ଲୁକ 24
24
ଯୀଶୁ ହାଃଜି ଆରେରଗ ଜିବୁନ୍ଆତି କାତା
(ମାଥି. ୨୮:୧-୧୦; ମାର୍କ. ୧୬:୧-୮; ଯୋହନ. ୨୦:୧-୧୦)
1ରଇବାର୍ ଦିନ୍ ନାଣାଙ୍ଗେ ହେ କଗ୍ଲେକ୍ ଇମେତାକେ ଯୀଶୁ ହାଃତି ଗାଗାଡ଼୍ତିଙ୍ଗ୍ ଇଡ଼୍ତି ଦୁଗେର୍ତାକେ ହେୱେକ୍ ରସ୍ତି ବାସ୍ନା ଚିକାଣ୍ ଆସ୍ତି ୱାତିକ୍। 2ପାରା ଦୁୱେର୍ ଗେସ୍ତେଙ୍ଗ୍ ର ଗାଜାକାଲ୍ ହିଜି ମାଚାର୍, ହେ କଗ୍ଲେକ୍ ହୁଡ଼୍ତିକ୍ ଯେ ହେ ଦୁଗେର୍ ମୁମ୍ଦି ଗାଜାକାଲ୍ ଦେହା ଗୁଚାଆତାତ୍ନା। 3ମାତର୍ ହେୱେକ୍ ପାରା ବିତ୍ରେ ହଟିକ୍, ଯୀଶୁ ହାଃତି ଗାଗାଡ଼୍ ଗାଟାଆୱିତିକ୍।
4ହେପାଦ୍ନା କଗ୍ଲେକ୍ ଇ ଗଟ୍ନାନି କାତା ଅଲପ୍ପା ବୁଜା ଆୱିତିକ୍। ଇ ଗଟ୍ନା ହୁଡ଼୍ଜି ହେୱେକ୍ ଚାନିଆ ଆତିହିଙ୍ଗ୍ ଣିଞ୍ଜ୍ନି କାଦିଆ ଉସ୍ପି ରିକାର୍ ସରଗ୍ଦୁତ୍ ହେୱେକ୍ ଲାଗାୟ୍ ନିଲ୍ତିକ୍। 5ହେ କଗ୍ଲେକ୍ ବେସି ପାଣ୍ଡ୍ରାଆଜି ହେୱେକ୍ କାପ୍ଡ଼ା ତାରେନ୍ କିଜି ନିଲ୍ଚି ମାଚିକ୍। ହେ ରିକାର୍ ଦୁତ୍କୁ ୱେନ୍ବିତିକ୍, “ଏପେଙ୍ଗ୍ ଜିବୁନ୍ ଆତାକାନିଙ୍ଗ୍ ଇ ହାଃତାକାର୍ ମାନି ବାହାତାକେ ଇନା କିଦେଙ୍ଗ୍ ଡେକ୍ନାଦେରା?
6ହେୱାନ୍ ଇବେ ହିଲୁନ୍, ମାତର୍ ଆରେରଗ ଜିବୁନ୍ ଆତାନ୍ନା। ହେୱାନ୍ ଗାଲିଲୀ ଜିଲ୍ଲାତାକେ ମାନିହିଙ୍ଗ୍ ମିଙ୍ଗେଙ୍ଗ୍ ଇନାକା ୱେଚ୍ଚି ମାନ୍ଞ୍ଚାନ୍, ହେଦାଙ୍ଗ୍ ମି ମାନ୍ତ ଏତ୍କିୟାଟ୍। 7‘ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା ପାପିର୍ କେଇଦ ଆହିଆନାନ୍। ହେୱାନିଙ୍ଗ୍ କୃଶକାଟ୍ତାକେ ଦୁପ୍ଚି ଅହ୍ନାର୍, ଆରେ ତିନ୍ଦିନ୍ ପାଚେ ଆରେରଗ ଜିବୁନ୍ ଆନାନ୍।’”
8ତାପାଚେ ଯୀଶୁ ଇନାକା ୱେଚ୍ଚି ମାନ୍ଞ୍ଚାନ୍, ହେ ବେଣ୍ତିଙ୍ଗ୍ ହେ କଗ୍ଲେକ୍ ମାନ୍ତ ଏତ୍ କିତିକ୍। 9ହେ କଗ୍ଲେକ୍ ଦୁଗେର୍ ପିସ୍ତି ଏଗାର୍ଜାଣ୍ ଚେଲାହିରିଙ୍ଗ୍, ଆରେ ଜେକନି ଚେଲାର୍ ଲାଗାୟ୍ ହାଲ୍ଜି ଏକିତିକ୍। ଦୁଗେର୍ ବିତ୍ରେ ଇନା ଇନାକା ଗଟାଆତାତ୍, ହେ ୱିଜୁ ରଞ୍ଜାଙ୍ଗ୍-ରଞ୍ଜାଙ୍ଗ୍ କିଜି ହେୱାରିଙ୍ଗ୍ ୱେଚ୍ଚିକ୍। 