ମାର୍କ 9
9
ଯୀଶୁ ରୁପ୍ ବାଦ୍ଲାଆନାକା
(ମାଥି. ୧୭:୧-୧୩; ଲୁକ. ୯:୨୮-୩୬)
1ଯୀଶୁ ତା ଚେଲାରିଙ୍ଗ୍ ଆରେ ହେବେ ମାଚି ମାନାୟାରିଙ୍ଗ୍ ଇଚାନ୍, “ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, ଈଶ୍ୱର ସାସନ୍ କିନି ରାଜି ଶାକ୍ତିତାଙ୍ଗ୍ ୱାୱି ପାତେକ୍ ଇବେ ମାନି କେତେକ୍ ମାନାୟ୍ ହାଃଉର୍।”
2ଚଅଦିନ୍ ପାଚେ ଯୀଶୁ, ପିତର, ଯାକୁବ ଆରେ ଯୋହନତିଙ୍ଗ୍ ଆସ୍ତି ହେୱାର୍ ର ପାନ୍ତି ମାଡ଼ିତ ହାଚାର୍। 3ଆରେ ଚେଲାହିର୍ ହୁଡ଼ୁ-ହୁଡ଼ୁ ଯୀଶୁ ରୁପ୍ ବାଦ୍ଲାଆତାତ୍, ଆରେ ତା ହେନ୍ଦ୍ରା ପା ବେସି ଣିଞ୍ଜ୍ଚାତ୍ ଯେ, ଆରେ ପୁର୍ତିତାକେ ହେଲେକେ ଣିଞ୍ଜ୍ନାକା ହିଲୁତ୍। 4ହେପାଦ୍ନା ତିନ୍ଜାଣ୍ ଚେଲାହିର୍ ହୁଡ଼୍ତାର୍ ଭବିଷ୍ଯତବକ୍ତା ଏଲିୟ ଆରେ ମୋଶା ଇ ରିୟାର୍ ଯୀଶୁ ହୁଦାଙ୍ଗ୍ ବେଣ୍କିବାଆଜି ମାଚାକା ହୁଡ଼୍ତାର୍।
5ହେବେତାଙ୍ଗ୍ ପିତର ଯୀଶୁଙ୍ଗ୍ ୱେଚ୍ଚାନ୍, “ଏ ଗୁରୁ, ଆସେଙ୍ଗ୍ ଇ ବାହାତାକେ ମାନାକା ହାର୍! ଆପେଙ୍ଗ୍ ତିନ୍ଗଟା ପୁଟ୍କୁ ରହ୍ନାପ୍, ନି କାଜିଙ୍ଗ୍ ରଞ୍ଜାଙ୍ଗ୍ ମୋଶା କାଜିଙ୍ଗ୍ ରଞ୍ଜାଙ୍ଗ୍ ଆରେ ଏଲିୟ କାଜିଙ୍ଗ୍ ରଞ୍ଜାଙ୍ଗ୍।” 6ପିତର ଆରେ ରି ଚେଲାହିର୍ ପାଣ୍ଡ୍ରାଆଜି ମାଚାର୍। ଇନେସ୍କି ହେୱାନ୍ ଇନାକା କିନାଙ୍ଗ୍ କି ଇନାକା ଇନାଙ୍ଗ୍ ଇଞ୍ଜି ପୁନ୍ୱାଦାଙ୍ଗ୍ ମାଚାନ୍। 7ହେଦାପ୍ରେ ଅଲପ୍ ବାଦାଡ଼୍ ୱାଜି ହେୱାରିଙ୍ଗ୍ ଡାବାଇ କିତାତ୍, ଆରେ ହେ ବାଦାଡ଼୍ତାଙ୍ଗ୍ ଈଶ୍ୱର ବେଣ୍କିତାନ୍, “ଏ ନା ଲାଡ୍ ମାଜି। ଇୱାନ୍ ବେଣ୍ତିଙ୍ଗ୍ ମାନ୍ଦିୟାନ୍ କିଜି ୱେନା!” 