ମାଥିଉ 15
15
ଆକଦାଦିନି ରିତିନିତି ତାଙ୍ଗ୍ ଈଶ୍ୱର କାତା ଗାଜା
(ମାର୍କ. ୭:୧-୧୩)
1ରଦିନ୍ ପାରୁସିଦଳ୍ ଆରେ ଯିରୁଶାଲାମ ସହର୍ତାଙ୍ଗ୍ କେତ୍ଜାଣ୍ ଯିହୁଦି ଦରମ୍ନି ପଣ୍ଡିତାର୍ ଯୀଶୁଙ୍ଗ୍ ହୁଡ଼୍ଦେଙ୍ଗ୍ ରୁଣ୍ଡାଆତାର୍। ଲାଗିଙ୍ଗ୍ ପାରୁସିଦଳ୍ ଆରେ ଯିହୁଦି ଦରମ୍ନି ପଣ୍ଡିତାର୍ ଯୀଶୁଙ୍ଗ୍ ୱେନ୍ବାତାର୍, 2ଆରେ ଇନା କିଦେଙ୍ଗ୍ ମି ଚେଲାର୍ ଆଗେନି ମାନାୟ୍ ହିକାଇ କିତି ବିଦି ମି ଚେଲାର୍ ମାନି କିଉରା? ହେ ବିଦିତାଙ୍ଗ୍ ଇନା କିଦେଙ୍ଗ୍ ତିନିହିଙ୍ଗ୍ ତୁକେର୍ କେଇଦ ତିନାରା? 3ଯୀଶୁ ଆରେରଗ ହେୱାରିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ଈଶ୍ୱର ବିଦିପିସ୍ତି ଜାର୍-ଜାର୍ ବିଦିତିଙ୍ଗ୍ ମାନି କିନାଦେରା।
4ଲାଗିଙ୍ଗ୍ ଈଶ୍ୱର ଇ ବିଦି ହିତ୍ତାନ୍ନା, ଯେ ଜାର୍-ଜାର୍ ଆୟାଆବାରିଙ୍ଗ୍ ମାନିକିଜି ମାନାଟ୍। ଆରେ ଇନେର୍ ତା ତେହି ଲାତ୍ରାହିଙ୍ଗ୍ ଇନସ୍ତା କିନାନ୍ ହେୱାନ୍ ହାଃନି ଦଣ୍ଡ୍ ପାୟା ଆନାନ୍। 5ମାତର୍ ଏପେଙ୍ଗ୍ ମି ଆୟା, ଆବାରିଙ୍ଗ୍ ଇଞ୍ଜିମାନାଦେର୍ ଈଶ୍ୱରତିଙ୍ଗ୍ ହିଦ୍ନାଙ୍ଗ୍ ଇଞ୍ଜି ପାର୍ମାଣ୍ କିତାଙ୍ଗ୍ନା, ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ମିଙ୍ଗେଙ୍ଗ୍ ହିଦେଙ୍ଗ୍ ଆଡ଼୍ଦୁଙ୍ଗା, ହେଦାଙ୍ଗ୍ ଆନେଙ୍ଗ୍ ଈଶ୍ୱରତିଙ୍ଗ୍ ନେ ହିନାଙ୍ଗ୍। 6ଏପେଙ୍ଗ୍ ଏଲେଙ୍ଗ୍ ଇଞ୍ଜି ଜାର୍ ଆୟାଆବାରିଙ୍ଗ୍ ମାନି କିଦେଙ୍ଗ୍ ହିଉଦେରା। ହେଲେକେ ଏପେଙ୍ଗ୍ ମାନାୟାରିଙ୍ଗ୍ ହିକ୍ଷା ହିନିହିଙ୍ଗ୍ ଈଶ୍ୱର ସାସ୍ତର୍ ବିଦିତିଙ୍ଗ୍ ପିହ୍ନାଦେରା। ଆରେ ଆଗେନିକାର୍ ହିକାଇ କିତି ବିଦିତିଙ୍ଗ୍ ଏପେଙ୍ଗ୍ ମାନି କିନାଦେରା, ଏପେଙ୍ଗ୍ ଇ ବିଦିତିଙ୍ଗ୍ ମାନିକିଜି ବେସିବୁଲ୍ କିନାଦେରା।”
7ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଯିଶାୟ ଭବିଷ୍ଯତବକ୍ତା ଈଶ୍ୱର ବେଣ୍ତାଙ୍ଗ୍ ମିଙ୍ଗେଙ୍ଗ୍ ଚଚ୍ଚି ସତ୍ ୱେଚ୍ଚାତାନ୍, ଏପେଙ୍ଗ୍ ପାଟ୍କାର୍ ମାନାୟ୍ କାଦେର୍,
8ଏପେଙ୍ଗ୍ ନାଙ୍ଗେଙ୍ଗ୍ ଜପି-ଜପି ଲାଡ୍ କିଦ୍ନାଦେର୍ ମାତର୍ ମି ଗରବ୍ତାକେ ଲାଡ୍ କିଦୁଦେର୍।
9ନାଙ୍ଗେଙ୍ଗ୍ ସନ୍ମାନ୍ ହିଦେଙ୍ଗ୍ ପୁଜା କିତାକା ହେଦାଙ୍ଗ୍ ପଲିଆ। ଇନେସ୍କି ହେୱାର୍ ମାନାୟ୍ ରସ୍ତି ବିଦିତିଙ୍ଗ୍ ମାପୃବିଦି ଇଞ୍ଜି ମାନାୟାରିଙ୍ଗ୍ ହିକାଇ କିନାରା।”
ଇନାକା ମାନାୟ୍ତିଙ୍ଗ୍ କରାପ୍ କିନାତା
(ମାର୍କ. ୭:୧୪-୨୩)
10ଯୀଶୁ ଆରେରଗ ମାନାୟାରିଙ୍ଗ୍ କୁକ୍ଚି ୱେଚ୍ଚାନ୍, “ନା ବେଣ୍ ୱେନାଟ୍, ଆରେ ବୁଜାଆଡ। 11ୱେଇଦାଙ୍ଗ୍ ଇନାକା ଚିଚିସ୍ ମାନାୟ୍ତିଙ୍ଗ୍ କରାପ୍ କିଦେଙ୍ଗ୍ ଆଡୁତ୍, ମାତର୍ ୱେଇଦାଙ୍ଗ୍ ଇମ୍ଣିବେଣ୍ ହତ୍ନାତ୍ ହେ ବେଣ୍ ନେ ମିଙ୍ଗେଙ୍ଗ୍ କରାପ୍ କିଦ୍ନାତ୍।”
12ହେପାଦ୍ନା ଚେଲାହିର୍ ଯୀଶୁ ଲାଗାୟ୍ ୱାଜି ୱେଚ୍ଚାର୍, ପାରୁସିଦଳ୍ନି ମାନାୟ୍ବେଣ୍ ୱେନ୍ଞ୍ଜି ବାଦା ପାୟାଆତାର୍ନା। ଏପେଙ୍ଗ୍ ଇନାକା ଇଦାଙ୍ଗ୍ ପୁନାଦେର୍? 13ମାତର୍ ଯୀଶୁ ୱେଚ୍ଚାନ୍, “ନା ସରଗ୍ନି ଆବା ଇମ୍ଣିୱିଜୁ ମାର୍କୁ ରୁଜ୍ୱାତାନ୍ନା ହେ ୱିଜୁ ଉବ୍ଜା ଆନିକ୍। 14ହେୱାରିଙ୍ଗ୍ ଚିନ୍ତା କିମାଟ୍, ହେୱାର୍ କାଣାଲଗାଙ୍ଗ୍ କାଣା ହାଜି ଚଚ୍ନାନ୍। ଆରେ ଇନାୱେଡ଼ାଙ୍ଗ୍ ର କାଣାମାନାୟ୍ ଆରେ ର କାଣା ମାନାୟ୍ତିଙ୍ଗ୍ ହାଜି ଚଚ୍ନାନ୍, ଲାଗିଙ୍ଗ୍ ରିକାର୍ ପା କଡ଼ିତାକେ ଆର୍ନାର୍।”
15ହେବେତାଙ୍ଗ୍ ପିତର ଯୀଶୁଙ୍ଗ୍ ୱେଚ୍ଚାନ୍, ଇ କାତାନି ଅର୍ତ ମାଙ୍ଗେଙ୍ଗ୍ ବୁଜାଇକିଜି ହିଦା। 16ଯୀଶୁ ଚେଲାହିରିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ନଙ୍ଗୟ୍ ପାତେକ୍ ବୁଜାଆଉଦେରା? 17ଲାଗିଙ୍ଗ୍ ହେଦାଙ୍ଗ୍ ହେ କାଦି ଗରବ୍ତାକେ ହଣ୍ୱାଦାଙ୍ଗ୍ ପଟ ବିତ୍ରେ ହାନାତ୍ ଆରେ ତାପାଚେ ଜିରା ଆନାତ୍। ଜିରା ଆଜି ବାର୍ତ ହସିହାନାତ୍, ଇଦାଙ୍ଗ୍ ଏପେଙ୍ଗ୍ ବୁଜାଆଉଦେରା।”