10ହେ କଗ୍ଲେକ୍ ବିତ୍ରେତାଙ୍ଗ୍ ମଗ୍ଦଲିନି ସହର୍ନି ମରିୟମ, ଯୋହନ, ଯାକୁବ ତେହି ମରିୟମ ଆରେ ଜେକନିକିକ୍ ପା ମାଚିକ୍। ହେୱେକ୍ ୱିଜୁ ବିଷୟ ବାଚିକିତି ଚେଲାରିଙ୍ଗ୍ ୱେଚ୍ଚିକ୍।
11ମାତର୍ ପକିଆତି ଚେଲାହିର୍ ହେ କଗ୍ଲେକ୍ ବେଣ୍ତିଙ୍ଗ୍ ଅଲପ୍ପା ପାର୍ତି କିୱାତାର୍। ହେୱାରିଙ୍ଗ୍ ଇଦାଙ୍ଗ୍ ପାଗଲ୍ ବେଣ୍ ଲେକେ ହତାତ୍। 12ମାତର୍ ପିତର ନିଙ୍ଗ୍ଞ୍ଜି ଦୁଗେର୍ତାକେ ହନ୍ଚିହାଚାନ୍, ଆରେ ଟଡ଼୍ଜି ଦୁଗେର୍ ବିତ୍ରେ ହୁଡ଼୍ତାନ୍ ହୁର୍ପିମାଚି ଣିଞ୍ଜ୍ନି ହେନ୍ଦ୍ରା ପିସ୍ତି ଆରେ ଇନାକାପା ହୁଡ଼୍ୱାତାନ୍। ପିତର ହେ ଗଟ୍ନା ହୁଡ଼୍ଜି ଚାନିଆ ଆଜି ଇଞ୍ଜ ୱାତାନ୍।
ଇମାୟୁ ନାସ୍ ହାନି ହାଜ୍ଦ ଯୀଶୁ ଚଞ୍ଜିଆ ଆତାନ୍
(ମାର୍କ. ୧୬:୧୨-୧୩)
13ହେ ନାଞ୍ଜିଙ୍ଗ୍ ଯୀଶୁର୍ ରିକାର୍ ଚେଲାହିର୍ ଇମାୟୁ ତର୍ଦି ର ନାସ୍ ହାଲ୍ଜି ମାଚାର୍। ଇ ବାହାତାଙ୍ଗ୍ ଯିରୁଶାଲାମ ସହର୍ ଏଗାର୍ କିଲମିଟର୍ ଦେହାମାଚାତ୍। 14ଆରେ ଇନାକା ୱିଜୁ ଗଟାଆଜି ମାଚାତ୍, ହେୱାର୍ ହେ ବିଷୟରେ ବେଣ୍କିଜି ମାଚାର୍।
15ହେ ୱିଜୁ ବିଷୟ ବେଣ୍କିନିହିଙ୍ଗ୍ ନିଜେ ଯୀଶୁ ହେୱାର୍ ଲାଗାୟ୍ ୱାତାନ୍ ଆରେ ହେୱାର୍ ହୁଦାଙ୍ଗ୍ ତାଙ୍ଗ୍ଦେଙ୍ଗ୍ ଲାଗାତାନ୍। 16ମାତର୍ ଈଶ୍ୱର ହେୱାରିଙ୍ଗ୍ ପୁଞ୍ଜେଙ୍ଗ୍ ହିୱାତାନ୍। ହେୱାର୍ ଯୀଶୁଙ୍ଗ୍ ହୁଡ଼୍ତାର୍ ଯେ ଚିନ୍ କିଦେଙ୍ଗ୍ ଆଡ୍ୱାତାର୍।
17ତାପାଚେ ଯୀଶୁ ହେୱାରିଙ୍ଗ୍ ୱେନ୍ବାତାନ୍, “ଏପେଙ୍ଗ୍ ଇମ୍ଣି ବିଷୟରେ ବେଣ୍ କିନାଦେରା?” ହେୱାର୍ ମୁମ୍ ବେସି ୱାଚ୍ଚି ଲେକେ ଆଜି ମାଚାତ୍। 18ହେୱାର୍ ବିତ୍ରେତାଙ୍ଗ୍ କ୍ଲେୟପା ତର୍ଦାକାନ୍ ମାଚାନ୍, ହେୱାନ୍ ଯୀଶୁଙ୍ଗ୍ ୱେଚ୍ଚାନ୍, “ଅଲପ୍ଦିନ୍ ଆଗେ ଯିରୁଶାଲାମ ସହର୍ତାକେ କେତେକ୍ ବିଷୟ ଗଟାଆତାତ୍ନା। ଆରେ ଏନେଙ୍ଗ୍ ର ଗଟାଆତି ଇ ଗଟ୍ନା ବିଷୟରେ ପୁନ୍ୱାତାଇନା କି?”