8ହେଦାପ୍ରେ ଚେଲାହିର୍ ହେବେ ଯୀଶୁଙ୍ଗ୍ ପିସ୍ତି ଆରେ ଇନେରିଙ୍ଗ୍ ପା ହୁଡ଼୍ୱାତାର୍। 9ହେୱାର୍ ମାଡ଼ିତାଙ୍ଗ୍ ଜୁନିହିଙ୍ଗ୍ ଯୀଶୁ ଚେଲାହିରିଙ୍ଗ୍ ଆଦେସ୍ ହିଜି ୱେଚ୍ଚାନ୍, “ନେଞ୍ଜେଙ୍ଗ୍ ଇନାକା ହୁଡ଼୍ତାଦେର୍ନା, ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା ହାଃଜି ପୁନି ଜିବୁନ୍ ପାୟାଆନି ପାତେକ୍ ଇବେଣ୍ ଇନେରିଙ୍ଗ୍ ପା ୱେଚ୍ମାଟ୍।” 10ହେୱାର୍ ମାଡ଼ିତାକେ ଆତି ଗଟ୍ନାତିଙ୍ଗ୍ ଇନେରିଙ୍ଗ୍ ୱେଚ୍ୱାତାର୍ନା, “ହାଃଜି ନିଙ୍ଗ୍ନାକା, ଇନାକା ଇଞ୍ଜି ବିତ୍ରେ-ବିତ୍ରେ ବେଣ୍କିଜି ମାଚାର୍?”
11ଆରେ ଚେଲାହିର୍ ଯୀଶୁଙ୍ଗ୍ ୱେନ୍ବାତାର୍, “ରକ୍ଷାକିଦ୍ନାକାନ୍ ୱାନି ଆଗେ ଏଲିୟ ଇନେକିଦେଙ୍ଗ୍ ଆଗେ ୱାୱାତାନ୍ ଇବେଣ୍ ଯିହୁଦି ଦରମ୍ନି ପଣ୍ଡିତାର୍ ୱେଚ୍ଚି ମାଚାର୍?”
12-13ଯୀଶୁ ତା ଚେଲାହିରିଙ୍ଗ୍ ୱେଚ୍ଚାନ୍, “ଈଶ୍ୱର ଏଲିୟଙ୍ଗ୍ ପାର୍ତୁମ୍ ପକ୍ନି କାତା, ଆରେ ରକ୍ଷାକିଦ୍ନାକାନ୍ ୱାୱି ଆଗେ ହେୱାନ୍ ୱାଜି ମାନାୟାର୍ ଗରବ୍ତିଙ୍ଗ୍ ରହନାକା ସତ୍। ମାତର୍ ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା, ‘ଏଲିୟ ୱାତାନେ।’ ଆରେ ଆଗେନି ଭବିଷ୍ୟତବକ୍ତାର୍ ୱେଚ୍ଚିଲେକେ ମା ନାୟକାର୍ ମାନ୍ଇଚା ବାଉରାଆଜି ହେୱାନିଙ୍ଗ୍ ଇନସ୍ତା କିତାର୍। ହେଲେକେନେ ଆନେଙ୍ଗ୍, ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା, ବିଷୟରେ ଦରମ୍ ସାସ୍ତର୍ତାକେ ବେସି ଲେକାଆତାତ୍ନା ଯେ ଆନେଙ୍ଗ୍ ବେସି ଦୁଃକ୍ ପାୟାଆନାଙ୍ଗ୍, ଆରେ ମାନାୟାର୍ ନାଙ୍ଗେଙ୍ଗ୍ ଆସ୍ତୁର୍।”
