ଲୁକ 1
1
ଲୁକ ଥୀୟପିଲ ଲାଗାୟ୍ ଇ ହାର୍ଦିକାବୁର୍ ଲେକିକିତାନ୍ନା
1-2ଲାଡ୍ନି ଥୀୟଫିଲ, ଇମ୍ଣାକାର୍ ଯୀଶୁତି ହାର୍ଦିକାବୁର୍ ଆରମ୍ କିତିତାଙ୍ଗ୍ ନିଜେ ହୁଡ଼୍ତାର୍ନା, ଆରେ ପାଚେ ଈଶ୍ୱର କାତାତିଙ୍ଗ୍ ଶୁଣାୟ୍ କିତାର୍। ହେୱାର୍ ଇନେସ୍ ୱେଚ୍ଚି ମାନ୍ଞ୍ଚାର୍, ହେଲେକେ ମା ବିତ୍ରେ ଯୀଶୁ ବିଷୟରେ ଗଟାଆତାତ୍ନା, ହେ ବିଷୟରେ କେତେକ୍ ମାନାୟାର୍ ଲେକିକିଦେଙ୍ଗ୍ ଉପାୟ୍ କିତାର୍ନା। 3ଆନେଙ୍ଗ୍ ପା ଇ ଗଟ୍ନା ବିଷୟରେ ମାନ୍ଦିୟାନ୍ କିଜି ପଡ଼ିକିତାଙ୍ଗ୍। ଆରେ ଇ ବିଷୟତିଙ୍ଗ୍ ମି କାଜିଙ୍ଗ୍ ଲାଇନ୍ ହିସାବ୍ରେ ଲେକିକିଦେଙ୍ଗ୍ ଆନେଙ୍ଗ୍ ଇଚା କିତାଙ୍ଗ୍। 4ଲାଗିଙ୍ଗ୍ ଏପେଙ୍ଗ୍ ପୁରା ସତ୍ ବିଷୟରେ ପୁଞ୍ଜେଙ୍ଗ୍ ଆଡ୍ନାଦେର୍ ଇମ୍ଣାକା ମିଙ୍ଗେଙ୍ଗ୍ ମାନାୟାର୍ ୱେଚ୍ଚି ମାନ୍ଞ୍ଚାର୍।
ଡୁବନ୍ହିନି ଯୋହନ ଜନମ୍ ଆତି ବିଷୟରେ ଆଗେନି କାତା
5ହେରୋଦ ଯିହୁଦା ଜିଲ୍ଲାନି ରାଜା ମାନିହିଙ୍ଗ୍ ଜିକରିୟ ତର୍ଦାକାନ୍ ରକାନ୍ ଈଶ୍ୱର ହେବାକିନି ମୁଡ଼୍ଦି ପୁଜାରି ମାଚାନ୍। ହେୱାନ୍ ଅବିୟ ଦଳ୍ଦାକାନ୍ ମାଚାନ୍। ଜିକରିୟ ଡକ୍ରୁହି ତର୍ ଏଲିଶାବେତ ମାଚାତ୍। ଏଲିଶାବେତ ହାରଣ ଲାତ୍ରାନି ଗାଡ଼୍ଚେ ମାଚାତ୍। 6ହେୱାର୍ ରିକାର୍ ଈଶ୍ୱରତାକେ ହାର୍ଦି ମାନାୟ୍ ମାଚାର୍। ହେୱାର୍ ରିକାର୍ ମାପୃତି ୱିଜୁ ଆଦେସ୍ ମାନିକିଜି ମାଚାର୍। 7ମାତର୍ ହେୱାରିଙ୍ଗ୍ ଇନାକାପା ହିମ୍ଣାୱାକ୍ଡ଼ା ହିଲାତାତ୍। ଏଲିଶାବେତ ବାଞ୍ଜ୍ଣି ମାଚାତ୍। ଆରେ ଜିକରିୟ ଆରେ ଏଲିଶାବେତ ବୁଡ଼୍ହା ବୁଡ଼୍ହି ଆଜି ମାଚାର୍।
8-9ରଦିନ୍ ଜିକରିୟ ଇମ୍ଣି ଦଳ୍ତାକେ ମାଚାନ୍ ହେଦଳ୍ନି ଈଶ୍ୱର ହେବେ କିନି ପୁଜାରି ଯିରୁଶାଲାମ ମନ୍ଦିର୍ତାକେ ହେବା କିଦେଙ୍ଗ୍ ପାଲି ପଡ଼ା ଆତାତ୍। ଈଶ୍ୱର ହେବାକିନି ପୁଜାରି ବିଦିତାଙ୍ଗ୍ ଲାଟ୍ରିପୁଟାୟ୍ କିଜି ଜିକରିୟଙ୍ଗ୍ ବାଚିକିତାର୍। ଆରେ ହେୱାର୍ ହେୱାନିଙ୍ଗ୍ ଈଶ୍ୱର ମାନି ପବିତ୍ର ମନ୍ଦିର୍ତାକେ ଦୁପ୍ନି ଆହିକିଦେଙ୍ଗ୍ ପକ୍ତାର୍। 10ଜିକରିୟ ଦୁପ୍ନି କାଚାୟ୍କିନିହିଙ୍ଗ୍ ମାନାୟାର୍ ଈଶ୍ୱର ମାନି ମନ୍ଦିର୍ ପିଣ୍ଡାତାକେ ମାନ୍ଞ୍ଜି ପାର୍ତାନା କିଜି ମାଚାର୍।