19ଯୀଶୁ ହେୱାରିଙ୍ଗ୍ ୱେନ୍ବାତାନ୍, “ଏପେଙ୍ଗ୍ ଇମ୍ଣି ଗଟ୍ନା ବିଷୟରେ ୱେଚ୍ଚାନାଦେରା?” ମାନାୟାର୍ ଯୀଶୁଙ୍ଗ୍ ୱେଚ୍ଚାର୍, “ନାଜରିତ ସହର୍ନି ଯୀଶୁ ବଷୟରେ। ହେୱାନ୍ ଈଶ୍ୱର ଆରେ ମାନାୟାର୍ କାଜିଙ୍ଗ୍ ରକାନ୍ ବେସି ହାର୍ଦି ଭବିଷ୍ଯତବକ୍ତା ମାଚାନ୍। ହେୱାନ୍ ବେସି ଚାନିଆଆନି କାମାୟ୍ କିଜି ମାଚାନ୍ ଆରେ ୱେଚ୍ଚି ମାଚାନ୍। 20ମାତର୍ ମା ଈଶ୍ୱର ହେବାକିନି ମୁଡ଼୍ଦି ପୁଜାରିର୍ ଆରେ ଦେସ୍ତିଙ୍ଗ୍ ସାସନ୍ କିନାକାର୍ ହେୱାନିଙ୍ଗ୍ ଶାତ୍ରୁ କେଇଦ ଆହିକିତାର୍ ଆରେ ହେୱାନ୍ କୃଶକାଟ୍ତାକେ ହାଃତାନ୍।
21ମାତର୍ ଆପେଙ୍ଗ୍ ଆହାକିଜି ମାଚାପ୍ ଯେ ହେୱାନ୍ନେ ଇସ୍ରାଏଲ ଜାତିନି ମାନାୟାରିଙ୍ଗ୍ ରମିୟ ସରକାର୍ତାଙ୍ଗ୍ ରକ୍ଷା କିନାନ୍! ନଙ୍ଗୟ୍ ଯୀଶୁଙ୍ଗ୍ ମାର୍ନେ ଅସ୍ତି ତିନ୍ଦିନ୍ ଆତାତେ।
22ଆରେ ନଙ୍ଗୟ୍ ମା ଦଳ୍ନି କେତ୍ଜାଣ୍ କଗ୍ଲେକ୍ ମାଙ୍ଗେଙ୍ଗ୍ ଚାନିଆଆନି ବେଣ୍ ୱେଚ୍ଚିତିକ୍। ହେୱେକ୍ ନେଞ୍ଜେଙ୍ଗ୍ ନାଣାଙ୍ଗେ ଯୀଶୁ ହାଃତି ଗାଗାଡ଼୍ତିଙ୍ଗ୍ ଇଡ଼୍ଜି ମାଚି ବାହାତାକେ ହାଲ୍ଜି ମାଚିକ୍। 23ମାତର୍ ହେବେ ତା ଗାଗାଡ଼୍ ହିଲାତାତ୍। ହେୱେକ୍ ସରଗ୍ ଦୁତ୍ତିଙ୍ଗ୍ ହୁଡ଼୍ତି ବେଣ୍ ପା ହେୱେକ୍ ୱାଜି ମାଙ୍ଗେଙ୍ଗ୍ ୱେଚ୍ଚିତିକ୍। ସରଗ୍ଦୁତ୍କୁ ହେ କଗ୍ଲେକାଙ୍ଗ୍ ଯୀଶୁ ଜିବୁନ୍ଆତି ବେଣ୍ ୱେଚ୍ଚି ମାଚିକ୍। 24ତାପାଚେ ମା ହାଙ୍ଗଦାକାର୍ ବିତ୍ରେତାଙ୍ଗ୍ କେତ୍ଜାଣ୍ ପା ଦୁଗେର୍ ଲାଗାୟ୍ ହାଚାର୍। ହେ କଗ୍ଲେକ୍ ୱେଚ୍ଚିଲେକେ ହେୱାର୍ ପା ଯୀଶୁ ହାଃତି ଗାଗାଡ଼୍ତିଙ୍ଗ୍ ହେବେ ଗାଟା ଆୱାତାର୍।”
