ଲୁକ 6
6
ଜମ୍ନିଦିନ୍ତ ଯୀଶୁତି ଆଦିକାର୍ ମାନାତ୍
(ମାଥି. ୧୨:୧-୮; ମାର୍କ. ୨:୨୩-୨୮)
1ଦିନେକ୍ ଯିହୁଦିର୍ ଜମ୍ନିଦିନ୍ ନାଞ୍ଜିଙ୍ଗ୍ ଯୀଶୁ ଆରେ ତା ଚେଲାହିର୍ ତାସ୍ ୱିତ୍ତି ଜମି ନିପଣ୍ ହାଲ୍ଜି ମାଚାର୍। ତା ଚେଲାହିର୍ ତାସ୍ନି କେରା ନାଡ଼୍ଚି କେଇଦାଙ୍ଗ୍ ରାମ୍ଦାୟ୍ କିଜି ତିନ୍ଞ୍ଜି ମାଚାର୍। 2ହେଦାଙ୍ଗ୍ କାଜିଙ୍ଗ୍ ଯିହୁଦି ଦରମ୍ନି ପାରୁସିଦଳ୍ନି ମାନାୟାର୍ ୱେଚ୍ଚାର୍, “ଯିହୁଦିର୍ ଜମ୍ନିଦିନ୍ ନାଞ୍ଜିଙ୍ଗ୍ ଇମ୍ଣି କାମାୟ୍ ପା କିଦେଙ୍ଗ୍ ବିଦି ହିଲେତ୍, ହେଦାଙ୍ଗ୍ ଏପେଙ୍ଗ୍ ଇନା କିଦେଙ୍ଗ୍ କିନାଦେରା?”
3ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ସାସ୍ତର୍ତାକେ ଇବିଷୟ ପଡ଼ି କିୱାତାଦେର୍ନା କି? ଦାଉଦ ରାଜା ଆରେ ତା ହାଙ୍ଗ୍ଦାକାର୍ତାକେ ଚିଞ୍ଜେଙ୍ଗ୍ ଇନାକା ହିଲିହିଙ୍ଗ୍, ହେପାଦ୍ନା ହେୱାନ୍ ଇନାକା କିଜି ମାଚାନ୍? 4ଦାଉଦ ଈଶ୍ୱର ମାନି ପୁଟ୍ତ ହାଚାନ୍। ଆରେ ଈଶ୍ୱର ହେବାକିନି ପୁଜାରି ଈଶ୍ୱରତିଙ୍ଗ୍ ପୁଜାକିତି ରୁଟିତିଙ୍ଗ୍ ହେୱାନ୍ ଚିଚାନ୍, ଆରେ ତା ହାଙ୍ଗ୍ଦାକାରିଙ୍ଗ୍ ପା ଚିଞ୍ଜେଙ୍ଗ୍ ହିତାନ୍। ଇମ୍ଣାକା ଈଶ୍ୱରତିଙ୍ଗ୍ ପୁଜାକିତି ରୁଟିତିଙ୍ଗ୍ ଈଶ୍ୱର ହେବାକିନି ମୁଡ଼୍ଦି ପୁଜାରିର୍ନେ ତିନି ଦରକାର୍।” 5ଆରେରଗ ଯୀଶୁ ପାରୁସିଦଳ୍ନି ମାନାୟାରିଙ୍ଗ୍ ୱେଚ୍ଚାନ୍, “ଯିହୁଦିର୍ ଜମ୍ନିଦିନ୍ ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣାତି ଆଦିକାର୍ ମାନାତ୍।”
ଯୀଶୁ ର କେଇ ହିର୍କଲ୍ ଆହିଆ ଆତାକାନିଙ୍ଗ୍ ହାର୍କିତାନ୍
(ମାଥି. ୧୨:୯-୧୪; ମାର୍କ. ୩:୧-୬)
