ଲୁକ 7
7
ଯୀଶୁ ଶହେଜାଣ୍ ସେନାର୍ତାଙ୍ଗ୍ ମୁଡ଼୍ଦି ହଲିଆହିଙ୍ଗ୍ ହାର୍କିତାନ୍
(ମାଥି. ୮:୫-୧୩)
1ଯୀଶୁ ମାନାୟାରିଙ୍ଗ୍ ୱିଜୁ ପର୍କାର୍ ହିକ୍ଷାହିଜି ୱିସ୍ତି ପାଚେ ହେୱାନ୍ କପୁର୍ନାହୁମ୍ ସହର୍ତାକେ ହାଚାନ୍।
2ହେପାଦ୍ନା କପୁର୍ନାହୁମ୍ ସହର୍ତାକେ ରକାନ୍ ଶହେଜାଣ୍ ସେନାର୍ତାଙ୍ଗ୍ ମୁଡ଼୍ଦାକାନ୍ ମାଚାନ୍। ତା ହଲିଆ ବେସି ବେମାର୍ ମାଚାନ୍ ଯେ ହେୱାନ୍ ହାନିଲେକେ ଆଜି ମାଚାନ୍। ଶହେଜାଣ୍ ସେନାର୍ତାଙ୍ଗ୍ ମୁଡ଼୍ଦାକାନ୍ ତା ହଲିଆହିଙ୍ଗ୍ ବେସି ଲାଡ୍କିଜି ମାଚାନ୍। 3ଶହେଜାଣ୍ ସେନାର୍ତାଙ୍ଗ୍ ମୁଡ଼୍ଦାକାନ୍ ଯୀଶୁ ବିଷୟ ୱେଚାନ୍। ଆରେ ହେୱାନ୍ କେତ୍ଜାଣ୍ ଯିହୁଦି ପ୍ରାଚିନ୍ନାରିଙ୍ଗ୍ ଯୀଶୁ ଲାଗାୟ୍ ପକ୍ତାନ୍। ହେୱାନ୍ ଇଚାକିଜି ମାଚାନ୍ ଯେ ଯୀଶୁ ୱାଜି ତା ହଲିଆହିଙ୍ଗ୍ ଉଦାର୍ କିୟେନ୍। 4ହେ ନାୟକାର୍ ଯୀଶୁ ଲାଗାୟ୍ ହାଚାର୍ ଆରେ ବେସି ଗୁୱାରି କିଜି ୱେଚ୍ଚାର୍, “ଶହେଜାଣ୍ ସେନାର୍ତାଙ୍ଗ୍ ମୁଡ଼୍ଦି ହଲିଆହିଙ୍ଗ୍ ଏନେଙ୍ଗ୍ ହାର୍କିନି ଦର୍କାର୍। 5ଇନେସ୍କି ହେୱାନ୍ ମା ଲକ୍ତିଙ୍ଗ୍ ଲାଡ୍ କିନାନ୍ ଆରେ ମା କାଜିଙ୍ଗ୍ ଯିହୁଦିର୍ ପାର୍ତାନା ଇଲ୍ ରସ୍ତି ହିଦ୍ନାନ୍।”
6ଲାଗିଙ୍ଗ୍ ଯୀଶୁ ହେୱାର୍ ଲାହାଙ୍ଗ୍ ହାଞ୍ଜେଙ୍ଗ୍ ହତାନ୍। ଯୀଶୁ ସେନାର୍ ମୁଡ଼୍ଦାକାନ୍ ଇଲ୍ ଲାଗାୟ୍ ୱାଜି ଏକିତି ୱେଡ଼ାଲିଙ୍ଗ୍, ସେନାର୍ ମୁଡ଼୍ଦାକାନ୍ ରକାନ୍ ଜାର୍ ହାଙ୍ଗ୍ଦାକାରିଙ୍ଗ୍ ଯୀଶୁ ଲାଗାୟ୍ ଇବେଣ୍ ୱେଚ୍ନି କାଜିଙ୍ଗ୍ ପକ୍ତାନ୍, “ମାପୃ ଏନେଙ୍ଗ୍ ଆରେ କଷ୍ଟ ଆମା। ଇନେସ୍କି ଆନେଙ୍ଗ୍ ଏଚେକ୍ ହାର୍ ଆକାଇ ଯେ ଏନେଙ୍ଗ୍ ମାଞ୍ଜ ୱାନାୟ୍। 7ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ନିଜେ ମି ଲାଗାୟ୍ ହାଞ୍ଜେଙ୍ଗ୍ ଇଚା କିୱାଦାଙ୍ଗ୍ ମାଚାଙ୍ଗ୍। ଏନେଙ୍ଗ୍ ଆପ୍କା ଆଦେସ୍ ହିୟା ନା ହଲିଆ ହାର୍ ଆନାନ୍। 8ଆନେଙ୍ଗ୍ ପା ରକାନ୍ ଗାଜାକାନ୍ ତାକେ କାମାୟ୍ କିନାଙ୍ଗା। ନା ତାରେନ୍ କେତେକ୍ ସେନାର୍ ମାନାର୍, ଆନେଙ୍ଗ୍ ଯଦି ର ସେନାଙ୍ଗ୍ ୱେଚ୍ନାଙ୍ଗ୍, ହାଲା ଇଚିସ୍ ହେୱାନ୍ ହାନାନ୍। ଆନେଙ୍ଗ୍ ଯଦି ଆରେ ରକାନିଙ୍ଗ୍ ୱେଚ୍ନାଙ୍ଗ୍ ୱା ଇଚିସ୍ ହେୱାନ୍ ୱାନାନ୍। ଆନେଙ୍ଗ୍ ଯଦି ନା ହଲିଆଙ୍ଗ୍ ଇଦାଙ୍ଗ୍ କିୟା ଇଚିସ୍ ହେୱାନ୍ ହେଦାଙ୍ଗ୍ କିନାନ୍।”
9ଯୀଶୁ ଇଦାଙ୍ଗ୍ ୱେନ୍ଞ୍ଜି ଚାନିଆ ଆତାନ୍। ହେୱାନ୍ ତାପାଚେ ୱାଜିମାଚି ମାନାୟାର୍ ନିପଣ୍ ବୁଲାଆଜି ୱେଚ୍ଚାନ୍, “ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା ଇଲେକେ ପାର୍ତି କିନାକାର୍ ଇସ୍ରାଏଲ ଜାତିତାକେ ଇନେର୍ତାକେ ପା ହୁଡ଼୍ୱାତାଙ୍ଗ୍।” 10ଯୀଶୁ ଲାଗାୟ୍ ଇମ୍ଣି ମାନାୟାରିଙ୍ଗ୍ ପକ୍ଚି ମାଚାର୍, ହେୱାର୍ ଇଞ୍ଜ ୱାତି ପାଚେ ହୁଡ଼୍ତାର୍ ଯେ ହେ ହଲିଆ ହାର୍ ଆତାନ୍ନା।
ଯୀଶୁ ରାଣ୍ଡି କଗ୍ଲେନି ହାଃତି ହିମ୍ଣାତିଙ୍ଗ୍ ହାର୍କିତାନ୍
11ତା ଆର୍କାତ୍ ନାଞ୍ଜିଙ୍ଗ୍ ଯୀଶୁ ନାଇନ ସହର୍ତାକେ ହାଚାନ୍। ତା ହୁଦାଙ୍ଗ୍ ତା ଚେଲାହିର୍ ଆରେ ବେସିହେନି ମାନାୟାର୍ ମାଚାର୍। 12ଯୀଶୁ ହେ ସହର୍ ଲାଗାୟ୍ ଏକିତିହିଙ୍ଗ୍, ର ମାଡ଼ା ପିଣ୍ଜି ଅନାକା ହୁଡ଼୍ତାର୍। ହେୱାନ୍ ତା ରାଣ୍ଡି ତେହି ରକାନ୍ ଇଞ୍ଜି ହିମ୍ଣା ମାଚାନ୍। ହିମ୍ଣା ମାଡ଼ାତିଙ୍ଗ୍ ପିଣ୍ଜି ଅନିହିଙ୍ଗ୍ ହେବେ ତା ତେହି ହୁଦାଙ୍ଗ୍ ପା ସହର୍ନି ବେସିହେନି ମାନାୟାର୍ ମାଚାର୍। 13ହେ ରାଣ୍ଡିଙ୍ଗ୍ ହୁଡ଼୍ଜି ଯୀଶୁ ବେସିଦୁକ୍ ଆତାନ୍। ହେୱାନ୍ ହେ ରାଣ୍ଡିଙ୍ଗ୍ ୱେଚ୍ଚାନ୍, “ଆଡ଼୍ବାମା।” 