ମାଥିଉ 16
16
ଯୁନସ୍ ଚାନିଆଆନି ଚିନା
(ମାର୍କ. ୭:୧୧-୧୩; ଲୁକ. ୧୨:୫୪-୫୬)
1ପାରୁସିଦଳ୍ ଆରେ ଯିହୁଦି ଦର୍ମନି ସାଦୁକିଦଳ୍ନି ମାନାୟାର୍ ଯୀଶୁ ଲାଗାୟ୍ ୱାଜି ଯୀଶୁଙ୍ଗ୍ ହେୱାର୍ ଯୀଶୁଙ୍ଗ୍ ଗୁପାଇ କିଦେଙ୍ଗ୍ ସରଗ୍ତାଙ୍ଗ୍ ର ଚାନିଆଆନି ଚିନା ଏନ୍ତେଙ୍ଗ୍ ଗୁୱାରି କିତାର୍। 2ମାତର୍ ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ମିକାହାରେସ୍ ଏପେଙ୍ଗ୍ ଇଞ୍ଜିମାନାଦେର୍, ହାର୍ଦି ପାଗ୍ ମାନାତ୍, ଲାଗିଙ୍ଗ୍ ସରଗ୍ ହେନ୍ତାତ୍ନା।
3ଆରେ ଆଗେ ୱେଚ୍ଚି ମାନାଦେର୍, ନେଞ୍ଜେଙ୍ଗ୍ ବାର୍ହା ଆନାତ୍, ଲାଗିଙ୍ଗ୍ ସରଗ୍ ହେନ୍ତାତ୍ନା ଆରେ ବାର୍ହା ବାଦାଡ଼୍ ଆତାତ୍ନା। ବାଦାଡ଼୍ନି ପାଗ୍ ହୁଡ଼୍ଜି ଏପେଙ୍ଗ୍ ପୁନାଦେରା, ମାତର୍ ନଙ୍ଗୟ୍ନି ଚିନାତିଙ୍ଗ୍ ୱିଜୁ ବୁଜା ଆଦେଙ୍ଗ୍ ଆଡୁଦେରା? 4ବାନ୍ୟା ମାନାୟ୍ ଆରେ ଦାରୁଲାନି ଲାତ୍ରା ଚାନିଆଆନି ଚିନା ଡେକ୍ନାର୍। ମାତର୍ ଭବିଷ୍ଯତବକ୍ତା ଯୁନସ୍ ଜିବୁନ୍ତ ଇନେସ୍ ଲେଗ୍ଦି ଚାନିଆଆନି କାମାୟ୍ କିଜି ମାଚାର୍ ହେଲେଗ୍ଦି ଚିନା ମିଙ୍ଗେଙ୍ଗ୍ ହିୟିଆନାତ୍।” ଆରେ ଯୀଶୁ ହେୱାରିଙ୍ଗ୍ ପିସ୍ତି ହାଚାନ୍।
ପାରୁସିଦଳ୍ ଆରେ ସାଦୁକିର୍ ବିତ୍ରେ ସଡ଼ାକାର୍
(ମାର୍କ. ୮:୧୪-୨୧)
5ଚେଲାହିର୍ ଆନ୍ଟିପାଡ଼୍କା ହାଲ୍ଜି ହୁଡ଼୍ତାର୍ ଯେ, ହେୱାର୍ ରୁଟି ଅଦେଙ୍ଗ୍ ବାଣାଆତାର୍। 6ପାଚେ ଯୀଶୁ ଚେଲାହିରିଙ୍ଗ୍ ୱେଚ୍ଚାନ୍, “ଜାଗ୍ରତ୍ ଆଜି ମାନାଟ୍ ପାରୁସିଦଳ୍ ଆରେ ଯିହୁଦି ଦର୍ମନି ସାଦୁକିଦଳ୍ନି ସଡ଼ାକାର୍ ତାକେଡାଙ୍ଗ୍ ସାବ୍ଦାନ୍ ଆଜି ମାନାଟ୍।” 7ହେବେତାଙ୍ଗ୍ ଚେଲାହିର୍ ଜାର୍-ଜାର୍ବିତ୍ରେ ପୁସୁର୍ ପାସାର୍ କିଜି ବେଣ୍ କିତାର୍, “ଆସେଙ୍ଗ୍ ରୁଟି ତାହି ୱାୱିତିଲେ ହେୱାନ୍ ଇବେଣ୍ ଇଞ୍ଜ୍ନାନା।” 8ହେୱାର୍ ପୁସୁର୍ ପାସାର୍ ଆନାକା ପୁନ୍ଞ୍ଜି, ଯୀଶୁ ଚେଲାହିରିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ନା ବିଷୟରେ ନଙ୍ଗୟ୍ ପେତେକ୍ ପୁନୁଦେରା କି ବୁଜାଆଉଦେରା। ଏପେଙ୍ଗ୍ ବୁଜା ଆଦେଙ୍ଗ୍ ଏଚେକ୍ ଆବ୍ଡ଼ୁ ଆନାଦେରାକି?
