙ୍ଗ୍ ତାରେନ୍ ଜପି ଆନାକା ହୁଡ଼୍ନାଦେର୍।”
Currently Selected:
ଯୋହନ 1: PEGNT
Highlight
Share
Copy
Want to have your highlights saved across all your devices? Sign up or sign in
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