14ଯୀଶୁ ମାଡ଼ାଡାଣ୍ଡିଆ ଲାଗାୟ୍ ହାଲ୍ଜି ଆସ୍ପାତାନ୍। ମାଡ଼ାଡାଣ୍ଡିଆ ପିଣ୍ଜି ଅନାକାର୍ ଟେବାଆତାର୍। ଯୀଶୁ ହେ ହାଃତି ହିମ୍ଣାଙ୍ଗ୍ ୱେଚ୍ଚାନ୍, “ହିମ୍ଣା, ଆନେଙ୍ଗ୍ ନିଙ୍ଗେଙ୍ଗ୍ ୱେଚ୍ଚାନାଙ୍ଗା ନିଙ୍ଗା!” 15ହାଃତି ହିମ୍ଣା ନିଙ୍ଗ୍ଞ୍ଜି କୁଚ୍ଚାନ୍। ଆରେ ହେୱାନ୍ ବେଣ୍କିଦେଙ୍ଗ୍ ଲାଗାତାନ୍। ଯୀଶୁ ହେ ହିମ୍ଣାତିଙ୍ଗ୍ ତା ତେହି କେଇଦ ହିତାନ୍।
16ହେବେ ମାଚି ୱିଜାକାର୍ ଚାନିଆ ଆତାର୍। ଆରେ ହେୱାର୍ ଈଶ୍ୱରତିଙ୍ଗ୍ ଜୟ୍-ଜୟକିଜି ହେୱାର୍ ୱେଚ୍ଚାର୍, “ଇୱାନ୍ ଗାଜା ଭବିଷ୍ଯତବକ୍ତା ମା ଲାଗାୟ୍ ୱାତାନ୍ନା। ଆରେ ଈଶ୍ୱର ତା ଲକ୍ବାକ୍ତିଙ୍ଗ୍ ସାଇଜ କିଦେଙ୍ଗ୍ ୱାତାନ୍ନା।” 17ଯୀଶୁ ବିଷୟରେ ଇବେଣ୍ ଯିହୁଦା ଜିଲ୍ଲା ଆରେ ଲାଗାୟ୍ ଲାଗାୟ୍ନି ୱିଜୁ ସହର୍ ନିପଣ୍ ବିଚାଆତାତ୍।
ଡୁବନ୍ହିନି ଯୋହନ ଚେଲାହିର୍ ଯୀଶୁ ଲାଗାୟ୍ ପକ୍ତାନ୍
(ମାର୍କ. ୧୧:୨-୧୯)
18ଡୁବନ୍ହିନି ଯୋହନ ଚେଲାହିର୍ ଯୋହନତିଙ୍ଗ୍ ଯୀଶୁ କିତି ୱିଜୁବେଣ୍ ୱେଚ୍ଚାର୍। 19ହେବେତାଙ୍ଗ୍ ଡୁବନ୍ହିନି ଯୋହନ ଜାର୍ ଚେଲାହିରିଙ୍ଗ୍ ଯୀଶୁ ଲାଗାୟ୍ ଇବେଣ୍ ୱେନ୍ବେଦେଙ୍ଗ୍ ପକ୍ତାନ୍, “ଈଶ୍ୱର ଇନେରିଙ୍ଗ୍ ପକ୍ତାନାଙ୍ଗ୍ ଇଞ୍ଜି ୱେଚ୍ଚି ମାଚାନ୍ ଏନେଙ୍ଗ୍ ହେୱାଇ କି? ଆରେ ଇନେରିଙ୍ଗ୍ କାସି ମାନାପ୍?”
20ହେୱାର୍ ଯୀଶୁ ଲାଗାୟ୍ ଏକାତାର୍। ହେୱାର୍ ଯୀଶୁଙ୍ଗ୍ ୱେନ୍ବାତାର୍, “ଡୁବନ୍ହିନି ଯୋହନ ମାଙ୍ଗେଙ୍ଗ୍ ନିଙ୍ଗେଙ୍ଗ୍ ଇ ପ୍ରଶ୍ନ ୱେନ୍ବେଦେଙ୍ଗ୍ ପକ୍ତାତାନ୍। ଈଶ୍ୱର ଇନେରିଙ୍ଗ୍ ପକ୍ତାନାଙ୍ଗ୍ ଇଞ୍ଜି ୱେଚ୍ଚି ମାଚାନ୍ ଏନେଙ୍ଗ୍ ହେୱାଇ କି? ଆରେ ଇନେରିଙ୍ଗ୍ କାସି ମାନାପ୍?”