11ହେପାଦ୍ନା ଜିକରିୟଙ୍ଗ୍ ସରଗ୍ଦୁତ୍ ଚଚିୟାଆତାନ୍। ହେ ଦୁତ୍ ଦୁପ୍ନି ଆହିକିନି ତିନାବାଗାୟ୍ ନିଲ୍ଚି ମାଚାନ୍। 12ଜିକରିୟ ସରଗ୍ ଦୁତ୍ତିଙ୍ଗ୍ ହୁଡ଼୍ତି ଦାପ୍ରେ ତ୍ରିପ୍କାତାନ୍ ଆରେ ପାଣ୍ଡ୍ରା ଆତାନ୍। 13ମାତର୍ ସରଗ୍ଦୁତ୍ ହେୱାନିଙ୍ଗ୍ ୱେଚ୍ଚାତ୍, “ଜିକରିୟ! ପାଣ୍ଡ୍ରାଆମା, ନି ପାର୍ତାନା ଈଶ୍ୱର ୱେଚାନ୍ନା, ନି ଡକ୍ରୁଦି ଏଲିଶାବେତ ର ହିମ୍ଣାତିଙ୍ଗ୍ ଜନମ୍ କିନାତ୍। ଏପେଙ୍ଗ୍ ତା ତର୍ ଯୋହନ ଇଟ୍ନାଦେର୍।
14ଏପେଙ୍ଗ୍ ତା କାଜିଙ୍ଗ୍ ବେସି ୱାରି ଆନାଦେର୍। ହେୱାନ୍ ଜନମ୍ ଆତିସ୍ ବେସିହେନି ମାନାୟ୍ ୱାରି ଆନାର୍। 15ଇନେସ୍କି ମାପୃ ହେୱାନିଙ୍ଗ୍ ଗାଜାକାନ୍ କିନାନ୍। ହେୱାନ୍ ଇନାୱେଡ଼ାଙ୍ଗ୍ ପା ଅଙ୍ଗୁର୍ ରାସ୍ କି କାଲିଙ୍ଗ୍ ଉଣୁନ୍। ହେୱାନିଙ୍ଗ୍ ଜଲମ୍ତାଙ୍ଗ୍ ନେ ପବିତ୍ର ଆତ୍ମା ଶାକ୍ତି ତା ହୁଦାଙ୍ଗ୍ ମାନ୍ଗାନାତ୍।
16ଆରେ ହେ ଯୋହନ ଇସ୍ରାଏଲନି ମାନାୟାରିଙ୍ଗ୍ ଈଶ୍ୱର ଲାଗାୟ୍ ୱାଦେଙ୍ଗ୍ ସାଇଜ କିନାନ୍। 17ଭବିଷ୍ଯତବକ୍ତା ଏଲିୟ ଆତ୍ମା ଆରେ ଶାକ୍ତି ଲେକେ ଯୋହନ ପା ଡାଣ୍ଡାସି ଲେକେ ଆଜି ମାପୃ ଆଗେ-ଆଗେ ହାନାନ୍। ହେୱାନ୍ ଆବାରିଙ୍ଗ୍ ତା ହିମ୍ଣାର୍ ହୁଦାଙ୍ଗ୍ ମେହାଇ କିନାନ୍। ହେୱାନ୍ ଈଶ୍ୱରତିଙ୍ଗ୍ ମାନିକିୱି ଅଦରମ୍ ମାନାୟାରିଙ୍ଗ୍ ଦରମ୍ ମାନାୟାର୍ ହାନି ହାଜ୍ଦିଙ୍ଗ୍ ତାସିୱାନାନ୍। ମାପୃ କାଜିଙ୍ଗ୍ ହେୱାନ୍ ମାନାୟାରିଙ୍ଗ୍ ଜାଗ୍ରତ୍ କିୟିକିନାନ୍।”
18ଜିକରିୟ ସରଗ୍ ଦୁତ୍ତିଙ୍ଗ୍ ୱେଚ୍ଚାନ୍, “ହେଦାଙ୍ଗ୍ ସତ୍ ଗଟ୍ନାଇଞ୍ଜି ଆନେଙ୍ଗ୍ ଇନେସ୍ କିଜି ପୁନାଙ୍ଗ୍? ଆନେଙ୍ଗ୍ ରକାଙ୍ଗ୍ ବୁଡ଼ା ମାନାୟ୍ ଆରେ ନା କଗ୍ଲେ ପା ବୁଡି ଆତାତେ।” 19ସରଗ୍ଦୁତ୍ ଜିକରିୟଙ୍ଗ୍ ୱେଚ୍ଚାତ୍, “ଆନେଙ୍ଗ୍ ଗାବ୍ରିୟେଲ। ଆନେଙ୍ଗ୍ ଈଶ୍ୱର ମୁମ୍ଦ ନିଲ୍ଚି ମାନାଙ୍ଗ୍। ନି ହୁଦାଙ୍ଗ୍ କାତାବାର୍ତା କିଦେଙ୍ଗ୍ ଆରେ ଇ ହାର୍ଦିକାବୁର୍ ଶୁଣାୟ୍ କିଦେଙ୍ଗ୍ ଈଶ୍ୱର ନାଙ୍ଗେଙ୍ଗ୍ ପକ୍ତାତାନ୍ନା। 