लुका 22

येसुक मारनेन योजना

(मत्ती 26:1-5,14-16; मरकुस 14:1-2,10-11; योहान 11:45-53)

1बेखमीर रुटान तीहीवारोन जिनाक वोलांडोनोन तीहीवार कोयतेला, साते होतु; 2एने प्रधान पुजारू एने शास्त्री इनी वातोन हेरेमा होता कि तीनाक कोसा मारजे, बाकीन चे माणसो काजे बिहता होता.

यहुदा इस्कारीयोतन भुरसू घात

3तेत्यार भुतडू यहुदामा भोराय गोयू, जू इस्कारीयोत कोवायतलु एने बारा चेलामा गीनायतू होतु. 4चू जायीन प्रधान पुजारान सोरदार साते वात कोऱ्यु कि तीनाक काहना रितीसी तेरे हाते धोरावजे. 5चे खुश होया, एने तीना काजे रुप्या आपनेन कबूल कोऱ्या. 6चू मान लेदू, एने टेम हेरने बाज गोयू कि जेतार गोरदी नि रोये ती तेरे हाते धोराव दे.

तीहीवारोन तीयारी

(मत्ती 26:17-25; मरकुस 14:12-21; योहान 13:21-30)

7जेतार बेखमीर रुटान तीहीवारोन दाहळू आव्यु जीनामा वोलांडोनोन बलिदान बुकडू मारनेन गरज होती. 8येसु पतरस एने योहान काजे यो कोयीन मूकल्यु “जाईन आमरे खाणेन कोरीन तीहीवारोन तोयारी कोरु.” 9चे तीना काजे पुछ्या, “तुसेक का जुवे कि आमु इनान तीयारी कोरजे?” 10येसु तीनु काजे कोयू, “देखू, सोहोरोमा जातेज एक माणूस पाणीन डूचरो चुटीन तुमुक भेटायसे; जिना घोरोमा चू जासे तुमु हेरे पोछोव जात रोयजू,” 11एने तीना घोरोन मालिक काजे कोयजू, “गुरु तुसे काजे कोयो कि पाहांतऱ्यान जागू का छे जीनामा मे आपना चेला साते वोलांडोनोन खाणो खाम?” 12चू तुमु काजे एक सोजाडली मोटीत खुली देखाळसे; चा तीयारी कोरु. 13चे जायीन, जोसो चू तीनु काजे कोयलु होतु तोसोच, देख्या एने वोलांडोनोन तीयारी कोऱ्या.

परमेश्वरोन आखरी खाणो

(मत्ती 26:16-30; मरकुस 14:22-26; 1 कुरीन्थियो 11:23-25)

14जेतार खाणेन टेम आव लागी ती, चु प्रेषितोन साते खाणो खाणे बोशु. 15एने चू तीना काजे कोयु, “मेसेक घोनी मोर्जी होती कि दुख भोगणेन पेहेले जो तीहीवारोन खाणो तुमरे साते खाम. 16काहाकि मे तुमु काजे कोय कि, जेतार चे परमेश्वरोन राजमा जुनलो होयते तोक मे इनाक कोबी नि खाम.” 17तेत्यार चू प्यालू लीन धन्यवाद कोऱ्यु एने कोयू, “इना काजे लेवू एने आपोसमा वाट लेवू. 18काहाकि मे तुमु काजे कोयो कि जेतार तोक परमेश्वरोन राज नि आवे मे आंगुरोन रोस कोबी नि पियो,” 19ओवतेन चु रुटू लेदू, एने धन्यवाद कोरीन भांग्यु, एने तीनु काजे यो कोयतु जाईन आप्यू, “यो मारो डील छे यो तुमरेन कोरता आपाय जाय रोयो मारा स्मरणन कोरता यो कोरता रोयजू.” 20इना रितीसी चू खाणान ओवतेन प्यालू बी आपतू जाईन कोयू, यो प्यालू मारा तीना लुयमा जो तुमरेन कोरीन वोयाळाय जाय नवीन वायदू छे. 21बाकीन देखू, मेसेक धोरणे वावान हात मारे साते टेबल पोर छे. 22काहाकि माणसोन पुऱ्यु ते जोसो तेरेन कोरता ठेरावलो गोयलो छे, बाकीन हाय तिना माणसो पोर जीनान लारे चू धोराय जातलू छे. 23जेतार चे आपोसमा पुछपाछ कोरणे बाज गोया कि आमरे मायलु कुन छे, जू यो काम कोरसे.

आखान कुन जानाये?

