ଲୁକ 23
23
ଗବର୍ନର୍ ପିଲାତ ରାଜାତାକେ ଯୀଶୁଙ୍ଗ୍ ଅତାର୍
(ମାଥି. ୨୭:୧,୨,୧୧-୧୪; ମାର୍କ. ୧୫:୧-୫; ଯୋହନ. ୧୮:୨୮-୩୮)
1ତାପାଚେ ଗାଜା ସବାନି ମାନାୟାର୍ ୱିଜାକାର୍ ନିଙ୍ଗ୍ଞ୍ଜି ଯିହୁଦା ଜିଲ୍ଲାନି ପିଲାତ ରାଜାତାକେ ଅତାର୍। 2ହେୱାର୍ ତା ବିରଦ୍ତାକେ ଇଞ୍ଜେଙ୍ଗ୍ ଲାଗାତାର୍, “ଇ ମାନାୟ ମା ମାନାୟାରିଙ୍ଗ୍ ବୁଲ୍ ହାଜ୍ଦିଙ୍ଗ୍ ଅନାନା। ଆରେ କାଇସର୍ ମହା ରାଜାଙ୍ଗ୍ ସିସ୍ତୁ ହିମାଟ୍ ଇଞ୍ଜି ଇଞ୍ଜ୍ନାନା। ହେୱାନ୍ ନିଜେ ଖ୍ରୀଷ୍ଟ ଆରେ ର ରାଜା ଇଞ୍ଜି ଇଞ୍ଜ୍ନାନା।”
3ପିଲାତ ରାଜା ଯୀଶୁଙ୍ଗ୍ ୱେନ୍ବାତାନ୍, “ଏନେଙ୍ଗ୍ ଇନାକା ଯିହୁଦିର୍ ରାଜାତି?” ଯୀଶୁ ପିଲାତ ରାଜାଙ୍ଗ୍ ୱେଚ୍ଚାନ୍, “ଏନେଙ୍ଗ୍ ସତ୍ ୱେଚ୍ନାୟା।” 4ପିଲାତ ଈଶ୍ୱର ହେବାକିନି ମୁଡ଼୍ଦି ପୁଜାରିର୍ ଆରେ ମାନାୟାରିଙ୍ଗ୍ ୱେଚ୍ଚାନ୍, “ଇୱାନ୍ତାଙ୍ଗ୍ ଆନେଙ୍ଗ୍ ଇଚ୍କେ ପା ବୁଲ୍ ହୁଡ଼ୁଙ୍ଗା,” 5ମାତର୍ ହେୱାର୍ ବାର୍-ବାର୍ ୱେଚ୍ଚାର୍, “ହେୱାନ୍ ତା ହିକ୍ଷା ହିକାଇକିଜି ଯିହୁଦା ଜିଲ୍ଲାନି ୱିଜୁ ମାନାୟାର୍ ବିତ୍ରେ ମାଡ୍ଗଲ୍ କିୟିକିନାନା। ହେୱାନ୍ ଗାଲିଲୀ ଜିଲ୍ଲାତାକେ ଆରମ୍ କିତାନ୍ ଆରେ ଇବେ ୱାତାନ୍।
6ମାତର୍ ପିଲାତ ରାଜା ଇଦାଙ୍ଗ୍ ୱେନ୍ଞ୍ଜି ୱେନ୍ବାତାନ୍, ଇୱାନ୍ ଇନାକା ଗାଲିଲୀ ଜିଲ୍ଲାନି ମାନାୟ୍?” 7ପିଲାତ ରାଜା ପୁଚାନ୍ କି, ଯୀଶୁ ହେରୋଦ ରାଜା ଦେସ୍ତି ମାନାୟ୍। ହେରୋଦ ରାଜା ହେପାଦ୍ନା ଯିରୁଶାଲାମ ସହର୍ତାକେ ମାଚାନ୍। ଲାଗିଙ୍ଗ୍ ପିଲାତ ରାଜା ଯୀଶୁଙ୍ଗ୍ ହେୱାନ୍ ଲାଗାୟ୍ ପକ୍ତାନ୍।
ହେରୋଦ ରାଜାତାକେ ଯୀଶୁଙ୍ଗ୍ ଅତାର୍