20ନଙ୍ଗୟ୍ ୱେନା! ଆନେଙ୍ଗ୍ ୱେଚ୍ଚିତି କାତା ଗଟାଆୱି ପାତେକ୍, ଏନେଙ୍ଗ୍ ଗୁଲା ଆଜି ମାନ୍ଗାନାଇ। ଇନେସ୍କି ଏନେଙ୍ଗ୍ ନା କାତାତିଙ୍ଗ୍ ପାର୍ତି କିୱାତାଇ। ଟିକ୍ ସମୟରେ ଆନେଙ୍ଗ୍ ୱେଚ୍ଚି କାତା ୱିଜୁ ଗଟାଆନାତ୍।”
21ହେପାଦ୍ନା ମାନାୟାର୍ ବାର୍ତ ଜିକରିୟଙ୍ଗ୍ କାସି ମାଚାର୍। ହେୱାର୍ ଚାନିଆ ଆଜି ବାବିକିତାର୍, “ଏଚେକ୍ ଗାଡ଼ି ପାତେକ୍ ହେୱାନ୍ ଈଶ୍ୱର ମାନି ମନ୍ଦିର୍ ବିତ୍ରେ ଇନା କିଦେଙ୍ଗ୍ ମାନାନ୍?” 22ଏଚେପାଦ୍ନା ଜିକରିୟ ବାର୍ତ ୱାତାନ୍, ହେପାଦ୍ନା ହେୱାନ୍ ଇନାକାପା ୱେଚ୍ଚେଙ୍ଗ୍ ଆଡ୍ୱାତାନ୍। ଲାଗିଙ୍ଗ୍ ହେୱାର୍ ବୁଜାଆତାର୍ ଯେ, ହେୱାନ୍ ଈଶ୍ୱର ମାନି ମନ୍ଦିର୍ ବିତ୍ରେ ଈଶ୍ୱରତିଙ୍ଗ୍ ହୁଡ଼୍ତାନ୍ନା। ହେୱାନ୍ କେଇ ଚଚ୍ଚିନେ ୱେଚ୍ଚି ମାଚାନ୍। ଆରେ ଗୁଲା ଲେକେ ଆଜି ମାଚାନ୍। 23ଜିକରିୟ ଈଶ୍ୱର ମାନି ମନ୍ଦିର୍ତ ହେବାକିନି ପାଲି ୱିସ୍ତି ପାଚେ ହେୱାନ୍ ତାଞ୍ଜ ହାଚାନ୍।
24କେତ୍ଦିନ୍ ପାଚେ ଜିକରିୟ ଡକ୍ରୁହି ଏଲିଶାବେତ ଗାଗାଡ଼୍ତ ଟେବା ଆତାତ୍। ଲାଗିଙ୍ଗ୍ ଏଲିଶାବେତ ଇଞ୍ଜାଙ୍ଗ୍ ବାର୍ତ ପାଞ୍ଚ୍ମାସ୍ ପାତେକ୍ ହୱାତାତ୍। ଏଲିଶାବେତ ୱେଚ୍ଚାତ୍, 25“ହୁଡ଼ା, ଈଶ୍ୱର ନାଙ୍ଗେଙ୍ଗ୍ ସାଇଜ କିତ୍ତାନ୍ନା। ହେୱାନ୍ ମାନାୟାର୍ ଲାଜୁତାଙ୍ଗ୍ ନାଙ୍ଗେଙ୍ଗ୍ ରକ୍ଷା କିତ୍ତାନ୍ନା। ଆରେ ହେୱାନ୍ ର ବାଞ୍ଜ୍ଣି କଗ୍ଲେଙ୍ଗ୍ ତାଡ଼ି ଆଦେଙ୍ଗ୍ ଆଦିକାର୍ ହିତ୍ତାନ୍ନା।”
ଯୀଶୁ ଜନମ୍ ଆନି ବିଷୟରେ ଆଗେନି କାତା
26ଏଲିଶାବେତ ଗାଗାଡ଼୍ତ ଆସ୍ତି ଚଅ ମାସ୍ ଆତିହିଙ୍ଗ୍, ଈଶ୍ୱର ଗାବ୍ରିୟେଲ୍ ଦୁତ୍ତିଙ୍ଗ୍ ଗାଲିଲୀ ଜିଲ୍ଲାନି ନାଜରିତ ସହର୍ତାକେ ପକ୍ତାନ୍। 27ହେ ଦୁତ୍ ଜୁବା ଗାଡ଼୍ଚେ ଲାଗାୟ୍ ହାର୍ଦିକାବୁର୍ ହିଦେଙ୍ଗ୍ ୱାତାନ୍। ହେ ଜୁବା ଗାଡ଼୍ଚେ ତର୍ ମରିୟମ ମାଚାତ୍। ହେ ଗାଡ଼୍ଚେଙ୍ଗ୍ ଦାଉଦ ଲାତ୍ରାନି ଯୋଷେପ୍ କାଜିଙ୍ଗ୍ ମାଲା ଆଜି ୱିଜ୍ଦି ମାଚାତ୍। 