24तीनुमा यु जोखळाय बी होयलु तीनुमा गोथू कून मोटू सोमजाय जातु होसे? 25येसु तीनु काजे कोयु, “दिसरा जातीन राजा तिंदरे पोर हुकुम चालाळे; एने जे तुमरे पोर होक मेके चे तेरु उपकारी कोवाये. 26बाकीन तुमु ओसा नि होयजू; बाकीन जो तुमरेमा मोटू छे, चू नानला सारखु एने जे अधिकारी छे, चे सेवकन तोसा बोने.” 27काहाकि मोटू कुन छे जू खाणे बोस रोयू, कि यु चाकरी कोरणे बाज रोयू? काय नि यु खाणे बोस रोयू? बाकीन मे तुमरे इचमा एक चाकरोन तोसु छे. 28“तुमु जे छे, जे मारी परीक्षामा हमेशा मारे साते रोयू; 29एने जोसो मारो बास मारेन कोरता एक राज ठेरावालु छे, तोसोच मे बी तारेन कोरता ठेरावीस, 30काहाकि तुमु मारा राज्यमा मारे साते बोसीन मारा मेज पर खावू-पिवू, बाकीन सिहासन पोर बोसीन इस्राईलोन बारा पिढीन नियाव कोरो.

पतरसोन मना येसुक मना कोरणेन भविष्यवाणी

(मत्ती 26:31-35; मरकुस 14:27-31; योहान 13:36-38)

31“शिमोन हे शिमोन देख, भुतडू तुमु माणसो काजे मांग लेदलु छे कि गोहून तोसो झाडे, 32बाकीन मे तारेन कोरता विनता कोऱ्यु कि तारू भुरसू कोमजुर नि होये; एने जेतार तू फिरे, आपना भाशो काजे पाको कोरजी.” 33पतरस येसु काजे कोयू, “हे प्रभू, मे तारे साते जेलमा जाणे नि बाकीन मोरने भी तीयार छे,” 34येसु कोयू, “हे पतरस, मे तुसे काजे कोयो कि आज कुकळू वासनेन पेहेल जेतार तोक तू तीन कावा मेसेक नाकारनेन नि कोर लेये कि मेसेक नि उवखतलु.”

दुख झेलणे तीयार रोयू

35एने येसु तीनु काजे कोयू, “जेतार मे तुमुक थोयला, एने झुवनो, एने बिना खासळान मूकल्यु होतु, ती काय तुमु काजे कानली चीजोन कोमी पोळली होती काय?” चे कोया, “कहानी चीजोन नि.” 36येसु तीनु काजे कोयू, बाकीन हिमी जिना जुव थोयलू, छे चू तीनाक लेयू एने तोसोच झुवनो बी, 37काहाकि मे तुमुक कोयो, कि यो लिखलो से, चू अधोरमी साते गीनाय गोयू, तेरो मारेमा पुरो होयनो गरजोन छे, काहाकि मारे बारामा वाते पुरी होयने पोर छे. 38चे कोया “हे माहाराज, देख या दुय तलवारे से,” इनापोर चू तीनुक कोयू, “लोकेत छे.”

जेतुनोन बोयळाम येसुन प्रार्थना

(मत्ती 26:36-46; मरकुस 14:32-42)

39ओवतेन चू चा गोथू उठीन आपना रितीसी जेतुनोन बोयळा पोर गोयू एने चेला तेरे पोछोव चाल पोळ्या. 40ती चे बारा जोना निकवीन आपनी रितीन अनसारे जेतुनोन बोयळा पोर गोयू, एने चेला तेरे पोछोव चाल पोळ्या. चू तिना जागा पोर पुग्यू ती येसु तीनुक कोयू, “प्रार्थना कोरु कि तुमु परीक्षामा नि पोळे.” 41तिने जागे पुगीण येसु तीनु काजे कोयू, “प्रार्थना कोरु कि तुमु पारखमा नि पोळती” एने चू आपसुत एक कावा नाखे होतरे नांबे गोयू, एने मांडा टेकिन प्रार्थना कोरणे बाज गोयू, 42“हे बासो, ओगर तारी मोर्जी होय ती इना प्याला काजे मारेंचा गोथू छेटू कोरले, बाकीन मारी नि बाकीन तारीत मोर्जीसी पुरो होये.” 43तेत्यार सोरगोमा गोथू एक दूत तीना काजे देखाय पोळ्यु चू तीनाक ताकत आपतू होतु. 44चू घोनु जुदु तोकलीतमा कासावीस होईन ओवी बी दुखोमा भोरीन प्रार्थना कोरणे बाज गोयू; एने तेरु पेसोव जोसो लुयोन मोटा-मोटा तेळा सारखो धोरती पोर पोळतो होतो. 45तेत्यार चू प्रार्थना कोरीन उठ्यू एने आपना चेलानचा साते आवीन तीनु काजे नाराजगीन मारे सुवतला देखाया. 46एने तीनु काजे कोयू, “काहा सुवरोया? उठू, प्रार्थना कोरु कि परीक्षामा नि पोळे.”