ବୁତ୍ ଡୁୟାଆତି କାଡ଼୍ଦେଙ୍ଗ୍ ଯୀଶୁ ହାର୍କିତାନ୍
(ମାଥି. ୧୭:୧୪-୨୧; ଲୁକ. ୯:୩୭-୪୩)
14ତାପାଚେ ଯୀଶୁ ଆରେ ତା ତିନ୍ଜାଣ୍ ଚେଲାହିର୍ ହୁଦାଙ୍ଗ୍ ମାଡ଼ିତାଙ୍ଗ୍ ଜୁଜି ତା ହାଙ୍ଗ୍ଦି ଚେଲାହିର୍ତାକେ ହାଲ୍ଜି ହେୱାର୍ ହୁଡ଼୍ତାର୍। ବେସିହେନି ମାନାୟ୍ ହେୱାରିଙ୍ଗ୍ ମୁକ୍ଚି ମାଚାର୍, ଆରେ କେତେକ୍ ଯିହୁଦି ଦରମ୍ନି ପଣ୍ଡିତାର୍ ହେୱାର୍ ହୁଦାଙ୍ଗ୍ ଉଲ୍ଟା ପାଲ୍ଟା ବେଣ୍କିନାରା। 15ମାନାୟାର୍ ଏଚେପାଦ୍ନା ଯୀଶୁଙ୍ଗ୍ ହୁଡ଼୍ଜି କାବା ଆତାର୍, ଆରେ ହନ୍ଚି ୱାଜି ଯୀଶୁଙ୍ଗ୍ ଜୱାର୍ କିତାର୍। 16ହେବେତାଙ୍ଗ୍ ଯୀଶୁ ତା ଚେଲାହିରିଙ୍ଗ୍ ୱେନ୍ବାତାନ୍, ଏପେଙ୍ଗ୍ ଇୱାର୍ ହୁଦାଙ୍ଗ୍ ଇନା ଉଲ୍ଟା ପାଲ୍ଟା କିଜି ମାଚାଦେର୍?
17ହେ ମାନାୟାର୍ ବିତ୍ରେତାଙ୍ଗ୍ ରକାନ୍ ଯୀଶୁଙ୍ଗ୍ ୱେଚ୍ଚାନ୍, “ଏ ଗୁରୁ, ନା ହିମ୍ଣାଙ୍ଗ୍ ର କନ୍ଦା ବୁତ୍ଡୁତାତ୍ନା। ହେୱାନ୍ ବେଣ୍କିଦେଙ୍ଗ୍ ଆଡୁନା, ହେ ହିମ୍ଣାଙ୍ଗ୍ ଆନେଙ୍ଗ୍ ନି ଲାଗାୟ୍ ତାହିୱାଜି ମାଚାଙ୍ଗ୍। 18ବୁତ୍ ତାଙ୍ଗେଙ୍ଗ୍ ଆସ୍ତି, ରଗ-ରଗ ତାରେନ୍ ଗୁତ୍ନାତ୍, ହେପାଦ୍ନା ତା ମୁମ୍ଦ ପେପୁଲ୍ ହନାତ୍। ଆରେ ହେୱାନ୍ ଟାଡାଙ୍ଗ୍ କାପ୍ନାନ୍, ଆରେ ତା ଗାଗାଡ଼୍ ଡାଙ୍ଗ୍ଡାଙ୍ଗା ଆଜି ହାଃତି ଲେକେ ଆନାତ୍। ବୁତ୍ ପିହିକିଦେଙ୍ଗ୍ ନି ଚେଲାରିଙ୍ଗ୍ ୱେଚ୍ଚି ମାଚାଙ୍ଗ୍, ମାତର୍ ହେୱାର୍ ଇନାକାପା କିଦେଙ୍ଗ୍ ଆଡ୍ୱାତାର୍।”
19ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ପାର୍ତି କିୱାକାଦେର୍। ଆନେଙ୍ଗ୍ ମିହୁଦାଙ୍ଗ୍ କେତେକ୍ ଦିନ୍ ମାନାଙ୍ଗ୍? ଆରେ ଏପେଙ୍ଗ୍ ପାର୍ତିକିନି ପାତେକ୍ ଆନେଙ୍ଗ୍ ମିହୁଦାଙ୍ଗ୍ ଏଚେକ୍ ଦିନ୍ ମାନାଙ୍ଗ୍? ହେ ହିମ୍ଣାତିଙ୍ଗ୍ ନା ଲାଗାୟ୍ ତାହି ୱାଡ।” ହେୱାର୍ ଯୀଶୁତାକେ ହେୱାନିଙ୍ଗ୍ ତାତାର୍। 20ବୁତ୍ଆତ୍ମା ଯୀଶୁଙ୍ଗ୍ ହୁଡ଼୍ତି ଦାପ୍ରେ ହେ ହିମ୍ଣାଙ୍ଗ୍ ଅପ୍ରାବଲ୍ ମଡି କିତାତ୍, ଆରେ ହେୱାନିଙ୍ଗ୍ ମେଦ୍ନିତ ତିଗ୍ତାତ୍, ଆରେ ହିମ୍ଣା ୱେଇଦାଙ୍ଗ୍ ପେପୁଲ୍ ହପ୍ଚି ଗୁଣ୍ଡ୍ଲା ଆଦେଙ୍ଗ୍ ଲାଗାତାନ୍। 21ଯୀଶୁ କାଡ଼୍ଦେ ଲାତ୍ରାହିଙ୍ଗ୍ ୱେନ୍ବାତାନ୍, “ଇଲେକେ ଇୱାନିଙ୍ଗ୍ ଏଚେଦିନ୍ ଆତାତେ?” ତା ଲାତ୍ରାହି ୱେଚ୍ଚାନ୍, “ହିମ୍ଣାୱାଡ଼ାତାଙ୍ଗ୍, 22ହେ ବୁତ୍ ରଗ-ରଗ ନାଣିତ ଆରେ ଏଜୁକାଙ୍ଗ୍ ଇୱାନିଙ୍ଗ୍ ପାଗ୍ଦେଙ୍ଗ୍ ଉପାୟ୍ କିଜି ମାଚାତ୍, ଏନେଙ୍ଗ୍ ଯଦି ଆଡ଼୍ତିସ୍ ନାଙ୍ଗେଙ୍ଗ୍ ଅଲପ୍ ସାଇଜକିଦା।”
23ହେବେତାଙ୍ଗ୍ ଯୀଶୁ ହେ ହିମ୍ଣା ଲାତ୍ରାହିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ଇଦାଙ୍ଗ୍ ହାର୍ କିନାଙ୍ଗ୍ କି ଆକାଇ ଇଞ୍ଜି ଏପେଙ୍ଗ୍ ଏଲେଙ୍ଗ୍ ବାବିକିମାଟ୍। ନାବେ ପାର୍ତି କିତିସ୍ ୱିଜୁଆନାତ୍।”
24ହେଦାପ୍ରେ ହିମ୍ଣା ଲାତ୍ରାହି ଗାଜାକାଟ୍ କିଜି ୱେଚ୍ଚାନ୍, “ଆନେଙ୍ଗ୍ ପାର୍ତି କିଦ୍ନାଙ୍ଗ୍, ମାତର୍ ପାର୍ତି କିୱାକା ନାଙ୍ଗେଙ୍ଗ୍ ପିହିକିଦା।”
25ତାପାଚେ ଯୀଶୁ କେତ୍ଜାଣ୍ ମାନାୟ୍ତିଙ୍ଗ୍ ତା ଲାଗାୟ୍ ୱାନାକା ହୁଡ଼୍ତାନ୍। ଲାଗିଙ୍ଗ୍ ଯୀଶୁ ହେ ବୁତ୍ଆତ୍ମାତିଙ୍ଗ୍ ଦମ୍କାଇକିଜି ୱେଚ୍ଚାନ୍, “ଏ ବୁତ୍ଆତ୍ମା ଇ ହିମ୍ଣାତିଙ୍ଗ୍ କନ୍ଦା ଆରେ ବଇରା କିତାଇନା ନଙ୍ଗୟ୍ ଇ ହିମ୍ଣାତାଙ୍ଗ୍ ହସିହାଲା! ଆରେ ଇନାୱେଡ଼ାଙ୍ଗ୍ ପା ଇୱାନିଙ୍ଗ୍ ଡୁଉୟ୍।” 