मत्ती 26

येसुन मारनेन योजना

(मरकुस 14:1-2; लुका 22:1-2; योहान 11:45-53)

1जेतार येसु जे आखा वाते कोय देदु ती आपना चेला काजे कोयने बाज गोयू. 2“तुमुक मालूम छे कि दुय दाहळामा वोलांडोनोन तीहीवार छे एने माणसोन पुऱ्यु ख्रुस पोर चोळवाय जाणे कोरीन धोरवाय जासे.” 3तेत्यार प्रधान पुजारान एने माणसोन डायलू कैफा नावोन महायाजकोन आंगनामा एखठा होता. 4एने आपसामा विचार कोरणे बाज गोया कि येसु काजे दोगासी धोरीन मार देणे, 5बाकीन चे कोयता होता “वोलांडोनोन टेमे नी, कोदि ओसो नी होयो कि माणसोमा दोंगु होय जाय.”

येसु पोर मोहेंगलो इत्तर छिळेकनो

(मरकुस 14:3-9; योहान 12:1-8)

6जेतार येसु बैतनिय्याह गावमा शिमोन कुळावा बिमारी वावान घोरमा होतु जेनाक येसु वारू कोरलु होतु. 7ती एक बायोर संगमरमरोन केटलीमा मोहोंगलो इत्तर लीन तेरेनचा आवी एने जेतार चू खाणो खाणे बोस रोयू होतु ती तेरे मुंडका पोर रेचवी देदी. 8यो देखीन तेरा चेला रीसवाया एने कोयने बाज गोया “एरू काहा नाश कोर देदी? 9इनाक ते वारला किमोत मा वेचीन गोरीब काजे वाट सोकता होता.” 10यो जानीन येसु तीनु काजे कोयू, “बायर काजे काहा तोकलीत आपने बाज रोया? जी मारे पोर भोलाई कोरली छे. 11गोरीब ते तुमरे साते हमेशा रोयतला छे, बाकीन मे तुमरे साते हमेशा नी रोयो. 12होयी ते मारे डीलोपोर यो इत्तर रेचवली छे, यो मारे गाळाय जाणे कोरीन कोरलो छे. 13मे तुमु काजे छाचलीन कोयो कि आखा जोगोमा जा जी वारली खोबरोन प्रचार कोराय जासे चा तेरा इना कामोन फोम कोरायसे.”

यहुदा इस्कारीयोतन विस्वासघात

(मरकुस 14:10-11; लुका 22:3-6)

14तेत्यार यहुदा इस्कारीयोत जू बारा चेला मायलु एक होतु, प्रधान पुजारानचा जायीन कोयू. 15“अगर मे तीनाक तुमरे हाते धोराव दोम ती मेसेक काय आपसु? चे तीना काजे तीस चांदीन सीक्का तुलीन आप देदा, 16एने चू तिनी टेमे तीनाक धोरावनेन मोकू हेरने बाज गोयू.”

चेला साते आखरी खाणो

(मरकुस 14:12-21; लुका 22:7-14,21-23; योहान 13:21-30)

17बेखमीर रुटान तीहीवारोन पेहेले दाहळे चेला येसुनचा आवीन पुछ्ने बाज गोया “तू काय चाहे कि आमु तारेन कोरता वोलांडोनोन तीहीवारोन तीयारी कोरजे?” 18चू कोयू, “सोहोरोमा आमुक माणसोन घोर जायेन तीनाक कोयू ‘गुरु कोये कि मारू टेमे साते छे, मे आपना चेला साते तारेनचा वोलांडोनोन तीहीवार कोरु.’” 19आखरी चेला येसुन आग्या मानीन वोलांडोनोन तीहीवारोन तीयारी कोऱ्या.

