लूका 18
18
रान्डी आउर अधरमी नियाय करू
1फेर हुन ऐचो बारे ने कि सदा पारथना करतोर आउर हिम्मत नी छांडतोर आसे, हुनमन ले ऐ कहनी बल्लो: 2“कोनी नंगर ने गोटक नियाय करू रते रलो, जोन ना माहापुरू ले डरते रलो आउर ना कोनी माने चो फिकर करते रलो। 3हुनी नंगर ने गोटक रान्डी बले रते रली, जोन हुनचो लगे ऐऊन-ऐऊन भाती बोलते रली, ‘मोचो नियाय चुकाऊन भाती मोके करजदार ले बचाव।’ 4खिन्डिक समया ले तो हुन नी मानलो मान्तर आखरी ने मन ने बिचार करून बल्लो, ‘अगर मय ना माहापुरू ले डरते, आउर ना मानेमन चो काई फिकर करू आंय; 5तेबले बले ऐ रान्डी मोके कन्दराते रऊ आय, ऐईकाजे मय हुनचो नियाय चुकायें दें, काहांय असन नी होओ कि घड़ी-घड़ी ऐऊन भाती आखरी ने मोके असकट करो’।”
6परबु बल्लो, “सुना, ऐ अधरमी नियाय करू काय बलेंसें? 7ऐईकाजे काय माहापुरू आपलो चुनलो बितामन चो नियाय नी चुकायें दें, जोन रात दिन हुनचो दुहाई देते रऊ आत? काय हुन हुनमन चो बारे ने बेर करे दे? 8मय तुमचो ले बलेंसें, हुन तुरते हुनमन चो नियाय चुकाय दे। तेबले बले माने चो बेटा जिदलदाय ऐये दे, तेबे काय हुन धरतनी थाने बिश्वास पाये दे?”
कोन धरमी ठेबाया जाये दे?
9हुन हुनमन ले जोन आपलो उपरे भरसा संगाते रवत, कि आमी धरमी आंव, आउर दुसरमन के नीच जानते रवत, ऐ कहनी बल्लो: 10“दुय झान माने मंदिर ने पारथना करतो काजे गेला; गोटक फरीसी रलो आउर दुसर कर धरू बिता। 11फरीसी उबा होऊन भाती आपलो मन ने असन पारथना करूक मुरयालो, ‘हे माहापुरू, मय तुचो धन्यबाद करें से कि मय दुसर माने चो असन गलत करतो बिता, ओनियायी आउर बेबीचारी नुआय, आउर ना ऐ कर धरू बितामन चो असन आय। 12मय सपता ने दुयहार उपास संगाऊ आय; मय आपलो सपाय कमानी चो दसमांस बले देऊ आय।’
13“मान्तर कर धरू बिता लापी उबा होऊन भाती, सरग चो बाटे आँईक उठाऊक बले नी चाह लो, मान्तर आपलो छाती पेटुन-पेटुन भाती बल्लो, ‘हे माहापुरू, मय पापी उपरे दया कर!’ 14मय तुमचो ले बलेंसें कि हुन दुसर नुआय, मान्तर ऐई माने धरमी ठेबाया जाऊन भाती आपलो घरे गेलो; कसनबल्लोने जोन कोनी खुद के बड़े बनाये दे, हुन नानी करा जाये दे; आउर जोन खुद के नानी बनाये दे, हुन बड़े करा जाये दे।”
माहापुरू चो राज पिलामन चो असन
15फेर लोग आपलो पिलामन के बले हुनचो लगे आनुक मुरयाला कि हुन हुनमन उपरे हाथ संगा ओ; मान्तर चेलामन दकुन भाती हुनमन के खिजला। 16ईशु पिलामन के लगे हाग देउन भाती बल्लो, “लेकामन के मोचो लगे ऐऊक दिआस, आउर हुनमन के माना नी करा: कसनबल्लोने माहापुरू चो राज असने ही मन चो आय। 17मय तुमचो ले सते बलेंसें कि जोन कोनी माहापुरू चो राज के लेका चो असन गरहन नी करे हुन-हुन थाने केबीई ओलुक नी सके।”
गोटक सवकार चो ईशु ले सवाल
