मत्ती 25

दोस कुवारीन दाखलू

1सोरगोन राज “तीनु दोस कुवारीन सारखो होयसे जे तिंदरा दिवा लीन दुल्हा काजे भेटने कोरीन निकव्या. 2तीनुमा पाच सोमोजदार होता, एने पाच सोमोजदार नी होता.” 3जे सोमोजदार नी होता चे तिंदरा दिवा ली लेदा, बाकीन तिंदरे साते तेल नी लेदा. 4बाकीन जे सोमोजदार होता चे तिंदरा दिवा पुठी तिंदरा केटल्यामा तेल भोर लेदा. 5जेतार दुल्हा काजे आवनेमा मुळू होय गोयू, ती चे आखा डूलक्या लेने बाज गोया, एने सुव गोया.

6“आदी राती पुकार होयू, ‘देखू दुल्हा आवने बाज रोयू तीनाक भेटने कोरीन चालू.’” 7तेत्यार चे आखा कुवाऱ्या उठीन तिंदरा दिवा सुदारने बाज गोया. 8एने नि सोमोजदार होता चे सोमोजदार होता तीनुक कोया; तुमरा तेलोमा गोथो थुलोक आमु काजे बी आपु, काहाकि आमरा दिवा उलायने बाज रोया. 9बाकीन सोमोजदार जोवाब आप्या, कांखुर मायन यो तुमरेन कोरता एने आमरेन कोरता पुरो नी होये; वारलो यो छे कि तुमु वेचनेवावानचा जायीन तुमरेन कोरता मुले ली लेवू. 10जेतार ची मुले लेणे जाता होता ती दुल्हा आवीन पुग गोयू एने जे तीयार होता चे तिना साते वीयावोन घोरमा जात रोया एने झोपलु बोंद कोराय गोयू. 11ओवतेन चे दिसरा कुवाऱ्या बी आवीन कोयने बाज गोया, “हे माहाराज, आमरेन कोरता झोपलु उगाळ दे.” 12चू जोवाब आप्यू मे तुमु काजे छाचलीन कोयो कि मे तुमु काजे नी उवेखतलु. 13इनान कोरता जागता रोयू काहाकि तुमु नी तिना दाहळाक जानतला नि तिनी टेमो काजे.

तीन दासोन दाखलू

(लुका 19:11-27)

14“काहाकि परमेश्वरोन राज तिना माणसोन सारखो छे जू परदेश जाणेन टेमे आपना पावोर काजे बुलावीन आपनी मालमत्ता तिंदरे होवाले कोर देदू.” 15चू एक काजे पाच तुळा, दिसरा काजे दुय, तिसरा काजे एक मतलब; होर एक काजे तिंदरी लायकी देखीन आप्यू एने चू पोरदेस जात रोयू. 16तेत्यार जीना काजे पाच तुळा जोळला होता चू तेत्यारुत जायीन तिना पोर लेन देन कोऱ्यु एने पाच तुळा एने कोमायू. 17इना रितीसी जिनाक दुय जोळला होता चू बी दुय एने कोमायू. 18बाकीन जीना काजे एक आपलु होतु चू जायीन जागाक खोंद्यू एने आपना मालकोन तुळा डुकाळ देदु.

19घोणा सोवटा दाहळान बाद तीनु पावोरन माहाराज आवीन तिंदरे जुव हिसाब लेणे बाज गोयू. 20जीना काजे पाच तुळा जोळला होता चू, पाच तुळा एने लावीन कोयू, “हे माहाराज, तू मेसे काजे पाच तुळा आपलु होतु, देख, मे पाच तुळा एने कोमायलु छे.” 21तेरु माहाराज तिना काजे कोयू, “सोयावा वारला एने भुरसान लायक पावोर, तू थुलाकमा भुरसान लायक रोयू; मे तुसेक घोणा सोवटा चीजोन अधिकारी बोनावीस, आपना महाराजोन खुशीमा सहभागी होय जा.”

22“एने जीना काजे दुय तुळा आपला होता, चू बी आवीन कोयू ‘हे माहाराज, तू मेसेक दुय तुळा आपलु होतु, देख मे दुय तुळा एने कोमायू.’ 23तेरु माहाराज तीनाक कोयू, ‘सोयावा छे, वारला एने भुरसान लायोक दास, तु थुलाक भुरसान लायोक रोयू; मे तुसेक घोणा सोवटा चिजोन अधिकारी बोनावीस आपना महाराजोन खुशीमा सहभागी होय जा.’”