8ହେରୋଦ ରାଜା ଯୀଶୁଙ୍ଗ୍ ହୁଡ଼୍ଜି ବେସି ୱାରି ଆତାନ୍, ହେରୋଦ ରାଜା ଯୀଶୁ ବିଷୟରେ ୱିଜୁବେଣ୍ ୱେନ୍ଞ୍ଜି ମାଚାନ୍। ଯୀଶୁ ଚାନିଆଆନି କାମାୟ୍ କିନାନ୍ ଇଞ୍ଜି ହେରୋଦ ରାଜା ବେସି ଦିନ୍ତାଙ୍ଗ୍ ହୁଡ଼୍ନାଙ୍ଗ୍ ଇଞ୍ଜି ଆହାକିଜି ମାଚାନ୍। 9ହେରୋଦ ରାଜା ଯୀଶୁଙ୍ଗ୍ କେତେକ୍ ପ୍ରଶ୍ନ ୱେନ୍ବାତାନ୍। ମାତର୍ ଯୀଶୁ ହେରୋଦ ରାଜାଙ୍ଗ୍ ଇନାକାପା ଉତର୍ ହିୱାତାନ୍। 10ଈଶ୍ୱର ହେବାକିନି ମୁଡ଼୍ଦି ପୁଜାରିର୍ ଆରେ ପଣ୍ଡିତାର୍ ହେବେ ନିଲ୍ଚି ମାଚାର୍। ହେୱାର୍ ଯୀଶୁ ବିରୁଦ୍ତାକେ ଚେରାଆଜି ୱେଚ୍ଚି ମାଚାର୍।
11ତାପାଚେ ହେରୋଦ ରାଜା ଆରେ ତା ସେନାର୍ ଯୀଶୁଙ୍ଗ୍ ରାଜା ଉସ୍ପିନି ଆଙ୍ଗି ଉସ୍ପି କିଜି ହେୱାର୍ ଇନସ୍ତା କିତାର୍। ତାପାଚେ ହେରୋଦ ରାଜା ପିଲାତ ରାଜା ଲାଗାୟ୍ ଯୀଶୁଙ୍ଗ୍ ପକ୍ତାନ୍। 12ହେ ଦିନ୍ ହେରୋଦ ରାଜା ଆରେ ପିଲାତ ରାଜା ବିତ୍ରେ ସାଙ୍ଗ ଆତାତ୍। ତା ଆଗେ ହେୱାର୍ ବେସି ଶାତ୍ରୁ ମାଚାର୍।
ଯୀଶୁଙ୍ଗ୍ ହାଃନି ଦଣ୍ଡ୍ ଗାଟାଆତାତ୍
(ମାଥି. ୨୭:୧୫-୨୬; ମାର୍କ. ୧୫:୬-୧୫; ଯୋହନ. ୧୮:୩୯-୧୯:୧୬)
13ଇଦାଙ୍ଗ୍ କାଜିଙ୍ଗ୍ ପିଲାତ ରାଜା ଈଶ୍ୱର ହେବାକିନି ମୁଡ଼୍ଦି ପୁଜାରିର୍ ଆରେ ଯିହୁଦି ନେତାର୍ ହୁଦାଙ୍ଗ୍ ୱିଜୁ ମାନାୟାରିଙ୍ଗ୍ ରବେ କୁକ୍ଚି ୱେନ୍ବାତାନ୍। 14ପିଲାତ ରାଜା ହେୱାରିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ଇୱାନିଙ୍ଗ୍ ନା ଲାଗାୟ୍ ବିଚାର୍ କିଦେଙ୍ଗ୍ ତାହି ୱାତାଦେର୍ ଆରେ ହେ ମାନାୟାରିଙ୍ଗ୍ ଗଣ୍ଡ୍ଗଲ୍ କିୟିକିଦେଙ୍ଗ୍ ହିକାଇ କିନାନା ଇଞ୍ଜି ୱେଚ୍ଚାନାଦେରା। ହେରୋଦ ପା ତା ଦସ୍ ପାଇକିଉନା, ଇନେସ୍କି ହେୱାନ୍ ହେୱାନିଙ୍ଗ୍ ନା ଲାଗାୟ୍ ପକ୍ତାତାନ୍।