6ଆରେ ର ଜମ୍ନିଦିନ୍ ଯୀଶୁ ଯିହୁଦିର୍ ପାର୍ତାନା ଇଞ୍ଜ ହିକ୍ଷାହିଦେଙ୍ଗ୍ ହାଚାନ୍। ହେବେ ତିନା କେଇଦିଙ୍ଗ୍ ହିର୍କଲ୍ ଆହିଆତି ମାନାୟ୍ ମାଚାନ୍। 7ହେପାଦ୍ନା କେତେକ୍ ପଣ୍ଡିତାର୍ ଆରେ ପାରୁସିଦଳ୍ ଯୀଶୁଙ୍ଗ୍ ଦସ୍ ଆସ୍ତେଙ୍ଗ୍ ଉପାୟ୍ ଡେକ୍ଚି ମାଚାର୍। ହେଦାଙ୍ଗ୍ କାଜିଙ୍ଗ୍ ଯୀଶୁ ଜମ୍ନିଦିନ୍ତ ହେ କେଇଦ ହିର୍କଲ୍ ଆହିଆ ଆତାକାନିଙ୍ଗ୍ ହାର୍କିନାନ୍ କି ଇଞ୍ଜି ମାନ୍ତ ବାବିକିଜି ମାଚାର୍। ଆରେ ହେୱାର୍ ଯୀଶୁଙ୍ଗ୍ ଇଟ୍କାଡ଼୍ କିଜି ହୁଡ଼୍ଜି ମାଚାର୍। 8ଯୀଶୁ ହେୱାର୍ ମାନ୍ତି ବେଣ୍ ପୁଚାନ୍। ଆରେ ଇମ୍ଣାକାନିଙ୍ଗ୍ ତା କେଇଦିଙ୍ଗ୍ ହିର୍କଲ୍ ଇଡ଼୍ଜି ମାଚାତ୍ ହେୱାନିଙ୍ଗ୍ ଯୀଶୁ ୱେଚ୍ଚାନ୍, “ୱା, ୱିଜାର୍ ମାଦି ନିଲା।” ହେବେତାଙ୍ଗ୍ ହେୱାନ୍ ୱିଜାର୍ ମାଦି ନିଲ୍ତାନ୍।
9ତାପାଚେ ଯୀଶୁ ହେ ପଣ୍ଡିତାର୍ ଆରେ ପାରୁସିଦଳ୍ ନିକାରିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ମିଙ୍ଗେଙ୍ଗ୍ ର ପ୍ରଶ୍ନ ୱେନ୍ବାଆଦ୍ନାଙ୍ଗ୍, ‘ଯିହୁଦିର୍ ଜମ୍ନିଦିନ୍ ନାଞ୍ଜିଙ୍ଗ୍ ଇନା କାମାୟ୍ କିନି ବିଦି ମାନାତ୍? ହାର୍ କାମାୟ୍ କି ନାସ୍କି ବାନ୍ୟା କାମାୟ୍ କିନାସ୍? ଆରେ ମାନାୟାର୍ ଜିବୁନ୍ ଉଦାର୍ କି ନାସ୍କି ଜିବୁନ୍ ଆରାଇ କିନାସ୍? ଇବେଣ୍ ୱେନ୍ଞ୍ଜି ହେୱାର୍ ଚିମ୍ରା ଆଜି ମାଚାର୍।’ ” 10ତାପାଚେ ଯୀଶୁ ୱିଜାକାରିଙ୍ଗ୍ ଚାରିବେଣ୍ତାଙ୍ଗ୍ ହୁଡ଼୍ଜି ହେ କେଇଦ ହିର୍କଲ୍ ଆହିଆତି ମାନାୟ୍ତିଙ୍ଗ୍ ୱେଚ୍ଚାନ୍, “ହେ ହିର୍କଲ୍ ଆସ୍ତିକେଇ ଲାମାୟ୍ କିଦା।” ହେୱାନ୍ ତା ହିର୍କଲ୍ ଆସ୍ତିକେଇ ଲାମାୟ୍ କିତାନ୍, ଆରେ ହେ ହିର୍କଲ୍ ଆସ୍ତିକେଇ ହାର୍ ଆତାତ୍। 11ମାତର୍ ପାରୁସିଦଳ୍ ଆରେ ପଣ୍ଡିତାର୍ ବେସି ରିସାଆତାର୍। ଆରେ ଯୀଶୁଙ୍ଗ୍ ଇନାକା କିନାସ୍ ହେ ବିଷୟରେ ଜାର୍-ଜାର୍ବିତ୍ରେ କାତାବାର୍ତା ଆତାର୍।
ଯୀଶୁ ବାରଜାଣ୍ ଚେଲାହିରିଙ୍ଗ୍ ବାଚିକିତାନ୍
(ମାଥି. ୧୦:୧-୪; ମାର୍କ. ୩:୧୩-୧୯)