21ହେପାଦ୍ନା ଯୀଶୁ କେତେକ୍ ହେନି ମାନାୟାରିଙ୍ଗ୍ ହେୱାର୍ ରଗ୍, ଦୁକ୍ ଆରେ ବୁତ୍ଆତ୍ମାତାଙ୍ଗ୍ ରକ୍ଷା କିଜି ମାଚାନ୍। ହେୱାନ୍ କେତେକ୍ କାଣାଲଗାଙ୍ଗ୍ ହୁଡ଼ି କିଜି ମାଚାନ୍। 22ତାପାଚେ ଯୀଶୁ ଡୁବନ୍ହିନି ଯୋହନ ଚେଲାହିରିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ହାଲ୍ଜି ଇନା ଇନାକା ୱେଚାଦେର୍ନା ଆରେ ହୁଡ଼୍ତାଦେର୍ ହେ ୱିଜୁ ଯୋହନତିଙ୍ଗ୍ ୱେଚାଟ୍। କାଣାର୍ ହୁଡ଼୍ଦେଙ୍ଗ୍ ଆଡ଼୍ତାର୍, ଚଟାର୍ ତାଙ୍ଗ୍ଦେଙ୍ଗ୍ ଆଡ଼୍ତାର୍, କୁଷ୍ଟରଗ୍ଦାକାର୍ ହାର୍ଆତାର୍, ବଇରାର୍ ୱେଞ୍ଜେଙ୍ଗ୍ ଆଡ଼୍ତାର୍, ହାଃତାକାର୍ ଆରେରଗ ଜିବୁନ୍ ଆନାରା। ଆରେ ଗରିବ୍ ମାନାୟାରିଙ୍ଗ୍ ଈଶ୍ୱର ରାଜିନି ହାର୍ଦିକାବୁର୍ ଶୁଣାୟ୍ କିନାନା। 23ଆରେ ଇନେର୍ ପା ନାଙ୍ଗେଙ୍ଗ୍ ପାର୍ତି କିଦେଙ୍ଗ୍ ପିସ୍ତୁନ୍, ହେୱାନ୍ ଆଶ୍ରିବାଦ୍ ପାୟା ଆନାନ୍।”
24ଡୁବନ୍ହିନି ଯୋହନ ଡାଣ୍ଡାସିର୍ ହାଚି ପାଚେ ଯୀଶୁ ମାନାୟାରିଙ୍ଗ୍ ଡୁବନ୍ହିନି ଯୋହନ ବିଷୟରେ ୱେଚ୍ଚେଙ୍ଗ୍ ଆରମ୍ କିତାନ୍, “ର ମାର୍ତି କେନ୍ଦା ଡ଼ୁଇତାକେ ଇନେସ୍ ଇନି ଆନି ଆଜି ଜଲାଆଜି ମାନାତ୍, ହେଲେକେ ଚାନେକ୍ତିଙ୍ଗ୍-ଚାନେକ୍ ଇନି ଆନି ୱେଚ୍ନି ମାନାୟ୍ତିଙ୍ଗ୍ ଟାଙ୍ଗ୍ରାବାହାତ ହୁଡ଼୍ଦେଙ୍ଗ୍ ହାଲ୍ଜି ମାଚାଦେର୍ କି? ହେଲେଗ୍ଦି ମାନାୟ୍ତିଙ୍ଗ୍ ଏପେଙ୍ଗ୍ ହୁଡ଼୍ଦେଙ୍ଗ୍ ହାଲ୍ୱାଦାଙ୍ଗ୍ ମାଚାଦେର୍। 25ଇନାକା ଦାମ୍କିୟା ହାର୍ଦି ହେନ୍ଦ୍ରା ଉସ୍ପିତି ମାନାୟ୍ତିଙ୍ଗ୍ ହୁଡ଼୍ଦେଙ୍ଗ୍ ହାଲ୍ଜି ମାଚାଦେର୍ କି? ହେଲେଗ୍ଦି ମାନାୟ୍ତିଙ୍ଗ୍ ଆକାୟ୍। ଇନେସ୍କି ଦାମ୍କିୟା ହାର୍ଦି ହେନ୍ଦ୍ରା ଉସ୍ପିତି ମାନାୟ୍ ରାଜାମାନି ବାହାତାକେ ମାନ୍ଗାନାର୍। 