येसुक बंदी बोनावनो

(मत्ती 26:47-56; मरकुस 14:43-50; योहान 18:3-11)

47चू यो कोयतुत होतु कि एक गोरदीन टूवू आव्यु, एने तीनु बारा जोनामा गोथू एक जेरो नाव यहुदा होतो तिंदरे ओगोव-ओगोव आव रयु होतु चू येसुनचा आयु कि तेरु गुवू लेये. 48येसु तीना काजे कोयु, “हे यहुदा, काय तू गुवू लीन माणसोन पुऱ्या काजे थोरावतलु?” 49तेरा सातीदारो जेतार देख्या कि काय होयने वावो छे, ती कोया, “हे प्रभू, काय आमु तोलवार चालाळजे?” 50एने तीनु मायलु एक जोनु महायाजकोन दास पोर तलवार चालाळीन तेरो जेवळो कानटो काट देदु. 51इनापोरसी येसु कोयू, “हिमी बोस कोरु” एने तेरा काटा काजे हात लागाळीन तिनाक वारू कोऱ्यु. 52तेत्यार येसु प्रधान पुजारू एने मंदीरोन पुढारी एने सोरदार जे येसु काजे धोरणे आवला होता तीनु काजे कोयू, “काय तुमु मेसेक डाखू सोमजीन तलवारे एने लाकळ्या लीन नीकवी रोया? 53जेतार मे मंदीरमा दाहळीन तुमरे साते होतु, ती तुमु मारे पोर हात नि नाख्या; बाकीन जी तुमरी टेम छे, एने अंधकारोन होक छे.”

पतरसोन येसुक मना कोरनो

(मत्ती 26:57-58,69-75; मरकुस 14:53-54,66-72; योहान 18:12-18,25-27)

54ओवतेन चे धोरीन लीगोया, एने महायाजकोन घोरोमा ली आव्या पतरस नांबे नांबेत तेरे पोछोव-पोछोव चालतु होतु; 55एने जेतार चे आंगनामा आगठो धोपाळीन एखठा बोश्या, ती पतरस बी तिंदरे इचमा मा बोस गोयू. 56ती एक पावेरनी तीना काजे आगठान विजावामा बोसलु देखीन एने तेरे भूनी जुराखी भावीन कोयने बाज गोयी, “यु बी ते तेरे साते होतु.” 57बाकीन चू यो कोयीन नाकार कोऱ्यु, “हे बायोर, मे तीनाक नी उवखतलु.” 58थुलिक वारमा कहानुस, एने तीनाक देखीन कोयू, “तू बी ते तीनु मायलु छे” पतरस कोयू, “माणूस, मी नि होय.” 59एक घोनटान ओवतेन एक माणूस भुरसासी कोयने बाज गोयू, “छाचलीन यु बी ते तेरे साते होतु, काहाकि यु गलीली छे.” 60पतरस कोयू, “हे माणूस, मे नि जानतलु कि तू काय कोयतेलु” चू कोयने बाज रोयू होतु, कि तेतारुत कुकळू वास गोयू. 61ती प्रभू पोछु फिरीन पतरस भूनी भाव्यू, एने पतरस काजे प्रभून ची वात फोम आवाळीन जी चू कोयलु होतु, “आज कुकळू वासदेनेन पेहेले, तू तीन कावार मारू नाकार कोरसे.” 62एने चू बारथे निकवीन मोटा दुखसी रोड्यू.

येसुन उपवास

(मत्ती 26:67-68; मरकुस 14:65)

63जे माणसे येसु काजे धोर रोया होता, चे तेरी मोजाक उळावीन देणे बाज गोया; 64एने तेरा डूवा ढाकिन तीना काजे पुछ्या, “भविष्यवाणी देखाळ कि तुसेक कून देदो.” 65एने चे घोन सोवटी ओवी बी बुराईन वाते तेरा खिलापमा कोया.

डाहला एने माणसो सामने येसुन होयनो

(मत्ती 26:59-66; मरकुस 14:55-64; योहान 18:19-24)

66जेतार दाहळू उग्यु ती माणसोन डायला एने प्रधान पुजारू एने शास्त्री एखठा होया, एने तीनाक आपना महासभामा लावीन पुछ्या, 67“काय तू मसिह छे, ती आमु काजे कोय दे” येसु तीनु काजे कोयू, “अगर मे तुमु काजे कोयो, ती भुरसू नि कोरे; 68एने ओगर पुछो, ती जवाब नि आपे. 69बाकीन हिमी गोथू माणसोन पुऱ्यु आखामा ताकत वावू परमेश्वर जेवळे धोळे बोसलू रोयसे.” 70इनापोरसी बी आखा कोया, ती काय तू परमेश्वरोन पुऱ्यु छे? चू तीनुक कोयू, “तुमु आपसात कोयतेला, काहाकि मेत छे.” 71तेत्यार चू कोयू, “हिमी आमु काजे गोवायीन काय गरज छे; काहाकि आमु खुद तेरे मुयोसी सोमवी लेदला छे.”

Currently Selected:

लुका 22: BFBNT

Highlight

Copy