12ଦିନେକ୍ ଯୀଶୁ ପାର୍ତାନା କିଦେଙ୍ଗ୍ ମାଡ଼ିଜପି ହାଚାନ୍। ହେୱାନ୍ ହେବେ ଈଶ୍ୱରତାକେ ହାରା ରାତି ପାର୍ତାନା କିତାନ୍। 13ଅଜଡ଼୍ ଆତିଲେ ଯୀଶୁ ୱିଜାର୍ ଚେଲାରିଙ୍ଗ୍ ଲାଗେ କୁକ୍ତାନ୍। ଆରେ ହେୱାର୍ ବିତ୍ରେତାଙ୍ଗ୍ ବାରଜାଣ୍ତିଙ୍ଗ୍ ବାଚିକିତାନ୍। ଆରେ ହେୱାରିଙ୍ଗ୍ ତା ବାଚିକିତି ଚେଲାଇଞ୍ଜି ତର୍ ହିତାନ୍।
14ଯୀଶୁ ବାଚିକିତି ହେ ବାରଜାଣ୍ ଚେଲାର୍ ତର୍ ଇଲେକେ: ଶିମୋନତିଙ୍ଗ୍ ପିତର ଇଞ୍ଜି ଆରେ ର ତର୍ ହିତାନ୍, ଆରେ ତା ଟଣ୍ଡାହି ଆନ୍ଦ୍ରିୟ, ଜେବଦି ମେହି ଯାକୁବ ଆରେ ତା ଟଣ୍ଡାହି ଯୋହନ୍, ପିଲିପ ଆରେ ବାର୍ଥଲମି, 15ଥୋମା, ମାଥିଉ, ଆଲ୍ପି ମେହି ଯାକୁବ ଆରେ ଦେସ୍ତିଙ୍ଗ୍ ହେବାକିନି ଶିମୋନ, 16ଯାକୁବ ମେହି ଯିହୁଦା ଆରେ ଇଷ୍କାରିତିୟ ଯିହୁଦା ଇୱାନ୍ ଯୀଶୁଙ୍ଗ୍ ଶାତ୍ରୁ କେଇଦ ଆହିକିଜି ମାଚାନ୍।
ଯୀଶୁ ହିକ୍ଷା ହିତାନ୍ ଆରେ ବେସିହେନି ମାନାୟାରିଙ୍ଗ୍ ହାର୍କିତାନ୍
(ମାଥି. ୪:୨୩-୨୫)
17ଯୀଶୁ ଆରେ ତା ଚେଲାହିର୍ ମାଡ଼ିତାଙ୍ଗ୍ ଜୁଜି ର ହାମାନ୍ ବାହାତ ନିଲ୍ତାର୍। ଆରେ ହେ ବାହାତାକେ ୱାଜିମାଚି ଜେକନି ଚେଲାର୍, ଆରେ ଯିହୁଦା ଜିଲ୍ଲା ଆରେ ଯିରୁଶାଲାମ ସହର୍ ଆରେ ସୋର୍ ସହର୍ ଆରେ ସିଦନ୍ ସହର୍ନି ହାମ୍ଦୁର୍ ଲାଗାୟ୍ନି ନାସ୍କୁନିକାର୍ ପା ବେସିହେନି ମାନାୟ୍ ରୁଣ୍ଡାଆଜି ମାଚାର୍। 18ହେୱାର୍ ଯୀଶୁ ହିକ୍ଷା ୱେଞ୍ଜେଙ୍ଗ୍ ଆରେ ହେୱାର୍ ଜାର୍ ରଗ୍ତାଙ୍ଗ୍ ହାର୍ ଆଦେଙ୍ଗ୍ ତା ଲାଗାୟ୍ ୱାଜିମାଚାର୍। ଯୀଶୁ ବୁତ୍ଆତ୍ମା ଡୁୟାଆଜି କଷ୍ଟ ପାୟଆତାକାରିଙ୍ଗ୍ ପା ହାର୍କିତାନ୍। 19ଯୀଶୁଙ୍ଗ୍ ଆସ୍ପିତିସ୍ ହାର୍ଆନି ଶାକ୍ତିତିଙ୍ଗ୍ ପୁନ୍ଞ୍ଜି ବେସିହେନି ମାନାୟ୍ ହେୱାନିଙ୍ଗ୍ ଆସ୍ପେଦେଙ୍ଗ୍ ତିବ୍ଗା ତିବ୍ଗି ଆଜି ମାଚାର୍।
ଇମ୍ଣାକାର୍ ଈଶ୍ୱରତାଙ୍ଗ୍ ଆଶ୍ରିବାଦ୍ ପାୟାଆନାର୍
(ମାଥି. ୫:୧-୧୨)