26ହେବେତାଙ୍ଗ୍ ବୁତ୍ଆତ୍ମା ବିଲ୍କି ଆଜି ହିମ୍ଣାତିଙ୍ଗ୍ ମଡ଼ିକିଜି ହସିହାଚାତ୍, ଆରେ ହିମ୍ଣା ହାଃତି ଲେକେ ଆତାନ୍, ଆରେ ୱିଜାକାର୍ ୱେଚ୍ଚାର୍, “ଇ ହିମ୍ଣା ହାଃତାନ୍।” 27ମାତର୍ ଯୀଶୁ ହେ ହିମ୍ଣା କେଇ ଆସ୍ତି ହିମ୍ଣାଙ୍ଗ୍ ନିକ୍ତାନ୍, ଆରେ ହେୱାନ୍ ହାର୍ ଆଜି ନିଲ୍ତାନ୍।
28ଯୀଶୁ ଆରେ ତା ଚେଲାହିର୍ ଇଞ୍ଜ ହାଚି ପାଚେ ଇନେର୍ ହିଲିହିଙ୍ଗ୍ ହେୱାନିଙ୍ଗ୍ ୱେନ୍ବାତାର, “ଆପେଙ୍ଗ୍ ଇନା କିଦେଙ୍ଗ୍ ହେ ବୁତ୍ଆତ୍ମାତିଙ୍ଗ୍ ପିହିକିଦେଙ୍ଗ୍ ଆଡ୍ୱାତାପ୍?”
29ଯୀଶୁ ତା ଚେଲାହିରିଙ୍ଗ୍ ୱେଚ୍ଚାନ୍, “ଇଲେଗ୍ଦି ବୁତ୍ଆତ୍ମାତିଙ୍ଗ୍ ପିହିକିଦେଙ୍ଗ୍ ଇଚି ପାର୍ତାନା ଉପାସ୍ କିଦେଙ୍ଗ୍ ଲାଗ୍ଦାନାତ୍, ଆରେ ଜେକନି ଉପାୟ୍ ଆକାଇ।”
ଯୀଶୁ ଜାର୍ ହାଃନାକା ଆରେରଗ ୱେଚ୍ଚାନ୍
(ମାଥି. ୧୭:୨୨,୨୩; ଲୁକ. ୯:୪୩-୪୫)
30ତାପାଚେ ଯୀଶୁ ଆରେ ତା ଚେଲାହିର୍ ହେ ବାହା ପିସ୍ତି ଗାଲିଲୀ ଜିଲ୍ଲା ହିଜି ହାଚାର୍। ଯୀଶୁ ଇମେତାକେ ମାନାନ୍ ଇଞ୍ଜି, ଇନେର୍ ପା ପୁନ୍ମେର୍ ଇଞ୍ଜି ମାନ୍ କିଜି ମାଚାନ୍। 31ଯୀଶୁ ତା ଚେଲାର୍ ହୁଦାଙ୍ଗ୍ ମାନ୍ଞ୍ଜି ହିକ୍ଷାହିଦେଙ୍ଗ୍ ମାନ୍ କିଜି ମାଚାନ୍। ଆରେ ହେୱାନ୍ ୱେଚ୍ଚାନ୍, “ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣାଙ୍ଗ୍ ର ମାନାୟ୍ ଶାତ୍ରୁ କେଇଦ ଆହିକିନାନ୍, ଆରେ ହେୱାର୍ ହେୱାନିଙ୍ଗ୍ ମାର୍ନେ ଅହ୍ନାର୍, ଆରେ ହେୱାନ୍ ହାଃତି ପାଚେ ତିନ୍ଦିନ୍ତାଙ୍ଗ୍ ଆରେରଗ ଯିବୁନ୍ ଆନାନ୍।” 32ମାତର୍ ତା ଚେଲାହିର୍ ଇ ବେଣ୍ତିଙ୍ଗ୍ ଅଲପ୍ପା ବୁଜାଆୱାତାର୍। ଆରେ ହେ ବିଷୟତିଙ୍ଗ୍ ଯୀଶୁଙ୍ଗ୍ ୱେନ୍ବେଦେଙ୍ଗ୍ ପାଣ୍ଡ୍ରାଆଜି ମାଚାର୍।
