ମାର୍କ 10
10
ପିସ୍ପାଆନି ବିଷୟରେ ଯୀଶୁ ହିକ୍ଷା ହିତାନ୍
(ମାଥି. ୧୯:୧-୧୨; ଲୁକ. ୧୬:୧୮)
1ଯୀଶୁ ଆରେ ତା ଚେଲାହିର୍ କପୁର୍ନାହୁମ୍ ସହର୍ ପିସ୍ତି ହେୱାନ୍ ଯିହୁଦା ଜିଲ୍ଲା ନିପଡାଙ୍ଗ୍ ଆଜି ଯର୍ଦ୍ଦନ ନାଗୁଡ଼୍ ଆରେ ର ପାଡ଼୍କା ହାଚାର୍। ହେବେ ମାନାୟାର୍ ଆରେରଗ ତା କଚଣ୍ତ ରୁଣ୍ଡାଆତାର୍, ଆରେ ଇନେସ୍ ଲେକେ ହିକ୍ଷାହିଜି ମାଚାନ୍ ହେଲେକେ ଆରେରଗ ହିକ୍ଷାହିଦେଙ୍ଗ୍ ଲାଗାତାନ୍।
2ତାପାଚେ ଯିହୁଦି ଦରମ୍ନି ପାରୁସିଦଳ୍ନି ମାନାୟାର୍ ଯୀଶୁଙ୍ଗ୍ ଗୁପାଇ କିଦେଙ୍ଗ୍ ୱେନ୍ବାତାର୍, “ଆଣ୍ଡ୍ରେନ୍ କଗ୍ଲେଙ୍ଗ୍ ହେଲ ନାଟ୍ନାକା ନିୟମ୍ ମାନାତ୍ କି?”
3ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ମୋଶା ମିଙ୍ଗେଙ୍ଗ୍ ଇନା ଆଦେସ୍ ହିତ୍ତାନ୍ନା?”
4ହେୱାର୍ ଯୀଶୁଙ୍ଗ୍ ୱେଚ୍ଚାର୍, “ମୋଶା ଲେକିକିତି ସାସ୍ତର୍ତାକେ କଗ୍ଲେଙ୍ଗ୍ ହେଲ ନାଟ୍ନାକା ଆଦେସ୍ ହିତାନ୍ନା।”
5ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଈଶ୍ୱରତିଙ୍ଗ୍ ୱିଜୁଦିନ୍ ମାନିକିୱାଦାଙ୍ଗ୍ ମାଚିଲେ, ଇ କାଜିଙ୍ଗ୍ ମୋଶା ମିଙ୍ଗେଙ୍ଗ୍ ଇ ଆଦେସ୍ ହିତ୍ତାନ୍ନା। 6ମାତର୍ ସାସ୍ତର୍ତାକେ ଏଲେଙ୍ଗ୍ ଲେକାଆତାତ୍ନା, ‘ଈଶ୍ୱର ଜଗତ୍ତିଙ୍ଗ୍ ଆଗେ ଉବ୍ଜାଇ କିତିହିଙ୍ଗ୍ ଆଣ୍ଡ୍ରେନ୍ ଆରେ କଗ୍ଲେ କିଜି ରସ୍ତାନ୍।’ 7ଇଦାଙ୍ଗ୍ କାଜିଙ୍ଗ୍ ଆଣ୍ଡ୍ରା ହିମ୍ଣାଙ୍ଗ୍ ଜାର୍ ଆବାଆୟା ତାକେଣ୍ତାଙ୍ଗ୍ ବିନେ ଆଜି, ହେୱାର୍ ରବେଆଜି ମାନାର୍। 8ଲାଗିଙ୍ଗ୍ ହେୱାର୍ ଆରେ ରିୟାର୍ ଆଜି ମାନୁର୍ ମାତର୍ ର ଗାଗାଡ଼୍ ଆଜି ମାନାର୍। 9ଲାଗିଙ୍ଗ୍, ଈଶ୍ୱର ଇମ୍ଣି ରିୟାରିଙ୍ଗ୍ ରବେ ମେହାଇ କିତାତ୍ନା, ଇନେର୍ ପା ହେୱାରିଙ୍ଗ୍ ବାଙ୍ଗାୟ୍ କିମାଟ୍।”
