मत्ती 24

येसुन लारे मंदीरोन नाशोन होयनेन भविश्ष्यवानी

(मरकुस 13:1-31; लुका 21:5-33)

1जेतार येसु मंदीरमा गोथू निकवीन जातु होतु, ती तेरा चेला तीनाक मंदीरोन बोनावलो देखाळनेन कोरता तेरेनचा आव्या. 2चे तीनाक कोया, “तुमु यो आखो देखणे बाज रोया एने मे तुमु काजे छाचलीन कोयने बाज रोयू, या दोगळा पोर दोगळू बि नि रोये जो पाळाय नि.”

येसुन पोछो ओवतेन चिन्ह

3जेतार चू जेतुनोन बोयळा पोर बोस रोयू होतु, ती चेला सुनलामा तेरेनचा आवीन कोया, “आमुक कोय कि ये वाते कोत्यार होयसे? तारो आवने एने जोगोन आखरी निशाणी काय होयसे?” 4येसु तीनु काजे जोवाब आप्यू, “सावधान रोयू, कुदू तुमु काजे भोनकावणे नि, 5काहाकि लोकेत जोना ओसा रोयसे जे मारे नावोसी आवीन कोयसे, ‘मे मसिह छे, एने लोकेत जोना काजे भोनकावसे.’” 6तुमु लोळाय एने लोळायीन वाते सोमवसु, ती बिहता झुनी काहाकि इंदरो होयनो जोरुरी छे, बाकीन तिनी टेमे आखरी नि होये. 7काहाकि जाती पोर जाती, एने राज्य पोर राज्य चोळायी कोरसे, एने जागे-जागे काव पोळसे, एने धोरती फाटसे. 8ये आखा वाते पिलान सुरुवात होयसे. 9तेत्यार तोकलीत देनेन कोरता तुमुक धोरावसे, एने तुमु काजे मार नाखसे, एने मारा नावोन वजेसी आखा जातीन माणसे तुमु पोर दुष्मोनी कोरसे. 10तेत्यार घोना सोवटा जोना ठूकर खासे, एने एक दिसरा काजे धोरावसे, एने एक दिसरा पुठी दुष्मोनी राखसे. 11लोकेत झुटा भविष्य कोरता उठीन उभरोईसे, एने लोकेत जोनाक भोनकावसे. 12पाप बोढनेसी लोकेत जोनान मोंग कोम होय जासे, 13बाकीन जू आखरी तोक वाट जुवीन हिंमत धोर रोयसे, तेरु छुटकारू होयसे. 14एने राज्यान जी वारली खोबर आखा जोगोमा प्रचार कोराये जासे कि आखा जाती पोर गोवायी होये, तेत्यार आखरी आव जासे.

मोटला ताकलीपोन सुरुवात

15इनान कोरता जेतार तुमु तिनी उजाळने वावी भुंडली चीजो काजे जेरी वात दानिएल भविष्य कोरतान लारे होयली होती, चुखला जागामा उभ रोयली देखसु (जे भोने चे समजे). 16तेत्यार जे यहुदियामा होय चे बोयडा पोर जावु. 17जे छोत पोर होय, चे आपना घोरमा समान लेनेन कोरीन नि उतरजू;. 18एने जे खेतोमा होसे, चे आपना कापळा लेणे कोरीन पोछा नि आवे.

19“इना दाहळामा जे भारीस एने दुध पिवाळती होसे, तिंदरेन कोरीन हाय, हाय. 20प्रार्थना कोऱ्या कोरु कि तुमुक ताडोमा शब्बाथोन दाहळे दोवळनो नी पोळती. 21काहाकि तिनी टेमे ओसी मोटी वेला होयसे जोसो जोगोतन सुरुमा गोथो आज तोक नि होयो एने नि कोबी होये. 22ओगर चे दाहळा कोम नी कोरायता ती काहनो जोनावर नि वाचतो बाकीन नेवाळलान वोजेहसी चा दाहळा कोम कराय जासे. 23तिनी टेमे ओगर कुदू तुमु काजे कोये देख मसिह या छे एने वा छे ती भुरसू नी कोरनो.”

24“काहाकि झुटा मसिह एने झुटा भविष्य कोरता उठीन उभरोय, एने मोटा निशाणी एने नेवलायीन काम देखाळसे, कि ओगर होय सोके ती नेवाळला माणसो काजे बी फोसाळ देसे.” 25देखू, मे पेहेले सी तुमु काजे यो आखो काहीन कोय देदलु छे. 26इनान कोरता ओगर चे तुमुक कोये, देखू, बोयळामा छे, ती बारथे झुन नीकवता, “देखू चू माहाय वावा कुठारमा छे, ती भुरसू झुन कोरता.”