ଇନେର୍ ୱିଜୁତାଙ୍ଗ୍ ଗାଜାକାନ୍ ୱିଜାକାରିଙ୍ଗ୍ ହେବାକିନାକାନ୍
(ମାଥି. ୧୮:୧-୫; ଲୁକ. ୯:୪୬-୪୮)
33ପାଚେ ଯୀଶୁ ଆରେ ତା ଚେଲାହିର୍ କପୁର୍ନାହୁମ୍ ସହର୍ତାକେ ୱାତାର୍। ହେୱାନ୍ ଇଞ୍ଜ ଏକି ଚେଲାରିଙ୍ଗ୍ ୱେନ୍ବାତାନ୍, “ଏପେଙ୍ଗ୍ ହାସ୍ଦ ଇନାକା ୱେଚ୍ପାଆଜି ମାଚାଦେର୍?” 34ମାତର୍ ଚେଲାହିର୍ ଚିମ୍ରା ଆଜି ମାଚାର୍। ଇନେସ୍କି ମା ବିତ୍ରେତାଙ୍ଗ୍ ଇନେର୍ ଗାଜାକାନ୍ ଇଞ୍ଜି, ହାସ୍ଦ ଜାର୍ ଜାର୍ବିତ୍ରେ ୱେଚ୍ପାଆଜି ମାଚାର୍। 35ହେବେତାଙ୍ଗ୍ ଯୀଶୁ କୁଚ୍ଚି, ତା ବାରଜାଣ୍ ବାଚିକିତି ଚେଲାହିରିଙ୍ଗ୍ ଲାଗାୟ୍ କୁକ୍ଚି ୱେଚ୍ଚାନ୍, “ଇନେର୍ ଯଦି ଗାଜାକାନ୍ ଆଦେଙ୍ଗ୍ ଡେକ୍ନାନ୍, ହେୱାନ୍ ପାଚେ ଦରମ୍ ଆରେ ୱିଜାକାରିଙ୍ଗ୍ ହିରୁକାନ୍ ଆଜି ୱିଜାରିଙ୍ଗ୍ ହେବା କିନାକା ମାନାତ୍।”
36ତାପାଚେ ଯୀଶୁ ର ହିରୁ ହିମ୍ଣାତିଙ୍ଗ୍ କୁଚ୍ଚି ତା ଲାଗାୟ୍ ନିଲି କିତାନ୍, ଆରେ ହେୱାନିଙ୍ଗ୍ ପମ୍ଜି ତା ଚେଲାରିଙ୍ଗ୍ ୱେଚ୍ଚାନ୍, 37“ଇନେର୍ ପା ନା ତର୍ଦାଙ୍ଗ୍ ଇଲେକେ ହିରୁ ହିମ୍ଣାତିଙ୍ଗ୍ ମାନି କିନାନ୍, ହେୱାନ୍ ନାଙ୍ଗେଙ୍ଗ୍ ମାନିକିଦ୍ନାନ୍। ଆରେ, ଇନେର୍ ପା ନାଙ୍ଗେଙ୍ଗ୍ ମାନିକିଦ୍ନାନ୍, ହେୱାନ୍ ନାଙ୍ଗେଙ୍ଗ୍ ନେ ମାନିକିଦୁନା ମାତର୍ ନାଙ୍ଗେଙ୍ଗ୍ ପକ୍ତିତି ଈଶ୍ୱରତିଙ୍ଗ୍ ପା ମାନି କିନାନ୍।”
ଇନେର୍ ମା ବିରୁଦ୍ ଆକାଇ, ହେୱାନ୍ ମା ମିତ୍ର
(ଲୁକ. ୯:୪୯,୫୦)