15ହେରୋଦ ରାଜା ପା ପୁଚାନ୍ ଯେ ଯୀଶୁ ବୁଲ୍ କିୱାତାନ୍ନା। ଲାଗିଙ୍ଗ୍ ହେୱାନ୍ ହେୱାନିଙ୍ଗ୍ ନା ଲାଗାୟ୍ ପକ୍ତାତାନ୍ନା। ଇ ମାନାୟ୍ ହାଃନି ଦଣ୍ଡ୍ ପାୟାଆନି ଲେକେ ଇନା କାମାୟ୍ କିୱାତାନ୍ନା। 16ଲାଗିଙ୍ଗ୍ ଆନେଙ୍ଗ୍ ହେୱାନିଙ୍ଗ୍ କର୍ଡା ମାଡ୍ହିଜି ପିସ୍ତି ହିନାଙ୍ଗ୍।” 17ୱିଜୁବାର୍ହୁ ନିସ୍ତାର୍ ପାର୍ବୁ ୱେଡ଼ାଙ୍ଗ୍ ପିଲାତ ରାଜା ର ବନ୍ଦି ମାନାୟ୍ତିଙ୍ଗ୍ ପିସ୍ତିହିନି ନିୟମ୍ କିଜି ମାଚାନ୍।
18ମାତର୍ ୱିଜାକାର୍ ଗାଜାକାଟ୍ କିଜି ୱେଚ୍ଚାର୍, “ଯୀଶୁଙ୍ଗ୍ ମାର୍ନେ ଅହାଟ୍, ଆରେ ମା କାଜିଙ୍ଗ୍ ବାରବ୍ବାଙ୍ଗ୍ ପିସ୍ତିହିଦା।” 19ବାରବ୍ବା ସହର୍ତାକେ ଯୁଦ୍ ଆରମ୍ କିତିଲେ ଆରେ କେତେକ୍ ମାନାୟାରିଙ୍ଗ୍ ମାର୍ନେ ଅସ୍ତି କାଜିଙ୍ଗ୍ ଜଇଲ୍ ଇଞ୍ଜ ବନ୍ଦି ଆଜି ମାଚାନ୍।
20ମାତର୍ ପିଲାତ ରାଜା ଯୀଶୁଙ୍ଗ୍ ପିସ୍ତି ହିଦେଙ୍ଗ୍ ଇଚାକିଜି ମାନାୟାରିଙ୍ଗ୍ ଆରେରଗ ବୁଜାଇ କିତାନ୍। 21ମାତର୍ ହେବେ ମାନି ମାନାୟାର୍ ଚେରାଆଜି ୱେଚ୍ଚାର୍, “ହେୱାନିଙ୍ଗ୍ ମାର୍ନେ ଅହାଟ୍। ହେୱାନିଙ୍ଗ୍ କୃଶକାଟ୍ତାକେ ଦୁପ୍ଚି ଅହାଟ୍।” 22ପିଲାତ ରାଜା ତିନ୍ହଟ୍ ୱେଚ୍ଚାନ୍, “ଇନା କିଦେଙ୍ଗ୍, ହେୱାନ୍ ଇନା ଦସ୍ କିତାନ୍ନା? ହେୱାନ୍ ଦସି ଆକାୟ୍। ହେୱାନିଙ୍ଗ୍ ହାଃନି ଦଣ୍ଡ୍ ହିଦେଙ୍ଗ୍ ଆନେଙ୍ଗ୍ ଇନାକାପା ଦସ୍ ହୁଡ଼ୁଙ୍ଗା। ଲାଗିଙ୍ଗ୍ ହେୱାନିଙ୍ଗ୍ କର୍ଡା ହୁଦାଙ୍ଗ୍ ଟ୍ରାକ୍ତି ପାଚେ ହେୱାନିଙ୍ଗ୍ ପିସ୍ତି ହିନାଙ୍ଗ୍।”