10ହେୱାନ୍ ଇଞ୍ଜ ହାଚି ପାଚେ ଚେଲାହିର୍ ଯୀଶୁଙ୍ଗ୍ ଇ ବିଷୟତିଙ୍ଗ୍ ଆରେରଗ ୱେନ୍ବାତାର୍। 11ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଇମ୍ଣି ଆଣ୍ଡ୍ରେନ୍ ପା ଜାର୍ କଗ୍ଲେଙ୍ଗ୍ ପିସ୍ତି ଜେକନି କଗ୍ଲେଙ୍ଗ୍ ଇଲାଆନାନ୍, ହେୱାନ୍ ତା ବିରୁଦ୍ ତାଙ୍ଗ୍ ଦାରି କିନାନ୍। 12ଆରେ, ଇମ୍ଣି କଗ୍ଲେ ଜାର୍ ଆଣ୍ଡ୍ରେନିଙ୍ଗ୍ ପିସ୍ତି ଜେକନି ଆଣ୍ଡ୍ରେନିଙ୍ଗ୍ ଇଲାଆନାତ୍, ହେଦେଲ୍ ପା ଦାରି କିନାତ୍।”
ଯୀଶୁ ହିରୁ ହିମ୍ଣାରିଙ୍ଗ୍ ଆଶ୍ରିବାଦ୍ କିନାନ୍
(ମାଥି. ୧୯:୧୩-୧୫; ଲୁକ. ୧୮:୧୫-୧୭)
13ଯୀଶୁ ହିରୁ-ହିରୁ ଗାଡ଼୍ଚେ ହିମ୍ଣାକାଙ୍ଗ୍ କାପ୍ଡ଼ାତାକେ କେଇ ଇଡ଼୍ଜି ଆଶ୍ରିବାଦ୍ କିନାନ୍ ଇଞ୍ଜି, ତା ଲାଗାୟ୍ ତାତେଙ୍ଗ୍ ଲାଗାତାର୍। ମାତର୍ ତା ଚେଲାହିର୍ ମାନାୟାରିଙ୍ଗ୍ ତାହିୱାନାଦେରା ଇଞ୍ଜି କେତ୍ତିମାଚାର୍। 14ଯୀଶୁ ହେଦାଙ୍ଗ୍ ହୁଡ଼୍ଜି ରିସାଆଜି ହେୱାରିଙ୍ଗ୍ ୱେଚ୍ଚାନ୍, “ହିରୁ-ହିରୁ ଗାଡ଼୍ଚେ ହିମ୍ଣାକାଙ୍ଗ୍ ନା ଲାଗେ ୱାଦେଙ୍ଗ୍ ହିଆଟ୍, ହେୱାରିଙ୍ଗ୍ ମୁନା କିମାଟ୍। ଇନେସ୍କି ଈଶ୍ୱର ସାସନ୍ କିନି ରାଜି ଇ ଗାଡ଼୍ଚେ ହିମ୍ଣାଙ୍ଗ୍ ତି ଲେକେ। 15ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, ଇନେର୍ ପା ହିରୁ ହିମ୍ଣା ଲେକେ ଈଶ୍ୱର ଆଦିକାର୍ତିଙ୍ଗ୍ ମାନିକିଉନ୍, ହେୱାନ୍ ଈଶ୍ୱର ସାସନ୍ କିନି ରାଜିତାକେ ହାଞ୍ଜେଙ୍ଗ୍ ଆଡୁନ୍।” 16ଆରେ, ଯୀଶୁ ହିରୁ ହିମ୍ଣାରିଙ୍ଗ୍ ପମ୍ଜି ହେୱାର୍ ଜପି କେଇ ଇଡ଼୍ଜି ହେୱାରିଙ୍ଗ୍ ଆଶ୍ରିବାଦ୍ କିତାନ୍।
ରକାନ୍ ହାଉକାର୍ ମାନାୟ୍
(ମାଥି. ୧୯:୧୬-୩୦; ଲୁକ. ୧୮:୧୮-୩୦)
17ଯୀଶୁ ଆରେ ତା ଚେଲାହିର୍ ଆରେରଗ ହାନିହିଙ୍ଗ୍, ରକାନ୍ ହନ୍ଚି ୱାତାନ୍, ଆରେ ତା କାଲ୍ ତାରେନ୍ ମେଣ୍ଡାକୁନ୍ଦିକିଜି ଯୀଶୁଙ୍ଗ୍ ୱେନ୍ବାତାନ୍, “ଏ ହାର୍ଦି ଗୁରୁ, ୱିଜ୍ୱି ଜିବୁନ୍ ପାଇକିଦେଙ୍ଗ୍ ଆନେଙ୍ଗ୍ ଇନାକା କିଦେଙ୍ଗ୍ ଆନାତ୍?”