26ଲାଗିଙ୍ଗ୍ ଏପେଙ୍ଗ୍ ଇନାକା ଭବିଷ୍ଯତବକ୍ତାଙ୍ଗ୍ ହୁଡ଼୍ଦେଙ୍ଗ୍ ହସିହାଲ୍ଜି ମାଚାଦେର୍? ସତ୍ କାତା ଏପେଙ୍ଗ୍ ର ଭବିଷ୍ଯତବକ୍ତାଙ୍ଗ୍ ହୁଡ଼୍ଦେଙ୍ଗ୍ ହାଲ୍ଜି ମାଚାର୍। ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, ‘ଡୁବନ୍ହିନି ଯୋହନ ଜେକନି ଭବିଷ୍ଯତବକ୍ତାତାଙ୍ଗ୍ ପା ବେସି ଗାଜାକାନ୍।’
27ଡୁବନ୍ହିନି ବିଷୟରେ ଇଦାଙ୍ଗ୍ ଲେକା ମାନାତ୍,
‘ହୁଡ଼ାଟ୍, ଆନେଙ୍ଗ୍ ମି ଆଗେ ନା ଡାଣ୍ଡାସିଙ୍ଗ୍ ମି ଆଗେ ପକ୍ତାନାଙ୍ଗା।
ହେୱାନ୍ ମି କାଜିଙ୍ଗ୍ ଆଗେତାଙ୍ଗ୍ ହାଜି ରସ୍ତି ହିଦ୍ନାନ୍।’
28ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା, କଗ୍ଲେ ଗରବ୍ତାଙ୍ଗ୍ ଜନମ୍ ଆତାକାର୍ ଇନେର୍ ପା ଡୁବନ୍ହିନି ଯୋହନତାଙ୍ଗ୍ ଗାଜା ଆକାୟ୍। ମାତର୍ ଈଶ୍ୱର ସାସନ୍ କିନି ରାଜିତାକେ ଇନେର୍ ୱିଜାକାର୍ତାଙ୍ଗ୍ ହିରୁ, ହେୱାନ୍ ଡୁବନ୍ହିନି ଯୋହନତାଙ୍ଗ୍ ପା ଗାଜାକାନ୍ ଆନାନ୍।
29ହେପାଦ୍ନା ହେୱାର୍ ଯୀଶୁ କାତା ୱେନ୍ଞ୍ଜି ହେୱାର୍ ୱେଚ୍ଚାର୍, ଡୁବନ୍ହିନି ଯୋହନତାଙ୍ଗ୍ ଡୁବନ୍ ଆତାକା ଈଶ୍ୱର ଯଜ୍ନା ଟିକ୍ ମାଚାତ୍ ଇଞ୍ଜି ୱେଚ୍ଚାର୍। ଇଲେକେକି ସିସ୍ତୁଏନ୍କାର୍ ପା ୱେଚ୍ଚାର୍। 30ମାତର୍ ପାରୁସିଦଳ୍ ଆରେ ପଣ୍ଡିତାର୍ ଡୁବନ୍ହିନି ଯୋହନତାଙ୍ଗ୍ ଡୁବନ୍ ଅୱାତାର୍। ଆରେ ଜିବୁନ୍ କାଜିଙ୍ଗ୍ ଈଶ୍ୱର କାତାତିଙ୍ଗ୍ ମାନ୍କିୱାତାର୍।