18ଆରେରଗ ଯୀଶୁ ୱେଚ୍ଚାନ୍, “ଇନାକା ମାନାୟ୍ ଗରବ୍ ତାକେଣ୍ଡାଙ୍ଗ୍ ହନାତ୍, ହେଦାଙ୍ଗ୍ନେ ହେୱାନିଙ୍ଗ୍ କରାପ୍ କିନାତ୍। 19ମାତର୍ ମାନାୟ୍ ଗରବ୍ତାଙ୍ଗ୍ ନେ କରାପ୍ ଚିନ୍ତା ହତ୍ନାତ୍, ଦାରି, ଚର୍, ମାନାୟ୍ ଅହ୍ନାକା, ମିଚ୍ୱା, ନିନ୍ଦା ଇୱିଜୁ କରାପ୍ ବେଣ୍ ହତ୍ନାତ୍। 20ଇୱିଜୁ କରାପ୍ କାମାୟ୍ ଗରବ୍ତାଙ୍ଗ୍ ହସି ମାନାୟ୍ତିଙ୍ଗ୍ କରାପ୍ କିନାତ୍। ମାତର୍ କେଇନୁଜ୍ୱାଦାଙ୍ଗ୍ କାଦି ଚିଚିସ୍ ମାନାୟ୍ତିଙ୍ଗ୍ କରାପ୍ କିଦେଙ୍ଗ୍ ଆଡୁତ୍।”
ର କଗ୍ଲେ ଯୀଶୁଙ୍ଗ୍ ପାର୍ତି କିତାତ୍
(ମାର୍କ. ୭:୨୪-୩୦)
21ତାପାଚେ ଯୀଶୁ ହେ ବାହା ପିସ୍ତି ସୋର୍ ଆରେ ସିଦନ୍ ସହର୍ତାକେ ହାଚାନ୍। 22କିଣାନିୟ ସହର୍ତାଙ୍ଗ୍ ର କଗ୍ଲେ ୱାଜି ଯୀଶୁଙ୍ଗ୍ ୱେଚ୍ତାତ୍, ଏ ମାପୃ, ଦାଉଦ ରାଜା ଲାତ୍ରାନି ଯୀଶୁ ନାଙ୍ଗେଙ୍ଗ୍ ଦୟାକିଦା, ମାଞ୍ଜ୍ କଇଙ୍ଗ୍ ବୁତ୍ଆତ୍ମା ଡୁତାତ୍ନା।
23ମାତର୍ ଯୀଶୁ ହେଦେଲିଙ୍ଗ୍ ରପାଦ୍ ପା ୱେଚ୍ୱାତାନ୍। ଆରେ ତା ଚେଲାହିର୍ ୱାଜି ଯୀଶୁଙ୍ଗ୍ ଗୁୱାରି କିଜି ୱେଚ୍ଚେଙ୍ଗ୍ ଲାଗାତାର୍, ଇଦେଲିଙ୍ଗ୍ ପକାମ୍ଦେ, ଇଦେଲ୍ ମା ପାଚେ-ପାଚେ ଆଲାଆଜି ୱାନାତା।
24ମାତର୍ ଯୀଶୁ ୱେଚ୍ଚାନ୍, “ଆନେଙ୍ଗ୍ ଇସ୍ରାଏଲନି ଲାତ୍ରା ନିକାଙ୍ଗ୍ ଜାଙ୍ଗ୍ତି ମେଣ୍ଢାକାଜିଙ୍ଗ୍ ଆନେଙ୍ଗ୍ ଇବେ ୱାତାଙ୍ଗ୍ନା।”
25ମାତର୍ ହେ କଗ୍ଲେ ୱାଜି ଯୀଶୁଙ୍ଗ୍ କାଲ୍କୁ ତାରେନ୍ ଡାଣ୍ଡାହାରାଣ୍ ମାଗ୍ଜି ୱେଚ୍ଚାତ୍, “ଏ ମାପୃ, ନାଙ୍ଗେଙ୍ଗ୍ ସାଇଜକିଦା।”