28ସରଗ୍ଦୁତ୍ ହେ ମରିୟମ ତାକେ ୱାଜି ୱେଚ୍ଚାତ୍, “ଜୱାର୍, ଈଶ୍ୱର ନିଙ୍ଗେଙ୍ଗ୍ ବେସି ଆଶ୍ରିବାଦ୍ କିତ୍ତାନ୍ନା। ହେୱାନ୍ ନି ହୁଦାଙ୍ଗ୍ ମାନାନ୍।” 29ମରିୟମ ସରଗ୍ ଦୁତ୍ତି କାତା ୱେନ୍ଞ୍ଜି ଚାନିଆ ଆଜି ୱେଚ୍ଚାତ୍। ଆରେ ଇ କାତାନି ଅର୍ତ ଇନାକା ଇଞ୍ଜି ହେଦେଲ୍ ମାନେ-ମାନେ ବାବିକିଦେଙ୍ଗ୍ ଲାଗାତାତ୍।
30ସରଗ୍ଦୁତ୍ ହେଦେଲିଙ୍ଗ୍ ୱେଚ୍ଚାତ୍, “ମରିୟମ! ପାଣ୍ଡ୍ରାଆମା। ଇନେସ୍କି ଈଶ୍ୱର ନିଙ୍ଗେଙ୍ଗ୍ ଦୟା କିତ୍ତାନ୍ନା। 31ୱେନା, ଏନେଙ୍ଗ୍ ଗାଗାଡ଼୍ତ ଆହ୍ନାଇ। ଏନେଙ୍ଗ୍ ର ହିମ୍ଣାତିଙ୍ଗ୍ ଜନମ୍ କିନାଇ। ଏପେଙ୍ଗ୍ ହେୱାନ୍ ତର୍ ଯୀଶୁ ଇଟ୍ନାଦେର୍। 32ହେୱାନ୍ ଗାଜା ଆଦିକାର୍ ମାନାୟ୍ ଆନାନ୍। ମାନାୟାର୍ ହେୱାନିଙ୍ଗ୍ ୱିଜୁ ଶାକ୍ତିନିକାନ୍ ଗାଜା ଈଶ୍ୱର ମେହି ଇଞ୍ଜି ଇନାର୍। ଆରେ ମାପୃ ଈଶ୍ୱର ହେୱାନିଙ୍ଗ୍ ତା ଆକଦାଦି ଦାଉଦ ସିଙ୍ଗାସନ ହିନାନ୍। 33ହେୱାନ୍ ଯାକୁବ ଲାତ୍ରାତିଙ୍ଗ୍ ଯୁଗ୍-ଯୁଗ୍ ରାଜାଆଜି ସାସନ୍ କିନାନ୍। ଆରେ ତା ସାସନ୍ କିନି ରାଜି ଇନାୱେଡ଼ାଙ୍ଗ୍ ପା ୱିଜୁତ୍।”
34ମରିୟମ ସରଗ୍ ଦୁତ୍ତିଙ୍ଗ୍ ୱେନ୍ବାତାତ୍, “ଇଦାଙ୍ଗ୍ ଇନେସ୍ କିଜି ଗଟାଆନାତ୍? ଆନେଙ୍ଗ୍ ତ ରଞ୍ଜେଲ୍ ଜୁବା ଗାଡ଼୍ଚେ।” 35ସରଗ୍ଦୁତ୍ ମରିୟମତିଙ୍ଗ୍ ୱେଚ୍ଚାତ୍, “ପବିତ୍ର ଆତ୍ମାନି ଲାଗାୟ୍ ୱାନାତ୍, ଆରେ ୱିଜୁ ଶାକ୍ତିନିକାନ୍ ଗାଜା ଈଶ୍ୱର ହୁଦାଙ୍ଗ୍ ମାନ୍ଗାନାତ୍। ହେଦାଙ୍ଗ୍ କାଜିଙ୍ଗ୍ ହେ ହିମ୍ଣା ପବିତ୍ର ଆଜି ଜନମ୍ ଆନାନ୍। ଆରେ ମାନାୟାର୍ ହେୱାନିଙ୍ଗ୍ ଈଶ୍ୱର ମେହି ଇଞ୍ଜି ପୁନାର୍।
36ହୁଡ଼ା, ନି ହାଙ୍ଗ୍ଦାକାଦେଲ୍ ଏଲିଶାବେତ ପା ଗାଗାଡ଼୍ତ ମାନାତ୍। ହେଦେଲିଙ୍ଗ୍ ମାନାୟାର୍ ବାଞ୍ଜ୍ଣି ଇଞ୍ଜିମାଚାର୍, ହେଦେଲ୍ ନଙ୍ଗୟ୍ ଚଅ ମାସ୍ ଗାଗାଡ଼୍ତ ମାନାତ୍। 37ଈଶ୍ୱର ସବୁ କିଚି କିଦେଙ୍ଗ୍ ଆଡ୍ନାନ୍।” 38ମରିୟମ ୱେଚ୍ଚାତ୍, “ହୁଡ଼ା ଆନେଙ୍ଗ୍ ତ ମାପୃତିଙ୍ଗ୍ ହେବାକିନି ଦାସି। ଏନେଙ୍ଗ୍ ନାଙ୍ଗେଙ୍ଗ୍ ଇନାକା ଇଞ୍ଜ୍ନାଇ, ନା କାଜିଙ୍ଗ୍ ହେଦାଙ୍ଗ୍ନେ ଆୟେତ୍।” ତାପାଚେ ସରଗ୍ଦୁତ୍ ହେବେତାଙ୍ଗ୍ ହସିହାଚାତ୍।