18ହେପାଦ୍ନା ଯୀଶୁ ହେୱାନିଙ୍ଗ୍ ୱେଚ୍ଚାନ୍, “ନାଙ୍ଗେଙ୍ଗ୍ ହାର୍ଦାକାଇ ଇଞ୍ଜି ଇନା କିଦେଙ୍ଗ୍ ଇଞ୍ଜ୍ନାୟା? ଈଶ୍ୱରତିଙ୍ଗ୍ ପିସ୍ତି ଆରେ ଇନେର୍ ପା ହାର୍ଦାକାନ୍ ଆକାୟ୍। 19ଈଶ୍ୱର ଆଦେସ୍ ୱିଜୁ ଏପେଙ୍ଗ୍ ପୁନାଟ୍, ମାନାୟ୍ ଅହ୍ମାଟ୍, ଦାରି କିମାଟ୍, ଚର୍ କିମାଟ୍, ମିଚ୍ ସାକି ହିମାଟ୍, ଟକାଇ କିମାଟ୍, ଜାର୍ ଆବାଆୟା କାତା ମାନି କିୟାଟ୍।”
20ହେୱାନ୍ ଯୀଶୁଙ୍ଗ୍ ୱେଚ୍ଚାନ୍, “ଏ ଗୁରୁ, ଇୱିଜୁ ଆଦେସ୍ତିଙ୍ଗ୍ ଆନେଙ୍ଗ୍ ବେଣ୍ଡିଆ ୱେଡ଼ାତାଙ୍ଗ୍ ମାନିକିଜି ୱାନାଙ୍ଗା।”
21ଯୀଶୁ ଲାଡ଼୍ କିଜି ହୁଡ଼୍ଜି ହେୱାନିଙ୍ଗ୍ ୱେଚ୍ଚାନ୍, “ନିଦି ର ବିଷୟ ଉଣା ମାନାତ୍, ଏନେଙ୍ଗ୍ ହାଲ୍ଜି ନିତାଙ୍ଗ୍ ୱିଜେ ଦନ୍ ସମ୍ପତି ପସି ନାସ୍କି ନିକାରିଙ୍ଗ୍ ଡାବୁଙ୍ଗ୍ ହିୟା, ଆରେ ନା ପାଚେ ୱା, ଆରେ ଏନେଙ୍ଗ୍ କିତିସ୍ ସରଗ୍ତାକେ ଦନ୍ ପାୟାଆନାୟ୍।” 22ମାତର୍ ଯୀଶୁ ଇଚି ବେଣ୍ ୱେନ୍ଞ୍ଜି ହେ ମାନାୟ୍ ମୁମ୍ ରାତ୍ତାନ୍, ଆରେ ହେୱାନ୍ ଦୁଃକ୍ ଆଜି ହାଚାନ୍, ଇନେସ୍କି ତାବେ ବେସି ଦନ୍ ସମ୍ପତି ମାଚାତ୍।