9ଏପେଙ୍ଗ୍ ପୁଚାଦେର୍ନା ପାଞ୍ଚ୍ଗଟା ରୁଟି ପାଞ୍ଚ୍ ହାଜାର୍ ମାନାୟ୍ ତିନ୍ଞ୍ଜି ମାଚାର୍, ଆରେ ଏପେଙ୍ଗ୍ ଉବ୍ରାଆତି ରୁଟିଙ୍ଗ୍ ବାରଗଟା ଟପାକାଙ୍ଗ୍ ପେସ୍ଦି ବାର୍ତିକିଜି ମାଚାଦେର୍।” 10ଆରେ ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଚାରି ହାଜାର୍ ମାନାୟ୍ତିଙ୍ଗ୍ ସାତ୍ଗଟା ରୁଟିଙ୍ଗ୍ ତିନ୍ଞ୍ଜି ମାଚାର୍, ଆରେ ଏପେଙ୍ଗ୍ ଉବ୍ରାଆତି ରୁଟିଙ୍ଗ୍ ସାତ୍ଗଟା ଟପାକାଙ୍ଗ୍ ବାର୍ତିକିଜି ମାଚାଦେର୍। 11ଆନେଙ୍ଗ୍ ମିଙ୍ଗେଙ୍ଗ୍ ରୁଟି ବିଷୟରେ ୱେଚ୍ୱାତାଙ୍ଗ୍ନା, ଇଦାଙ୍ଗ୍ ଇନେସ୍ ଏପେଙ୍ଗ୍ ନାଙ୍ଗେଙ୍ଗ୍ ପୁଞ୍ଜୁଦେରା? ମାତର୍ ପାରୁସିଦଳ୍ ଆରେ ଯିହୁଦି ଦର୍ମନି ସାଦୁକିଦଳ୍ନି ସଡ଼ାକାର୍ ବିଷୟତାଙ୍ଗ୍ ସାବ୍ଦାନ୍ ଆଜି ମାନାଟ୍।”
12ହେୱାନ୍ ରୁଟିନି ସଡ଼ାକାର୍ତାଙ୍ଗ୍ ସାବ୍ଦାନ୍ ଆଜି ମାଞ୍ଜେଙ୍ଗ୍ ୱେଚ୍ୱାଦାଙ୍ଗ୍ ପାରୁସିଦଳ୍ ଆରେ ଯିହୁଦି ଦର୍ମନି ସାଦୁକିଦଳ୍ନି ହିକ୍ଷାତାଙ୍ଗ୍ ସାବ୍ଦାନ୍ ଆଜି ମାଞ୍ଜେଙ୍ଗ୍ ହେୱାରିଙ୍ଗ୍ ୱେଚ୍ଚି ମାଚାନ୍, ଇଦାଙ୍ଗ୍ ହେୱାର୍ ହେପାଦ୍ନା ବୁଜାଆତାର୍।
ଯୀଶୁଙ୍ଗ୍ ଖ୍ରୀଷ୍ଟ ଇଞ୍ଜି ପିତର ପାର୍ତି କିତାନ୍
(ମାର୍କ. ୮:୨୭-୩୦; ଲୁକ. ୯:୧୮-୨୧)
13ପାଚେ ବେଥସାଇଦା ସହର୍ତାଙ୍ଗ୍ ଯୀଶୁ ଆରେ ତା ଚେଲାହିର୍ କାଇସରିଆ ପିଲିପ ସହର୍ନି ନାସ୍କୁକାଙ୍ଗ୍ ହାନିହିଙ୍ଗ୍, ଯୀଶୁ ହାଜ୍ଦ ହେୱାରିଙ୍ଗ୍ ୱେନ୍ବାତାନ୍, “ଆନେଙ୍ଗ୍ ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣାତିଙ୍ଗ୍ ମାନାୟାର୍ ଇନେର୍ ଇଞ୍ଜି ଇଞ୍ଜ୍ନାର୍?” 