25ତାପାଚେ ଯୀଶୁ ହେ ରିକାରିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ଏଚେକ୍ ବକୁଆ। ଭବିଷ୍ଯତବକ୍ତାର୍ ଇନାକା ୱିଜୁ ୱେଚ୍ଚି ମାନ୍ଞ୍ଚାର୍, ହେ ସତ୍ତିଙ୍ଗ୍ ଏପେଙ୍ଗ୍ ପାର୍ତି କିଦେଙ୍ଗ୍ ଆଡୁଦେରା। 26ଭବିଷ୍ଯତବକ୍ତାର୍ ୱେଚ୍ଚି ମାନ୍ଞ୍ଚାର୍ ଯେ ଖ୍ରୀଷ୍ଟ ତା ଅଜଡ଼୍ତାଙ୍ଗ୍ ୱାୱି ଆଗେଲେକେ ଦୁକ୍କଷ୍ଟ ପାୟାଆଜି ହାଃନାନ୍। 27ତାପାଚେ ଯୀଶୁ ଦରମ୍ ସାସ୍ତର୍ନି ବିଷୟରେ ଇନାକା ୱିଜୁ ଲେକା ମାନାତ୍, ହେ ୱିଜୁ ରଞ୍ଜାଙ୍ଗ୍-ରଞ୍ଜାଙ୍ଗ୍ କିଜି ବୁଜାଇ କିଦେଙ୍ଗ୍ ଲାଗାତାନ୍। ଯୀଶୁ ମୋଶା ଲେକିକିତି ନିୟମ୍ନି ସାସ୍ତର୍ତାଙ୍ଗ୍ ଆରମ୍ କିଜି ଜେକନି ଭବିଷ୍ଯତବକ୍ତାର୍ ପାତେକ୍ ୱିଜାକାର୍ ହେୱାନ୍ ବିଷୟରେ ଇନାକା ୱିଜୁ ୱେଚ୍ଚି ମାନ୍ଞ୍ଚାନ୍, ହେ ୱିଜୁ ବୁଜାଇ କିତାନ୍।”
28ଇମ୍ଣିନାସ୍ ହାଲ୍ଜି ମାଚାର୍, ହେନାସ୍ ଲାଗାୟ୍ ଆତିହିଙ୍ଗ୍ ହେୱାର୍ ହୁଡ଼୍ତାର୍ ଯେ ଯୀଶୁ ଆଗେନି ନାସ୍କୁକାଙ୍ଗ୍ ହାନିଲେକେ ବେଣ୍କିଜି ମାଚାନ୍। 29ମାତର୍ ହେୱାର୍ ବେସି ୱାରିତାଙ୍ଗ୍ ଯୀଶୁଙ୍ଗ୍ ମା ହୁଦାଙ୍ଗ୍ ମାଞ୍ଜେଙ୍ଗ୍ ଗୁୱାରି କିତାର୍। ଇନେସ୍କି ମିସି ୱାନାତା। ଲାଗିଙ୍ଗ୍ ଯୀଶୁ ହେୱାର୍ ହୁଦାଙ୍ଗ୍ ମାଞ୍ଜେଙ୍ଗ୍ ଇଲ୍ ବିତ୍ରେ ହାଚାନ୍।
30ଯୀଶୁ ହେୱାର୍ ହୁଦାଙ୍ଗ୍ ଚିଞ୍ଜେଙ୍ଗ୍ କୁଚ୍ଚାନ୍। ହେୱାନ୍ କେଇଦ ଇଚ୍କେ ରୁଟି ଆସ୍ତାନ୍। ହେ କାଦି କାଜିଙ୍ଗ୍ ଈଶ୍ୱରତିଙ୍ଗ୍ ଦନ୍ଯବାଦ୍ ହିତାନ୍ ଆରେ ରୁଟିତିଙ୍ଗ୍ ଗନ୍ଦା-ଗନ୍ଦା କିଜି ଡ୍ରିକ୍ଚି ହେୱାରିଙ୍ଗ୍ ହିତାନ୍। 31ହେପାଦ୍ନା ଈଶ୍ୱର ହେୱାରିଙ୍ଗ୍ ଚିନ୍ କିଦେଙ୍ଗ୍ ସାଇଜ କିତାନ୍। ଆରେ ହେୱାର୍ ଯୀଶୁଙ୍ଗ୍ ଚିନ୍ କିଦେଙ୍ଗ୍ ଆଡ଼୍ତାର୍। ମାତର୍ ଯୀଶୁ ହେୱାର୍ ମୁମ୍ଦ ହେଦାପ୍ରେ ମାୟାଁ ଆତାନ୍। 