20ଯୀଶୁ ଚେଲାହିର୍ ନିପଣ୍ ହୁଡ଼୍ଜି ୱେଚ୍ଚାନ୍, “ଇମ୍ଣାକାନ୍ ଗରିବ୍ ଆଜି ମାନ୍ଗାନାନ୍ ହେୱାନ୍ ଆଶ୍ରିବାଦ୍ ପାୟାଆନାର୍। ଇନେସ୍କି ଈଶ୍ୱର ସାସନ୍ କିନି ରାଜି ହେୱାର୍ତି। 21ନଙ୍ଗୟ୍ ନାସ୍କି ନିକାର୍ ହେୱାର୍ ଆଶ୍ରିବାଦ୍ ପାୟାଆନାର୍। ଇନେସ୍କି ଈଶ୍ୱର ମିଙ୍ଗେଙ୍ଗ୍ ହାର୍ଦି କାଦିହିଜି ପଟ ପାଞ୍ଜିକିଦ୍ନାନ୍। ଆରେ ନଙ୍ଗୟ୍ ଆଡ଼୍ବାନାର୍ ହେୱାର୍ ଆଶ୍ରିବାଦ୍ ପାୟାଆନାର୍। ଇନେସ୍କି ଈଶ୍ୱର ମିଙ୍ଗେଙ୍ଗ୍ ୱାରି ହିଦ୍ନାନ୍।
22ଆନେଙ୍ଗ୍, ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା ନା କାଜିଙ୍ଗ୍ ଇନାୱେଡ଼ାଙ୍ଗ୍ ମାନାୟାର୍ ମିଙ୍ଗେଙ୍ଗ୍ ଗିଣ୍ କିଦ୍ନାର୍। ଆରେ ମିହୁଦାଙ୍ଗ୍ ମେହାଆଦୁର୍, ମି ବିଷୟରେ ବାନ୍ଯା କାତା ୱେଚ୍ଚି ମିଙ୍ଗେଙ୍ଗ୍ ଇନସ୍ତା କିଦ୍ନାର୍, ଲାଗିଙ୍ଗ୍ ଏପେଙ୍ଗ୍ ଆଶ୍ରିବାଦ୍ ପାୟାଆନାଦେର୍। 23ହେପାଦ୍ନା ଏପେଙ୍ଗ୍ ୱାରିତାଙ୍ଗ୍ ଏନ୍ଦାଟ୍। ଇନେସ୍କି ମି କାଜିଙ୍ଗ୍ ସରଗ୍ତାକେ ଗାଜା ପୁରଷ୍କାର୍ ମାନାତ୍। ହେୱାର୍ ଆକଦାଦିରିଙ୍ଗ୍ ଭବିଷ୍ଯତବକ୍ତାଙ୍ଗ୍ ହେଲେକେ ଇନସ୍ତାକିଜି ମାଚାର୍।”
ଈଶ୍ୱରନି ହିମ୍ଣା ଲେକେ ଆଜି ଜିବୁନ୍ କାଟିକିୟାଟ୍
(ମାଥି. ୫:୩୮-୪୮; ୭:୧୨)
24ଆରେରଗ ଯୀଶୁ ୱେଚ୍ଚାନ୍, “ଏ ହାଉକାର୍ କାଦେର୍, ୱେନାଟ୍! ନଙ୍ଗୟ୍ ଏପେଙ୍ଗ୍ ଆରାମ୍ସେ ଜିବୁନ୍ କାଟି କିନାଦେରା। ମାତର୍ ଦିନ୍ ୱାନାତ୍ ଏପେଙ୍ଗ୍ ଗାଜା ଦୁକ୍ ପାୟାଆନାଦେର୍। 25ଇମ୍ଣାକାଦେର୍ ନଙ୍ଗୟ୍ ପଟ ପାଞ୍ଜୁ-ପାଞ୍ଜୁ ତିନାଦେରା ୱେନାଟ୍! ଦିନ୍ ୱାନାତା ଏପେଙ୍ଗ୍ ବେସିଦୁକ୍ ଆରେ ନାସ୍କି ମାନାଦେର୍। ନଙ୍ଗୟ୍ ଗାଇନାକାଦେର୍ ୱେନାଟ୍! ଦିନ୍ ୱାନାତା ଏପେଙ୍ଗ୍ ବେସି ଦୁଃକ୍ ପାୟାଆନାଦେର୍ ଆରେ ଆଡ଼୍ବାନାଦେର୍।
