ମାର୍କ 16
16
ଯୀଶୁ ହାଜି ଆରେରଗ ଯିବୁନ୍ ଆତାନ୍
(ମାଥି. ୨୮:୧-୮; ଲୁକ. ୨୪:୧-୧୨; ଯୋହନ. ୨୦:୧-୧୦)
1ଯିହୁଦିର୍ ଜମ୍ନିଦିନ୍ ଆର୍କାତ୍ ନାଞ୍ଜିଙ୍ଗ୍ ରଇବାର୍ ନାଞ୍ଜ୍ ନାଣାଙ୍ଗେ ମଗ୍ଦଲିନି ସହର୍ନି ମରିୟମ, ଆରେ ହିରୁ ଯାକୁବ ଆରେ ଯସି ତେହି ମରିୟମ ଆରେ ଶଲମି ବାସ୍ନା ଚିକାଣ୍ କଡ଼୍ତିକ୍, ଇନେସ୍କି ହେୱେକ୍ ହାଲ୍ଜି ଯୀଶୁ ହାଃତି ଗାଗାଡ଼୍ତିଙ୍ଗ୍ ଇତ୍ପେଦେଙ୍ଗ୍ ଆଡ୍ନିକ୍। 2ରଇବାର୍ ନାଞ୍ଜ୍ ନାଣାଙ୍ଗେ ୱେଡ଼ାହତିହିଙ୍ଗ୍ ହେବେ ହେ କଗ୍ଲେକ୍ ମାଡ଼ା ଇଡ଼୍ତି ଦୁଗେର୍ତାକେ ଏକିତିକ୍। 3ହେୱେକ୍ ଜାର୍-ଜାର୍ ୱେଚ୍ପାଆଜି ମାଚିକ୍, “ଇନେର୍ ମା କାଜିଙ୍ଗ୍ ଦୁଗେର୍ତ ଡାବାଇ କିତି ଗାଜାକାଲ୍ ଗୁତ୍ତି ହିଦ୍ନାନ୍?” 4ମାତର୍ ହେୱେକ୍ ପାରା ନିପଣ୍ ହୁଡ଼୍ତିକ୍ ଯେ, ହେ ଦୁଗେର୍ ମୁମ୍ଦି ଗାଜାକାଲ୍ ଦେହା ଗୁଚାଆତାତ୍ନା। 5ହେୱେକ୍ ପାରାତାକେ ଏକିସ୍ ବିତ୍ରେ ହଟିକ୍, ଆରେ ହେୱେକ୍ ର ବେଣ୍ଡିଆ କାଡ଼୍ଦେ ଡ଼ିଞ୍ଜ୍ନି ହେନ୍ଦ୍ରା ଉସ୍ପିସ୍ ତା ତିନି ବାଗାୟ୍ କୁଚି ମାଚାକା ହୁଡ଼୍ଜି କାବା ଆତିକ୍। 6ହେବେ ହେ ସରଗ୍ଦୁତ୍ କଗ୍ଲେକାଙ୍ଗ୍ ୱେଚ୍ଚାନ୍, “ଚାନିଆ ଆମାଟ୍! ଏପେଙ୍ଗ୍ କୃଶକାଟ୍ତାକେ ହାଃତାକାନିଙ୍ଗ୍ ନାଜରିତ ସହର୍ନି ଯୀଶୁଙ୍ଗ୍ ଦାହ୍ନାଦେରା। ଯୀଶୁ ନିଙ୍ଗ୍ତାନ୍ନା, ହେୱାନ୍ ଇବେ ହିଲେନ୍। ହୁଡ଼ାଟ୍, ଇ ବାହାତାକେ ହେୱାର୍ ଯୀଶୁଙ୍ଗ୍ ଇଡ଼୍ଜି ମାଚାର୍। 7ନଙ୍ଗୟ୍ ଏପେଙ୍ଗ୍ ହାଲ୍ଜି ପିତର ଆରେ ଜେକନି ଚେଲାହିରିଙ୍ଗ୍ ୱେଚାଟ୍, ‘ଯୀଶୁ ମି ଆଗେ ଗାଲିଲୀ ଜିଲ୍ଲାତାକେ ହାନାନା। ହେୱାନ୍ ହାଃୱିଆଗେ ମିଙ୍ଗେଙ୍ଗ୍ ଇନେସ୍ ଲେକେ ୱେଚ୍ଚି ମାନ୍ଚାନ୍, ହେଲେକେ ଏପେଙ୍ଗ୍ ହେୱାନିଙ୍ଗ୍ ହେବେ ହୁଡ଼୍ନାଦେର୍।’ ” 8ହେୱେକ୍ ବେଣ୍ ୱେଚି ପାଚେ ଦୁଗେର୍ ପିସ୍ତି ହନ୍ଞ୍ଚି ହାଚିକ୍, ହେୱେକ୍ ପାଣ୍ଡ୍ରୁତିଙ୍ଗ୍ ତ୍ରିଗ୍ଜି କାବା ଆବିମାଚିକ୍, ହେୱେକ୍ ହାନିହିଙ୍ଗ୍ ହାଜ୍ଦ ଇନେରିଙ୍ଗ୍ ପା ଇନାକା ୱେଚ୍ୱିତିକ୍। ଇନେସ୍କି ହେୱେକ୍ ପାଣ୍ଡ୍ରାଆଜି ମାଚିକ୍।