26ମାତର୍ ଯୀଶୁ ହେଦିଲିଙ୍ଗ୍ ୱେଚ୍ଚାନ୍, “ଇମ୍ଣାକା ହେୱାରିଙ୍ଗ୍ ଦର୍କାର୍ ଆଗେ ମା ଜାର୍ ଯିହୁଦି ଲଗାଙ୍ଗ୍ ହିୟାଆନାତ୍। ନଇଲେ ହିମ୍ଣାଙ୍ଗ୍ କାଦି ନିକୁଡ଼ିକାଙ୍ଗ୍ ହିତିଲେକେ ଆନାତ୍।”
27ହେ କଗ୍ଲେ ଯୀଶୁଙ୍ଗ୍ ୱେଚ୍ଚାତ୍, ଆଁ ମାପୃ, ନିକୁଡ଼ିଙ୍ଗ୍ ପା କାଟେଲ୍ ତାରେନ୍ ମାନ୍ଞ୍ଜି ହିମ୍ଣାଙ୍ଗ୍ ସୁକ୍ଡ଼ି କାଦି ତିନିକ୍। 28ତାପାଚେ ଯୀଶୁ ୱେଚ୍ଚାନ୍, “ଏ ଗାଡ଼୍ଚେ! ନିବେ ଗାଜା ପାର୍ତି ମାନାତ୍। ଏନେଙ୍ଗ୍ ନାବେତାଙ୍ଗ୍ ଇନାକା ଇଚା କିନାୟା, ଆନେଙ୍ଗ୍ ହେଦାଙ୍ଗ୍ କିଜିହିଦ୍ନାଙ୍ଗ୍।” ଏଲେଙ୍ଗ୍ ୱେଚ୍ଚି ଦାପ୍ରେ ହେ କଗ୍ଲେ ଗାଡ଼୍ହି ହାର୍ ଆତାତ୍।
ଯୀଶୁ ବେସିହେନି ମାନାୟାରିଙ୍ଗ୍ ହାର୍କିତାନ୍
(ଯିଶା. ୩୫:୫-୬; ଲୁକ. ୭:୨୨-୨୩)
29ଯୀଶୁ ହେବେତାଙ୍ଗ୍ ହସି ଗାଲିଲୀନି ହାମ୍ଦୁର୍ ଲାଗେ ୱାତାନ୍, ଆରେ ମାଡ଼ିଜପି ହାଲ୍ଜି ହେବେ କୁଚ୍ଚାନ୍। 30ଆରେ ବେସିହେନି ମାନାୟ୍ ଚଟା, ବଇରା, କାଣା, ତତ୍ଲା ଆରେ ବାରବିନି ରଗିୟାରିଙ୍ଗ୍ ଆସ୍ତି ଯୀଶୁ ଲାଗାୟ୍ ୱାତାର୍। ଆରେ ହେୱାରିଙ୍ଗ୍ କାଲ୍କୁ ତାରେନ୍ ଇଡ଼୍ତାର୍, ଆରେ ଯୀଶୁ ହେୱାରିଙ୍ଗ୍ ହାର୍କିତାନ୍। 31ହେଲେକେ ତତ୍ଲାର୍ ବେଣ୍କିନାରା, ବଇରାର୍ ୱେଞ୍ଜେଙ୍ଗ୍ ଆଡ୍ନାରା, ଚଟାର୍ ତାଙ୍ଗ୍ନାରା ଆରେ କାଣାର୍ ହୁଡ଼୍ନାରା, ଇଦାଙ୍ଗ୍ ହୁଡ଼୍ଜି ମାନାୟାର୍ କାବା ଆତାର୍। ଆରେ ଇସ୍ରାଏଲନି ମାନାୟାର୍ ଈଶ୍ୱରତିଙ୍ଗ୍ ଜୟ୍-ଜୟ୍ କିତାର୍।
ଯୀଶୁ ଚାର୍ ହାଜାର୍ ମାନାୟାରିଙ୍ଗ୍ ଚିଚ୍ପାତାନ୍
(ମାର୍କ. ୮:୧-୧୦)
32କେତେକ୍ ଦିନ୍ ହାଚି ପାଚେ, ଯୀଶୁତାକେ ବେସିହେନି ମାନାୟ୍ ରୁଣ୍ଡାଆତାର୍। ଏଚେକାଡ଼୍ଦ ହେୱାର୍ତାକେ କାଦି କଣ୍ଡା ହିଲାତାତ୍। ହେଦାଙ୍ଗ୍ କାଜିଙ୍ଗ୍ ଯୀଶୁ ତା ଚେଲାହିରିଙ୍ଗ୍ ହିର୍ବି ୱେଚ୍ଚାନ୍, “ଇ ମାନାୟାର୍ ତିନ୍ଦିନ୍ ଆତାତେ ନା ଲାହାଙ୍ଗ୍ ମାନାରା। ମାତର୍ ନଙ୍ଗୟ୍ ଇୱାର୍ ତାକେ ଇନାକାପା ଚିଞ୍ଜେଙ୍ଗ୍ ହିଲୁତ୍। ହେଦାଙ୍ଗ୍ କାଜିଙ୍ଗ୍ ନାଙ୍ଗେଙ୍ଗ୍ ଦୁଃକ୍ ହତ୍ନାତା।” 