23ମାତର୍ ମାନାୟାର୍ ଚେରାଆଜି ୱେଚ୍ଚେଙ୍ଗ୍ ଲାଗାତାର୍। ହେୱାର୍ ଦାବି କିତାର୍ ଯେ ଯୀଶୁଙ୍ଗ୍ କୃଶକାଟ୍ତାକେ ଦୁପ୍ଚି ଅହାଟ୍। ହେୱାର୍ ଚେରାଆଜି ୱେଚ୍ଚେଙ୍ଗ୍ ଜିତା ଆତାର୍, 24ପିଲାତ ରାଜା ମାନାୟାର୍ ଇଚାତାଙ୍ଗ୍ ରାଜି ଆତାନ୍। 25ମାନାୟାର୍ ବାରବ୍ବାଙ୍ଗ୍ ମୁକ୍ତି କିଦେଙ୍ଗ୍ ଇଚାକିଜି ମାଚାର୍। ବାରବ୍ବା ମାନାୟ୍ ଅସ୍ତି ଆରେ ଗଣ୍ଡ୍ଗଲ୍ ଦସିତାଙ୍ଗ୍ ଜଇଲ୍ ଇଞ୍ଜ ହାଲ୍ଜି ମାଚାନ୍। ପିଲାତ ରାଜା ବାରବ୍ବାଙ୍ଗ୍ ପିସ୍ତି ହିତାନ୍। ପିଲାତ ରାଜା ଯୀଶୁଙ୍ଗ୍ ମାର୍ନେ ଅସ୍ତେଙ୍ଗ୍ ମାନାୟାର୍ କେଇଦ ହେଲାଇ କିଜି ହିତାନ୍।
ଯୀଶୁ କୃଶକାଟ୍ତାକେ ହାଃତାନ୍
(ମାଥି. ୨୭:୩୨-୪୪; ମାର୍କ. ୧୫:୨୧-୩୨; ଯୋହନ. ୧୯:୧୭-୨୭)
26ସେନାର୍ ଯୀଶୁଙ୍ଗ୍ ଅସାହାନିହିଙ୍ଗ୍ କୁରିଣିୟ ଦେସ୍ତାଙ୍ଗ୍ ଶିମୋନ ତର୍ଦାକାନ୍ ରକାନିଙ୍ଗ୍ ଆସ୍ତି ଯୀଶୁ ପାଚେ-ପାଚେ କୃଶକାଟ୍ ପିଣ୍ଦେଙ୍ଗ୍ ତା ନିପିତ ହେ କୃଶକାଟ୍ ହେୱାନିଙ୍ଗ୍ ପିଣ୍ଡିକିତାର୍।
27ବେସିହେନି ମାନାୟ୍ ତାପାଚେ ପାଚେ ହାଚାର୍। କେତେକ୍ ହେନି କଗ୍ଲେକ୍ ଦୁଃକ୍ କିଜି ମାଚିକ୍ ଆରେ ଆଡ଼୍ବି ମାଚିକ୍। 28ମାତର୍ ଯୀଶୁ ବୁଲାଆଜି ହେ କଗ୍ଲେକାଙ୍ଗ୍ ୱେଚ୍ଚାନ୍, “ଏ ଯିରୁଶାଲାମ ସହର୍ତାକେ ମାନି କଗ୍ଲେକ୍! ନା କାଜିଙ୍ଗ୍ ଆଡ଼୍ବାମାଟ୍। ଏପେଙ୍ଗ୍ ମି କାଜିଙ୍ଗ୍ ଆରେ ଜାର୍ ହିମ୍ଣାୱାକ୍ଡ଼ା କାଜିଙ୍ଗ୍ ଆଡ଼୍ବାଟ୍।
29ଇନେସ୍କି ଇଲେକେ ଦୁଃକ୍ଦିନ୍ ୱାନାତ୍, ଏଚେପାଦ୍ନା ମାନାୟାର୍ ଇନାର୍, ଇମ୍ଣି କଗ୍ଲେ ବାଞ୍ଜ୍ଣି, ଆରେ ଇମ୍ଣି କଗ୍ଲେକ୍ ହିମ୍ଣା ଜନମ୍ କିୱିତିକ୍ନା, ହେୱେକ୍ କାଜିଙ୍ଗ୍ କେତେକ୍ ହାର୍। 30ହେପାଦ୍ନା ମାଡ଼ିକାଙ୍ଗ୍ ୱେଚ୍ନାର୍ ମା ଜପି ଆର୍ଦା, ମାନାୟାର୍ କୁପ୍ଲିକାଙ୍ଗ୍ ୱେଚ୍ନାର୍, ‘ମାଙ୍ଗେଙ୍ଗ୍ ଡାବାଇ କିଦା।’ 31ଇନେସ୍କି ଏପେଙ୍ଗ୍ ହୁଡ଼୍ନାଦେରା ଆନେଙ୍ଗ୍ ଦରମ୍ ମାନାୟ୍ତିଙ୍ଗ୍ ପା ଈଶ୍ୱର ଇନେସ୍ ଦୁଃକ୍ ୱାଦେଙ୍ଗ୍ ହିନାତା, ଲାଗିଙ୍ଗ୍ ଏପେଙ୍ଗ୍ ହେଦାଙ୍ଗ୍ ପୁନ୍ଞ୍ଜି ମାନାଟ୍ ର ପାପି ମାନାୟ୍ନି ଦୁଃକ୍ ବେସି ଆନାତ୍।”