32ହେୱାର୍ ଜାର୍-ଜାର୍ ୱେଚ୍ପା ୱେଚ୍ପି ଆତାର୍, “ହାଜ୍ଦ ହେୱାନ୍ ମା ହୁଦାଙ୍ଗ୍ ବେଣ୍ କିଦ୍ନିହିଙ୍ଗ୍ ଆରେ ଦରମ୍ ସାସ୍ତର୍ ବିଷୟରେ ବୁଜାଇ କିଦ୍ନିହିଙ୍ଗ୍ ମା ଗରବ୍ ବିତ୍ରେ ବେସି ହାରିଆୱାଦାଙ୍ଗ୍ ମାଚାତ୍ କି?”
33ତାପାଚେ ହେୱାର୍ ନିଙ୍ଗ୍ତାର୍ ଆରେ ଯିରୁଶାଲାମ ସହର୍ତାକେ ହାଚାର୍। ଆରେ ଏଗାର୍ଜାଣ୍ ବାଚିକିଜି ପକ୍ତି ଚେଲାହିର୍ ଆରେ ଜେକନିକାର୍ ରବେଆଜି ୱେଚ୍ପା ଆନାକା ହୁଡ଼୍ତାର୍। 34ହେୱାର୍ ଇ କାତା ୱେଚ୍ପାଆଜି ମାଚାର୍, “ମାପୃ ହାତ୍ପା ଜିବୁନ୍ ଆତାନ୍ନା। ଆରେ ଶିମୋନତିଙ୍ଗ୍ ଚଞ୍ଜି ଆତାନ୍ନା।” 35ତାପାଚେ ଇ ରିକାର୍ ମାନାୟ୍ ହାନିଙ୍ଗ୍ ହାଜ୍ଦ ଇନାକା ୱିଜୁ ଗଟାଆଜି ମାଚାତ୍। ହେ ୱିଜୁ ହେୱାରିଙ୍ଗ୍ ୱେଚ୍ଚାର୍। ଯୀଶୁ ରୁଟି ଡ୍ରିକ୍ଚି ବାଟା କିନିହିଙ୍ଗ୍ ଇନେସ୍ କିଜି ଯୀଶୁଙ୍ଗ୍ ଚିନ୍ କିତାର୍, ହେ ବିଷୟରେ ପା ୱେଚ୍ଚାର୍।
ଯୀଶୁ ତା ଚେଲାରିଙ୍ଗ୍ ଚଞ୍ଜିଆତାନ୍
(ମାଥି. ୨୮:୧୬-୨୦; ମାର୍କ. ୧୬:୧୪-୧୮; ଯୋହନ. ୨୦:୧୯-୨୩; କାମାୟ୍. ୧:୬-୮)
36ଇ ରିକାର୍ ମାନାୟ୍ ଇ ୱିଜୁବେଣ୍ ୱେଚ୍ନିହିଙ୍ଗ୍ ନିଜେ ଯୀଶୁ ୱାଜି ଚେଲାହିର୍ ବିତ୍ରେ ନିଲ୍ଚି ମାଚାନ୍। ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଈଶ୍ୱର ମିଙ୍ଗେଙ୍ଗ୍ ଆଶ୍ରିବାଦ୍ କିଦେଙ୍ଗ୍।” 37ଇବେତାଙ୍ଗ୍ ଚେଲାହିର୍ ଚାନିଆ ଆଜି ପାଣ୍ଡ୍ରା ଆତାର୍। ଆପେଙ୍ଗ୍ ର ବୁତ୍ ହୁଡ଼୍ନାପା ଇଞ୍ଜି ହେୱାର୍ ବାବିକିତାର୍।