23ହେବେତାଙ୍ଗ୍ ଯୀଶୁ ତା ଚେଲାହିରିଙ୍ଗ୍ ଚାରିବେଣ୍ତାଙ୍ଗ୍ ହୁଡ଼୍ଜି ୱେଚ୍ଚାନ୍, “ଈଶ୍ୱର ସାସନ୍ କିନି ରାଜିତାକେ ହାଉକାର୍ ମାନାୟାରିଙ୍ଗ୍ ହାଞ୍ଜେଙ୍ଗ୍ ବେସି କଷ୍ଟ!” 24ଯୀଶୁ ବେଣ୍ ୱେନ୍ଞ୍ଜି ଚେଲାହିର୍ କାବା ଆତାର୍। ମାତର୍ ଯୀଶୁ ଆରେରଗ ୱେଚ୍ଚାନ୍, “ଏ ଟଣ୍ଡାର୍କାଦେର୍ ଦନ୍ତିଙ୍ଗ୍ ଆହାକିନି ମାନାୟାର୍ ବେସି କଷ୍ଟତାଙ୍ଗ୍ ଈଶ୍ୱର ସାସନ୍ କିନି ରାଜିତାକେ ହାଲିଆନାତ୍! 25ର ଉଟ୍ ପଶୁ ହୁଜାକାଣା ତ ହଣାକା କଷ୍ଟ, ମାତର୍ ର ହାଉକାର୍ ମାନାୟ୍ ଈଶ୍ୱର ସାସନ୍ କିନି ରାଜିତାକେ ହାନାକା ହେବେତାଙ୍ଗ୍ ଆରେ ଇଦାଙ୍ଗ୍ ବେସି କଷ୍ଟ।”
26ଇ ବେଣ୍ତିଙ୍ଗ୍ ଚେଲାହିର୍ ୱେନ୍ଞ୍ଜି ବେସି କାବାଆଜି ଜାର୍ ଜାର୍ବିତ୍ରେ ୱେଚ୍ପାଆତାର୍, “ଇନେର୍ ରକ୍ଷା ପାୟାଆନାର୍?”
27ଯୀଶୁ ଚେଲାହିରିଙ୍ଗ୍ ର ହାଣ୍କୁ ହୁଡ଼୍ଜି ୱେଚ୍ଚାନ୍, “ଇ କାମାୟ୍ ମାନାୟାର୍ କିଦେଙ୍ଗ୍ ଆଡୁର୍, ମାତର୍ ଈଶ୍ୱର କିଦେଙ୍ଗ୍ ଆଡ୍ନାନ୍, ଈଶ୍ୱର ୱିଜୁ ବିଷୟ କିଦେଙ୍ଗ୍ ଆଡ୍ନାନ୍।”
28ଇ ବେଣ୍ ୱେନ୍ଞ୍ଜି ପିତର ଯୀଶୁଙ୍ଗ୍ ୱେଚ୍ଚାନ୍, “ଆପେଙ୍ଗ୍ ୱିଜୁ ପିସ୍ତି ନି ପାଚେ-ପାଚେ ୱାତାପ୍ ଆରେ ନି ଚେଲା ଆତାପ୍ନା। ମା ବିଷୟରେ ଇନାକା?”