14ହେୱାର୍ ଯୀଶୁଙ୍ଗ୍ ୱେଚ୍ଚାର୍, “କେତେକ୍ ମାନାୟାର୍ ଇନାରା ଡୁବନ୍ହିନି ଯୋହନ, ଆରେ କେତେକ୍ ହେନି ଇନାରା ଏଲିୟ, ଆରେ କେତେକ୍ ହେନି ଇନାର୍, ଯିରିମିୟ କି ଭବିଷ୍ଯତବକ୍ତାର୍ ବିତ୍ରେତାଙ୍ଗ୍ ରକାନ୍।” 15ଯୀଶୁ ହେୱାରିଙ୍ଗ୍ ୱେନ୍ବାତାନ୍, “ଆନେଙ୍ଗ୍ ଇନେର୍ ଇଞ୍ଜି ଏପେଙ୍ଗ୍ ଇନାକା ବାବିକିନାଦେରା?” 16ଶିମୋନ ପିତର ୱେଚ୍ଚାନ୍, “ଏନେଙ୍ଗ୍ ଆନାୟା ଖ୍ରୀଷ୍ଟ। ଯିବୁନ୍ ମାନି ଈଶ୍ୱର ମେହିତି।”
17ହେବେତାଙ୍ଗ୍ ଯୀଶୁ ଶିମୋନ ପିତରତିଙ୍ଗ୍ ୱେଚ୍ଚାନ୍, “ଏ ଯୁନସ୍ ମେହି ଶିମୋନ, ଏନେଙ୍ଗ୍ ଦନ୍ୟ, ଇନେସ୍କି ମାନାୟ୍ନି କଚଣ୍ତ ଇ କାତା ୱେଚ୍ୱାତାର୍ନା। ମାତର୍ ନା ସରଗ୍ନି ଆବା ଇ କାତା ୱେଚ୍ଚାତାନ୍ନା। 18ଆରେ ଆନେଙ୍ଗ୍ ପା ମିଙ୍ଗେଙ୍ଗ୍ ୱେଚ୍ଚାନାଙ୍ଗା, ଏନେଙ୍ଗ୍ ପିତର, ଆରେ ଇ କାଲ୍ଜପି ଆନେଙ୍ଗ୍ ଜାର୍ ମଣ୍ଡ୍ଲି ଇଲ୍ ରହ୍ନାଙ୍ଗ୍, ଆରେ ନରକ୍ନି ସାକ୍ତି ହେଦାଙ୍ଗ୍ତିଙ୍ଗ୍ ଆରାଇ କିଦେଙ୍ଗ୍ ଆଡୁତ୍।
19ଆନେଙ୍ଗ୍ ମିଙ୍ଗେଙ୍ଗ୍ ଈଶ୍ୱର ସାସନ୍ କିନି ରାଜିନି କୁଚିକାଡିଙ୍ଗ୍ ହିଦ୍ନାଙ୍ଗ୍। ଆରେ ଏପେଙ୍ଗ୍ ପୁର୍ତିତାକେ ଇନାକାପା ବନ୍ଦ୍ କିନାଦେର୍, ସରଗ୍ତାକେ ହେଦାଙ୍ଗ୍ ବନ୍ଦ୍ ମାନ୍ଙ୍ଗାନାତ୍, ଆରେ, ପୁର୍ତିତାକେ ଇନାକାପା ମୁକ୍ତି କିନାଦେର୍, ସରଗ୍ତାକେ ପା ହେଦାଙ୍ଗ୍ୱିଜୁ ମୁକ୍ତି ମାନ୍ଗାନାତ୍।” 20ହେବେତାଙ୍ଗ୍ ଯୀଶୁ ତା ଚେଲାହିରିଙ୍ଗ୍ ଆଦେସ୍ ହିଜି ୱେଚ୍ଚାନ୍, “ଆନେଙ୍ଗ୍ ଖ୍ରୀଷ୍ଟ ଇଞ୍ଜି ଇନେରିଙ୍ଗ୍ ପା ୱେଚ୍ମାଟ୍।”
