यूहन्ना 5

अड़तीस बरक चो रोगी के चेंगा करतोर

1ऐ गोठमन चो पाचे यहूदीमन चो गोटक तिआर होली, आउर ईशु यरूशलेम ने गेलो। 2यरूशलेम ने भेड़ फाटक चो लगे गोटक कुण्ड आसे जोन इब्रानी भाषा ने बैतसैदा बलाया जाऊ आय; हुनचो पांच बरांदा आसे। 3ऐ थाने खुबे असन बेमार, कानामन, खोड़ीयामन आउर झुरा देंह बितामन पानी चो हलाया जातोर चो आशा ने पडु रते रला। 4कसनबल्लोने तय समया ने माहापुरू चो सरगदूत कुण्ड ने उरुन भाती पानी के हलाते रवत। पानी हलते ची जोन कोनी पयले उतरो हुन चेंगा होते रलो भले हुनचो कोनी बेमार केंव नी होओ। 5हुता गोटक माने रलो, जोन अड़तीस बरक ले बेमार ने पडु रलो। 6ईशु हुनके पढ़लोर दकुन भाती आउर ऐ जानुन भाती कि हुन खुबे दिनमन ले ऐ दसा ने पड़लो से, हुनके पूछलो, “काय तुय चेंगा होऊक मन कर सीस?” 7हुन बेमार माने हुनके जबाप दिलो, “हे परबु, मोचो लगे कोनी माने निआत कि जिदलदाय पानी हलाया जाओ, तेबे मोके कुण्ड ने उतराओ; मान्तर मोचो अमरते-अमरते दुसर मोचो ले पयले उतरून जाऊ आय।” 8ईशु हुनचो ले बल्लो, “उठ, आपलो खटिया उठाव, आउर हिन्ड़ा बुला हो।” 9हुन माने तुरते चेंगा होलो, आउर आपलो खटिया उठाऊन भाती हिन्डुक बुलुक मुरयालो। 10हुन सब्त चो दिन रये। ऐईकाजे यहूदी हुनचो ले जोन चेंगा होऊ रये, बोलुक मुरयाला, “आजी तो सब्त चो दिन आय, तुके खटिया उठातोर ठीक नुआय।” 11हुन हुनमन के जबाप दिलो, “जोन मोके चेंगा करलो, हुनी मोचो ले बल्लो, ‘आपलो खटिया उठाव, आउर हिन्ड़ बुल’।” 12हुनमन हुनचो ले पचारला, “हुन कोन माने आय जोन तुचो ले बल्लो, ‘खटिया उठाव, आउर हिन्ड़ बुल’?” 13मान्तर जोन चेंगा होऊन जाऊ रलो हुन नी जानते रये कि हुन कोन आय, कसनबल्लोने हुन जगा ने भीड़ होतोर लागुन ईशु हुन थानले गुचुन जाऊ रलो। 14ऐ गोठमन चो पाचे हुन ईशु के मंदिर ने मिललो। ईशु हुनचो ले बल्लो, “दक, तुय चेंगा होली सीस; फेर ले पाप नी कर, असन नी होओ कि ऐचो ले कोनी बड़े बिपत्ति तुचो उपरे ऐऊन पड़ो।” 15हुन माने जाऊन भाती यहूदीमन ले बोलुन दिलो कि जोन मोके चेंगा करलो हुन ईशु आय। 16ऐई लागुन यहूदी ईशु के कन्दराऊक मुरयाला, कसनबल्लोने हुन असन काम सब्त चो दिने करते रलो। 17ऐ थाने ईशु हुनमन ले बल्लो, “मोचो बुआ ऐबे तक कामकरू आय, आउर मय बले काम करूं आय।” 18ऐई लागुन यहूदी आउर बले खुबे हुनके मारतो काजे कोशिश करते रओत, कसनबल्लोने हुन ना मात्र सब्त चो दिन चो बिदी के टुटाते, मान्तर माहापुरू के आपलो बुआ बोलुन भाती आपन खुद के माहापुरू चो बराबर बले ठेबा ते रलो।