18कोनी सरदार हुनचो ले पचारलो, “हे बड़ीया गुरू, अमर जीवना चो हकदार होतो काजे मय काय करें दें?” 19ईशु हुनचो ले बल्लो, “तुय मोके बड़ीया केंव बोल सीस? कोनी उत्तम नुआत, मात्र गोटक बल्लोने माहापुरू। 20तुय हुकुममन के तो जानीस: ‘बेबीचार नी कर, हत्या नी कर, आउर चोरी नी कर, झूठा गोहई नी देस, आपलो बुआ आउर आपलो आया चो ईजीत कर’।” 21हुन बल्लो, “मय तो ऐ सपाय के पिला बेरा ले मानते ऐयें से।” 22ऐ सुनुन भाती ईशु हुनचो ले बल्लो, “तुचो थाने ऐबे बले गोटक गोठ चो कमी आसे, आपलो सपाय काई बिकुन भाती कंगालमन के बाटुन देस; आउर तुके सरग ने धन मिरे दे, आउर ऐऊन भारी मोचो पाट-पाट हो।” 23हुन ऐ सुनुन भाती खुबे मुरमुरा होलो, कसनबल्लोने हुन बड़े सवकार रये।
24ईशु हुनके दकुन भाती बल्लो, “सवकारमन चो माहापुरू चो राज ने ओलतोर कितलो मशकिल आय। 25माहापुरू चो राज ने सवकार ओलतोर ले, ऊंट चो सूई चो नाका थानले निकरून जातोर सरल आय।” 26ऐ थाने सुनतो बितामन बल्ला, “तो फेर काचो मुक्ति होऊक सके?” 27हुन बल्लो, “जोन माने ले नी होऊक सके, हुन माहापुरू ले होऊक सके।” 28पतरस बल्लो, “दक, आमी तो घरबार के छांडुन भाती तुचो पाट-पाट होलु से।” 29हुन हुनमन ले बल्लो, “मय तुमचो ले सते बलेंसें कि असन कोनी निआत जोन माहापुरू चो राज चो काजे घर, नाहले बायले, नाहले भाईमन, नाहले आया बुआ, नाहले पिला-झिलामन के छांडुन दिलो से; 30आउर ऐ समया कईं गुना आगर नी पाओ आउर ऐतो बिती जुग ने अमर जीवना।”
मरून जीव उठतोर चो अगम गोठ
31फेर हुन बारहों के संगे नेऊन भाती हुनमन ले बल्लो, “दका, आमी यरूशलेम ने जाऊ से, आउर जितरो गोठमन माने चो बेटा काजे अगम गिआनीमन चो बाटले लिका गेली से, हुनमन सपाय पुरा होये दे। 32कसनबल्लोने हुन दुसर जातिमन चो हाथ ने सोपा जाये दे, आउर हुनमन हुनके मजाकमन ने उड़ा दे; आउर हुनचो बेईजित कर दे; आउर हुनचो उपरे थुक दे, 33आउर हुनके कोड़ा मार दे, आउर घात कर दे; आउर हुन तीसर दिने जीव उठेदे।” 34मान्तर हुनमन ऐ गोठमन थानले कोनी गोठ नी समजला; आउर ऐ गोठ हुनमन ले लुकु रली, आउर जोन बोला जाऊ रये हुन हुनमन चो समज ने नी ईली।
काना भिकारी के दकातोर
35जिदलदाय हुन यरीहो चो लगे अमरलो, तेबे गोटक काना सड़क चो रेटे बसुन भाती भीक मांगते रलो। 36हुन भीड़ चो हिन्ड़तोर कोलार के सुनुन भाती पचारूक मुरयालो, “ऐ काय होये से?” 37हुनमन हुनके सांगला, “ईशु नासरी जाये से।” 38तेबे हुन चिचयाऊन भाती बल्लो, “हे ईशु, दाऊद चो पिला, मोचो उपरे दया कर!” 39जोन पुरे-पुरे जाते रवत, हुनमन हुनके खिजुक मुरयाला कि ओगाय रा; मान्तर हुन आउर बले चिचयाऊक मुरयालो, “हे दाऊद चो पिला, मोचो उपरे दया कर!” 40तेबे ईशु उबा होऊन भाती हुकुम दिलो कि हुनके मोचो लगे आना, आउर जिदलदाय हुन लगे ईलो तेबे हुन हुनचो ले पचारलो, 41“तुय काय मन कर सीस कि मय तुचो काजे करें दें?” हुन बल्लो, “हे परबु, ये कि मय दकुक मुरयायें।” 42ईशु हुनचो ले बल्लो, “दकुक मुरयाव; तुचो बिश्वास तुके चेंगा करलो से।” 43तेबे हुन तुरते दकुक मुरयालो आउर माहापुरू चो बड़ाई करते-करते हुनचो पाट-पाट गेलो; आउर सपाय लोगमन दकुन भाती माहापुरू चो स्तुति करला।
Currently Selected:
लूका 18: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