26ଏଚେପାଦ୍ନା ମାନାୟାର୍ ମିଙ୍ଗେଙ୍ଗ୍ ହାର୍ ଇଞ୍ଜି ୱେଚ୍ଚାନାର୍। ହେପାଦ୍ନା ଏପେଙ୍ଗ୍ ପୁନାଟ୍ କି ମିଙ୍ଗେଙ୍ଗ୍ ବେସିଦୁକ୍ ୱାନାତ୍। ଇନେସ୍କି ମି ଆକଦାଦିର୍ ମିଚ୍ ଭବିଷ୍ଯତବକ୍ତାରିଙ୍ଗ୍ ପା ହାର୍ ଇଞ୍ଜି ୱେଚ୍ଚି ମାଚାର୍।”
ମି ଶାତ୍ରୁରିଙ୍ଗ୍ ଲାଡ୍ କିୟାଟ୍
(ମାଥି. ୫:୩୮-୪୮; ୭:୧୨)
27ଯୀଶୁ ତା କାତା ୱେନାକାରିଙ୍ଗ୍ ୱେଚ୍ଚାନ୍, “ୱେନାଟ୍! ଏପେଙ୍ଗ୍ ମି ଶାତ୍ରୁରିଙ୍ଗ୍ ଲାଡ୍ କିୟାଟ୍। ମିଙ୍ଗେଙ୍ଗ୍ ଇମ୍ଣାକାର୍ ଗିଣ୍ କିଦ୍ନାରା, ହେୱାରିଙ୍ଗ୍ ଏପେଙ୍ଗ୍ ଗିଣ୍ କିମାଟ୍। 28ଆରେ ଇମ୍ଣାକାର୍ ମିଙ୍ଗେଙ୍ଗ୍ ଅବିଶାପ୍ ହିଦ୍ନାରା, ହେୱାରିଙ୍ଗ୍ ଆଶ୍ରିବାଦ୍ କିୟାଟ୍। ଇମ୍ଣାକାନ୍ ମିଙ୍ଗେଙ୍ଗ୍ ଅପ୍ମାନ୍ ହିଦ୍ନାରା, ଏପେଙ୍ଗ୍ ହେୱାର୍ କାଜିଙ୍ଗ୍ ଈଶ୍ୱରତାକେ ପାର୍ତାନା କିୟାଟ୍।
29ଇମ୍ଣାକାନ୍ ର କୁର୍ୱାତ ଚାପ୍ଡ଼ା ଇଡ଼୍ଦାନାର୍, ହେୱାନିଙ୍ଗ୍ ଆରେ ର କୁର୍ୱା ପା ଚଚ୍ଚି ହିୟାଟ୍। ଇମ୍ଣି ମାନାୟ୍ ମି ଆଙ୍ଗି ଅତାନ୍ନା ହେୱାନିଙ୍ଗ୍ ମି ପେଣ୍ଟ ପା ହିୟାଟ୍। 30ଯଦି ଇନେର୍ ମିଙ୍ଗେଙ୍ଗ୍ ଇନାକା ଏନ୍ତାନାର୍, ହେୱାନିଙ୍ଗ୍ ହିଆଟ୍। ଯଦି ଇମ୍ଣି ମାନାୟ୍ ମିଦି ଇଚ୍କେ ଇନାକା ଅନାର୍, ହେଦାଙ୍ଗ୍ତିଙ୍ଗ୍ ଏପେଙ୍ଗ୍ ହେୱାନିଙ୍ଗ୍ ଏନ୍ମାଟ୍।
31ଜେକନି ମାନାୟାର୍ ମିଙ୍ଗେଙ୍ଗ୍ ସନ୍ମାନ୍ ପାୟାଆନାଙ୍ଗ୍ ଇଞ୍ଜି ଇଚା କିନାଦେର୍, ଏପେଙ୍ଗ୍ ପା ହେୱାନିଙ୍ଗ୍ ହେଲେକେ ସନ୍ମାନ୍ କିୟାଟ୍। 32ଇମ୍ଣାକାର୍ ମିଙ୍ଗେଙ୍ଗ୍ ଲାଡ୍ କିଦ୍ନାର୍, ଏପେଙ୍ଗ୍ ହେୱାନିଙ୍ଗ୍ନେ ଲାଡ୍ କିତିସ୍, ହେବେ ଇନା ଲାବ୍? ଇନେସ୍କି ପାପିର୍ ପା ଜାର୍-ଜାର୍ ଲାଡ୍ କିଦ୍ନାକାରିଙ୍ଗ୍ ଲାଡ୍ କିନାରା। 33ଇମ୍ଣାକାର୍ ମିଙ୍ଗେଙ୍ଗ୍ ଉପ୍କାର୍ କିଦ୍ନାର୍, ଏପେଙ୍ଗ୍ ହେୱାରିଙ୍ଗ୍ ନେ ଉପ୍କାର୍ କିତିସ୍, ହେବେ ଇନା ଲାବ୍? ଇନେସ୍କି ପାପିର୍ ପା ଇଲେକେ କିନାରା। 34ଇମ୍ଣାକାର୍ତାକେ ହିଦ୍ନାନ୍ ଇଞ୍ଜି ଆହା ଇଡ଼୍ଜି ହେୱାନିଙ୍ଗ୍ନେ ରୁଣ୍ ହିତିସ୍, ହେବେ ଇନା ଲାବ୍? ଇନେସ୍କି ପାପିର୍ ପା ଡାବୁଙ୍ଗ୍ ଗାଟାଆନି ଆହା ଇଡ଼୍ଜି ଡାବୁଙ୍ଗ୍ ରୁଣ୍ତାଙ୍ଗ୍ ଜେକନିକାରିଙ୍ଗ୍ ହିନାର୍।
35ହେଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ଜାର୍ ଶାତ୍ରୁରିଙ୍ଗ୍ ଲାଡ୍ କିୟାଟ୍। ହେୱାରିଙ୍ଗ୍ ଉପ୍କାର୍ କିୟାଟ୍। ଆରେ ଡାବୁଙ୍ଗ୍ ଗାଟାଆୱି ଆହା ଇଟ୍ୱାଦାଙ୍ଗ୍ ହେୱାରିଙ୍ଗ୍ ଡାବୁଙ୍ଗ୍ ରୁଣ୍ ହିୟାଟ୍। ଇଦାଙ୍ଗ୍ କିତିସ୍ ମିଙ୍ଗେଙ୍ଗ୍ ବେସି ପୁରଷ୍କାର୍ ଗାଟାଆଦ୍ନାତ୍। ଏପେଙ୍ଗ୍ ୱିଜୁ ଶାକ୍ତିନିକାନ୍ ଗାଜା ଈଶ୍ୱର ମେହି ଆନାଦେର୍। ଇନେସ୍କି ହେୱାନ୍ ହାର୍ଦି ମାନାୟ୍ତିଙ୍ଗ୍ ଆରେ ବାନ୍ୟା ମାନାୟାରିଙ୍ଗ୍ ପା ଦୟା ଚଚ୍ଚାନାନ୍। 36ମି ସରଗ୍ନି ଆବା ଈଶ୍ୱର ଇନେସ୍ ମିଙ୍ଗେଙ୍ଗ୍ ଦୟା କିଦ୍ନାନ୍, ହେଲେକେ ହେୱାରିଙ୍ଗ୍ ପା ଦୟା କିୟାଟ୍।”
ଜେକନିକାରିଙ୍ଗ୍ ବିଚାର୍ କିମାଟ୍
(ମାଥି. ୭:୧-୪)
37ଯୀଶୁ ଆରେ ୱେଚ୍ଚାନ୍, “ଏପେଙ୍ଗ୍ ଇନେରିଙ୍ଗ୍ ପା ବିଚାର୍ କିମାଟ୍। ଲାଗିଙ୍ଗ୍ ମିଙ୍ଗେଙ୍ଗ୍ ପା ଈଶ୍ୱର ବିଚାର୍ କିଦୁନ୍। ଇନେରିଙ୍ଗ୍ ପା ଦସି କିମାଟ୍, ଲାଗିଙ୍ଗ୍ ଈଶ୍ୱର ମିଙ୍ଗେଙ୍ଗ୍ ପା ଦସି ଇଞ୍ଜି ଇଞ୍ଜୁନ୍। ଜେକନିକାରିଙ୍ଗ୍ କେମା ହିୟାଟ୍, ଲାଗିଙ୍ଗ୍ ମିଙ୍ଗେଙ୍ଗ୍ ପା ଈଶ୍ୱର କେମା କିଦ୍ନାନ୍।
38ଏପେଙ୍ଗ୍ ଜେକନିକାରିଙ୍ଗ୍ ଦାନ୍ ହିୟାଟ୍, ଲାଗିଙ୍ଗ୍ ହେଲେକେ ମିଙ୍ଗେଙ୍ଗ୍ ଈଶ୍ୱର ହିଦ୍ନାନ୍। ଆରେ ହେୱାନ୍ ଆଦିକ୍ କିଜି ହିଦ୍ନାନ୍। ଇନେସ୍କି ଏପେଙ୍ଗ୍ ଇମ୍ଣି ମାଣ୍ ତାଙ୍ଗ୍ ଲାଜ୍ଜି ହିନାଦେର୍, ହେ ମାଣ୍ ତାଙ୍ଗ୍ ମିଙ୍ଗେଙ୍ଗ୍ ଲାଜ୍ଜି ହିଦ୍ନାର୍।”