ଜାର୍ ହାଃନାକା ଆରେ ହାଃଜି ଆରେରଗ ଜିବୁନ୍ଆନି ବିଷୟରେ ଯୀଶୁ ୱେଚ୍ଚାନ୍
(ମାର୍କ. ୮:୩୧-୩୩; ଲୁକ. ୯:୨୨)
21ନଙ୍ଗୟ୍ତାଙ୍ଗ୍ ଯୀଶୁ ଖ୍ରୀଷ୍ଟ ତା ଚେଲାରିଙ୍ଗ୍ ବୁଜାଇକିଜି ୱେଚ୍ଚେଙ୍ଗ୍ ଲାଗାତାନ୍, ଆନେଙ୍ଗ୍ ଯିରୁଶାଲାମ ସହର୍ତାକେ ହାଞ୍ଜେଙ୍ଗ୍ ଆନାତ୍। ହେବେ ପ୍ରାଚିନ୍, ଈଶ୍ୱର ହେବାକିନି ମୁଡ଼୍ଦି ପୁଜାରିର୍ ଆରେ ଯିହୁଦି ଦରମ୍ନି ପଣ୍ଡିତାର୍ ନାଙ୍ଗେଙ୍ଗ୍ ହିନସ୍ତାକିଜି ମାର୍ନେ ଅସ୍ତାନାର୍। ମାତର୍ ଆନେଙ୍ଗ୍ ତିନ୍ଦିନ୍ ପାଚେ ଆରେରଗ ନିଙ୍ଗ୍ନାଙ୍ଗ୍।
22ହେବେତାଙ୍ଗ୍ ପିତର ହେୱାନିଙ୍ଗ୍ ଅଲପ୍ ଦେହା କୁଚ୍ଚି ଏଲେଙ୍ଗ୍ ୱେଚ୍ୱାକା ଇଞ୍ଜି ଅଲପ୍ ରିସାଆଜି ୱେଚ୍ଚାନ୍। ଏ ମାପୃ, ଈଶ୍ୱର ନିଙ୍ଗେଙ୍ଗ୍ ଦୟା କିଦେନ୍, ଇଦାଙ୍ଗ୍ ମିଙ୍ଗେଙ୍ଗ୍ ଇନାୱେଡ଼ାଙ୍ଗ୍ ପା ଗଟା ଆମେତ୍।
23ମାତର୍ ଯୀଶୁ ମାସ୍ଜି ତା ଚେଲାରିଙ୍ଗ୍ ହୁଡ଼୍ତାନ୍, ଆରେ ପିତରତିଙ୍ଗ୍ ଦମ୍କାଇକିଜି ୱେଚ୍ଚାନ୍, “ଶୟତାନ! ନାବେତାଙ୍ଗ୍ ଦେହା ଆ। ଏନେଙ୍ଗ୍ ନାଙ୍ଗେଙ୍ଗ୍ ବାଦାହିଦ୍ନି ଲେକେ ଆନାୟା, ଇନେସ୍କି ଏନେଙ୍ଗ୍ ଈଶ୍ୱର ବିଷୟରେ ବାବି କିୱାଦାଙ୍ଗ୍ ମାନାୟ୍ ବିଷୟରେ ବାବିକିନାୟା।”
ଯୀଶୁ ତାଙ୍ଗ୍ନି ଅର୍ତ
(ମାର୍କ. ୮:୩୪-୯:୧; ଲୁକ. ୯:୨୩-୨୭)