ଏଲିଶାବେତ ହୁଦାଙ୍ଗ୍ ମରିୟମ ଗିଟାଆଦେଙ୍ଗ୍ ୱାତାତ୍।
39ତାପାଚେ ମରିୟମ ବେଗି ହାଞ୍ଜେଙ୍ଗ୍ ରେଡି ଆତାତ୍, ଆରେ ଯିହୁଦା ଜିଲ୍ଲାନି ମାଡ଼ି ମାନି ସହର୍ତାକେ ହସିହାଚାତ୍। 40ହେଦେଲ୍ ଜିକରିୟ ଇଞ୍ଜ ହାଲ୍ଜି ଏଲିଶାବେତତିଙ୍ଗ୍ ଜୁଆର୍ କିତାତ୍। 41ଏଲିଶାବେତ ମରିୟମ ଜୁଆର୍ କିତାକା ୱେଚିଦାପ୍ରେ ତା ଗାଗାଡ଼୍ନି ହିମ୍ଣା ଲେମ୍ତାତ୍। ଏଲିଶାବେତ ପବିତ୍ର ଆତ୍ମାତାକେ ପୁରା ଆତାତ୍।
42ଆରେ ଏଲିଶାବେତ ଗାଜାକାଟ୍ କିଜି ୱେଚ୍ଚାତ୍, “ଏନେଙ୍ଗ୍ ୱିଜୁ କଗ୍ଲେକ୍ତାଙ୍ଗ୍ ବେସି ଆଶ୍ରିବାଦ୍ ପାୟା ଆତାକାୟ୍। ଇନେସ୍କି ଇମ୍ଣି ହିମ୍ଣାତିଙ୍ଗ୍ ଜନମ୍ କିଦେଙ୍ଗ୍ ହାନାୟା, ହେ ହିମ୍ଣାତିଙ୍ଗ୍ ଈଶ୍ୱର ଆଶ୍ରିବାଦ୍ କିତାତ୍ନା। 43ଆନେଙ୍ଗ୍ ବେସି ୱାରି ନା ମାପୃ ତେହି ନାଙ୍ଗେଙ୍ଗ୍ ହୁଡ଼୍ଦେଦେଙ୍ଗ୍ ମାଞ୍ଜ ୱାତାତ୍ନା! 44ଆନେଙ୍ଗ୍ ନି କାତା ୱେଚିଦାପ୍ରେ ନା ଗାଗାଡ଼୍ନି ହିମ୍ଣା ୱାରିତାଙ୍ଗ୍ ଏନ୍ତାତ୍। 45ଏନେଙ୍ଗ୍ ର ବାଗ୍ୟ ନିକାୟ୍!, ଇନେସ୍କି ମାପୃ ନିଙ୍ଗେଙ୍ଗ୍ ଇନା-ଇନାକା ୱେଚ୍ଚାତାନ୍ନା, ହେ ୱିଜୁ କାତା ଗଟାଆନାତ୍ ଇଞ୍ଜି ପାର୍ତି କିତାୟ୍।”
ମରିୟମ ଈଶ୍ୱରତିଙ୍ଗ୍ ଜୟ୍-ଜୟ୍ କିଜି କେର୍କଣ୍ କେର୍ତାତ୍
46ତାପାଚେ ମରିୟମ ୱେଚ୍ଚାତ୍, “ନା ଗରବ୍ ମାପୃତି ଜୟ୍-ଜୟ୍ କିନାତା।
47ନାଙ୍ଗେଙ୍ଗ୍ ଉଦାର୍ କିଦ୍ନାକାନ୍ ଈଶ୍ୱରତାକେ ନା ଜିବୁନ୍ ବେସି ୱାରି।
48ହେୱାନ୍ ତା ହିରୁ ହେବା କିନାକା ହୁଡ଼୍ଜି ପା ନାଙ୍ଗେଙ୍ଗ୍ ଦୟାକିତ୍ତାନ୍। ହେଦାଙ୍ଗ୍ କାଜିଙ୍ଗ୍ ୱିଜୁ ଜାତିନି ମାନାୟାର୍ ନାଙ୍ଗେଙ୍ଗ୍ ର ଆଶ୍ରିବାଦ୍ନି କଗ୍ଲେ ଇଞ୍ଜି ଇଞ୍ଜ୍ନାର୍।
49ଇନେସ୍କି ୱିଜୁତାଙ୍ଗ୍ ସାକ୍ତିକାଟି ଈଶ୍ୱର ନା କାଜିଙ୍ଗ୍ ଗାଜା କାମାୟ୍ ୱିଜୁ କିତାନ୍ନା। ହେୱାନ୍ ତର୍ ପବିତ୍ର।
50ଇମ୍ଣାକାର୍ ହେୱାନିଙ୍ଗ୍ ସନ୍ମାନ୍ କିନାର୍। ହେୱାନିଙ୍ଗ୍ ତା ନାତି ନିର୍ପୁତିତାଙ୍ଗ୍ ଦୟା କିଦ୍ନାନ୍।