29ଯୀଶୁ ତା ଚେଲାହିରିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, ଇମ୍ଣି ମାନାୟ୍ ତା ଇଲ୍, ଗାଣ୍, ଟଣ୍ଡେନ୍, ତଣ୍ଦେଲିଙ୍ଗ୍, ଆୟାଆବାରିଙ୍ଗ୍, ହିମ୍ଣାୱାକ୍ଡ଼ା, ଆରେ ଜମିବାଡ଼ିତିଙ୍ଗ୍ ପିସ୍ତି ନା ପାଚେ ୱାଜି ନା ହାର୍ଦିକାବୁର୍ ୱେଚ୍ଚି ବୁଲାଆନାନ୍, 30ଆରେ ନଙ୍ଗୟ୍ ଇ ଜୁଗ୍ତ ବେସି ଦୁଃକ୍ ପାୟାଆତି ସାଙ୍ଗେ-ସାଙ୍ଗେ ସତ୍ ଗୁଣ୍ତାଙ୍ଗ୍ ଇଲ୍ଗାଣ୍, ଟଣ୍ଡେନ୍, ତଣ୍ଦେଲ୍, ଆୟା, ହିମ୍ଣାୱାକ୍ଡ଼ା ଆରେ ଦନ୍ ସମ୍ପତି ଆରେ ଜମିବାଡ଼ି ଗାଟାଆନାନ୍ ଆରେ ୱାନିଜୁଗ୍ତ ୱିଜ୍ୱି ଜିବୁନ୍ ପାୟା ଆନାନ୍। ଇଲେକେ ମାନାୟ୍ ଇନେର୍ ପା ହିଲୁର୍। 31ମାତର୍ ଇମ୍ଣାକାଦେର୍ ନଙ୍ଗୟ୍ ଗାଜା ଆତାଦେର୍ନା ହେୱାର୍ ହିରୁ ଆନାର୍ ଆରେ ଇମ୍ଣାକାର୍ ନଙ୍ଗୟ୍ ହିରୁ ମାନାର୍ ହେୱାର୍ ପାଚେ ଗାଜା ଆନାର୍।”
ଜାର୍ ହାଃନି ବିଷୟରେ ଯୀଶୁ ଆରେରଗ ୱେଚ୍ଚାନ୍
(ମାଥି. ୨୦:୧୭-୧୯; ଲୁକ. ୧୮:୩୧-୩୪)
32ଯୀଶୁ ତା ଚେଲାର୍ ହୁଦାଙ୍ଗ୍ ଯିରୁଶାଲାମ ସହର୍ତାକେ ହାଲ୍ଜି ମାଚାର୍, ଇମେତାକେ ଆଗେ ଯୀଶୁଙ୍ଗ୍ ବିରଦ୍ କିଜି ମାଚାର୍, ଆରେ ହେଦାଙ୍ଗ୍ କାଜିଙ୍ଗ୍ ତା ଚେଲାହିର୍ ହେୱାନିଙ୍ଗ୍ ହୁଡ଼୍ଜି କାବା ଆତାର୍, ଆରେ ତାହୁକେ ମାଚି ମାନାୟ୍ ପା ପାଣ୍ଡ୍ରାଆଜି ମାଚାର୍। ଆରେ ଯୀଶୁ ହେ ବାହାତାକେ ଆଗେ-ଆଗେ ହାଲ୍ଜି ମାଚାନ୍, ହେୱାନ୍ ତା ବାରଜାଣ୍ ଚେଲାହିରିଙ୍ଗ୍ କୁକ୍ଚି ଜେକ ଅସାହାଲ୍ଜି ୱେଚ୍ଚାନ୍ ହେୱାନିଙ୍ଗ୍ ଇନାକା ଗଟା ଆଦେଙ୍ଗ୍ ହାନାତା ହେ ବେଣ୍ ୱେଚ୍ଚେଙ୍ଗ୍ ଲାଗାତାନ୍, 33“ୱେନାଟ୍, ଆସେଙ୍ଗ୍ ଯିରୁଶାଲାମ ସହର୍ତାକେ ହାନାସ୍। ଆରେ ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା ଈଶ୍ୱର ହେବାକିନି ମୁଡ଼୍ଦି ପୁଜାରିର୍ ଆରେ ଯିହୁଦି ଦରମ୍ନି ପଣ୍ଡିତାର୍ କେଇଦ ଆହିଆନାନ୍, ଆରେ ହେୱାର୍ ହେୱାନିଙ୍ଗ୍ ଜିବୁନ୍ ହିଲାଦାଙ୍ଗ୍ ମାଡ୍ହିଜି ବିନ୍ଜାତିର୍ କେଇଦ ଆହିକିନାର୍। 