38ମାତର୍ ଯୀଶୁ ୱେଚ୍ଚାନ୍, “ଏପେଙ୍ଗ୍ ଇନା କିଦେଙ୍ଗ୍ ପାଣ୍ଡ୍ରା ଆନାଦେରା? ଏପେଙ୍ଗ୍ ଇନା କିଦେଙ୍ଗ୍ ନାଙ୍ଗେଙ୍ଗ୍ ପାର୍ତି କିଦୁଦେରା? 39ଏହେଁ ନା କେଇଦିଙ୍ଗ୍ ହୁଡ଼ାଟ୍ ଆରେ ନା କାଲ୍କୁକାଙ୍ଗ୍ ହୁଡ଼ାଟ୍। ଇଦାଙ୍ଗ୍ ଆନେଙ୍ଗ୍ ନିଜେ ଯୀଶୁ! ନାଙ୍ଗେଙ୍ଗ୍ ଆସ୍ପାଆଦାଟ୍ ଆରେ ପୁନାଟ୍, ଆନେଙ୍ଗ୍ ଜିବୁନ୍ ମାନି ଗାଗାଡ଼୍ତାକେ ଜେଇ ଆରେ ପେଣ୍ ମାନାତ୍। ମାତର୍ ବୁତ୍କୁକାଙ୍ଗ୍ ତ ଇଲେକେ ହିଲ୍ଗୁତ୍।” 40ଯୀଶୁ ହେୱାରିଙ୍ଗ୍ ଇ କାତା ୱେଚ୍ଚି ପାଚେ, ହେୱାନ୍ ହେୱାରିଙ୍ଗ୍ ତା କେଇ ଆରେ କାଲ୍ନି ଚିନାଙ୍ଗ୍ ୱିଜୁ ଚଚ୍ଚାନ୍।
41ଚେଲାହିର୍ ଚାନିଆଆତାର୍। ହେୱାର୍ ଯୀଶୁଙ୍ଗ୍ ଜିବୁନ୍ ଆତାକା ହୁଡ଼୍ଜି ବେସି ୱାରିୟା ଆତାର୍। ମାତର୍ ହେୱାର୍ ପାର୍ତି କିଦେଙ୍ଗ୍ ଆଡ୍ୱାତାର୍। ହେଦାଙ୍ଗ୍ ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ମିବେ ଇନାକା ତିନାକା ମାନାତ୍ କି?” 42ହେୱାର୍ ଯୀଶୁଙ୍ଗ୍ ରଞ୍ଜାଙ୍ଗ୍ ୱାନ୍ଞ୍ଚି ମିନ୍ ହିତାର୍। 43ଚେଲାହିର୍ ହୁଡ଼୍ନିହିଙ୍ଗ୍ ଯୀଶୁ ମିନ୍ଦିଙ୍ଗ୍ ଚିଚାନ୍।
44ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ମି ଲାଗାୟ୍ ଆନେଙ୍ଗ୍ ମାନି ୱେଡ଼ାଙ୍ଗ୍ନି କାତାତିଙ୍ଗ୍ ଏତୁକିୟାଟ୍। ଆନେଙ୍ଗ୍ ୱେଚ୍ଚି ମାନ୍ଞ୍ଚାଙ୍ଗ୍ ଯେ ମୋଶା ଲେକିକିତି ନିୟମ୍ନି ସାସ୍ତର୍ତାକେ, ଭବିଷ୍ଯତବକ୍ତା ବହିତାକେ ଆରେ କେର୍କଣ୍ବିହିତାକେ ନା ବିଷୟରେ ଇନାକା ୱିଜୁ ଲେକାଆତାତ୍ନା, ହେ ୱିଜୁ ହାତ୍ପା ଗଟାଆତାତ୍ନା।”
