यूहन्ना 6
6
पांच हजार लोगमन के खुआतोर
1ऐ गोठमन चो पाचे ईशु गलील चो झील बल्लोने तिबिरियास चो झील चो हुनपाट गेलो। 2आउर गोटक बड़े भीड़ हुनचो पाटे होला कसनबल्लोने जोन अकचकित काम हुन बेमारीमन उपरे दकाते रये हुनमन हुनमन दकते रवत। 3तेबे ईशु डोंगरी उपरे चेगुन भाती आपलो चेलामन चो संगे हुता बसलो। 4यहूदीमन चो फसह चो तिआर लगे रली। 5जिदलदाय ईशु आपलो आँईक उठाऊन भाती गोटक बड़े भीड़ के आपलो लगे ऐतोर दकलो, तेबे फिलिप्पुस ले बल्लो, “आमी ऐ मन चो खातो काजे काहां ले रोटी घेनुन आनुन्दे?” 6हुन ऐ गोठ हुनके परकतो काजे बल्लो, कसनबल्लोने हुन खुद जानते रये कि हुन काय करे दे। 7फिलिप्पुस हुनके जबाप दिलो, “दुय सव दीनार चो रोटी बले हुनमन चो काजे पुरा नी होये कि हुनमन ले हरकोनी के खिन्डिक-खिन्डिक मिरो।” 8हुनचो चेलामन ले शिमोन पतरस चो भाई अन्द्रियास हुनचो ले बल्लो, 9“ऐथा गोटक लेका आसे जेचो लगे जोंदरी चो पांच रोटी आउर दुय ठान मछरी आसे; मान्तर ईतलो लोगमन चो काजे हुन काय आय?” 10ईशु बल्लो, “लोगमन के बसाआ।” हुन जगा ने खुबे लाटा रली। तेबे लोग जोन थाने मानेमन चो गेनती लग-भग पांच हजार चो रली, बसला। 11तेबे ईशु रोटी के धरलो, आउर धन्यबाद करून बसतो बितामन के बाटुन दिलो; आउर असने ची मछरीमन थानले जितरो हुनमन चाहते रवत बाटुन दिला। 12जिदलदाय हुनमन खाऊन भाती संतुष्ट होला तेबे हुन आपलो चेलामन ले बल्लो, “बाचलो बिती गोंदा के सकला कि काई बले पकाया नी जाओं।” 13आउर हुनमन सकलल्ला, आउर जोंदरी चो पांच रोटीमन चो गोंदा थानले जोन खातो बितामन ले बाचते रये, बारा ठान टुकना भरली। 14तेबे जोन अकचकित काम हुन करून दकालो हुनके हुन लोगमन दकुन भाती बोलुक मुरयाला, “हुन अगम गिआनी जोन जगत ने ऐतो बिता रये बिलकुल ऐई आय।” 15ईशु ऐ जानुन भाती कि हुनमन मोके राजा बनातो काजे धरूक मन कर सोत, फेर डोंगरी उपरे ऐकला जाते गेलो।
ईशु चो पानी उपरे हिन्ड़तोर
16जिदलदाय सांज होली, तेबे हुनचो चेलामन झील चो रेटे गेला, 17आउर ड़ोंगा थाने चेगुन भाती झील चो हुनपाट कफरनहूम बाटे जाऊक मुरयाला। हुदलदाय अंधार होली, आउर ईशु ऐबे ले हुनमन चो लगे नी ऐऊ रलो। 18लेहरा धुका चो लागुन झील ने हरला उठुक मुरयाली। 19जिदलदाय हुनमन घाटते-घाटते तीन-चार मील चो लग-भग निकरून गेला, तेबे हुनमन ईशु के झील थाने हिन्ड़ते आउर ड़ोंगा चो लगे ऐतोर दकला, आउर डरला। 20मान्तर हुन हुनमन ले बल्लो, “मय आंय; डरा नाई।” 21आउर हुनमन हुनके ड़ोंगा थाने चेगातो काजे तिआर होला आउर तुरते हुन डोंगा हुन जगा ने जाऊन अमरली जोन थाने हुनमन जाते रवत।
लोगमन चो ईशु के डगरातोर
22दुसर दिने हुन भीड़, जोन झील चो हुनपाट उबा होऊन रली, ऐ दकला कि ऐथा गोटक के छांडुन आउर कोनी डोंगा नी रली; आउर ईशु आपलो चेलामन चो संगे हुन ड़ोंगा थाने नी चेगु रलो; मान्तर मात्र हुनचो चेलामन ची जाऊ रवत। 23तेबे दुसर ड़ोंगामन तिबिरियास ले हुन जगा चो लगे ईली, जोन थाने हुनमन परबु चो धन्यबाद करलोर पाचे रोटी खाऊ रला। 24ऐईकाजे जिदलदाय भीड़ दकला कि ऐथा ना ईशु आसे आउर ना हुनचो चेलामन, तेबे हुनमन बले ड़ोंगीमन थाने चेगुन ईशु के डगराते कफरनहूम पोंचला।