20जेतार सांतो होयो ती चू बारा चेला साते खाणो खाणे कोरीन बोशु. 21जेतार चे खाणे बाज रोया होता ती चु कोयू, “मे तुमु काजे छाचलीन कोयो कि तुमरेमा गोथू एक मेसेक धोरावसे” 22इनापोरसी चे जुदा नाराज होय गोया, एने होर एक जोणु तीनाक पुछने बाज गोया, “हे गुरु काय चू मे छे?” 23चू जोवाब आप्यू, “जू मारे साते थाविमा हात घाल रोयु चू मेसेक धोरावसे. 24माणसोन पुऱ्यु ते जोसो तेरे बारामा लिखलो छे, जातलु छे; बाकीन तिना माणसोन कोरीन दुख छे जिनान लारे माणसोन पुऱ्यु धोराय जातलू छे; अगर तिना माणसोन जन्मो नि होयतो, तेरेन कोरता वारलो होयतो” 25तेत्यार चू धोरणे वावू यहुदा कोयू, “हे रब्बी, काय चू मे छे?” तीनाक चू कोयू, “तू कोय देदू.”

प्रभू भोज

(मरकुस 14:22-26; लुका 22:15-20; 1 कुरीन्थियो 11:23-25)

26जेतार चे खाय रोया होता ती येसु रुटू लेदू एने आशिष मांगीन एने रुटू तुळीन चेलाक कोयू, “खावू यो मारो डील छे,” 27ओवतेन चू प्यालू लीन धन्यवाद कोऱ्यु एने तीनुक आपतू जायीन कोयु “तुमु आखा न्या गोथो पिवू. 28काहाकि जो नोवीन वायदू जो लुय छे जो घोणा सोवटा जुगू पापोन माफीन कोरता वोयाळाय जातलो छे, 29मे तुमु काजे छाचलीन कोयो कि आंगुरोन जू रोस तिने दाहळे तोक नि पियो जेतार तोक तुमरे साते मारा बासोन राजमा नोवलो नि पियो.” 30ओवतेन चे गीते गावीन जयतुन बोयळा पोर गोया.

पतरसोन मना कोरनेन भविष्यवाणी

(मरकुस 14:27-31; लुका 22:31-34; योहान 13:36-38)

31तेत्यार येसु तीनु काजे कोयू, “तुमु आखा आज राती मारे बारामा ठूकर खासु, काहाकि लिखलो छे मे गुवाव्या काजे भाविस, एने टूवान गाडरा वेरा वेर होय जासे. 32बाकीन मे मारे जीव उठनेन बादमा तुमरेन पेहेले गलीलमा जायीस.” 33इनापोरसी पतरस तीनाक कोयु, “ओगर आखा तारा बारामा ठूकर खाय ती खाय, बाकीन मे कोबी नि ठूकर खाम.” 34येसु तीना काजे कोयू “मे तुसेक छाचलीन कोय कि आज राती कुकळू वासनेण पेहेले तू तीन कावा मारू नाकार कोरिस.” 35पतरस तीनाक कोयू, “ओगर मेसेक तारे साते मोरनु बी पोळे ती, ते बी मे तारू इनकार नी कोरो एने ओसोत आखा चेला बी कोया.”

गतसमनीमा प्रार्थना

(मरकुस 14:32-42; लुका 22:39-46)