32ସେନାର୍ ରିକାର୍ ଚର୍କୁକାଙ୍ଗ୍ ପା ହାଃନି ଦଣ୍ଡ୍ ହିଦେଙ୍ଗ୍ ସେନାର୍ ଯୀଶୁ ହୁଦାଙ୍ଗ୍ ଅଜିମାଚାର୍।
33କାପ୍ଡ଼ାନି କପ୍ରି ଲେକେ ଚଞ୍ଜ୍ନିବାହାତାକେ ଯୀଶୁଙ୍ଗ୍ ଆରେ ହେ ରିକାର୍ ଚର୍କୁକାଙ୍ଗ୍ ପା ଅସିହାଚାର୍। ହେବେ ସେନାର୍ ଯୀଶୁଙ୍ଗ୍ କୃଶକାଟ୍ତାକେ ଦୁପ୍ତାର୍, ଆରେ ହେୱାର୍ ହେ ରିକାର୍ ଚର୍କୁକାଙ୍ଗ୍ ପା ଯୀଶୁ ତିନା ବାଗାଇ ରକାନିଙ୍ଗ୍ ଆରେ ରକାନିଙ୍ଗ୍ ଡେବା ବାଗାଇ କିଜି କୃଶକାଟ୍ତାକେ ଦୁପ୍ତାର୍। 34ହେପାଦ୍ନା ଯୀଶୁ ୱେଚ୍ଚାନ୍, “ଆବା, ଇୱାରିଙ୍ଗ୍ କେମା କିୟା, ଇନେସ୍କି ଇୱାର୍ ଇନାକା କିନାର୍ ହେଦାଙ୍ଗ୍ ପୁନୁରା। ଆରେ ହେୱାର୍ ଯୀଶୁ ଉସ୍ପିତି ହେନ୍ଦ୍ରାତିଙ୍ଗ୍ ହେୱାର୍ ବାଗ୍କିଦେଙ୍ଗ୍ ଅତାର୍।”
35ମାନାୟାର୍ ହେବେ ନିଲ୍ଚି ଯୀଶୁଙ୍ଗ୍ ହୁଡ଼୍ଜି ମାଚାର୍। ଯିହୁଦି ନେତାର୍ ଯୀଶୁଙ୍ଗ୍ ଇନସ୍ତାକିଜି ମାଚାର୍। ହେୱାର୍ ଇଞ୍ଜିମାଚାର୍, “ଯଦି ହେୱାନ୍ ଈଶ୍ୱର କାଜିଙ୍ଗ୍ ବାଚିକିତି ଖ୍ରୀଷ୍ଟ, ଲାଗିଙ୍ଗ୍ ଜାର୍ତିଙ୍ଗ୍ ରକ୍ଷା କିୟେନ୍। ହେୱାନ୍ ଜେକନିକାରିଙ୍ଗ୍ ଉଦାର୍ କିଜି ମାଚାନ୍।”
36ହେଲେକେ ସେନାର୍ ଯୀଶୁଙ୍ଗ୍ ଇନସ୍ତା କିତାର୍ ହେୱାର୍ ଯୀଶୁ ଲାଗାୟ୍ ୱାତାର୍, ଆରେ ହେୱାନିଙ୍ଗ୍ ହଇନି ଅଙ୍ଗୁର୍ ରାସ୍ ଉଣେନ୍ଇଞ୍ଜି ହିତାର୍। 37ସେନାର୍ ୱେଚ୍ଚାର୍, “ଏନେଙ୍ଗ୍ ଯିହୁଦିର୍ ରାଜାତି, ଲାଗିଙ୍ଗ୍ ଜାର୍ତିଙ୍ଗ୍ ଉଦାର୍ କିୟା।” 38ଆରେ ଯୀଶୁଙ୍ଗ୍ ଦୁପ୍ତି କୃଶକାଟ୍ ଜପି ଇନସ୍ତା କିଦେଙ୍ଗ୍ ର ମାର୍ ପାଟା ରସ୍ତି ବଡ୍ ଇଡ଼୍ତାର୍। ହେ ପାଟାତାକେ ଇଲେକେ ଲେକାଆଜି ମାଚାତ୍, “ଏ ଯିହୁଦିର୍ ରାଜା।”