ଯୀଶୁ ମରିୟମତିଙ୍ଗ୍ ଚଞ୍ଜିଆତାନ୍
(ମାଥି. ୨୮:୯,୧୦; ଯୋହନ. ୨୦:୧୧-୧୮)
9ରଇବାର୍ ନାଞ୍ଜ୍ ନାଣାଙ୍ଗେ ଯୀଶୁ ହାଃଜି ନିଙ୍ଗ୍ତି ପାଚେ ମଗ୍ଦଲିନି ସହରନି ମରିୟମତିଙ୍ଗ୍ ପାର୍ତୁମ୍ ଚଞ୍ଜିଆତାନ୍, ଇନେରିଙ୍ଗ୍ ଆଗେ ସାତ୍ଗଟା ବୁତ୍ଆତ୍ମାକାଙ୍ଗ୍ ପିହିକିଜି ମାଚାନ୍। 10ମଗ୍ଦଲିନି ସହର୍ନି ମରିୟମ ହାଲ୍ଜି ଯୀଶୁ ଚେଲାହିରିଙ୍ଗ୍ ୱେଚ୍ଚାତ୍। ହେୱାର୍ ଯୀଶୁ ହାଃତାକା ଏତ୍କିଜି ଦୁକ୍ଆଜି ଆଡ଼୍ବି ମାଚାର୍। 11ମଗ୍ଦଲା ମରିୟମ ହେୱାରିଙ୍ଗ୍ ୱେଚ୍ଚାତ୍, “ଯୀଶୁ ଜିବୁନ୍ ମାନାନ୍, ଆନେଙ୍ଗ୍ ନଙ୍ଗୟ୍ ହୁଡ଼୍ତାଙ୍ଗ୍।” ମାତର୍ ହେୱାର୍ ହେ ବେଣ୍ ୱେନ୍ଞ୍ଜି ପାର୍ତି କିୱାତାର୍।
ଯୀଶୁ ରିୟାର୍ ଚେଲାହିରିଙ୍ଗ୍ ଚଞ୍ଜିଆତାନ୍
(ଲୁକ. ୨୪:୧୩-୩୫)
12ଇ ୱିଜୁଗଟ୍ନା ଆତିପାଚେ ଯୀଶୁ ଚେଲାହିର୍ ରିୟାର୍ ତା ନାସ୍ ହାନିହିଙ୍ଗ୍ ହେୱାନ୍ ଅଲ୍ଗା ମୁର୍ତି ଆଜି ହେୱାରିଙ୍ଗ୍ ଚଞ୍ଜିଆତାନ୍, 13ହେ ରିୟାର୍ ଚେଲାହିର୍ ଯୀଶୁଙ୍ଗ୍ ଚିନ୍କିତିପାଚେ ହେୱାର୍ ଲେଉଟା ଆଜି ହାଲ୍ଜି। ଅଲ୍ଗାଚେଲାରିଙ୍ଗ୍ ୱେଚ୍ଚାର୍, ମାତର୍ ହେୱାର୍ ବେଣ୍ ଇନେର୍ ପା ପାର୍ତି କିୱାତାର୍।
ମୁଡ଼୍ଆଦେସ୍
(ମାଥି. ୨୮:୧୬-୨୦; ଲୁକ. ୨୪:୩୬-୪୯; ଯୋହନ. ୨୦:୧୯-୨୩; କାମାୟ୍. ୧:୬-୮)
14ତାପାଚେ ଏଗାର୍ଜାଣ୍ ବାଚିକିତି ଚେଲାହିର୍ ଚିଞ୍ଜେଙ୍ଗ୍ କୁଚ୍ଚିହିଙ୍ଗ୍ ଯୀଶୁ ହେୱାରିଙ୍ଗ୍ ଚଞ୍ଜିଆତାନ୍। ଆରେ ହେୱାନ୍ ହେୱାର୍ ପାର୍ତି କିୱାକା ଆରେ ମାନ୍ତି ଆଟ୍ୱା କାଜିଙ୍ଗ୍ ହେୱାରିଙ୍ଗ୍ କେତ୍ତାନ୍। ଇନେସ୍କି ଇମ୍ଣାକାର୍ ହେୱାନ୍ ହାଃଜି ଆରେରଗ ନିଙ୍ଗ୍ତାକା ହୁଡ଼୍ଜି ମାଚାର୍, ହେୱାର୍ ବେଣ୍ତିଙ୍ଗ୍ ହେୱାର୍ ପାର୍ତି କିୱାଦାଙ୍ଗ୍ ମାଚାର୍। 