33ଚେଲାହିର୍ ଯୀଶୁଙ୍ଗ୍ ୱେଚ୍ଚାର୍, ଇନେସ୍ କିଜି ଏଚେକ୍ ହେନି ମାନାୟ୍ତିଙ୍ଗ୍ ଇ ଚିମ୍ରା ବାହାତାକେ ଚିଚ୍ପେଦେଙ୍ଗ୍ ଆଡ୍ନାସ୍? 34ଯୀଶୁ ଚେଲାହିରିଙ୍ଗ୍ ୱେନ୍ବାତାନ୍, ମିତାକେ ଏଚେଗଟା ରୁଟିଙ୍ଗ୍ ମାନିକ୍? ଚେଲାହିର୍ ୱେଚ୍ଚାର୍, ମାତର୍ ସାତ୍ଗଟା ରୁଟିଙ୍ଗ୍ ମାନିକ୍, ଆରେ ଅଲପ୍ ଲେକେ ହିରୁ ମିନ୍କୁ ମାନିକ୍। 35ହେବେତାଙ୍ଗ୍ ଯୀଶୁ ମାନାୟ୍ତିଙ୍ଗ୍ ମେଦ୍ନିତ କୁଚ୍ଚେଙ୍ଗ୍ ଆଦେସ୍ ହିତାନ୍।
36ତାପାଚେ ହେ ସାତ୍ଗଟା ରୁଟି ଆରେ ହିରୁ ମିନ୍କୁକାଙ୍ଗ୍ ଆସ୍ତି ଯୀଶୁ ଈଶ୍ୱରତିଙ୍ଗ୍ ଦନ୍ଯବାଦ୍କିଜି, ହେ ରୁଟିଙ୍ଗ୍ ଆରେ ହିରୁ ମିନ୍କୁକାଙ୍ଗ୍ ଡ୍ରିପ୍କିସ୍ ମାନାୟାରିଙ୍ଗ୍ ବାଟାକିଜି ହିଦେଙ୍ଗ୍ ଚେଲାହିରିଙ୍ଗ୍ ହିତାନ୍। ଚେଲାହିର୍ ହେ ରୁଟିଙ୍ଗ୍ ବୁଲାଇ କିଜି ହିତାର୍।
37ହେବେତାଙ୍ଗ୍ ହେ ମାନାୟାର୍ ପଟ ପାଞ୍ଜୁ-ପାଞ୍ଜୁ ଚିଚାର୍। ଚେଲାହିର୍ ମାନାୟାର୍ ତିନ୍ଞ୍ଜି ଉବ୍ରାଆତି ରୁଟିଙ୍ଗ୍ ସାତ୍ଗଟା ଟପାକାଙ୍ଗ୍ ପେସ୍କାତାର୍। 38ହେବେ ଚିଚାକାର୍, କଗ୍ଲେ ଆରେ ହିମ୍ଣାକାଙ୍ଗ୍ ପିସ୍ତି ଅତିକମ୍ରେ ଚାର୍ ହାଜାର୍ ଆଣ୍ଡ୍ରା ହିମ୍ଣାଙ୍ଗ୍ ମାଚାର୍। 39ତାପାଚେ ଯୀଶୁ ହେୱାରିଙ୍ଗ୍ ପକ୍ତାନ୍। ଆରେ ତା ଚେଲାହିର୍ ହୁଦାଙ୍ଗ୍ ଡଙ୍ଗାତାକେ ଦୁମ୍ଜି ମଗ୍ଦାନ୍ ସହର୍ନି ହାନ୍ଦିତାକେ ୱାତାର୍।
Currently Selected:
ମାଥିଉ 15: PEGNT
Highlight
Share
Copy
Want to have your highlights saved across all your devices? Sign up or sign in
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