ତିନାବାଗାୟ୍ ମାନି ଚର୍ ଯୀଶୁଙ୍ଗ୍ ପାର୍ତି କିତାନ୍
39କୃଶକାଟ୍ତାକେ ଦୁପ୍ତି ରିକାର୍ ଚର୍କୁ ବିତ୍ରେତାଙ୍ଗ୍ ରକାନ୍ ଯୀଶୁଙ୍ଗ୍ ନିନ୍ଦା ହିଜି ୱେଚ୍ଚାନ୍, “ଏନେଙ୍ଗ୍ ଇନାକା ଖ୍ରୀଷ୍ଟ ଆକାୟ୍? ଲାଗିଙ୍ଗ୍ ଏନେଙ୍ଗ୍ ଜାର୍ତିଙ୍ଗ୍ ଉଦାର୍ କିୟା ଆରେ ମାଙ୍ଗେଙ୍ଗ୍ ପା ରକ୍ଷା କିଦା।” 40ମାତର୍ ଜେକନି ଚର୍ ଆରେ ଚର୍ତିଙ୍ଗ୍ କେତ୍ତି ୱେଚ୍ଚାନ୍, “ଏନେଙ୍ଗ୍ ଇନାକା ଈଶ୍ୱରତିଙ୍ଗ୍ ପା ପାଣ୍ଡ୍ରା ଆଉୟା? ଆସେଙ୍ଗ୍ ଜାଲ୍ଦି ହାଃଦେଙ୍ଗ୍ ହାନାସା। 41ଏନେଙ୍ଗ୍ ଆରେ ଆନେଙ୍ଗ୍ ରିକାସ୍ ଚର୍। ଆସେଙ୍ଗ୍ ଦସ୍ କିଜି ମାଚାପ୍। ଲାଗିଙ୍ଗ୍ ଆସେଙ୍ଗ୍ ଇନାକା ପାୟା ଆଦେଙ୍ଗ୍ ଦର୍କାର୍, ଆସେଙ୍ଗ୍ ହେଦାଙ୍ଗ୍ ପାୟାଆତାସ୍ନା। ମାତର୍ ଇୱାନ୍ ଇନା ଦସ୍ କିୱାତାନ୍ନା।”
42ତାପାଚେ ହେ ଚର୍ ଯୀଶୁଙ୍ଗ୍ ୱେଚ୍ଚାନ୍, “ଯୀଶୁ, ଏନେଙ୍ଗ୍ ଏଚେପାଦ୍ନା ରାଜା ଲେକେ ନି ସାସନ୍ କିନି ରାଜି ଆରମ୍ କିନାଇ, ହେପାଦ୍ନା ନାଙ୍ଗେଙ୍ଗ୍ ମାନ୍ତ ଏତୁ କିଦ୍ନାଇ।” 43ଯୀଶୁ ହେୱାନିଙ୍ଗ୍ ୱେଚ୍ଚାନ୍, “ୱେନା! ଆନେଙ୍ଗ୍ ଇନାକା ୱେଚ୍ଚାନାଙ୍ଗା ହେଦାଙ୍ଗ୍ ସତ୍। ନେଞ୍ଜେଙ୍ଗ୍ ଏନେଙ୍ଗ୍ ନା ହୁଦାଙ୍ଗ୍ ସରଗ୍ଜପି ହାନାଇ।”
ଯୀଶୁ ହାଃତାନ୍
(ମାଥି. ୨୭:୪୫-୫୬; ମାର୍କ. ୧୫:୩୩-୪୧; ଯୋହନ. ୧୯:୨୮-୩୦)
44ହେପାଦ୍ନା ୱେଡ଼ା ବାର୍ଟା ୱେଡ଼ାଙ୍ଗ୍ ୱିଜୁ ଦେସ୍ ନିପଣ୍ ମାଜ୍ଗା ଆଜି ତିନ୍ ଘଣ୍ଟା ପାତେକ୍ ମାଚାତ୍। 45ହେପାଦ୍ନା ଈଶ୍ୱର ମାନି ମନ୍ଦିର୍ତାକେ ଡ଼ସିମାଚି ବୱାଡ଼୍ପାର୍ଦା ଜପିତାଙ୍ଗ୍ ତାରେନ୍ ପାତେକ୍ କେଞ୍ଚାତ୍। ହେ ପାର୍ଦାକାଜିଙ୍ଗ୍ ଈଶ୍ୱର ମାନି ପବିତ୍ର ବାହାତ ମାନାୟାର୍ ହାଞ୍ଜେଙ୍ଗ୍ ଆଡ୍ୱାଦାଙ୍ଗ୍ ମାଚାର୍।