45ତାପାଚେ ଯୀଶୁ ଚେଲାହିରିଙ୍ଗ୍ ୱିଜୁ ଦରମ୍ ସାସ୍ତର୍ ବିଷୟରେ ବୁଜାଇ କିତାନ୍। 46ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଖ୍ରୀଷ୍ଟ ଦୁକ୍କଷ୍ଟ ପାୟାଆଜି ହାଃନାନ୍ ଆରେ ହାଃତିତାଙ୍ଗ୍ ତିନ୍ଦିନ୍ ପାଚେ ଆରେରଗ ଜିବୁନ୍ଆନି କାତା ସାସ୍ତରତାକେ ଲେକା ମାନାତ୍। 47ଯିରୁଶାଲାମ ସହର୍ତାଙ୍ଗ୍ ଆରମ୍ କିଜି ୱିଜୁ ଜାତିର୍ତାକେ ପାପ୍ କାମାୟ୍ ପିସ୍ତି ମାପୃ ୱାତିସ୍ ଈଶ୍ୱର ପାପ୍ କେମା କିନି ବିଷୟରେ ମାନାୟାରିଙ୍ଗ୍ ଶୁଣାୟ୍ କିନାର୍।
48ଏପେଙ୍ଗ୍ ଇୱିଜୁ ବିଷୟତିଙ୍ଗ୍ ସାକି ଆନାଦେର୍। 49ୱେନାଟ୍! ନା ଆବା ମିଙ୍ଗେଙ୍ଗ୍ ଇମ୍ଣି କାତା ହିଜିମାନ୍ଞ୍ଚାନ୍ ହେ ପବିତ୍ର ଆତ୍ମାତିଙ୍ଗ୍ ଆନେଙ୍ଗ୍ ମି ଲାଗାୟ୍ ପକ୍ତାନାଙ୍ଗ୍। ମାତର୍ ସରଗ୍ତାଙ୍ଗ୍ ହେ ଶାକ୍ତି ଏପେଙ୍ଗ୍ ପାୟାଆୱି ପାତେକ୍ ଯିରୁଶାଲାମ ସହର୍ତାକେ ମାନାଦେର୍।”
ଯୀଶୁ ସରଗ୍ଜପି ହାଚାନ୍
(ମାର୍କ. ୧୬:୧୯-୨୦; କାମାୟ୍. ୧:୯-୧୧)
50ଯୀଶୁ ତା ଚେଲାରିଙ୍ଗ୍ ଯିରୁଶାଲାମ ସହର୍ତାଙ୍ଗ୍ ବେଥନିଆ ନାସ୍ ଲାଗାୟ୍ ଅସିହାଚାନ୍। ଯୀଶୁ ତା କେଇ ଜପି ନିକ୍ଚି ଚେଲାହିରିଙ୍ଗ୍ ଆଶ୍ରିବାଦ୍ କିତାନ୍। 51ଯୀଶୁ ତା ଚେଲାରିଙ୍ଗ୍ ଆଶ୍ରିବାଦ୍ କିନିହିଙ୍ଗ୍ ଈଶ୍ୱର ହେୱାନିଙ୍ଗ୍ ସରଗ୍ତାକେ ଅତାନ୍।
52ଚେଲାହିର୍ ହେବେ ହେୱାନିଙ୍ଗ୍ ମେଣ୍ଡାକୁନ୍ଦିକିଜି ଜୟ୍-ଜୟ୍ କିତାର୍। ତାପାଚେ ହେୱାର୍ ବେସି ୱାରିତାଙ୍ଗ୍ ଯିରୁଶାଲାମ ସହର୍ତାକେ ହାଚାର୍। 53ହେୱାର୍ ୱିଜୁଦିନ୍ ମନ୍ଦିର୍ ପିଣ୍ଡାତାକେ ମାନ୍ଞ୍ଜି ଈଶ୍ୱରତିଙ୍ଗ୍ ଜୟ୍-ଜୟକିଜି ମାଚାର୍।
Currently Selected:
ଲୁକ 24: PEGNT
Highlight
Share
Copy
Want to have your highlights saved across all your devices? Sign up or sign in
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