27“काहाकि जोसी वीजवी पूरब गोथी निकवीन पश्चिम तोक चोमकतली, तोसुत, माणसोन पुऱ्यु बी आवनो होयसे. 28जा सारीक धोळ होसे, चा घुवळा एखठा होयसे.”

मानोन पुऱ्यान पोछो आवनो

29तीनु दाहळामा तोकलीतोन बादमा तेतारुत दाहळू आंदारो होय जासे, एने चांदमा विजावो जात रोयसे, एने चांदण्या वादवामा गोथा पोळसे एने वादावान ताकत हालवायसे. 30तेत्यार माणसोन पुऱ्यान चिन्ह सोरगोमा देखायसे, एने तेत्यार धोरतीन आखा जातीन माणसे छाती ठुकसे; एने माणसोन पुऱ्याक मोटो ताकतसी महिमा पुठी सोरगोन वादवोपोर आवतेलु देखसे. 31चू फेपाऱ्यान मोटात आवाजमा आपना सोरग दूतो काजे मुकलसे, एने चे सोरगोमा इने धोळे गोथा पोल धोळे तोक चारू दिशामा गोथा नेवाळला काजे एखठा कोरसे.

गुलोरोन झाडोन शिकवन

32“गुलोरोन झाडमा गोथो यु दाखलु सिकू; जेतार तेरी डावी नोरोम होय जातली एने पानटा निकवने बाज जातला ती तुमु जान लेतला कि उणावू साते छे.” 33इनी रितीसी जेतार तुमु इनी आखा वातो काजे देखसु, ती जान लेवू कि चू साते छे, बाकीन झोपला पोरुत छे. 34मे तुमु काजे छाचलीन कोयो कि जेतार तोक ये वाते पुरा नी होय जाय, तेत्यार तोक इनी कोवीन आखरी नी होये. 35सोरग एने धोरती टोव जासे, बाकीन मारी वाते कोबी नी टोवे.

जागता रोयू

(मरकुस 13:32-37; लुका 17:26-30,34-37)

36तिने दाहळे एने तिनी टेमेन बारामा कुदू नी जानतलु, ती सोरगोन दूतो काजे एने नी पुऱ्या काजे, बाकीन निस्तु बासो काजे. 37जोसा नोहान दाहळा होता, तोसाच माणसोन पुऱ्यान आवनो बी होयसे. 38काहाकि जोसो पाणीन भोरती आवनेन पेहेला दाहळामा, जिने दाहळे तोक नोहान ढोंड्यामा नि बोश्यू तिने दाहळे तोक माणसे खाता पिता होता, एने तिंदरेमा वीयाव होयता होता. 39एने जेतार तोक पाणी वोयाडीन नि लीग्यू तेतार तोक तीनुक मालूम नी पोळ्यो; तोसुत माणसोन पुऱ्यान आवनो भी होयसे. 40तिनी टेमे दुय जोना खेतोमा होयसे, एक ली लेसे एने दिसराक छुळ देसे. 41दुय बायर घट्टी पोर दोवता होसे, एकी काजे ली लेसे एने दिसरी काजे छुळ देसे. 42इनान कोरता जागता रोयू काहाकि नी जानतला कि तुमुक प्रभू कानले दाहळे आवसे. 43बाकीन यो सोमजी लेवू कि ओगर घोरोन मालिक जानतू होतु कि चूर काहने टेमे आवसे ती जागतू रोयतु, एने आपना घोरोमा चुरी कोरणे नि देतु. 44इनान कोरता तुमु बी तीयार रोयू, काहाकि जिनी घोळीन बारामा तुमु विचार बी नी होसे, तिनी घोळी माणसोन पुऱ्यु आव लागसे.

भुरसान लायक दास एने दोगावू दास

(लुका 12:41-48)

45“आखरी चू भुरसान लायक एने ग्यानवावू दास कून छे, जीनाक मालिक आपना नोकोर-चाकरे पोर सरदार ठेरावलू कि टेम पोर तीनुक खाणो आपे?” 46सोयावा छे चे दास, जीनाक तेरु मालिक आवीन ओसुत कोरतेलू देखे. 47मे तुमु काजे छाचलीन कोयो, चू हिनाक आपनी आखी संपत्ती पोर अधिकारी ठेरावसे. 48बाकीन ओगर चू काठलु दास सोचने बाज जाय कि मारा मालिकन आवनेमा टेम छे, 49एने आपना साती दास काजे देणे बाज जाय, एने मोंदळ्या साते खाय पिये. 50ती तिना दासोन मालिक ओसले दाहळे आवसे, जेतार चू हेरी वाट नि जुवतू होसे, एने ओसली टेम जी चू नि जानतू होसे, 51तेत्यार चू हिना काजे भारी शिक्षा आपसे एने हेरु भाग कोपट्यान साते ठेरावसे चा रोडनो एने दात पिसणो रोयसे.

Currently Selected:

मत्ती 24: BFBNT

Highlight

Copy