ईशु जीव चो रोटी
25झील चो हुनपाट जिदलदाय हुनमन हुनके मिलला तेबे बल्ला, “हे रब्बी, तुय ऐथा केबे ईलीस?” 26ईशु हुनमन के जबाप दिलो, “मय तुमचो ले सत-सत बलें सें, तुमी मोके ऐईकाजे नी डगरायसास कि तुमी अकचकित काम दकलास, मान्तर ऐईकाजे कि तुमी रोटीमन खाऊन भाती संतुष्ट होलास। 27नाश करतो बिती भात काजे मसागत नी करा, मान्तर हुन भात चो काजे जोन अमर जीवना तक ठेबु आय, जेके माने चो बेटा तुमके देये दे; कसनबल्लोने बुआ बल्लोने माहापुरू हुनचेई उपरे छापा लगालो से।” 28हुनमन हुनचो ले बल्ला, “माहापुरू चो काम करतो काजे आमी काय करवां?” 29ईशु हुनमन के जबाप दिलो, “माहापुरू चो काम ऐ आय कि तुमी हुनचो उपरे, जोन के हुन पठालो से, बिश्वास करा।” 30तेबे हुनमन हुनके बल्ला, “फेर तुय कोन बिती चिना दकाय सीस कि आमी हुनके दकुन भाती तुचो बिश्वास करू? तुय कोन बिती काम दकाय सीस? 31आमचो बाप दादीमन रान ने मन्ना खादला; जसन लिकलोर आसे, ‘हुन हुनमन के खातो काजे सरग ले रोटी दिलो’।” 32ईशु हुनमन ले बल्लो, “मय तुमचो ले सत-सत बलें सें कि मूसा तुमके हुन रोटी सरग ले नी दिलो, मान्तर मोचो बुआ तुमके सते रोटी सरग ले देऊ आय। 33कसनबल्लोने माहापुरू चो रोटी हुनी आय जोन सरग ले उतरून भाती जगत के जीवना देऊ आय।” 34तेबे हुनमन हुनचो ले बल्ला, “हे परबु, ऐ रोटी आमके हरमेशा दिया कर।” 35ईशु हुनमन ले बल्लो, “जीवना चो रोटी मय आय: जोन मोचो लगे ऐऊ आय हुन केबीई भूके नी होये, आउर जोन मोचो उपरे बिश्वास करू आय हुन केबीई पिआस नी होये। 36मान्तर मय तुमके बोलु रये कि तुमीमन बले मोके दकु बले राआस तेबले बले बिश्वास नी करास। 37जोन काई बुआ मोके देऊ आय हुन सपाय मोचो लगे ऐये दे, आउर जोन कोनी मोचो लगे ऐये दे हुनके मय केबीई नी निकरायें दे। 38कसनबल्लोने मय आपलो इच्छा नाई मान्तर आपलो पठालो बिता चो इच्छा पुरा करतो काजे सरग ले उतर ले से; 39आउर मोके पठालो बिता चो इच्छा ऐई आय कि जोन काई हुन मोके दिलो से, हुन थानले मय काई नी हजायें, मान्तर हुनके आखरी दिने फेर जीव उठायें। 40कसनबल्लोने मोचो बुआ चो इच्छा ऐई आय कि जोन कोनी बेटा के दके दे आउर हुनचो उपरे बिश्वास करे दे, हुन अमर जीवना पाओ; आउर मय हुनके आखरी दिने फेर जीव उठायें दें।” 41ऐईकाजे यहूदी हुनचो उपरे गुरमुरयाला, कसनबल्लोने हुन बोलु रलो, “जोन रोटी सरग ले उतरली, हुनी मय आय।” 42आउर हुनमन बल्ला, “काय ऐ यूसुफ चो बेटा ईशु नुआय, जेचो आया-बुआ के आमी जानु? तेबे हुन कसन बले से कि मय सरग ले उतर ले से?” 43ईशु हुनमन के जबाप दिलो, “आपस ने नी गुरमुराहा। 44कोनी मोचो लगे नी ऐऊक सकोत जिदलदाय ले बुआ, जोन मोके पठालो से, हुनके झिकुन नी धरो; आउर मय हुनके आखरी दिने फेर जी उठाये दे। 45अगम गिआनीमन चो लेखमन ने ऐ लिकलोर आसे, ‘हुनमन सपाय माहापुरू चो बाटले सिकालोर हो दे।’ जोन कोनी बले बुआ ले सुनला आउर सिकला से, हुन मोचो लगे ऐऊ आय। 46ऐ नाई कि कोनी बुआ के दकला से; मान्तर जोन माहापुरू चो बाटले आय, मात्र हुनी ची बुआ के दकलो से। 