मत्ती 23

1तेत्यार येसु भीळ काजे एने तेरा चेला काजे कोयू, 2शास्त्री एने फरुशी मुसान गादीपोर बोस रोया;. 3इनान कोरता चे तुमु काजे जो काहीन कोये चो कोरजू एने मानजू, बाकीन तिंदरेन तोसा काय काम झुन कोरता काहाकि कोयतेला बाकीन कोरतेला नि. 4चे एक ओसा भारी बुझू काजे जीनाक चुटनो काठो छे, बाकीन तीनाक माणसोन खांदा पोर मेकतेला; बाकीन कुदू तीनाक आपनी आंगवे कोरीन बी नि सोरकावतेला. 5चे आपना आखा काम माणसो काजे देखाळनेण कोरता कोरतेला चे आपना मोर्जीपोद काजे मोटा कोरतेला एने आपना छिंदरान कुरे वोदाळता होता. 6खाणो खाणेन मोटला-मोटला बोसनेन जागा एने सभामा एने प्रार्थना घोरमा मोटला-मोटला बोसनेने जागा, तीनु काजे वारू लागे. 7हाटोमा नमस्कार एने माणसोमा गुरुजी कोवाळनो तीनुक गोवतेलो. 8बाकीन तुमु गुरुजी झुन कोयता, काहाकि तुमरू एकुत गुरु छे, एने तुमु आखा भाश छे. 9धोरती पोर कुदा काजे आपनु बास झुन कोयता, काहाकि तुमरू एकुत बास छे, जू सोरगोमा छे. 10एने मालिक बी झुन कोयता, काहाकि तुमरू एकुत मालिक छे, मतलब मसिह. 11यु तुमरे गोथू मोटू छे, चू तुमरू सेवक बोने. 12यु कुदू खुदो काजे मोटू बोनावसे, चू नानू कोराय जासे एने जू कुदू खुदो काजे नानू बोनावसे, चू मोटू कोराय जासे. 13“हे दोगावा शास्त्री एने फरुशी, तुमरे पोर हाय तुमु माणसोन कोरता सोरगोन राजोन झोपलू बोंद कोरतेला नीती खुद मा जाणेन नी कोरतेला एने तीनामा जे जाणेन कोरतेला तीनु काजे जाणे नी देतला.” 14(हे दोगावा शास्त्री एने फरुशी, तुमरे पोर हाय, तुमु रोंडायलान घोरो काजे खाय जातला एने देखाळनेन कोरीन घोन वार तोक प्रार्थना कोरता रोयतला; इनान कोरता तुमु काजे जादा दोंड जोळसे). 15“हे दोगावा शास्त्री एने फरुशी, तूमरे पोर हाय, तुमु एक जोनाक आपना आपने भूनी लावनेन कोरता आखा पाणी एने धोरती पोर फिरतला, एने जेतार चू जावू मा आवतेलु ती तीनाक आपने गोथू बी डोबोल नोरोगन लायक बोनाव देतला.” 16“हे आंदवा, गुंगा, तुमरे पोर हाय, जे कोयतेला कि ओगर कुदु मंदीरोन कोसोम खाय ती काय नि बाकीन ओगर कुदू मंदीरोन सोनान कोसोम खाये ती तीनासी बांधाय जाय.” 17हे बिन ओकल्या एने आंदवा, कून मोटो छे; सोनो कि चो मंदीर जीनासी मंदीर चुखलो होयतलो. 18ओवते कोयतेला कि ओगर कुदु वेदीन कोसोम खाय ती काय नी, बाकीन जी भेट तिनी पोर छे ओगर कुदू तेरी कोसोम खाय ती बांधाय जाय. 19हे आंदवा कून मोटो छे; भेट कि वेदी जीनासी वेदी चुखलो होय जातली? 20इनान कोरता जू वेदीन कोसोम खातलु, चू तेरी एने जो काहीन तेरे पोर छे, तेरी बी कोसोम खातलु. 21जू मंदीरोन कोसोम खातलू चू तेरो एने तेरेमा रोयने वावान कोसोम खातलु. 22जो सोरगोन कोसोम खातलु चू परमेश्वरोन एने सिहासनोन एने तीना पोर बोसने वावान बी कोसोम खातलु. 