46ଯୀଶୁ ଗାଜାକାଟ୍ କିଜି ୱେଚ୍ଚାନ୍, “ଏ ଆବା, ଆନେଙ୍ଗ୍ ନା ଆତ୍ମା ନିଙ୍ଗେଙ୍ଗ୍ ହିଦ୍ନାଙ୍ଗା।” ଏଲେଙ୍ଗ୍ ୱେଚ୍ଚି ପାଚେ ଯୀଶୁ ଜିବୁନ୍ ହାଚାତ୍। 47ସେନାଦଳ୍ନି ଶହେଜାଣ୍ ସେନାର୍ତାଙ୍ଗ୍ ମୁଡ଼୍ଦାକାନ୍ ହେବେ ଇନାକା ଗଟାଆତି ଗଟ୍ନା ହୁଡ଼୍ତାନ୍। ଆରେ ହେବେ ଇବେଣ୍ ୱେଚ୍ଚି ଈଶ୍ୱରତିଙ୍ଗ୍ ଦନ୍ଯବାଦ୍କିଜି ୱେଚ୍ଚାନ୍, “ଆନେଙ୍ଗ୍ ପୁନାଙ୍ଗ୍ ଯେ, ଇୱାନ୍ ରକାନ୍ ହାର୍ଦି ମାନାୟ୍ ମାଚାନ୍!”
48ଇମ୍ଣି ମାନାୟାର୍ ଇ ଗଟ୍ନା ହୁଡ଼୍ଦେଙ୍ଗ୍ ରବେଆଜି ମାଚାର୍, ହେୱାର୍ ଇଞ୍ଜ ଲେଉଟା ଆତାର୍, ହେୱାର୍ ଦୁଃକ୍ତାକେ ମାନାପ୍ ଇଞ୍ଜି ଚଚିୟାଆଦେଙ୍ଗ୍ ଜାର୍-ଜାର୍ ନେଞ୍ଜାଡାକିତାକେ ଇଡ଼ିଆତାର୍। 49ମାତର୍ ହେୱାନିଙ୍ଗ୍ ହାର୍ କିଜି ପୁଚି କଗ୍ଲେ ହିମ୍ଣାକ୍ ଗାଲିଲୀ ଜିଲ୍ଲାତାଙ୍ଗ୍ ରବେ ମେହାଆଜି ତାପାଚେ ପାଚେ ୱାତି କଗ୍ଲେକ୍ ଦେହା ନିଲ୍ଚି ହୁଡ଼୍ଜି ମାଚିକ୍।
ଯୀଶୁଙ୍ଗ୍ ମୁଚ୍ଚାର୍
(ମାଥି. ୨୭:୫୭-୬୧; ମାର୍କ. ୧୫:୪୨-୪୭; ଯୋହନ. ୧୯:୩୮-୪୨)
50ଯିହୁଦା ଜିଲ୍ଲାନି ହାରାମାତିଆ ସହର୍ତାକେ ଯୋଷେପ ତର୍ଦାକାନ୍ ରକାନ୍ ମାନାୟ୍ ମାଚାନ୍। ହେୱାନ୍ ରକାନ୍ ଦରମ୍ ଆରେ ହାର୍ଦି ମାନାୟ୍ ମାଚାନ୍। ହେୱାନ୍ ଯିହୁଦିର୍ ଗାଜା ବିଚାର୍କିନି ର ମେମର୍ ମାଚାନ୍। 51ହେୱାନ୍ ଯିହୁଦି ନେତାର୍ ଉପାୟ୍ତିଙ୍ଗ୍ ଆରେ କାମାୟ୍ତାଙ୍ଗ୍ ରାଜି ହିଲ୍ୱାତାନ୍। ଇନେସ୍କି ଈଶ୍ୱର ସାସନ୍ କିନି ରାଜି ୱାନାକା ହେୱାନ୍ କାସି ମାଚାନ୍।