38ତା ଚେଲାହି ଯୋହନ ଯୀଶୁଙ୍ଗ୍ ୱେଚ୍ଚାନ୍, “ଏ ଗୁରୁ, ନି ତର୍ ଅଜି ରକାନ୍ ମାନାୟ୍ ବୁତ୍ଆତ୍ମା ପିହିକିନାକା ଆପେଙ୍ଗ୍ ହୁଡ଼୍ତାପ୍, ହେୱାନ୍ ମା ବିତ୍ରେ ନିକାନ୍ ଆକାଇ ଲାଗିଙ୍ଗ୍ ହେୱାନିଙ୍ଗ୍ ମୁନାକିତାପ୍।”
39ମାତର୍ ଯୀଶୁ ୱେଚ୍ଚାନ୍, “ହେୱାନିଙ୍ଗ୍ ମୁନା କିମାଟ୍। ଇନେର୍ ନା ତର୍ଦାଙ୍ଗ୍ ଚାନିଆ ଲେଗ୍ଦି କାମାୟ୍ କିନାନ୍, ହେୱାନ୍ ସାଙ୍ଗେସାଙ୍ଗେ ନାଙ୍ଗେଙ୍ଗ୍ ବିରଦ୍ କିଜି ୱେଚେଙ୍ଗ୍ ଆଡୁନ୍। 40ଇନେସ୍କି ଇନେର୍ ମା ବିରୁଦ୍ ଆକାୟ୍, ହେୱାନ୍ ମା ମିତ୍ର। 41ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, ଏପେଙ୍ଗ୍ ଖ୍ରୀଷ୍ଟ ନିପ୍ଣି ମାନାୟ୍ ଇଞ୍ଜି ଇନେର୍ ମିଙ୍ଗେଙ୍ଗ୍ ଗିନାତ ଏଜୁଙ୍ଗ୍ ଉଣ୍ଡେଙ୍ଗ୍ ହିଦ୍ନାନ୍, ହେୱାନିଙ୍ଗ୍ ଈଶ୍ୱର ହାତ୍ପା ପୁରଷ୍କାର୍ ହିନାନ୍।
ପାର୍ତି କିନାକାରିଙ୍ଗ୍ ବାଦାହିତିସ୍ ଦଣ୍ଡ୍ ପାୟାଆନାର୍
(ମାଥି. ୧୮:୬-୯; ଲୁକ. ୧୭:୧-୨)
42ଆରେ, ଇନେର୍ ପା ଦରମ୍ଆଜି ପାର୍ତି କିନାକାରିଙ୍ଗ୍ ବାଦା ହିଜି ତା ପାର୍ତିତାଙ୍ଗ୍ ବାଙ୍ଗାୟ୍ କିନାର୍। ହେୱାନିଙ୍ଗ୍ ଏଲେଙ୍ଗ୍ ଦଣ୍ଡ୍ ହାକ୍ତ ଗାଜାଟି ଜାତାକାଲ୍ ଗାଚ୍ଚି ତାଙ୍ଗେଙ୍ଗ୍ ହାମ୍ଦୁର୍ତାକେ ତୁଇତି ଲେକେ ଆନାତ୍। 43ମାତର୍ ମି କେଇ ପାପ୍ କାମାୟ୍ କିନାତ୍, ଲାଗିଙ୍ଗ୍ ହେ କେଇ କାଦ୍ଦି ତୁୟାଟ୍। ରି କେଇ ଆସ୍ତି ନରକ୍ତାକେ, ହାନି ବାଦୁଲ୍ କଲା ଆଜି ସରଗ୍ତାକେ ହାନାକା ହାର୍। 44ଇନେସ୍କି ନରକ୍ତାକେ ହେ ପିକୁଙ୍ଗ୍ ହେୱାନ୍ ଗାଗାଡ଼୍ତିଙ୍ଗ୍ ତିନ୍ଞ୍ଜି ମାନିକ୍, ଆରେ ନାଣିତାକେ ତା ଗାଗାଡ଼୍ କାଡ଼୍ଜି ମାନାତ୍ ହେ ନାଣି ଇନାୱେଡ଼ାଙ୍ଗ୍ ପା ହାଉତ୍। 