31ଲାଗିଙ୍ଗ୍ ଆନେଙ୍ଗ୍ ଇ ଜୁଗ୍ନି ମାନାୟ୍ ହୁଦାଙ୍ଗ୍ ଇନେର୍ ଲାହାଙ୍ଗ୍ ହାମାନ୍ କିନାଙ୍ଗ୍? ହେୱାର୍ ଇନେର୍ ଲେକେ ଆନାର୍? 32ଇୱାର୍ ଆଟ୍ବାଜାର୍ତ କୁଚ୍ଚି ମାଚି ହେ ହିମ୍ଣାଙ୍ଗ୍ ଜେକନି ହିମ୍ଣାରିଙ୍ଗ୍ କୁକ୍ଚି ଆଲା ଆନି ହିମ୍ଣାଙ୍ଗ୍ ଲେକେ। ଆପେଙ୍ଗ୍ ମି କାଜିଙ୍ଗ୍ ଶୁରୁଡ଼ି ତୁବ୍ଜି ହିତ୍ତାପ୍, ମାତର୍ ଏପେଙ୍ଗ୍ ଏନ୍ଦ୍ୱାତାଦେର୍। ଆପେଙ୍ଗ୍ ହାଃତିହିଙ୍ଗ୍ କେର୍ନି କେର୍କଣ୍ କେର୍ତାପ୍ ମାତର୍ ଏପେଙ୍ଗ୍ ଆଡ଼୍ବାୱାତାଦେର୍।
33ଡୁବନ୍ହିନି ଯୋହନ ୱାଜି ରୁଟି ତିନ୍ୱାତାନ୍ ଆରେ ଅଙ୍ଗୁର୍ ରାସ୍ ଉଣ୍ୱାଦାଙ୍ଗ୍ ମାଚାନ୍। ମାତର୍ ମାନାୟାର୍ ହେୱାନିଙ୍ଗ୍ ୱେଚ୍ଚାର୍, ‘ହେୱାନିଙ୍ଗ୍ ବୁତ୍ଆତ୍ମା ଡୁତାତ୍ନା।’ 34ମାତର୍ ଆନେଙ୍ଗ୍, ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା ଉଣ୍ଡେଙ୍ଗ୍ କି ଚିଞ୍ଜେଙ୍ଗ୍, ୱାତାୟ୍ନା ଇଞ୍ଜି ମାନାୟାର୍ ୱେଚ୍ଚାତାର୍, ‘ହୁଡ଼ାଟ୍, ଇୱାନ୍ ପେଟୁ, ମଦୁୱା। ଆରେ ସିସ୍ତୁଏନ୍ନାକାର୍ ଆରେ ପାପିର୍ ହାଙ୍ଗ୍ଦାକାନ୍।’ 35ମାତର୍ ଈଶ୍ୱର ହିମ୍ଣାର୍ କାମାୟ୍ତିଙ୍ଗ୍ ହୁଡ଼୍ଜି, ମାନାୟାର୍ ହେୱାର୍ ବୁଦି ଆରେ ଜ୍ଞାନ୍ତିଙ୍ଗ୍ ପୁନାର୍।”
ଯୀଶୁ ର ପାପି କଗ୍ଲେଙ୍ଗ୍ ପାପ୍ କେମା କିତାନ୍
36ପାରୁସିଦଳ୍ ବିତ୍ରେତାଙ୍ଗ୍ ରକାନ୍ ଯୀଶୁ ହୁଦାଙ୍ଗ୍ ତିନି କାଜିଙ୍ଗ୍ ତାଞ୍ଜ କୁକ୍ତାନ୍। ହେଦାଙ୍ଗ୍ ଯୀଶୁ ହେ ପାରୁସିର୍ ଇଞ୍ଜ ହାଚାନ୍ ଆରେ ଚିଞ୍ଜେଙ୍ଗ୍ କୁଚ୍ଚାନ୍। 37ହେପାଦ୍ନା ହେ ସହର୍ନି ରଞ୍ଜେଲ୍ ପାପି କଗ୍ଲେ ମାଚାତ୍। ହେଦେଲ୍ ପୁଚାତ୍ ଯେ ଯୀଶୁ ର ପାରୁସି ଇଞ୍ଜ ଚିଞ୍ଜେଙ୍ଗ୍ କୁଚ୍ଚାନ୍ନା, ହେଦାଙ୍ଗ୍ତିଙ୍ଗ୍ ହେ କଗ୍ଲେ ପୁନ୍ଞ୍ଜି ର କାଲ୍ଦାଙ୍ଗ୍ ରସ୍ତି କଣ୍ଡିତାକେ ବେସି ଦାମ୍କିୟା ବାସ୍ନା ଚିକାଣ୍ ଆସ୍ତି ହାଚାତ୍। 