यूहन्ना 4

ईशु आउर सामरी बायले लेकी

1फेर जिदलदाय परबु के जान पड़ली कि फरीसीमन सुनला से कि ईशु यूहन्ना ले खुबे चेलामन बनाऊ आय आउर हुनमन के डूबन देऊ आय 2बल्ले ईशु खुदे ची नाई मान्तर हुनचो चेलामन डूबन देते रवत 3तेबे हुन यहूदिया के छांडुन भाती फेर गलील ने गेलो, 4आउर हुनके सामरिया ले होऊन भाती जातोर जरूरी रये। 5ऐईकाजे हुन सूखार नाव चो सामरिया चो गोटक नंगर लगले ईलो, जोन हुन भुईं चो लगे आसे जोन के याकूब आपलो बेटा यूसुफ के देऊ रलो; 6आउर याकूब चो चुंआ बले हुताय रली। आउर ईशु बाट चो थाकुन भाती हुन चुंआ थाने असने ची बसुन दिलो। ऐ गोठ मुंडे बेरा चो लगे-लगे होली। 7ईतलो ने गोटक सामरी बायले लेकी पानी भरूक ईली। ईशु हुनके बल्लो, “मोके पानी पिआव।” 8कसनबल्लोने हुनचो चेलामन नंगर ने भात घेनुक जाऊ रओत। 9हुन सामरी बायले लेकी हुनचो ले बल्ली, “तुय यहूदी होऊन भाती मय सामरी बायले लेकी ले कसन पानी मांग सीस?” (कसनबल्लोने यहूदी सामरीमन चो संगे कोनी परकार चो बेवहार नी संगावत।) 10ईशु जबाप दिलो, “अगर तुय माहापुरू चो बरदान के जानतीस आउर ये बले जानतीस कि हुन कोन आय जोन तुचो ले बलें सें, ‘मोके पानी पिआव,’ तेबे तुय हुनचो ले मांगतीस, आउर हुन तुके जीवना चो पानी देतो।” 11बायले लेकी हुनचो ले बल्ली, “हे परबु, तुचो लगे पानी भरतो काजे तो काई आसे बले नाई आउर चुंआ गड़ीयां आसे; तेबे फेर हुन जीवना चो पानी तुचो लगे काहां ले ईली? 12काय तुय आमचो बुआ याकूब ले बड़े आस, जोन आमके ऐ चुंआ दिलो; आउर खुदे ची आपलो पिलामन, आउर आपलो पशुमन संगे ऐ थाने ले पिवलो?” 13ईशु हुनके जबाप दिलो, “जोन कोनी ऐ पानी पिये दे हुन फेर पिआस होये दे, 14मान्तर जोन कोनी हुन पानी थानले पिये दे जोन मय हुनके देयें दें, हुन फेर अनंत काल तक पिआसा नी होये दे; मान्तर जोन पानी मय हुनके देयें दें, हुन हुन थाने गोटक झरन बनुन जाये दे जोन अमर जीवना चो काजे उमड़ते रये दे।” 15बायले लेकी हुनचो ले बल्ली, “हे परबु, हुन पानी के मोके देस बल्ले मय पिआस नी होयें दें आउर ना पानी भरतो काजे ईतलो दूर ऐयें दें।” 16ईशु हुनचो ले बल्लो, “जा, आपलो मनुक के ऐथा हाग देऊन आन।” 17बायले लेकी जबाप दिली, “मय बिना मनुक चो आंसे।” ईशु हुनचो ले बल्लो, “तुय सते बोल सीस, ‘मय बिना मनुक चो आंसे।’ 18कसनबल्लोने तुय पांच मनुक करून चुकली सीस, आउर जेचो लगे तुय ऐबे आशीष हुन बले तुचो मनुक नुआय। ऐ तुय सते ची बल्ली सीस।” 19बायले लेकी हुनचो ले बल्ली, “हे परबु, मोके लागे से कि तुय अगम गिआनी आस। 20आमचो बाप दादीमन ऐई डोंगरी थाने आराधना करला, आउर तुमी बलेसास कि हुन ठान जोन थाने आराधना करतोर आय यरूशलेम ने आसे।” 21ईशु हुनचो ले बल्लो, “हे नारी, मचो गोठ चो बिश्वास कर कि हुन समया ऐये से कि तुमी ना तो ऐ डोंगरी थाने बुआ चो आराधना करा से, ना यरूशलेम ने। 22तुमी जेके नी जानास, हुनचो आराधना करेसास; आउर आमी जेके जानु हुनचो आराधना करूं से; कसनबल्लोने मुक्ति यहूदीमन थानले आय। 23मान्तर हुन समया ऐये से, मान्तर ऐबे बले आसे, जोन थाने सते भगत बुआ चो आराधना आत्मा आउर सत ले कर दे, कसनबल्लोने बुआ आपलो काजे असने ची आराधना करूमन के डगरा ये से। 24माहापुरू आत्मा आय, आउर जरूरी आय कि हुनचो आराधना करतो लोग आत्मा आउर सते ले आराधना करोत।” 25बायले लेकी हुनचो ले बल्ली, “मय जाने से कि मसीह जोन ख्रिस्त बलाया जाऊ आय, ऐतो बिता आय; जिदलदाय हुन ऐये दे, तेबे आमके सपाय गोठमन सांगुन देये दे।” 26ईशु हुनचो ले बल्लो, “मय जोन तुचो ले बलें सें, हुनी आंय।”