36जेतार येसु आपना चेला साते गेथसेमोन नावोन एक जागे आव्यु, एने आपना चेला काजे कोयने बाज गोयू, “जेतार तोक मे वा जायीन प्रार्थना कोरो, तेतार तोक न्यात बोस रोयजू.” 37येसु पतरस एने जब्दिन दुयू पुऱ्या याकुब एने योहान काजे साते लीगोयू एने नोजोरमा कासावीस होयने बाज गोयू. 38तेत्यार चू तीनु काजे कोयू, “मारू जीव निकवने बाज रोयू, न्या तोक कि मारू जीव निकोवने हिंडे, तुमु न्यात उबा रोयू एने मारे साते जागता रोयू. 39ओवतेन येसु थुलूक ओगु जायीन उबळू पोळ गोयू; एने जी प्रार्थना कोऱ्यु, कि हे मारा बास ओगर होय सोके ती यो दुख मारेनचा गोथो तोव जाय बाकीन जोसो मे लागे तोसो नि बाकीन जोसो तूसेक लागे तोसोत होयने दे.” 40एने चू चेलानचा आवीन तीनुक सुवतला देख्यू एने पतरस काजे कोयू, “काय तुमु मारे साते एक घोळीक भोर बी नी जाग सोक्या? 41जागता रोयू, एने प्रार्थना कोरता रोयू, कि तुमु परीक्षामा नी पोळे, आत्मा ते तीयार छे बाकीन डील कोमजुर छे.” 42एने चू दिसरे कावा जायीन एने प्रार्थना कोऱ्यु कि, “हे मारा बासो, अगर यो मारे पिये बिना नी छेटो होय सोकतो ती तारी मोर्जी पुरी होये.” 43तेत्यार चू आवीन तीनुक ओवी सुवतला देख्यू, काहाकि तिंदरा डूवा निंदोमा भोरायला होता, 44तीनुक छुळीन चू ओवी जात रोयू एने तीनु बुलोमा एने तिसरे कावार प्रार्थना कोऱ्यु. 45तेत्यार चू चेलानचा आवीन तीनु काजे कोयू, हिमी सुवता रोयू, एने आराम कोरु देखू टेम आव लागली छे, एने माणसोन पुऱ्याक पापीन हाते धोरवाय जातलु छे, 46उठू, चालू; देखू, मेसेक धोरणे वावा साते आव लागला छे.

येसु काजे बंदी बोनावनो

(मरकुस 14:43-50; लुका 22:47-53; योहान 18:3-12)

47चू जो कोय रोयू होतु कि यहुदा जू बारामायलु एक होतु आव्यु, एने तेरे साते प्रधान पुजारू एने माणसो मायला डाहला पुढारी, इंदरे तोरोफसी मोटीत गोरदी तलवाऱ्या एने लाकळ्या लीन आव्या. 48तीनाक धोरणेवावु तीनुक निशाणी आपतू होतु; “जीनाक मे गुवू आपो चू छे; तीना काजे धोर लेजू.” 49एने तेत्यारुत येसुनचा आवीन कोयु “हे रब्बी, नमस्कार” एने तीनाक जादा गुवू देदू. 50येसु तीना काजे कोयू, “हे दोस्ता, जिना कामोन कोरता तू आवलु छे तीनाक कोरले,” तेत्यार चे साते आवीन येसु पोर हात नाखीन एने तीनाक धोर लेदा. 51येसुन साथीमा गोथू एक माणूस हात बोढावीन तेरी तलवार निकावीन महायाजक पावोर पोर चालाळीन तेरो कानटो काट देदू. 52तेत्यार येसु तीनाक कोयू, “तारी तोलवार पोछि जागा पोर मेक ले काहाकि जू तलवार चालाळे चे आखा तलवारे कोरीन माराय जासे. 53काय तुसेक नि जनायतो कि मे मारा बासोसी विनता कोर सोको, एने चू सोरगोन दूतोन बारा पालटोन गोथो जादा मारेनचा हिमी मुकली देये? 54बाकीन पवित्र शास्त्रान जी वाते ओसोत जोरुरी छे, कोसो पुरो होयसे?” 55तिनी टेमे येसु भीळ काजे कोयू, “तुमु तलवारे एने डेंगा लीन मेसेक डाखून तोसो धोरणे कोरीन निकवी रोया?” मे दाहळीन मंदीरमा बोसीन प्रचार कोरतू होतु एने तुमु मेसेक नि धोऱ्या. 56बाकीन यो आखो इनान कोरता होयो कि भविष्य कोरतान वचन पुरो होये तेत्यार आखा चेला तीना काजे छुळीन दोवळी पोळ्या.