24तेत्यार जीनाक एक तुळा आपलु होतु, चू आवीन कोयू, “हे माहाराज, मेसेक मालूम होतो कि तू रीसावू माणूस छे; तू जा नि वेरतलु चा काटतेलु छे, एने जा वेरायलो नि होय चा गोथू टुवू कोरतेलू,” 25“इनान कोरता मे बिह गोयू एने जायीन तारा तुळा धोरतीमा डुकाळ देदू, देख जो तारो छे, चो यो छे.” 26तेरु माहाराज तीनाक जोवाब आप्यू; “हे दोगावा एने उजग्यू पावोर, जेतार तुसेक जो मालूम होतो कि जा मे नि वेरतलु चा गोथो काटतेलु एने जां मे नि पोसरावतलू चा गोथो टूवू कोरतेलू.” 27ती तू ओसो कोरणो होतो कि मारा रुप्या सावकारो काजे आप देतु, मे आवीन मारो घोनो व्याज सोहित ली लेतू. 28इनान कोरता चू तुळू हेरेनचा गोथा ली लेयू, एने जीना जूव दोस तुळा छे तीना काजे आप देयू. 29काहाकि जिना कुदा जुव छे, तीनाक एने आपाय जासे एने तेरे जुव घोनो सोवटो होय जासे बाकीन जिना जुव नि होय, तेरेनचा गोथो चो बी जो हेरे जुवसे, मांगाय जासे, 30एने इना रिकामा पावोर काजे बारथेला आंदारलामा नाख देवू, जा रोडनो एने दात कोकळावनो छे.

संसारोन न्याय

31“जेतार माणसोन पुऱ्यु तेरा महिमामा आवसे एने आखा सोरग दूत तेरे साते आवसे ती चू महिमान सिहासन पोर बोससे.” 32एने आखा देसोन माणसे तेरे ओगोव एखठा कोरायसे, एने जोसो राखवाव गाडरा काजे बुकळामा गोथू ओलोग कोरतेलू, तोसोत चू तीनुक एक दिसराक ओलोग कोरसे. 33चू गाडरा काजे तेरे जेवळे धोळे एने बुकळा काजे तेरे डाखरे धोळे कोरसे. 34तेत्यार राजा तेरे जेवळे धोळे वावा काजे कोयसे, “हे मारा बासोन सोयावा माणसे आवू इना राजोन अधिकारी बोन जावू, जो जोगोन पेहेले गोथो तुमरेन कोरता तियार कोरलु छे.” 35काहाकि मे भूकलू होतु, एने तुमु मेसेक खाणे आपला छे; मे तीसलू होतु एने तुमु मेसे काजे पाणी पीवाळला; मे परदेसी होतु एने तुमु मेसेक आपना घोरमा राख्या;. 36मे उगाळलु होतु, एने तुमु मेसेक डोगला पेराव्या; मे बिमार होतु ती तुमु मारी चाकरी कोऱ्या मे जेलमा होतु, एने तुमु मेसेक मेवने आव्या.

37तेत्यार धोरमी तीना काजे जोवाब आपसे “हे प्रभू, आमु, कोत्यार तुसे भूकलू देखीन खाणो खावाळला? एने तीसलु देखीन पाणी पिवाळला? 38आमु कोत्यार तुसेक पोरदेसी देख्या, एने आमरे घोरमा राख्या? एने उगाळलु देखीन डोगला पेहेराव्या? 39आमु कोत्यार तुसेक बिमारीमा एने जेलमा देख्या, एने तुसे काजे मेवने आव्या?” 40तेत्यार राजा तीनुक जोवाब आपसे, “मे तुमु काजे छाचलीन कोय कि, तुमु जे मारा नानामा नाना भाशोमा गोथा काहना एका साते कोऱ्या चो मारे साते कोऱ्या.” 41“तेत्यार चू डाखऱ्या धोळे वावा काजे कोयसे, ‘हे शापित माणसो मारे ओगोव गोथा तिना ओमोरकाईन आगठामा जात रोयू जो भुतडान एने तेरा दूतोन कोरता तीयार कोरलो छे, 42काहाकि मे भूकलू होतु एने तुमु मेसेक खाणे नी आप्या, मे तीसलु होतु एने तुमु मेसेक पाणी नी पिवाळ्या. 43मे पोरदेसी होतु, एने तुमु मेसेक तुमरे घोरमा नी राख्या, मे उगाळलु होतु, एने तुमु मेसेक डोगला नी पेराव्या; मे मांदलु होतु एने जेलमा तुमु मारी खोबर नी लेदा.’”

44तेत्यार चे जोवाब आपसे, “हे प्रभू, आमु तुसेक केतार भूकलू, एने तीसलु, एने पोरदेसी, एने उगाळलु, एने मांदलु, एने जेलमा देख्या, एने तारी सेवा नी कोऱ्या, 45तेत्यार चू तीनुक जोवाब आपसे, ‘मे तुमु काजे छाचलीन कोय कि, तुमु जे इना नानलामा गथा नानला एक साते बी नी कोऱ्या, चू मारे साते बी कोऱ्या, 46एने जे ओमोरकाई दोंड भुगसे, बाकीन धोरमी ओमोर जीवनोमा जासे.’”

Currently Selected:

मत्ती 25: BFBNT

Highlight

Copy