52ଯୋଷେପ ପାଣ୍ଡ୍ରା ଆୱାଦାଙ୍ଗ୍ ରମିୟ ସର୍କାର୍ ପିଲାତତାକେ ହାଲ୍ଜି ଯୀଶୁ ହାଃତି ମାଡ଼ାତିଙ୍ଗ୍ କୃଶକାଟ୍ତାଙ୍ଗ୍ ଜୁତ୍ତି ମୁଚ୍ଚେଙ୍ଗ୍ ଅନୁମତି ଏନ୍ତାନ୍। ପିଲାତ ରାଜା ହେୱାନିଙ୍ଗ୍ ଅଦେଙ୍ଗ୍ ଆଦେସ୍ ହିତାନ୍। 53ଲାଗିଙ୍ଗ୍ ଯଷେପ ଯୀଶୁ ହାଃତି ଗାଗାଡ଼୍ତିଙ୍ଗ୍ କୃଶକାଟ୍ତାଙ୍ଗ୍ ତାରେନ୍ ଜୁତ୍ତାନ୍। ହେ ଗାଗାଡ଼୍ତିଙ୍ଗ୍ ର ହାର୍ଦି ପାତାଡ଼୍ ହେନ୍ଦ୍ରାତାଙ୍ଗ୍ ହୁର୍ପାତାନ୍। ହେ ଦୁଗେର୍ତାକେ ଇଡ଼୍ତାର୍, ଆରେ ହେବେ ହାଃତାକାରିଙ୍ଗ୍ ଇନେରିଙ୍ଗ୍ ପା ଇଟ୍ୱାଦାଙ୍ଗ୍ ମାଚାର୍, ଆରେ ହେ ଦୁଗେର୍ କାଲ୍କୁକାଙ୍ଗ୍ ପତ୍ତି ରହିୟାଆଜି ମାଚାତ୍।
54ହେ ଦିନ୍ ଜମ୍ନିଦିନ୍ ଆରମ୍ ଆନି ସମୟ୍ ଶୁକୁରୁବାର୍ ମାଚାତ୍। 55ଇମ୍ଣି କଗ୍ଲେ ହିମ୍ଣାକ୍ ଯୀଶୁ ହୁଦାଙ୍ଗ୍ ପାଚେ-ପାଚେ ଗାଲିଲୀ ଜିଲ୍ଲାତାଙ୍ଗ୍ ୱାଜିମାଚିକ୍, ହେ କଗ୍ଲେକ୍ ଯୋଷେପ ପାଚେ-ପାଚେ ହାଚିକ୍। ହେୱେକ୍ ହାଲ୍ଜି ଦୁଗେର୍ ହୁଡ଼୍ତିକ୍। ବିତ୍ରେ ଇମ୍ଣି ବାହାତାକେ ଯୀଶୁ ହାଃତି ଗାଗାଡ଼୍ତିଙ୍ଗ୍ ଇଡ଼୍ତାର୍, ହେ ବାହା ପା ହେ କଗ୍ଲେକ୍ ହୁଡ଼୍ତିକ୍। 56ତାପାଚେ ହେ କଗ୍ଲେକ୍ ଯୀଶୁ ହାଃତି ଗାଗାଡ଼୍ତିଙ୍ଗ୍ ଇତ୍ପେଦେଙ୍ଗ୍ ବାସ୍ନା ଚିକାଣ୍ ରସ୍ତେଙ୍ଗ୍ ହେବେତାଙ୍ଗ୍ ହେୱେକ୍ ତାଞ୍ଜ ହାଚିକ୍। ମାତର୍ ମୋଶା ଲେକିକିତି ନିୟମ୍ ମାଚିଲେ ହେୱେକ୍ ଜମ୍ତିକ୍, ଇନେସ୍କି ହେନାଞ୍ଜ୍ ଜମ୍ନିଦିନ୍ ମାଚାତ୍।
Currently Selected:
ଲୁକ 23: PEGNT
Highlight
Share
Copy
Want to have your highlights saved across all your devices? Sign up or sign in
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