47मय तुमचो ले सत-सत बलें सें कि जोन कोनी बिश्वास करू आत, अमर जीवना हुनचेई आय। 48जीवना चो रोटी मय आंय। 49तुमचो बुआ दादीमन रान ने मन्ना खादला आउर मरून गेला। 50ऐ हुनी रोटी आय जोन सरग ले उतरली से बल्ले माने हुन थानले खाओत आउर नी मरोत। 51जीवन चो रोटी जोन सरग ले उतरली, मय आय। अगर कोनी ऐ रोटी थानले खाओत, तेबे हरमेशा जीव रदे; आउर जोन रोटी मय जगत चो जीव काजे देयें दें, हुन मोचो मास आय।” 52ऐ थाने यहूदी ऐ बोलुन भाती आपस ने झगड़ा होऊक मुरयाला, “ऐ माने कसन आमके आपलो मास खातो काजे देऊक लाय सकु आय?” 53ईशु हुनमन ले बल्लो, “मय तुमचो ले सत-सत बलें सें कि जिदलदाय ले तुमी माने चो बेटा चो मास नी खाहास, आउर हुनचो लऊ नी पिआ, तुमचो ने जीव निआय। 54जोन मोचो मास खाऊ आय आउर मोचो लऊ पीऊ आय, अमर जीवना हुनचेई आय; आउर मय हुनके आखरी दिने फेर जियाऊन उठायें दें। 55कसनबल्लोने मोचो मास सते ने खातोर तीज आय, आउर मोचो लऊ सते ने पिवतोर तीज आय। 56जोन मोचो मास खाऊ आय आउर मोचो लऊ पिऊ आय हुन मचो ने थीर बनुन रऊ आय, आउर मय हुनचो ने। 57जसन जीवता बुआ मोके पठालो, आउर मय बुआ चो कारन जीव आसे, असने ची हुन बले जोन मोके खाये दे मोचो लागुन जीव रये दे। 58जोन रोटी सरग ले उतरली ऐई आय, हुन रोटी चो समान नाई जोन के बुआ दादीमन खादला आउर मरला; जोन कोनी ऐ रोटी खादे, हुन हरमेशा जीव रदे।” 59ऐ गोठमन हुन कफरनहूम चो गोटक आराधना घर ने उपदेश देतो समया बल्लो।
अमर जीवना चो बचन
60हुनचो चेलामन थानले खुबेमन ऐ सुनुन भाती बल्ला, “ऐ कटर गोठ आय; ऐके कोन सुनुक सकु आय?” 61ईशु आपलो मन ने ऐ जानुन भाती कि मोचो चेलामन आपस ने ऐ गोठ थाने घुरमुरू आत, हुन पचारलो, “काय ऐ गोठ ले तुमके ठोकर लगली से? 62अगर तुमी माने चो बेटा के जोन थाने हुन पयले रये, हुता उपरे जातो के दका से, तेबे काय होये दे? 63आत्मा तो जीवन देऊ आय, देंह ले काई लाब नाई; जोन गोठमन मय तुमचो ले बल्ले से हुन आत्मा आय, आउर जीव बले आय। 64मान्तर तुमनमन ले आदो असन आत जोन बिश्वास नी करोत।” कसनबल्लोने ईशु पयले ची ले जानते रये कि जोन बिश्वास नी करोत, हुनमन कोन आत; आउर कोन मोके धराये दे। 65आउर हुन बल्लो, “ऐईकाजे मय तुमचो ले बोलुन रले कि जिदलदाय ले काकीई बुआ चो बाटले ये बर नी दिया जाए तेबे तक हुन मोचो लगे नी ऐऊक सके।”
पतरस चो बिश्वास
66ऐथा हुनचो चेलामन थानले खुबे असन उलटा फिरून गेला आउर हुनचो पाचे हुनचो संगे नी गेला। 67तेबे ईशु हुन बारा झान ले बल्लो, “काय तुमी बले जाऊक चाहायेसास?” 68शिमोन पतरस हुनके जबाप दिला, “हे परबु, आमी काचो लगे जाऊँ दे? अमर जीवना चो गोठमन तो तुचीई लगे आसे; 69आउर आमी बिश्वास करलु आउर जानुन गेलु से कि माहापुरू चो पवितर जन तुय ची आस।” 70ईशु हुनमन के जबाप दिलो, “काय मय तुमी बारा झन के नी चुनले? तेबले बले तुमनमन ले गोटक माने शयतान आय।” 71ऐ हुन शिमोन इस्करियोती चो बेटा यहूदा चो बारे ने बोलुन रये, कसनबल्लोने हुनी जोन बारा झान थानले गोटक रये, हुनके धरातो ने रये।
Currently Selected:
यूहन्ना 6: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