51ହେୱାନ୍ ତା ଜାର୍ କେଇଦି ସାକ୍ତି ଚଚ୍ଚାତାନ୍ନା। ହେୱାନ୍ ଆକାର୍ ମାନାୟାରିଙ୍ଗ୍ ଚିନ୍ବିନ୍ କିତାନ୍।
52ହେୱାନ୍ ସାସନ୍ କିନାକାରିଙ୍ଗ୍ ସିଂହାସନ୍ତାକେତାଙ୍ଗ୍ ତାରେନ୍ ଜୁତ୍ତାନ୍। ଆରେ କାକୁଲ୍ତି ମାନାୟାରିଙ୍ଗ୍ ଜପି ନିକ୍ତାନ୍,
53ହେୱାନ୍ ନାସ୍କି ମାନାୟାରିଙ୍ଗ୍ ହାର୍ଦି କାଦିହିଜି ପଟପାଞ୍ଜି କିତାନ୍। ଆରେ ଦନି ମାନାୟାରିଙ୍ଗ୍ ୱାରି କେଇଦାଙ୍ଗ୍ ପକ୍ତାନ୍।
54ମା ଆକଦାଦିର୍ ହିତି କାତାତିଙ୍ଗ୍ ମାନ୍ତ ବାବିକିତାନ୍, ଆରେ ହେୱାନ୍ ତା ହେବାକିନି ଇସ୍ରାଏଲ ଜାତିନି ମାନାୟାରିଙ୍ଗ୍ ସାଇଜ କିଦେଙ୍ଗ୍ ୱାତାନ୍।
55ହେୱାନ୍ ଅବ୍ରାହାମ୍ ଆରେ ତା ହିମ୍ଣା ୱାକ୍ଡ଼ାରିଙ୍ଗ୍ ସବୁୱେଡ଼ାଙ୍ଗ୍ ଦୟାକିନି କାତା ମାନ୍ତ ବାବିକିଜି ହେୱାନ୍ ନଙ୍ଗୟ୍ ଦୟା ଚଚ୍ଚାନ୍।”
56ମରିୟମ ତିନ୍ମାସ୍ ପାତେକ୍ ଏଲିଶାବେତ ହୁଦାଙ୍ଗ୍ ମାଚି ପାଚେ ଜାର୍ ଇଞ୍ଜ ହାଚାତ୍।
ଡୁବନ୍ହିନି ଯୋହନ ଜନମ୍ ଆତି କାତା
57ଏଲିଶାବେତ ଜନମ୍କିନି ସମୟ୍ ଏକିୱାତିଲେ ହେଦେଲ୍ ହିମ୍ଣା ରଞ୍ଜାଙ୍ଗ୍ ଜନମ୍ କିତାତ୍। 58ମାପୃ ଏଲିଶାବେତତିଙ୍ଗ୍ ବେସି ଦୟାକିଜି ର ହିମ୍ଣା ହିତି କାତାତିଙ୍ଗ୍ ତା ପାଡ଼୍ହା ଇଞ୍ଜାକାର୍ ଆରେ ଜାର୍ ପରିବାର୍ ଲକ୍ ପୁଚାର୍। ଆରେ ହେୱାର୍ ତା ଲେକେ ୱାରିୟା ଆତାର୍।
59ଏଚେପାଦ୍ନା ହିମ୍ଣା ଜନମ୍ ଆଜି ଆଟ୍ଦିନ୍ ଆତାତ୍, ହେପାଦ୍ନା ମାନାୟାର୍ ଯିହୁଦିର୍ ବିଦିତାଙ୍ଗ୍ ହେ ହିମ୍ଣାକାଙ୍ଗ୍ ସୁନତ କିଦେଙ୍ଗ୍ ୱାତାର୍। ଆରେ ହେୱାର୍ ତାଞ୍ଜିବା ତର୍ ହିସାବ୍ରେ ହେ ହିମ୍ଣାତିଙ୍ଗ୍ ପା ଜିକରିୟ ତର୍ ହିଦେଙ୍ଗ୍ ଇଚାକିତାର୍। 60ମାତର୍ ତା ତେହି ୱେଚ୍ତାତ୍, “ଆକାୟ୍! ତା ତର୍ ଯୋହନ ହିୟାଟ୍।” 61ମାନାୟାର୍ ଏଲିଶାବେତତିଙ୍ଗ୍ ୱେଚ୍ଚାତ୍, “ମି ଲକ୍ବାକ୍ତାକେ ଇଲେଗ୍ଦି ତର୍ ଇନେରିଙ୍ଗ୍ ପା ଆକାୟ୍।”