34ଆରେ, ବିନ୍ଜାତିର୍ ମାନାୟ୍ ଯୀଶୁଙ୍ଗ୍ ଇନସ୍ତା କିନାର୍, ତା ଜପି ଏଉଡ଼ିଙ୍ଗ୍ ଚୁପ୍ନାର୍, ହେୱାନିଙ୍ଗ୍ କୋରଡା ହୁଦାଙ୍ଗ୍ ଇଡ଼୍ଜି ପାଗ୍ନାର୍, ଆରେ ତିନ୍ଦିନ୍ ହାଚି ପାଚେ ହେୱାନ୍ ଆରେରଗ ଜିବୁନ୍ ପାୟା ଆନାନ୍।”
ଯାକୁବ ଆରେ ଯୋହନ ଗୁୱାରି
(ମାଥି. ୨୦:୨୦-୨୮)
35ଦିନେକ୍ ଜେବଦି ମେହିର୍ ଯାକୁବ ଆରେ ଯୋହନ ଯୀଶୁ ଲାଗାୟ୍ ୱାଜି ୱେଚ୍ଚାର୍, “ଏ ଗୁରୁ, ମା ଇଚା, ଆପେଙ୍ଗ୍ ନିଙ୍ଗେଙ୍ଗ୍ ଇନାକାପା ଏନ୍ତାନାପ୍, ହେଦାଙ୍ଗ୍ ମା କାଜିଙ୍ଗ୍ ଏନେଙ୍ଗ୍ କିୟା।”
36ଲାଗିଙ୍ଗ୍ ଯୀଶୁ ହେୱାରିଙ୍ଗ୍ ୱେନ୍ବାତାନ୍, “ଆନେଙ୍ଗ୍ ମି କାଜିଙ୍ଗ୍ ଇନାକା ହିଦ୍ନାଙ୍ଗ୍ ଇଞ୍ଜି ଏପେଙ୍ଗ୍ ମାନ୍ କିନାଦେରା?”
37ହେୱାର୍ ଯୀଶୁଙ୍ଗ୍ ୱେଚ୍ଚାର୍, “ଏନେଙ୍ଗ୍ ରାଜାଆଜି ସିଂହାସାନ୍ତାକେ କୁଚ୍ଚିସ୍, ମା ବିତ୍ରେତାଙ୍ଗ୍ ରକାନିଙ୍ଗ୍ ନି ତିନି ବାଗାୟ୍ ଆରେ ରକାନିଙ୍ଗ୍ ଡେବା ବାଗାୟ୍ କୁଚ୍ଚେଙ୍ଗ୍ ହିଦା, ମାଙ୍ଗେଙ୍ଗ୍ ଇ ବର୍ହିଦା।”
38ମାତର୍ ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ଇନାକା ଏନ୍ତାନାଦେରା ହେଦାଙ୍ଗ୍ ମିଙ୍ଗେଙ୍ଗ୍ ଜାଣା ଆକାୟ୍। ଆନେଙ୍ଗ୍ ଇନେସ୍ କିଜି ଦୁଃକ୍ ପାୟାଆନାଙ୍ଗ୍ ଏପେଙ୍ଗ୍ ପା ହେ ଏନେଙ୍ଗ୍ ଏପେଙ୍ଗ୍ ପା ଦୁଃକ୍ ପାୟ୍ଆଦେଙ୍ଗ୍ ଇଚାକି? ଆରେ ଆନେଙ୍ଗ୍ ଇନେସ୍ଆଜି ହାଃନାଙ୍ଗ୍ ଏପେଙ୍ଗ୍ ପା ହେ ଏନେଙ୍ଗ୍ ଆଜି ହାଃଦେଙ୍ଗ୍ ଇଚା କିନାଦେରା କି?”