24ହେପାଦ୍ନା ଯୀଶୁ ତା ଚେଲାହିରିଙ୍ଗ୍ ୱେଚ୍ଚାନ୍, “ଇନେର୍ ପା ନା ପାଚେ ୱାଜି ଚେଲା ଆନାନ୍, ଲାଗିଙ୍ଗ୍ ହେୱାନ୍ ଜାର୍ ସୁକ୍ ପିସ୍ତି ଆରେ ଜାର୍ କୃଶ ଆସ୍ତି ନା ପାଚେ ୱାଡ। 25ଲାଗିଙ୍ଗ୍ ଇନେର୍ ଜାର୍ ଜିବୁନ୍ ଉଦାର୍ କିଦେଙ୍ଗ୍ ମାନ୍ କିନାନ୍, ହେୱାନ୍ ହେଦାଙ୍ଗ୍ ହାରାୟ୍ କିନାନ୍। ମାତର୍ ଇନେର୍ ନା କାଜିଙ୍ଗ୍ ଜାର୍ ଜିବୁନ୍ ହାରାୟ୍ କିନାନ୍, ହେୱାନ୍ ତା ଜିବୁନ୍ତିଙ୍ଗ୍ ବାଚାଇ କିନାନ୍। 26ଇନେର୍ ପା ୱିଜୁ ଜଗତ୍ତିଙ୍ଗ୍ ପାୟାଆଜି ଜାର୍ ଜିବୁନ୍ତିଙ୍ଗ୍ ଆରାୟ୍ କିତିସ୍, ହେଦାଙ୍ଗ୍ ତାଦି ଇନା ଲାବ୍? ଆରେରଗ ମାନାୟ୍ ତା ଜିବୁନ୍ ପାୟାଆନି ବାଦୁଲ୍ତ ଈଶ୍ୱରତିଙ୍ଗ୍ ଇନାକା ହିଦେଙ୍ଗ୍ ଆଡ୍ନାନ୍?
27ଆରେ ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା ଜାର୍ ଆବା ଗୌରବ ହୁଦାଙ୍ଗ୍ ଜାର୍ ଦୁତ୍କୁ ହୁଦାଙ୍ଗ୍ ୱାନାନ୍। ଆରେ ହେପାଦ୍ନା ଯୀଶୁ ୱିଜୁ ମାନାୟାରିଙ୍ଗ୍ ତା କିତି କାମାୟ୍ତାଙ୍ଗ୍ ପାଡ଼୍ ହିଦ୍ନାନ୍। 28ଯୀଶୁ ତା ଚେଲାରିଙ୍ଗ୍ ଆରେ ହେବେ ମାଚି ମାନାୟାରିଙ୍ଗ୍ ୱେଚ୍ଚାନ୍, ‘ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା ତା ସାସନ୍ କିନି ରାଜି ୱାୱି ପାତେକ୍ ଇବେ ମାନି କେତେକ୍ ମାନାୟ୍ ହାଃଉର୍।’ ”
Currently Selected:
ମାଥିଉ 16: PEGNT
Highlight
Share
Copy
Want to have your highlights saved across all your devices? Sign up or sign in
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