62ତାପାଚେ ହେୱାର୍ ତାଞ୍ଜିବାଙ୍ଗ୍ କେଇ ଚଚ୍ଚି ୱେନ୍ବାତାର୍, “ଏନେଙ୍ଗ୍ ନି ହିମ୍ଣାତିଙ୍ଗ୍ ଇନାତର୍ ହିଦେଙ୍ଗ୍ ଇଚା କିନାୟା?” 63ଇଦାଙ୍ଗ୍ ୱେନ୍ଞ୍ଜି ଜିକରିୟ ଲେକିକିଦେଙ୍ଗ୍ ହେୱାରିଙ୍ଗ୍ ରଞ୍ଜାଙ୍ଗ୍ ପାଟା ଏନ୍ତାନ୍। ଆରେ ହେ ପାଟାତାକେ ତା “ତର୍ ଯୋହନ ଇଞ୍ଜି ଲେକିକିତାନ୍।” ଇଦାଙ୍ଗ୍ ହୁଡ଼୍ଜି ୱିଜାକାର୍ ଚାନିଆଆତାର୍।
64ହେଦାପ୍ରେ ଜିକରିୟଙ୍ଗ୍ ୱେନ୍ଦୁଲ୍ ଜେୟାଆତାତ୍। ହେୱାନ୍ କାତାବାର୍ତା କିଦେଙ୍ଗ୍ ଆଡ଼୍ତାନ୍। ହେୱାନ୍ ଈଶ୍ୱରତିଙ୍ଗ୍ ଜୟ୍-ଜୟ୍ କିଦେଙ୍ଗ୍ ଲାଗାତାନ୍। 65ହେପାଦ୍ନା ୱିଜାକାର୍ ପାଡ଼୍ହା ଇଞ୍ଜାକାର୍ ଚାନିଆ ଆଜି ପାଣ୍ଡ୍ରା ଆତାର୍। ଯିହୁଦା ଜିଲ୍ଲାନି ମାଡ଼ିଜପି ମାନି ସହର୍ନି ମାନାୟାର୍ ଇ ୱିଜୁଗଟ୍ନା ବିଷୟରେ କାତାବାର୍ତା କିଦେଙ୍ଗ୍ ଲାଗାତାର୍। 66ଇବେଣ୍ ଇମ୍ଣାକାର୍ ୱେଚାର୍ ହେୱାର୍ ଚାନିଆ ଆଜି ବାବିକିତାର୍, “ଇ ହିମ୍ଣା ଗାଜା ଆଜି ଇନାକା ଆନାନ୍? ଇନେସ୍କି ଈଶ୍ୱର ଶାକ୍ତି ଇ ହିମ୍ଣା ହୁଦାଙ୍ଗ୍ ମାନାତ୍।”
ଜିକରିୟ ଈଶ୍ୱରତିଙ୍ଗ୍ ଜୟ୍-ଜୟ୍ କିତାନ୍
67ତାପାଚେ ଯୋହନ ତାଞ୍ଜିବା ଜିକରିୟଙ୍ଗ୍ ପବିତ୍ର ଆତ୍ମା ଶାକ୍ତି ହିତାତ୍। ଆରେ ହେୱାନ୍ ଈଶ୍ୱର ୱେଚ୍ଚି କାତାତିଙ୍ଗ୍ ୱେଚ୍ଚେଙ୍ଗ୍ ଲାଗାତାନ୍,
68“ଇସ୍ରାଏଲନି ଈଶ୍ୱରତିଙ୍ଗ୍ ଜୟ୍-ଜୟ୍ ଆୟେତ୍, ଇନେସ୍କି ହେୱାନ୍ ତା ମାନାୟାରିଙ୍ଗ୍ ହୁଡ଼୍ଦେଙ୍ଗ୍ ଆରେ ରକ୍ଷା କିଦେଙ୍ଗ୍ ୱାତାନ୍ନା।
69ଈଶ୍ୱର ମାଙ୍ଗେଙ୍ଗ୍ ଉଦାର୍ କିଦ୍ଦେଙ୍ଗ୍ ଦାଉଦ ରାଜା ଲାତ୍ରାତାଙ୍ଗ୍ ରକାନିଙ୍ଗ୍ ସାକ୍ତିକାଟି ଉଦାର୍ କିଦ୍ନାକାନିଙ୍ଗ୍ ପକ୍ତାତାନ୍ନା।
70ଈଶ୍ୱର ଆଗେ ତା ଭବିଷ୍ଯତବକ୍ତାର୍ ଇନେସ୍ ୱେଚ୍ଚି ମାଚାନ୍ ହେଲେକେ ନେ ହେୱାନ୍ କିନାନା।
71ମାଙ୍ଗେଙ୍ଗ୍ ମା ଶାତ୍ରୁତାଙ୍ଗ୍ ଉଦାର୍ କିଦ୍ଦେଙ୍ଗ୍ ରକାନିଙ୍ଗ୍ ସାକ୍ତିକାଟି ଖ୍ରୀଷ୍ଟଙ୍ଗ୍ ମା ଲାଗାୟ୍ ପକ୍ତାତାନ୍ନା। ମାଙ୍ଗେଙ୍ଗ୍ ଗିଣ୍ କିଦ୍ନି ମାନାୟାର୍ତାଙ୍ଗ୍ ହେୱାନ୍ ଉଦାର୍ କିଦ୍ନାନ୍।
72ହେୱାନ୍ ମା ଆକଦାଦିର୍ ହୁଦାଙ୍ଗ୍ କିଜିମାଚି ପାର୍ମାଣ୍ତିଙ୍ଗ୍ ମାନ୍ତ ଏତୁକିଜି ହେୱାନ୍ ମା ଆକଦାଦିରିଙ୍ଗ୍ ଦୟା କିତାନ୍ନା।