39ହେୱାର୍ ଯୀଶୁଙ୍ଗ୍ ୱେଚ୍ଚାର୍, “ଆପେଙ୍ଗ୍ ଆଡ୍ନାପ୍।” ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ଇମ୍ଣି ଦୁଃକ୍ ପାୟା ଆଦେଙ୍ଗ୍ ହାନାଙ୍ଗ୍, ଏପେଙ୍ଗ୍ ପା ହେ ଏନେଙ୍ଗ୍ ଦୁଃକ୍ ପାୟ୍ଆନାଦେର୍, ଆରେ ଆନେଙ୍ଗ୍ ଇନେସ୍ଆଜି ହାଃନାଙ୍ଗ୍ ଏପେଙ୍ଗ୍ ପା ହେ ଏନେଙ୍ଗ୍ ଆଜି ହାନାଦେର୍ କି? 40ନା ତିନି କି ଡେବା ବାଗାୟ୍ କୁଚିକିଦେଙ୍ଗ୍ ନା ଆଦିକାର୍ ଆକାୟ୍, ମାତର୍ ଈଶ୍ୱର ଇନେର୍ କାଜିଙ୍ଗ୍ ବାହା ରସ୍ତାତ୍ନା ହେୱାର୍ କୁଚ୍ନାର୍।”
41ଇବେଣ୍ ୱେନ୍ଞ୍ଜି, ଦାସ୍ ଜାଣ୍ ଚେଲାହିର୍ ଯାକୁବ ଆରେ ଯୋହନ୍ତିଙ୍ଗ୍ ରିସାଆତାର୍। 42ହେବେତାଙ୍ଗ୍ ଯୀଶୁ ହେୱାରିଙ୍ଗ୍ ଲାଗେ କୁକ୍ଚି ୱେଚ୍ଚାନ୍, “ଏପେଙ୍ଗ୍ ପୁଚାଦେର୍ନା ଇ ଜଗତ୍ନି ବିନ୍ଜାତି ରାଜା ଆରେ ତା ସେନାପତିର୍ ଚଚିୟାଆଜି ମାନାୟାର୍ ଜପି ସାସନ୍ କିଦେଙ୍ଗ୍ ଇଚା କିନାରା। 43ମାତର୍ ମି ବିତ୍ରେ ହେଲେକେ ଆକାୟ୍, ଆରେ ମି ବିତ୍ରେତାଙ୍ଗ୍ ଇନେର୍ ଯଦି ଗାଜାକାନ୍ ଆଦେଙ୍ଗ୍ ଇଚାକିନାନ୍, ହେୱାନ୍ ପାଚେ ଦରମ୍ ଆରେ ୱିଜାକାରିଙ୍ଗ୍ ହିରୁକାନ୍ ଆଜି ୱିଜାରିଙ୍ଗ୍ ହେବା କିନାକା ମାନାତ୍। 44ଆରେ, ମି ବିତ୍ରେ ଇନେର୍ ଗାଜାକାନ୍ ଆଦେଙ୍ଗ୍ ମାନ୍ କିନାନ୍, ହେୱାନ୍ ୱିଜାକାର୍ ହଲିଆ ଆଦେଙ୍ଗ୍ ଆନାତ୍। 45ଆନେଙ୍ଗ୍ ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା ପା ହେବା ପାୟା ଆଦେଙ୍ଗ୍ ୱାୱାତାନ୍ନା, ମାତର୍ ହେବାକିଜି ୱିଜାର୍ କାଜିଙ୍ଗ୍ ହାଃଜି ମୁକ୍ତି ହିଦେଙ୍ଗ୍ ୱାତାନ୍ନା।”
ବାର୍ଟିମୟ୍ ର କାଣାଙ୍ଗ୍ ଯୀଶୁ ହାର୍କିତାନ୍
(ମାଥି. ୨୦:୨୯-୩୪; ଲୁକ. ୧୮:୩୫-୪୩)
46ଯୀଶୁ ଆରେ ତା ଚେଲାହିର୍ ଯିରିହୋ ସହର୍ତାକେ ୱାତାର୍, ହେୱାର୍ ହେ ସହର୍ତାଙ୍ଗ୍ ହାନିହିଙ୍ଗ୍ ବେସିହେନି ମାନାୟ୍ ତାପାଚେ ପାଚେ ର କାଣା ବିକାରିଙ୍ଗ୍ ଆସ୍ତି ହାଚାର୍, ଇନେର୍କି ଟିମାୟର୍ ମେହି ବାର୍ଟିମୟ୍ ତର୍ଦାକାନ୍ ରକାନ୍ କାଣା ବିକାରି ହାଜି ଲାଗାୟ୍ କୁଚ୍ଚି ମାଚାନ୍। 47ହେୱାନ୍ ତ ନାଜରିତ ସହର୍ନି ଯୀଶୁ, ଇଦାଙ୍ଗ୍ ୱେନ୍ଞ୍ଜି ହେୱାନ୍ ଗାଜାକାଟ୍ କିଜି ୱେଚ୍ଚେଙ୍ଗ୍ ଲାଗାତାନ୍, “ଏ ଦାଉଦ ରାଜା ମେହି ଯୀଶୁ, ନାଙ୍ଗେଙ୍ଗ୍ ଦୟାକିଦା!”