38ହେଦେଲ୍ ଯୀଶୁ ପାଚ୍ବାଗାୟ୍ନି କାଲ୍କୁ ଲାଗାୟ୍ ନିଲ୍ତାତ୍। ହେଦେଲ୍ ଆଡ଼୍ବିସ୍ ମାଚାତ୍। ତାପାଚେ ହେଦେଲ୍ ଯୀଶୁ କାଲ୍ପାନା ତା କାଣେଲିଙ୍ଗ୍ ହୁଦାଙ୍ଗ୍ ନୁସ୍ଜି ହିତାତ୍। ଜାର୍ କାପ୍ଡ଼ାନି ତେମୁଲ୍ ହୁଦାଙ୍ଗ୍ ଯୀଶୁ କାଲ୍ପାନା ନେନ୍ଦ୍ତାତ୍। ଆରେ ଯୀଶୁ କାଲ୍ପାନାତିଙ୍ଗ୍ ବେସିହଟ୍ ଚୁମା ହିତାତ୍ ଆରେ ହେବେ ବାସ୍ନା ଚିକାଣ୍ ୱାକ୍ତାତ୍।
39ଇମ୍ଣି ପାରୁସି ଯୀଶୁଙ୍ଗ୍ ତାଞ୍ଜ କୁକ୍ଚି ମାଚାନ୍, ହେୱାନ୍ ଇୱିଜୁ ହୁଡ଼୍ତାନ୍। ଆରେ ହେୱାନ୍ ତା ମାନ୍ତ ବାବିକିତାନ୍, “ଯୀଶୁ ଯଦି ହାତ୍ପା ରକାନ୍ ଭବିଷ୍ଯତବକ୍ତା ଆତାନ୍ମା, ଲାଗିଙ୍ଗ୍ ହେୱାନ୍ ହାତ୍ପା ପୁଚାନ୍ମା ଯେ, ହେୱାନ୍ ପୁଚାନ୍ମା ହେୱାନିଙ୍ଗ୍ ଇନେସ୍ ଲେଗ୍ଦି କଗ୍ଲେ ଆସ୍ପାତାତ୍ ହେଦାଙ୍ଗ୍ ପୁଚାନ୍ମା। ଇନେସ୍କି ହେଦେଲ୍ ରଞ୍ଜେଲ୍ ପାପି କଗ୍ଲେ ମାଚାତ୍।”
40ଯୀଶୁ ହେୱାନିଙ୍ଗ୍ ୱେଚ୍ଚାନ୍, “ଶିମୋନ, ଆନେଙ୍ଗ୍ ର କାତା ୱେଚ୍ନାଙ୍ଗ୍।” ଶିମୋନ ୱେଚ୍ଚାନ୍, “ଗୁରୁ, ୱେଚ୍ଚା!”
41ଯୀଶୁ ର କାତା ୱେଚ୍ନିଲେକେ କିଜି ୱେଚ୍ଚାନ୍, “ର ହାଉକାର୍ତାକେ ରିକାର୍ ରୁଣ୍ ଅଜିମାଚାର୍। ରକାନ୍ ପାଞ୍ଚ୍ଶ ରୁପା ଡାବୁଙ୍ଗ୍ ଅଜି ମାଚାନ୍। ଆରେ ରକାନ୍ ପଚାସ୍ଗଟା ରୁପା ଡାବୁଙ୍ଗ୍ ଅଜି ମାଚାନ୍। 42ଏଚେକାଡ଼୍ଦ ହେୱାର୍ତାକେ ଡାବୁଙ୍ଗ୍ ହିଲ୍ୱିତିଲେ ହେୱାର୍ ଋଣ୍ ହୁଜାଆୱାଦାଙ୍ଗ୍ ମାଚାର୍। ଲାଗିଙ୍ଗ୍ ହାଉକାର୍ ରିକାରିଙ୍ଗ୍ ଋଣ୍ ପିସ୍ତି ହିତାନ୍। ଲାଗିଙ୍ଗ୍ ଇ ରିକାର୍ ବିତ୍ରେତାଙ୍ଗ୍ ଇନେର୍ ହାଉକାର୍ତିଙ୍ଗ୍ ବେସି ଲାଡ୍ କିନାର୍?”