39ଯୀଶୁ ହେୱାରିଙ୍ଗ୍ ର କାତା ୱେଚ୍ନିଲେକେ କିଜି ୱେଚ୍ଚାନ୍, “ରକାନ୍ କାଣାମାନାୟ୍ ଆରେ ର କାଣା ମାନାୟ୍ତିଙ୍ଗ୍ ହାଜି ଚଚ୍ଚେଙ୍ଗ୍ ଆଡ୍ନାନ୍ କି? ଯଦି ହେଲେକେ କିତିସ୍ ରିକାର୍ ପା କଡ଼ିତାକେ ଆର୍ନାର୍। 40ରକାନ୍ ଚେଲା ତା ଗୁରୁତାଙ୍ଗ୍ ଗାଜାଆଦେଙ୍ଗ୍ ଆଡୁନ୍। ମାତର୍ ଚେଲାହି ୱିଜୁ ବିଷୟ ପୁରା ହିକାଆତି ୱିସ୍ତି ପାଚେ ହେୱାନ୍ ତା ଗୁରୁତାଙ୍ଗ୍ ସାମାନ୍ ଆନାନ୍।
41ଏପେଙ୍ଗ୍ ଜାର୍ ଟଣ୍ଡେନ୍ ହିରୁ ବୁଲ୍ତିଙ୍ଗ୍ ଇନେକିଦେଙ୍ଗ୍ ହୁଡ଼୍ନାଦେରା? ଇନାକା ଏପେଙ୍ଗ୍ ଜାର୍ କିତି ଗାଜା ବୁଲ୍ତିଙ୍ଗ୍ ହୁଡ଼ୁଦେରା? 42ମିବେ ଗାଜା-ଗାଜା ବୁଲ୍ ମାନିହିଙ୍ଗ୍ ଇନେସ୍କିଜି ଜେକନି ଇଚ୍ରୁ ବୁଲ୍ ବିଷୟରେ ବିଚାର୍ କିଜି ୱେଚ୍ଚେଙ୍ଗ୍ ଆଡ୍ନାଦେରା? ଆରେ ହେୱାନିଙ୍ଗ୍ ୱେଚ୍ନାଦେରା ‘ଟଣ୍ଡେନ୍ ଆନେଙ୍ଗ୍ ନି ବୁଲ୍ତିଙ୍ଗ୍ ଟିକ୍ କିଜିହିଦ୍ନାଙ୍ଗ୍।’ ଏପେଙ୍ଗ୍ ପାଟ୍କାର୍ କାଦେର୍, ଏପେଙ୍ଗ୍ ଆଗେ ମି ଜାର୍ ବୁଲ୍ତିଙ୍ଗ୍ ଟିକ୍ କିୟାଟ୍। ଲାଗିଙ୍ଗ୍ ଏପେଙ୍ଗ୍ ଜେକନିକାର୍ ବୁଲ୍ତିଙ୍ଗ୍ ଇନେସ୍କିଜି ଟିକ୍ କିଦେଙ୍ଗ୍ ଆନାତ୍ ହେ ବିଷୟରେ ପୁଞ୍ଜେଙ୍ଗ୍ ଆଡ୍ନାଦେର୍। ଆରେ ହେୱାର୍ କିତି ବୁଲ୍ତିଙ୍ଗ୍ ହାର୍ଦାଙ୍ଗ୍ ଟିକ୍ କିଦେଙ୍ଗ୍ ଆଡ୍ନାଦେର୍।”
ପାଡ଼୍ ହୁଡ଼୍ଜି ମାର୍ତିଙ୍ଗ୍ ପୁନିଆଆନାତ୍
(ମାଥି. ୭:୧୬-୨୦; ୧୨:୩୩-୩୫)
43ଯୀଶୁ ଆରେରଗ ୱେଚ୍ଚାନ୍, “ହାର୍ଦି ମାର୍ ଇନେସ୍ ହାର୍ଦି ପାଡ଼୍ ଆହ୍ନାତ୍, ହେଲେକେ ହାର୍ଦି ମାନାୟ୍ ବାନ୍ୟା କାମାୟ୍ କିଉନ୍। ଆରେ ବାନ୍ଯା ମାର୍ ବାନ୍ଯା ପାଡ଼୍ ଆହ୍ନାତ୍, ହେଲେକେ ବାନ୍ଯା ମାନାୟ୍ ହାର୍ଦି କାମାୟ୍ କିଉନ୍। 44ହେଦାଙ୍ଗ୍ କାଜିଙ୍ଗ୍ ମାନାୟାର୍ କାମାୟ୍ତିଙ୍ଗ୍ ହୁଡ଼୍ଜି ମାନାୟାରିଙ୍ଗ୍ ପୁନିୟା ଆନାତ୍। ମାନାୟାର୍ ୱାଡ଼ି ମାର୍ତାଙ୍ଗ୍ ଅଙ୍ଗୁର୍ ପାଡ଼୍ ଏଚୁର୍। ଆରେ ୱାଡ଼ି ମାର୍ତାଙ୍ଗ୍ ତଗାପାଡ଼୍ ଏଚୁର୍।