15ଆରେ, ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ୱିଜୁ ଜଗତ୍ନିପଣ୍ ହାଲ୍ଜି ୱିଜୁ ମାନାୟାରିଙ୍ଗ୍ ହାର୍ଦିକାବୁର୍ ଶୁଣାୟ୍ କିୟାଟ୍। 16ଇନେର୍ ନା ହାର୍ଦିକାବୁର୍ତିଙ୍ଗ୍ ପାର୍ତିକିନାର୍ ଆରେ ଡୁବନ୍ ଆନାର୍। ହେୱାନ୍ ରକ୍ଷା ପାୟା ଆନାନ୍, ମାତର୍ ଇନେର୍ ପାର୍ତି କିଉନ୍, ହେୱାନିଙ୍ଗ୍ ଈଶ୍ୱର ଦଣ୍ଡ୍ ହିନାନ୍। 17ଇମ୍ଣାକାର୍ ନାବେ ପାର୍ତିକିନାର୍, ହେୱାର୍ ଇଲେଗ୍ଦି ଚାନିଆଆନି କାମାୟ୍ କିଦେଙ୍ଗ୍ ଆଡ୍ନାର୍, ନା ତର୍ଦାଙ୍ଗ୍ ବୁତ୍ଆତ୍ମାକାଙ୍ଗ୍ ପିହିକିନାର୍, ହେୱାର୍ ପୁନି-ପୁନି ବାଷା ବେଣ୍ ୱେଚ୍ନାର୍। 18ଆରେ ହେୱାନ୍ ବିସ୍ମାନି ରାଚ୍ ଆସ୍ତିସ୍ ପା ହେୱାନିଙ୍ଗ୍ ଆନେଙ୍ଗ୍ ରକ୍ଷା କିନାଙ୍ଗ୍। ଆରେ ବିସ୍ ଉଟିସ୍ ପା ହେୱାର୍ ନଷ୍ଟ ଆଉର୍, ହେୱାର୍ ବେମାର୍ ଆତାକାର୍ ଜପି କେଇ ଇଟ୍ନାର୍, ହେ ବେମାର୍ ଆତାକାର୍ ନା ତର୍ଦାଙ୍ଗ୍ ହେୱାର୍ ହାର୍ ଆନାର୍।”
ଯୀଶୁ ସରଗ୍ତାକେ ହାଚାନ୍
(ଲୁକ. ୨୪:୫୦-୫୩; ଯୋହନ. ୧:୯-୧୧)
19ମାପୃ ଯୀଶୁ ଇ ୱିଜୁବେଣ୍ ତା ଚେଲାହିରିଙ୍ଗ୍ ୱେଚ୍ଚି ପାଚେ ଈଶ୍ୱର ଯୀଶୁଙ୍ଗ୍ ସରଗ୍ତାକେ ଅସିହାଚାନ୍, ଆରେ ହେୱାନ୍ ଈଶ୍ୱର ହୁଦାଙ୍ଗ୍ ସାସନ୍ କିଦେଙ୍ଗ୍ ତା ତିନାବାଗାୟ୍ କୁଚ୍ଚାନ୍। 20ତାପାଚେ ଚେଲାହିର୍ ୱିଜୁ ବାହାତାକେ ହାଲ୍ଜି ମାନାୟାରିଙ୍ଗ୍ ହାର୍ଦିକାବୁର୍ ଶୁଣାୟ୍ କିତାର୍, ମାପୃ ହେୱାରିଙ୍ଗ୍ ସାଇଜ କିତାନ୍, ଆରେ ଚାନିଆଆନି କାମାୟ୍ କିଜି ହେୱାନ୍ କାତା ସତ୍ ଇଞ୍ଜି ପାର୍ମାଣ୍ କିତାନ୍।
Currently Selected:
ମାର୍କ 16: PEGNT
Highlight
Share
Copy
Want to have your highlights saved across all your devices? Sign up or sign in
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