73-74ମା ଶାତ୍ରୁତାଙ୍ଗ୍ ରକ୍ଷା କିଦ୍ଦେଙ୍ଗ୍ ମା ଆକଦାଦି ଅବ୍ରାହାମତିଙ୍ଗ୍ ପାର୍ମାଣ୍ କିଜି ମାଚାନ୍, ହେ କାତାତିଙ୍ଗ୍ ହେୱାନ୍ ପୁରା କିତାନ୍ନା। ହେଦାଙ୍ଗ୍ କାଜିଙ୍ଗ୍ ଇନେରିଙ୍ଗ୍ ପାଣ୍ଡ୍ରା ଆୱାଦାଙ୍ଗ୍ ଆସେଙ୍ଗ୍ ଈଶ୍ୱରତିଙ୍ଗ୍ ହେବା କିଦେଙ୍ଗ୍ ଆଡ୍ନାସ୍।
75ହେୱାନ୍ ମାଙ୍ଗେଙ୍ଗ୍ ଈଶ୍ୱରତାକେ ଅସାହାଞ୍ଜ୍ନାନ୍ ଆରେ ୱିଜୁଦିନ୍ ମାଙ୍ଗେଙ୍ଗ୍ ଦରମ୍ ଜିବୁନ୍ କାଟି କିଦେଙ୍ଗ୍ ସାଇଜ କିଦ୍ନାନ୍।
76ଆରେ ଏ ହିମ୍ଣା! ଯୋହନ ପା ୱିଜୁ ଈଶ୍ଵରତାଙ୍ଗ୍ ଗାଜା ଈଶ୍ୱରନି ରକାନ୍ ଭବିଷ୍ଯତବକ୍ତା ଆନାୟ୍। ଆରେ ମାପୃ ୱାନିଦିନ୍ ମାନାୟାରିଙ୍ଗ୍ ଜାଗ୍ରତ୍ କିନି କାଜିଙ୍ଗ୍ ମାପୃ ଆଗେ-ଆଗେ ଡାଣ୍ଡାସି ଲେକେ ଆଜି ହାନାୟ୍।
77ମାନାୟାର୍ ପାପ୍ କେମା ଇନେସ୍କିଜି ଆନାତ୍, ଆରେ ଈଶ୍ୱର ଦଣ୍ଡ୍ତାଙ୍ଗ୍ ଇନେସ୍ ଉଦାର୍ ଗାଟାଆଦ୍ନାତ୍ ହେ ବିଷୟରେ ମାନାୟାରିଙ୍ଗ୍ ବୁଜାଇକିନାଇ।
78ଈଶ୍ୱର ମାଙ୍ଗେଙ୍ଗ୍ ଇଲେକେ ସାଇଜ କିଦ୍ନାନ୍, ଇନେସ୍କି ଈଶ୍ୱର ମାଙ୍ଗେଙ୍ଗ୍ ଦୟା କିତ୍ତାନ୍ନା। ଇଦାଙ୍ଗ୍ କାଜିଙ୍ଗ୍ ୱେଡ଼ା ଇନେସ୍ କିଜି ନିଙ୍ଗ୍ନାତ୍ ହେଲେକେ ସରଗ୍ତାଙ୍ଗ୍ ରକ୍ଷାକିଦ୍ନାକାନ୍ ୱାନାନ୍।
79ଈଶ୍ୱରତିଙ୍ଗ୍ ପୁନ୍ୱାଦାଙ୍ଗ୍ ମାଜ୍ଗାତ ମାନି ମାନାୟ୍, ଆରେ ହାଃଦେଙ୍ଗ୍ ପାଣ୍ଡ୍ରାଆନି ମାନାୟାରିଙ୍ଗ୍ ହେୱାନ୍ ର ଅଜଡ଼୍ଲେକେ ଆନାନ୍। ହେୱାନ୍ ମାଙ୍ଗେଙ୍ଗ୍ ଶାନ୍ତିତାଙ୍ଗ୍ ଜିବୁନ୍ କାଟି କିଦେଙ୍ଗ୍ ସାଇଜ କିଦ୍ନାନ୍।”
80ହେ ଯୋହନ ଈଶ୍ୱରଆତ୍ମା ସାକ୍ତି ପାୟାଆଜି ଦିରେ-ଦିରେ ଗାଜା ଆତାନ୍। ଆରେ ଇସ୍ରାଏଲ ଜାତିନି ମାନାୟାର୍ତାକେ ଶୁଣାୟ୍ କିୱିପାତେକ୍ ଟାଙ୍ଗ୍ରାବାହାତ ମାଚାନ୍।
Currently Selected:
ଲୁକ 1: PEGNT
Highlight
Share
Copy
Want to have your highlights saved across all your devices? Sign up or sign in
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