केफान अगोव येसु

(मरकुस 14:53-65; लुका 22:54-55,63-71; योहान 18:13-14,19-24)

57तेत्यार येसुक धोरणे वावा तीनाक कैफा नावोन महायाजकोनचा लीन गोया चा शास्त्री एने पुढारी घोन डाहाला माणसे टूवायला होता, 58पतरस नांबेत-नांबे तेरे पोछोव-पोछोव महायाजकोन आंगने तोक गोयू, एने माही जाईन आखरी तोक काय होयतालो देखणेन कोरता खुलीमा जाईन बोस गोयू. 59प्रधान पुजारू एने आखरी महासभा, येसु काजे मार नखाने कोरीन तेरे खिलापमा झुटी गोवायी हेरता होता. 60बाकीन घोनसोवाटा गोवायी हेरनेपोर भी नि जोळी, आखिरमा दुय जोना आया. 61एने कोया “जू कोयलु छे कि मे परमेश्वरोन मंदीर काजे पाळ सोकतलु एने तीनाक तीन दाहळामा बोनाव सोकतलु?”

62तेत्यार महायाजक उबरोयीन येसु काजे कोयू “काय तू काहीन जोवाब नि आपतलु? जे माणसे तारे बारामा काय गोवायी देणे बाज रोया?” 63बाकीन येसु हुगुत रोयू तेत्यार महायाजक तीनाक कोयू “मे तुसेक जीवतला परमेश्वरोन कोसोम आपो कि अगर तू परमेश्वरोन पुऱ्यु मसिह छे ती आमु काजे कोय दे,” 64येसु तीना काजे कोयू, “तू आपसुत कोय देदू; बाकीन मे तुमु काजे यो भी कोयो कि हिमी गोथा तुमु माणसोन पुऱ्या काजे सर्वशक्तिमानोन जेवळे धोळे बोसलू एने सोरगोन वादवा पोर आवतेलु देखसु.” 65इनापोरसी महायाजक आपना छिंदरा फाळीन कोयु, “जू परमेश्वरोन बुराई कोरलु छे, हिमी आमुक गोवायीन काय जरुरत छे? देखू तुमु हिमी जी बुराई सोमवला छे. 66तुमु काय विचार कोरतेला?” चे जोवाब आप्या “यो मोरणोन दोंडोन लायक छे,” 67तेत्यार चे तेरे मुयो पोर थूक्या, एने तीनाक धूमा देदा, दिसरा थापळ्या देदा एने कोया, 68“हे मसिह, आमुक भविष्यवाणी कोरीन देखाळ कि कून तूसेक देदो?”

पतरसोन येसुन मना कोरनो

(मरकुस 14:66-72; लुका 22:56-62; योहान 18:15-18,25-27)

69पतरस बारथे आंगनामा बोस रोयु होतु कि एक पावेरनी तेरेनचा आवी एने कोयी “तू बी येसु गलीली साते होतु.” 70चू आखान सामने यो कोयतू जायीन इनकार कोऱ्या, “मे नी जानतलु कि तू काय कोय रोयी.” 71जेतार चू बारथे देवळीमा गोयू ती, दिसरी पावेरनी तीनाक देखीन तीनु काजे जे चा होता तीनुक कोयी, “यु बी येसु नासरी साते होतु. 72चू कोसोम खायीन एने इनकार कोऱ्यु मे तिना माणसो काजे नी उवखतलु.” 73थुलिक वारमा माणसे जे चा उबरोया होता, पतरसोनचा आवीन तीना काजे कोया छाचलीन तू बी तीना मायलु छे, काहाकि तारी बुली, तारू भेद खुल देदली छे. 74तेत्यार चू झीटकारिन कोसोम खाणे बाज गोयू “मे तीना माणसो काजे नी उवेखतलु,” एने तिनी टेमे कुकळू वासने बाज गोयू. 75तेत्यार पतरस काजे येसुन कोयली वात फोम आवी कुकळू वासने पेहेले तू तीन कावार मारू इनकार कोरिस एने चू बारथे जायीन ढसा-ढसा रोड्यू.

Currently Selected:

मत्ती 26: BFBNT

Highlight

Copy