45ମାତର୍ ମି କାଲ୍ ପାପ୍ କାମ୍ କିନାତ୍, ଲାଗିଙ୍ଗ୍ ହେ କାଲ୍ କାଦ୍ଦି ତୁୟାଟ୍। ରି କାଲ୍କୁ ଆସ୍ତି ନରକ୍ତାକେ ହାନି ବାଦୁଲ୍ ଚଟା ଆଜି ସରଗ୍ତାକେ ହାନାକା ହାର୍। 46ଇନେସ୍କି ନରକ୍ତାକେ ହେ ପିକୁଙ୍ଗ୍ ହେୱାନ୍ ଗାଗାଡ଼୍ତିଙ୍ଗ୍ ତିନ୍ଞ୍ଜି ମାନିକ୍, ଆରେ ନାଣିତାକେ ତା ଗାଗାଡ଼୍ କାଡ଼୍ଜି ମାନାତ୍ ହେ ନାଣି ଇନାୱେଡ଼ାଙ୍ଗ୍ ପା ହାଉତ୍। 47ମାତର୍ ମି କାଣ୍କୁ ପାପ୍ କାମାୟ୍ କିନାତ୍, ହେ କାଣ୍କୁକାଙ୍ଗ୍ ଉନ୍ନ୍ଦି ତୁୟାଟ୍। ରି କାଣ୍କୁ ଆସ୍ତି କାଚାଆନି ନାଣିନି ନରକ୍ତାକେ, ହାନି ବାଦୁଲ୍ କାଣା ଆଜି ଈଶ୍ୱର ସାସନ୍ କିନି ରାଜିତାକେ ହାନାକା ହାର୍। 48ଇନେସ୍କି ନରକ୍ତାକେ ହେ ପିକୁଙ୍ଗ୍ ହେୱାନ୍ ଗାଗାଡ଼୍ତିଙ୍ଗ୍ ତିନ୍ଞ୍ଜି ମାନିକ୍, ଆରେ ନାଣିତାକେ ତା ଗାଗାଡ଼୍ କାଡ଼୍ଜି ମାନାତ୍ ହେ ନାଣି ଇନାୱେଡ଼ାଙ୍ଗ୍ ପା ହାଉତ୍।
49ହର୍ ଇନେସ୍ ଲେକେ କାଦିତିଙ୍ଗ୍ ହାର୍, ହେଲେକେନେ ମାନାୟାରିଙ୍ଗ୍ ଦୁଃକ୍ ପାୟଆନାକା ହାର୍। 50ଇନେସ୍କି ହର୍ତାକେ ହୱାଦ୍ ହିଲ୍ଗୁତ୍, ଲାଗିଙ୍ଗ୍ ତା ହୱାଦ୍ ଇନେସ୍ କିଜି ତାସିୱାନାତ୍। ଇନାୱେଡ଼ାଙ୍ଗ୍ ମିବେ ହର୍ନି ଗୁଣ୍ ମାନେତ୍, ଏପେଙ୍ଗ୍ ଜାର୍-ଜାର୍ ହୁଦାଙ୍ଗ୍ ଶାନ୍ତିତାଙ୍ଗ୍ ମାନାଟ୍।”
Currently Selected:
ମାର୍କ 9: PEGNT
Highlight
Share
Copy
Want to have your highlights saved across all your devices? Sign up or sign in
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