48ହେବେତାଙ୍ଗ୍ କେତେକ୍ ମାନାୟ୍ ତାଙ୍ଗେଙ୍ଗ୍ ଚିମ୍ରା ଆଦେଙ୍ଗ୍ ଦମ୍କାଇକିଜି ୱେଚ୍ଚାର୍, ମାତର୍ ହେୱାନ୍ ଆରେ ବାଡାଙ୍ଗ୍ ହିର୍ବାତାନ୍, “ଏ ଦାଉଦ ରାଜା ମେହି ଯୀଶୁ, ନାଙ୍ଗେଙ୍ଗ୍ ଦୟାକିଦା।”
49ହେବେତାଙ୍ଗ୍ ଯୀଶୁ ତା ବେଣ୍ ୱେନ୍ଞ୍ଜି ହାନିମାନାୟ୍ ଲେଉଟା ଆଜି ୱାତାନ୍, ଆରେ ୱେଚ୍ଚାନ୍ ହେୱାନିଙ୍ଗ୍ “ନା ଲାଗାୟ୍ ତାଡ।” ହେୱାର୍ ହେ କାଣା ମାନାୟ୍ତିଙ୍ଗ୍ କୁକ୍ଚି ୱେଚ୍ଚାର୍, “ୱାରିଆ! ନିଙ୍ଗା! ହେୱାନ୍ ନିଙ୍ଗେଙ୍ଗ୍ କୁକ୍ତାନାନା!” 50ହେବେତାଙ୍ଗ୍ କାଣାମାନାୟ୍ ତା ଶାଲ୍ ତୁଇଜି ୱାରିଆଜି ଯୀଶୁ କଚଣ୍ତ ୱାତାନ୍।
51ଆରେ ଯୀଶୁ ହେୱାନିଙ୍ଗ୍ ୱେନ୍ବାତାନ୍, “ଆନେଙ୍ଗ୍ ନି କାଜିଙ୍ଗ୍ ଇନାକା କିନାଙ୍ଗ୍ ଇଞ୍ଜି ଏନେଙ୍ଗ୍ ମାନ୍ କିନାୟା?” ହେ କାଣାମାନାୟ୍ ଯୀଶୁଙ୍ଗ୍ ୱେଚ୍ଚାନ୍, “ଏ ଗୁରୁ, ଆନେଙ୍ଗ୍ ଇନେସ୍ କି କାଣ୍କୁ ହୁଡ଼୍ନାଙ୍ଗ୍।”
52ଯୀଶୁ ହେୱାନିଙ୍ଗ୍ ୱେଚ୍ଚାନ୍, “ହାଲା!” “ନି ପାର୍ତି ନିଙ୍ଗେଙ୍ଗ୍ ହାର୍ କିତ୍ତାତ୍ନା।” ହେଦାପ୍ରେ କାଣାମାନାୟ୍ କାଣ୍କୁ ହୁଡ଼୍ଜି, ହେୱାନ୍ ପା ଯୀଶୁ ହାନି ହାଜ୍ଦିଙ୍ଗ୍ ହାଞ୍ଜେଙ୍ଗ୍ ଲାଗାତାନ୍।
Currently Selected:
ମାର୍କ 10: PEGNT
Highlight
Share
Copy
Want to have your highlights saved across all your devices? Sign up or sign in
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