बेटा चो अधिकार

19ऐ थाने ईशु हुनमन ले बल्लो, “मय तुमचो ले सत-सत बलेंसे, बेटा खुद ले काई नी करूक सके, मात्र हुन जोन बुआ के करतोर दकु आय; कसनबल्लोने जोन-जोन काममन के हुन करू आय हुनके बेटा बले हुनी रीति ले करू आय। 20कसनबल्लोने बुआ बेटा ले मया संगाऊ आय आउर जोन-जोन काम हुन खुद करू आय, हुन सपाय हुनके दकाऊ आय; आउर हुन ऐ मन ले बले बड़े काम हुनके दकाय दे, बल्ले तुमी अकचकित करा।” 21जसन बुआ मरलो लोगमन के उठाऊ आय आउर जिआऊ आय, असने ची बेटा बले जोन के चाहाऊ आय हुनमन के जिआऊ आय। 22बुआ काचीई नियाय नी करे, मान्तर नियाय करतोर चो सपाय काम बेटा के सोपुन दिलो से, 23कि सपाय लोग जसन बुआ चो मान करू आत असने ची बेटा चो बले मान करोत। जोन बेटा चो मान नी करे, हुन बुआ चो जोन हुनके पठालो से, मान नी करे। 24मय तुमचो ले सते-सते बलें सें, जोन मोचो बचन सुनुन भाती मोचो पठालोबितामन थाने बिश्वास करू आय, अमर जीवना हुनचो आय; आउर हुनचो उपरे डण्ड चो हुकुम नी होये मान्तर हुन मरना ले निकरून भाती जीवना ने परवेश होऊन चुकलो से। 25“मय तुमचो ले सत-सत बलें सें हुन समया ऐये से, आउर ऐबे आसे, जोन थाने मरलो लोग माहापुरू चो बेटा चो शब्द सुन दे, आउर जोन सुन दे हुनमन जीव दे। 26कसनबल्लोने जोन रीति ले बुआ आपन खुद ने जीवना संगाऊ आय, हुनी रीति ले हुन बेटा के बले ऐ अधिकार दिलो से कि आपन खुद ने जीवना संगा ओ; 27मान्तर हुनके नियाय करतोर चो बले अधिकार दिलो से, ऐईकाजे कि हुन माने चो बेटा आय। 28ऐचो ले अकचकित नी करा; कसनबल्लोने हुन समया ऐये से कि जितरो कबरमन ने आसोत हुनमन हुनचो शब्द सुनुन भाती निकरून ऐ दे। 29जोनमन भलाई करला से हुनमन जीवना चो जीव उठतोर चो काजे जीव उठ दे आउर जोनमन खराप करला से हुनमन डण्ड चो जीव उठतोर काजे जीव उठ दे।”

ईशु चो बारे ने गोहई

30“मय आपन खुद ले काई नी करूक सके; जसन सुनु आय, असने नियाय करू आंय; आउर मोचो नियाय सते आय, कसनबल्लोने मय आपलो इच्छा नाई मान्तर आपलो पठाऊ बिता चो इच्छा चाहायें से। 31अगर मय खुदे ची आपलो गोहई देयें दें, तेबे मोचो गोहई सत नुआय। 32गोटक आउर आसे जोन मोचो गोहई देऊ आय, आउर मय जाने कि मोचो जोन गोहई हुन देऊ आय, हुन सत आय। 33तुमी यूहन्ना ले पुछलास आउर हुन सत चो गोहई दिलो से। 34मान्तर मय आपलो बारे ने मानेमन चो गोहई नी चाहायें; तेबले बले मय ऐ गोठमन ऐईकाजे बलें सें कि तुमके मुक्ति मिरो। 35हुन तो जरतो आउर बरतो बिती दीया रये, आउर तुमके खिन्डिक बेरा तक हुनचो उजर ने मतभुल होतोर अच्छा लागली। 36मान्तर मोचो लगे जोन गोहई आसे हुन यूहन्ना चो गोहई ले बड़े आय; कसनबल्लोने जोन काम बुआ मोके पुरा करतो काजे सोपलो से बल्लोने ऐई काम जोन मय करू आंय, हुनमन मोचो गोहई आत कि बुआ मोके पठालो से। 37आउर बुआ जोन मोके पठालो से, हुनी मोचो गोहई दिलो से। तुमी ना केबीई हुनचो शब्द सुनलास, आउर ना हुनचो रूप दकलासास; 38आउर हुनचो बचन के मन ने थीर नी संगाहास, कसनबल्लोने जोन के हुन पठालो तुमी हुनचो बिश्वास नी करास। 39तुमी पवितर शास्त्र ने डगराऊ आहास, कसनबल्लोने समजु आहास कि हुन थाने अमर जीवना तुमके मिरू आय; आउर ऐ हुनी आय जोन मोचो गोहई देऊ आय; 40फेर बले तुमी जीवना पावतो काजे मोचो लगे ऐऊक नी चाहास। 41मय मानेमन ले मान नी चाहायें। 42मान्तर मय तुमके जाने कि तुमचो ने माहापुरू चो मया निआय। 43मय आपलो बुआ चो नाव ले ईले से, आउर तुमी मोके गरहन नी करास; अगर दुसर कोनी आपलो ची नाव ले ऐओ, तेबे हुनके गरहन करा से। 44तुमी जोन गोटक दुसर ले मान चाहायसास आउर हुन मान जोन गोटक मात्र माहापुरू चो बाटले आय, नी चाहास, कोन परकार बिश्वास करूक सकास? 45ऐ नी समजा कि मय बुआ चो पुरे तुमचो उपरे दोष लगायें दे; तुमचो उपरे दोष लगातो बिता तो मूसा आय, जेचो उपरे तुमी आशा संगालासास। 46कसनबल्लोने अगर तुमी मूसा चो बिश्वास करतास, तेबे मोचो बले बिश्वास करतास, ऐईकाजे कि हुन मोचो बारे ने लिकलो से। 47मान्तर अगर तुमी हुनचो लिकलो बिती गोठमन थाने बिश्वास नी करास, तेबे मोचो गोठमन थाने कसन बिश्वास करा से?”

Currently Selected:

यूहन्ना 5: HLBNT

Highlight

Copy