चेलामन चो लेवटतोर

27ईतलो ने हुनचो चेलामन ईला, आउर भक्याऊन गेला कि हुन बायले लेकी ले गोठया से; तेबले बले कोनी नी पचारला, “तुय काय चाहाय सीस?” नाहले “काय काजे हुनचो ले गोठयाय सीस?” 28तेबे बायले लेकी आपलो हांडी के छांडुन भाती नंगर ने जाते गेली, आउर लोगमन के बोलुक मुरयाली, 29“ईआ, गोटक माने के दका, जोन सपाय काई जोन मय करले मोके सांगुन दिलो। काय ऐ तो मसीह नुआय?” 30आउर हुनमन नंगर ले निकरून भाती हुनचो लगे ऐऊक मुरयाला। 31ऐई मंजी हुनचो चेलामन ईशु के ऐ गुहार करला, “हे रब्बी, काई खा।” 32मान्तर हुन हुनमन ले बल्लो, “मचो लगे खातो काजे असन भात आसे जेके तुमी नी जानास।” 33तेबे चेलामन आपस ने बल्ला, “काय कोनी हुनचो काजे काई खातो काजे आनला सोत?” 34ईशु हुनमन ले बल्लो, “मचो भात ऐ आय कि आपलो पठालो बिता चो इच्छा चो अनुसार चलें दें आउर हुनचो काम पुरा करेंदे। 35काय तुमी नी बोलास, ‘कटीई होतोर ने ऐबे बले चार मयना पड़ली से?’ दका, मय तुमचो ले बलें सें, आपलो आँईक उठाऊन भाती बेड़ामन थाने नजर लगाहा कि हुनमन कटीई चो काजे पाकली से। 36काटतो बिता भुती पाऊ आय आउर अमर जीवना चो काजे पाक ओंडेयाऊ आय, बल्ले बुनतो बिता आउर काटतो बिता दुनो मिसुन भाती हरिक करोत। 37कसनबल्लोने ऐ थाने ऐ ठसका ठीक बसु आय; ‘बुनतो बिता दुसर आय आउर काटतो बिता दुसर।’ 38मय तुमके हुन फसह काटतो काजे पठाले जोन थाने तुमी मसागत नी करलास दुसरमन मसागत करला आउर तुमी हुनमन चो मसागत चो फल ने शामिल होलास।”

सामरीमन चो बिश्वास करतोर

39हुन नंगर चो खुबे असन सामरीमन हुन बायले लेकी चो बोलतो ने ईशु उपरे बिश्वास करला; कसनबल्लोने हुन ऐ गोहई देऊ रली, हुन सपाय काई जोन मय करले से, मोके सांगुन दिलो। 40ऐईकाजे जिदलदाय ऐ सामरी हुनचो लगे ईला, तेबे हुनचो ले गुहार करूक मुरयाला कि आमचो थाने रा। आउर हुन हुता दुय दिन तक रलो। 41हुनचो बचन चो कारन आउर बले खुबे असन लोगमन बिश्वास करला 42आउर हुन बायले लेकी के बल्ला, “अदायं आमी तुचो बोलतोर ची ले बिश्वास नी करू; कसनबल्लोने आमी खुदे ची सुनलु, आउर जानु से कि ऐई सते जगत चो मुक्ति करू आय।”

43फेर हुन दुय दिन चो पाचे हुन हुता ले निकरून भाती गलील ने गेलो, 44कसनबल्लोने ईशु खुद गोहई दिलो कि अगम गिआनी आपलो देश ने मान नी पाए। 45जिदलदाय हुन गलील नंगर ने ईलो, तेबे गलीलीमन हरिक चो संगे हुनचो ले मिलला; कसनबल्लोने जितरो काम हुन यरूशलेम ने तिआर चो समया करू रलो, हुनमन हुन सपाय के दकु रवत, कसनबल्लोने हुनमन बले तिआर ने जाऊ रवत।

राजघर ने कामकरू चो बेटा के चेंगा करतोर

46तेबे हुन फेर गलील नंगर चो काना गाँव ने ईलो, जोन थाने हुन पानी के अंगुर रस बनाऊ रये। हुता राजा चो गोटक काम करतो बिता रये जेचो बेटा कफरनहूम ने बेमार रये। 47हुन ऐ सुनुन भाती कि ईशु यहूदिया ले गलील ने ईलो से, हुनचो लगे गेलो आउर हुनचो ले गुहार करूक मुरयालो कि जाऊन भाती मचो बेटा के चेंगा करून देस: कसनबल्लोने हुन मरतो थाने रलो। 48ईशु हुनचो ले बल्लो, “जिदलदाय ले तुमी चिना आउर भयंकर काम नी दका से हुदलदाय ले केबीई बिश्वास नी करा से।” 49राजा चो कामकरू हुनचो ले बल्लो, “हे परबु, मचो लेका चो मरतोर ले पयले जो।” 50ईशु हुनचो ले बल्लो, “जा, तुचो बेटा जीव आसे।” हुन माने ईशु चो बल्लो बिती गोठ के बिश्वास करलो आउर जाते गेलो। 51हुन बाट ने ची रलो कि हुनचो दास हुनचो ले ऐऊन मिलला आउर बोलुक मुरयाला, “तुचो लेका जीव आसे।” 52हुन हुनमन ले पचारलो, “कोन घड़ी हुन अच्छा होऊक मुरयालो?” हुनमन हुनचो ले बल्ला, “काली सातवां घंटा ने हुनचो जर उतरून गेली।” 53तेबे बुआ जानुन गेलो कि ऐ हुनी घड़ी होली जोन घड़ी ईशु हुनचो ले बल्लो, “तुचो बेटा जीव आसे,” आउर हुन आउर हुनचो सपाय घरलोगमन बिश्वास करला। 54ऐ दुसरा अकचकित काम रये जोन ईशु यहूदिया ले गलील नंगर ने ऐऊन भाती दकालो।

Currently Selected:

यूहन्ना 4: HLBNT

Highlight

Copy