23हे दोगावा शास्त्री एने फरुशी तुमरे पोर हाय! तुमु पुदिना, एने सुंट, एने जीनान दोसवू हिस्सू आपतला, बाकीन तुमु नियम शास्त्रान महत्वान वात काजे मतलब न्याय, एने दया, एने भुरसू काजे छुळावतला छे; लागतो होतो कि इनुक बी कोरता रोयता एने इनुक बी नि छुळता. 24हे आंदवा, गुंगा, तुमु मच्छर काजे गाव देतला एने उटळा काजे गिव जातला. 25हे दोगावा शास्त्री एने फरुशी, तुमरे पोर हाय! तुमु वाटको एने थावि काजे उपोर-उपोर उजावतला बाकीन चे माही खराबी एने नाकमासी भोरलो छे. 26हे आंदवा फरुशी, पेहले वाटको एने थाविक माहिय गोथू उजाव कि जे बारथे गोथा बी साफ होये. 27“हे दोगावा शास्त्री एने फरुशी, तुमु पोर हाय! तुमु चुणु लागाळला मोळवाट्या सारखा छे ये उपोर गोथा ते घाटावा देखायतला, बाकीन माहाय मोरलान हाडका एने आखा भातीन भुंडलासी भोरलो छे.” 28इना रितीसी तुमरे बी उपोर गोथा धोरमी देखायतेला, बाकीन माहाय दोखु एने पाप सी भोरला छे. 29“हे दोगावा शास्त्री एने फरुशी, तुमरे पोर हाय, तुमु भविष्य कोरतान मोळवाट्यान सोवारता एने धोरमीन मोळवाट्या, बांधतला.” 30एने कोयतेला, “ओगर आमु आपना बाप दादान दाहळामा होयतो ती भविष्य कोरतान लुयमा तिंदरी भागीदार नि होती.” 31इनासी तुमु खुद तेरे उपोर गोवायी देतला कि तुमु भविष्य कोरतान मारण्यान पुऱ्या छे. 32आखरी तुमु आपना बाप दादान पापोन घोळू भोर देवू. 33हे घोळसान पिला, तुमु नोरोगन दोंडसी कोसा वाचसू? 34इनान कोरता देखू, मे तुमरेनचा भविष्य कोरता एने ग्यानी एने शास्त्री काजे मुकलो; एने तुमु तिंदरेमा गोथा काहनास काजे मार नाखसू एने ख्रुस पोर चोळावसू, एने काहनास काजे आपना प्रार्थना घोरोमा चाबका मारसू एने सोहोरोमा गोथा दिसरा सोहोरोमा दोवळावता फिरसू. 35जिनासी धोरमी हाबिलोनचां गोथा बिरिक्याह पुऱ्यु जखऱ्या तोक, जीनाक तुमु मंदीर एने वेदीन इचमा मामार नाखला होता, जेतार धोरमीन लुय धोरती पोर वोयलो छे चो आखो तुमरा मुंडकामा पोळसे. 36मे तुमु काजे छाचलीन कोय कि, जे आखा वाते इनी टेमोन माणसे पोर आवीन पोळसे. 37“हे यरुशलेम, हे यरुशलेम; तू भविष्य कोरता काजे मार नाखतलु, एने जे तारेनचा मुकल्या तिंदरे पोर दोगळ मार कोरतेला लोकेत कावा मेसेक लागतो होतो कि जोसी कुकळी आपना पिलात काजे आपना पाखळा तोवे एखठा कोरतेली, तोसुच मे बी तारा पुऱ्या काजे एखठा कोर लोम, बाकीन तुमुक नी लागतो होतो.” 38देखू, तुमरा घोरे तुमरेन कोरता उजाळ्या छुळाव जातला. 39काहाकि तुमु काजे कोय कि हिमी गोथा जा तोक तुमु नी कोये, “सोयावा छे चे चू, जू प्रभून नावोसी आवतेलु तेत्यार तोक तुमु मेसेक एने कोबी नी देखू.”

Currently Selected:

मत्ती 23: BFBNT

Highlight

Copy