लुका 21

गरीब रोंडालीन खरलो दान

(मरकुस 12:41-44)

1ओवतेन येसु डूवा उगाळीन मालदार माणसो काजे आपनो-आपनो दान पेटीमा आपतला देख्यू. 2चू एक गोरीब रोंनडायली काजे बी तीनामा दुय दोमड्या आपतली देख्यू. 3तेत्यार येसु कोयू, “मे तुमु काजे छाचलीन कोयो कि जी गोरीब रोंनडायली आखा गोथो बोढीन आपली छे. 4काहाकि चे आखा आपना बोढतीमा गोथो दानमा काहीन नाखला छे, बाकीन जी ते आपना कोमायीमा गोथो तेरी आखी जीवनेन कोमाय नाख देदी.”

जोगोन नाश होयनेन दावू

(मत्ती 24:1-14; मरकुस 13:1-13)

5आखा माणसे मंदीरोन बारामा कोय रोया होता कि जे कोसा घाटावा दोगळा एने भेटोन चीजोसी सोजाळलो गोयलो छे, ती चु कोयू, 6“चे दाहळा आवसे, जीनामा ये आखा तुमु देखतला, इनामा गोथू न्या दोगळा पोर दोगळू बी नि छुटे यो ढोवी नि जाय.”

7चे तीनु काजे पुछा, “हे गुरु, यो आखो कोत्यार होयसे? एने जे वाते जेतार पुरी होयने पोर होसे तिनी टेमोन काय निशाणी रोयसे?” 8येसु कोयू, “हुशारीमा रोयू कि भुलवाय नि जाय, काहाकि घोणा सोवटा मारे नावोसी आवीन कोयसे, ‘मे होयु छे,’ एने यो बी कि, ‘टेम साते आव लागली छे’ तुमु तिना पोछोव झुनी जाता. 9जेतार तुमु लोळाय एने दोंगान वाते सोमवे ती घाबरायता झुनी, काहाकि इंदरो पेहले होयनो जोरुरी छे बाकीन तिनी टेमे तेत्यारुत आखरी नि होये.”

10तेत्यार येसु तीनु काजे कोयू, “जाती पोर जाती राज्य पर राज चोढाइ कोरसे, 11एने मोटा-मोटा भूकंप होयसे, एने जागे-जागे कावा एने महामरी पोळसे, एने सोरगोमा भयानाक वाते मोटा-मोटा चिन्ह देखायसे. 12बाकीन इनी आखी वातोसी पेहेले चे मारे नावोन वाजेशी तुमु काजे धोरसे, एने तोकलीत देसे, एने पंचायतोन हवाले कोरसे, एने जेलमा घालाड देसे, एने राजा एने पुढारीन सामने लीजासे. 13बाकीन जो तुमरेन कोरता गोवायी आपनेन मोकू होय जासे. 14इनान कोरता आपना-आपना मोनोमा पाको राखू कि, आपु पेहेलेसी जोवाब आपनेन चिंता नि कोरजे. 15काहाकि मे तुमु काजे ओसू बुल एने ग्यान आपीस कि तुमरा आखा दुष्मोन तुमरू सामनु नीती रूकावट नि कोर सोके. 16तुमरा आसी-बासा, एने भाशे एने घोरल्या, एने दुस्तीदार भी तुमु काजे धोरावसे; न्या तोक कि तुमरे मायला कहानास काजे मार नाखसे. 17मारा नावोसी आखा माणसे तुमरे पोर दुष्मोनी कोरसे 18बाकीन तुमरे मुंडकान एक झोटू भी हालणे नि दोम,” 19आपना धीरसी तुमु आपना जीवो काजे वाचाडीन राखसू.

यरुशलेमोन नाश

(मत्ती 24:15-21; मरकुस 13:14-19)

20जेतार तुमु यरुशलेम काजे सेनासी घेरला देखे, ती सोमजी जाजू कि तेरो उजळी जाणो साते छे. 21तेत्यार जे यहुदियामा छे चे बोयळामा दोवळी पोळू; एने जे यरुशलेम माहिय छे चे बारथे निकवी जावू; एने जे गावोमा छे चे तीनामा मा जावू. 22काहाकि जे बोदलू लेनेन तोसा दाहळा रोयसे, जीनामा लिखली आखी वाते पुरी होय जासे. 23तिनु दाहळामा जी भारीस एने दूध पावने वावा होसे, तिंदरेन कोरता हाय, हाय! काहाकि देसोमा मोटू संकट एने माणसो पोर जुदी तोकलीत होयसे. 24चे तलवारोन धारसी पोळसे, एने आखा देसोन माणसोमा बोंदी बोनीन पुगडाइ जासे; एने जेतार तोकून दिसरा जात्यान टेम पुरी नी होये, तेत्यार तोक यरुशलेम दिसरा जात्यासी छेंदाय जासे.

येसुन पोछु ओवतेन संकेत

(मत्ती 24:29-31; मरकुस 13:24-27)

25“दाहळू, एने चांद, एने चांदण्यामा चिन्ह देखायसे; एने धोरती परदेस देसोन माणसो पर संकोट आवसे, काहाकि चे दोरीयान आवाज एने झोलोकोन उछेवनेसी घाबराय जासे.” 26बिकोसी एने जोगोपर आवने वावो तोकलीतोन बारामा वाट देखते-देखते माणसोन जीवोमा जीव नि रोये, सोरगोन ताकत हालवाय जासे. 27तेत्यार चे माणसोन पुऱ्याक ताकत एने मोटली महिमा साते वादवा पोर आवतेलु देखायसे. 28तेत्यार जे वाते होयने बाज जाय, ती सुदा होईन आपनो मुनका पोर हुचल; काहाकि तुमरू छुटकारू साते होसे.

परमेश्वरोन राज साते छे

(मत्ती 24:32-35; मरकुस 13:28-31)

29येसु तीना काजे एक दाखलु बी कोयू, “गुलोरोन झाड एने आखा झाडो काजे देख्यू.” 30जेतार तीनुमा डीरा निकोवतला, ती तुमु देखीन खुद सोमजी जातला कि उणावू साते छे. 31इना रितीसी आखा तुमु जे वाते होयतला देखसु, ती सोमजी जाजू कि परमेश्वरोन राज साते छे. 32मे तुमु काजे छाचलीन कोयो कि जेतार तोक जे आखा वाते नि होय जाय, तेत्यार तोक इनी पिढीन कोदिबी आखरी नि होये. 33सोरग एने धोरती टोव जासे, बाकीन मारी वाते कोबी नि टोवे.

सदा तीयार रोयू

34इनान कोरता हुशारीमा रोयू, ओसो नि होये कि तुमरा मोन खुमारीमा, एने मोंदळ्यामा, एने इना जीवनोन चिंतामा पोड जाय, एने चू दाहळू तुमरे पोर फासी सारखु आवीन पोळे. 35काहाकि चू आखी धोरतीमा रोयने वावापोर इना रितीसी आव लागसे. 36इनान कोरता जागता रोयू एने होर एक टेमे प्रार्थनामा रोयू कि तुमु इना आखी आवने वावी घोटनामा गोथू वाचने एने माणसोन पुऱ्या सामने उभू रोयनेन लायक बोनो.

37येसु दिसू मंदीरमा सिकाळतू कोरतू होतु एने, राती बारथे जाईन जेतुन नावोन बोयळा पोर रोया कोरतू होतु; 38एने सोंदारे वेगोत आखा माणसे हेरी सोमवनेन कोरता मंदीरमा हेरेनचा आव्या कोरता होता.

Currently Selected:

लुका 21: BFBNT

Highlight

Copy