43ଶିମୋନ ୱେଚ୍ଚାନ୍, “ଆନେଙ୍ଗ୍ ବାବିକିନାଙ୍ଗା, ଇନେର୍ ଆଦିକ୍ ଡାବୁଙ୍ଗ୍ ରୁଣ୍ ଅଜି ମାଚାନ୍, ହେୱାନ୍ କେମା ପାୟା ଆନାନ୍।” ଯୀଶୁ ଶିମୋନତିଙ୍ଗ୍ ୱେଚ୍ଚାନ୍, “ଏନେଙ୍ଗ୍ ଟିକ୍ କାତା ୱେଚ୍ନାୟା।”
44ତାପାଚେ ଯୀଶୁ ହେ କଗ୍ଲେ ନିପଣ୍ ମାସ୍ଜି ଶିମୋନତିଙ୍ଗ୍ ୱେଚ୍ଚାନ୍, “ଏନେଙ୍ଗ୍ ଇ କଗ୍ଲେଙ୍ଗ୍ ହୁଡ଼୍ନାୟା? ଆନେଙ୍ଗ୍ ମିଞ୍ଜ ୱାତାଙ୍ଗ୍। ଏନେଙ୍ଗ୍ ନାଙ୍ଗେଙ୍ଗ୍ କାଲ୍କୁ ନୁଜ୍ଦେଙ୍ଗ୍ ଏଜୁଙ୍ଗ୍ ହିଦ୍ୱାତାଇ, ମାତର୍ ଇ କଗ୍ଲେ କାଲ୍ପାନାତିଙ୍ଗ୍ ତା କାଣେଲିଙ୍ଗ୍ ହୁଦାଙ୍ଗ୍ ନୁଜ୍ଦାତାତ୍। ଆରେ ତା କାପ୍ଡ଼ାନି ତେମୁଲ୍ ହୁଦାଙ୍ଗ୍ ନେନ୍ଦ୍ଦାତାତ୍। 45ଏନେଙ୍ଗ୍ ମା ବିଦିଅନୁସାତାଙ୍ଗ୍ ନାଙ୍ଗେଙ୍ଗ୍ ସନ୍ମାନ୍ ହିଦେଙ୍ଗ୍ ଚୁମା ହିଦ୍ୱାତାଇ। ମାତର୍ ଏଚେପାଦ୍ନା ଆନେଙ୍ଗ୍ ୱାତାଙ୍ଗ୍, ହେପାଦ୍ନାତାଙ୍ଗ୍ ନଙ୍ଗୟ୍ ପାତେକ୍ ହେଦେଲ୍ ନା କାଲ୍ପାନାକାଙ୍ଗ୍ ଚୁମା ହିନାକା ଟେବାଇ କିୱାତାତ୍ନା।
46ଏନେଙ୍ଗ୍ ନା କାପ୍ଡ଼ାତାକେ ଚିକାଣ୍ ଇତ୍ପା ଆଦ୍ୱାତାଇ, ମାତର୍ ଇ କଗ୍ଲେ ନା କାଲ୍ପାନାକାଙ୍ଗ୍ ବାସ୍ନା ଚିକାଣ୍ ଇତ୍ପାଆତ୍ତାତ୍।” 47ଲାଗିଙ୍ଗ୍ ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା, “ଇଦେଲ୍ତାଙ୍ଗ୍ ବେସି ପାପ୍ କେମା ଆତାତ୍ନା। ହେଦାଙ୍ଗ୍ କାଜିଙ୍ଗ୍ ନାଙ୍ଗେଙ୍ଗ୍ ହେଦେଲ୍ ବେସି ଲାଡ୍ କିତ୍ତାତ୍ନା। ମାତର୍ ଇନେରିଙ୍ଗ୍ ଅଲପ୍ ପାପ୍ କେମା ଆତାତ୍ ହେୱାନ୍ ନାଙ୍ଗେଙ୍ଗ୍ ଅଲପ୍ ନେ ଲାଡ୍ କିଦ୍ନାନ୍।”
48ତାପାଚେ ଯୀଶୁ ହେ କଗ୍ଲେଙ୍ଗ୍ ୱେଚ୍ଚାନ୍, “ଆନେଙ୍ଗ୍ ନି ପାପ୍ ୱିଜୁ କେମା କିତ୍ତାଙ୍ଗ୍ନା।”
49ହେବେ ଚିଞ୍ଜେଙ୍ଗ୍ କୁଚ୍ଚି ମାନାୟାର୍ ମାନ୍ତ ବାବିକିଜି ୱେଚ୍ଚାର୍, “ଈଶ୍ୱରତିଙ୍ଗ୍ ପିସ୍ତି ଇନେର୍ ପା ପାପ୍ କେମା କିଦେଙ୍ଗ୍ ଆଡୁର୍। ଇୱାନ୍ ଜାର୍ତିଙ୍ଗ୍ ଇନାକା ବାବିକିନାନା?”
50ଯୀଶୁ ହେ କଗ୍ଲେଙ୍ଗ୍ ୱେଚ୍ଚାନ୍, “ଏନେଙ୍ଗ୍ ପାର୍ତି କିତିଲେଙ୍ଗ୍ ନି ପାପ୍ତାଙ୍ଗ୍ ଉଦାର୍ ପାୟାଆତାୟ୍ନା। ଶାନ୍ତିତାଙ୍ଗ୍ ହାଲା।”
Currently Selected:
ଲୁକ 7: PEGNT
Highlight
Share
Copy
Want to have your highlights saved across all your devices? Sign up or sign in
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