45ର ହାର୍ଦି ମାନାୟ୍ ଗରବ୍ ବିତ୍ରେ ହାର୍ଦି ବିଷୟ ବାର୍ତିଆଜି ମାନ୍ଗାନାତ୍। ହେଦାଙ୍ଗ୍ କାଜିଙ୍ଗ୍ ତା ଗରବ୍ତାଙ୍ଗ୍ ହାର୍ଦି ବିଷୟ ହନାତ୍। ମାତର୍ ର ବାନ୍ୟା ମାନାୟ୍ ଗରବ୍ ବିତ୍ରେ ବାନ୍ୟାବିଷୟ ବାର୍ତିଆଜି ମାନ୍ଗାନାତ୍। ଲାଗିଙ୍ଗ୍ ତା ଗରବ୍ତାଙ୍ଗ୍ ବାନ୍ୟାବିଷୟ ହନାତ୍। ର ମାନାୟ୍ ତା ଗରବ୍ ବିତ୍ରେ ଇନାକା ମାନ୍ଗାନାତ୍, ହେୱାନ୍ ହେଦାଙ୍ଗ୍ ୱେଚ୍ନାନ୍।”
ବୁଦିକାଟାକାନ୍ ଆରେ ବକୁଆ ମାନାୟ୍ ଇଲ୍ ଗାଚ୍ନି ବିଷୟ
(ମାଥି. ୭:୨୪-୨୭)
46ଯୀଶୁ ଆରେରଗ ୱେଚ୍ଚାନ୍, “ଏପେଙ୍ଗ୍ ନାଙ୍ଗେଙ୍ଗ୍ ଇନା କିଦେଙ୍ଗ୍ ମାପୃ-ମାପୃ ଇଞ୍ଜି କୁକ୍ତାନାଦେରା? ମାତର୍ ଆନେଙ୍ଗ୍ ଇନାକା ୱେଚ୍ଚାନାଙ୍ଗା, ଏପେଙ୍ଗ୍ ତ ହେଦାଙ୍ଗ୍ତିଙ୍ଗ୍ ମାନି କିଉଦେରା। 47ଇମ୍ଣାକାନ୍ ନା ଲାଗାୟ୍ ୱାଜି ନା କାତା ୱେନାନ୍, ଆରେ ହେ କାତାତିଙ୍ଗ୍ ମାନି କିନାନ୍, ହେୱାନ୍ ଇଲେଗ୍ଦାକାନ୍ ଆନାନ୍। 48ହେୱାନ୍ କାଲ୍କୁ ଜପି କୁନାଦି କିଜି ହାର୍ଦାଙ୍ଗ୍ ଇଲ୍ ଗାଚ୍ନି ମାନାୟ୍ ଲେକେ। ଇ ଇଲ୍ ହାର୍ଦାଙ୍ଗ୍ ଗାଚ୍ଚି ମାଚିଲେ, ଏଚେକାଡ଼୍ଦ ପା ବାତ୍ୟା ୱାଜି ଡୁକା ଆତିସ୍ପା ହେ ଇଲ୍ ବାଡ଼୍ହା ଆଉତ୍।
49ମାତର୍ ଇମ୍ଣାକାନ୍ ନା କାତାତିଙ୍ଗ୍ ୱେନ୍ଞ୍ଜି ହେ କାତାତିଙ୍ଗ୍ ମାନିକିଉନ୍, ହେୱାନ୍ ଇଲେଗ୍ଦାକାନ୍ ଆନାନ୍, କୁନାଦି କିୱାଦାଙ୍ଗ୍ ବାଲିଆଜପି ଇଲ୍ ଗାଚ୍ଚି ମାନାୟ୍ ଲେକେ। ଏଚେକାଡ଼୍ଦ ବାତ୍ୟା ୱାଜି ହେ ବାଲିଆଜପି ଗାଚ୍ଚି ଇଲ୍ତିଙ୍ଗ୍ ହେପ୍କା ଇଡ଼୍ତିସ୍ ଇଲ୍ ଅଲପ୍ତିଙ୍ଗ୍ ୱିଜୁ ବାଡ଼୍ହା ଆନାତ୍।”
Currently Selected:
ଲୁକ 6: PEGNT
Highlight
Share
Copy
Want to have your highlights saved across all your devices? Sign up or sign in
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
