लूका 20
20
यहूदीमन बाटले ईशु ले सवाल
1गोटक दिन असन होली कि जिदलदाय हुन मंदिर ने लोगमन के उपदेश देते रये आउर नगतखबर सुनाते रलो, तेबे परधान याजक आउर शास्तरी, सियानमन चो संगे लगे ऐऊन भाती उबा होलो; 2आउर बोलुक मुरयाला, “आमके सांग, तुय ऐ काममन के कोन अधिकार ले कर सीस, आउर हुन कोन आय जोन तुके ऐ अधिकार दिलो से?” 3हुन हुनमन के जबाप दिलो, “मय बले तुमचो ले गोटक गोठ पचारें सें; मोके सांगा 4यूहन्ना चो डूबन सरग बाटले रली नाहले मानेमन चो बाटले रली?” 5तेबे हुनमन आपस ने बोलुक मुरयाला, “अगर आमी बलवां, ‘सरग चो बाट ले,’ तेबे हुन बले दे, ‘फेर तुमी हुनचो बिश्वास केंव नी करलास?’ 6आउर अगर आमी बलवां, ‘मानेमन चो बाटले,’ तो सपाय लोग आमचो उपरे पकना मार दे, कसनबल्लोने हुनमन सत-सत जानोत कि यूहन्ना अगम गिआनी रलो।” 7आउर हुनमन जबाप दिला, “आमी नी जानु कि हुन काचो बाटले रलो।” 8ईशु हुनमन ले बल्लो, “तो मय बले तुमके नी सांगे कि मय ऐ काम काय अधिकार ले करे से।”
दुष्ट किसानमन चो कहनी
9तेबे हुन लोगमन ले ऐ कहनी बोलुक मुरयालो, “कोनी माने अंगुर चो बनवाड़ी लागलो, आउर किसानमन के हुनचो ठेका देऊन दिलो आउर खुबे दिनमन काजे परदेश गेलो। 10जिदलदाय समया ईली तेबे हुन किसानमन चो लगे गोटक कमया के पठालो कि हुनमन अंगुर चो बनवाड़ी चो खिन्डिक फरमन चो भाग हुनके दे ओत, मान्तर किसानमन हुनके पेटुन भाती छुछाय हाथे फिराऊन दिला। 11फेर हुन गोटक आउर कमया के पठालो, आउर हुनमन हुनके बले पेटुन भाती आउर हुनचो बेईजित करून छुछाय हाथे फिराऊन दिला। 12फेर हुन तीसर के पठालो, आउर हुनमन हुनके बले घायल करून निकराऊन दिला। 13तेबे अंगुर चो बनवाड़ी चो मालिक बल्लो, ‘मय काय करें दें? मय आपलो लाड़रा बेटा के पटायें दें, होऊक सके हुनमन हुनचो ईजीत कर दे।’ 14जिदलदाय किसानमन हुनके दकला तो आपस ने बिचार करूक मुरयाला, ‘ऐ तो हकदार आय; ईआ आमी ऐके मारून देऊ कि सम्पत्ति आमचो होऊन जाओ।’ 15आउर हुनमन हुनके अंगुर चो बनबाड़ी ले बाहरे निकराऊन भाती मारला। ऐईकाजे अंगुर चो बनवाड़ी चो मालिक हुनमन चो संगे काय करे दे? 16हुन ऐऊन भाती हुन किसानमन के नाश करे दे, आउर अंगुर चो बनवाड़ी दुसर के सोपे दे।” ऐ सुनुन भाती हुनमन बल्ला “माहापुरू करो असन नी होओ।” 17हुन हुनमन चो बाटे दकुन भाती बल्लो, “फेर ऐ काय लिकलोर आसे:
जोन पकना के राजमिस्त्रीमन बेकार समजु रवत
हुनी कोनया चो मुंडी होली। 18जोन कोनी हुन पकना थाने घसरे दे हुन रनबन होऊन जाये दे, आउर जेचो उपरे हुन घसरे दे हुनके पिसुन देये दे।”
शास्तरीमन आउर प्रधानयाजकमन चो चाल
19हुनी घड़ी शास्तरीमन आउर परधान याजकमन हुनके धरूक चाहला, कसनबल्लोने हुनमन समजुन रवत कि हुन आमचो उपरे ऐ कहनी बल्लो, मान्तर हुनमन लोगमन ले डरला। 20आउर हुनमन हुनचो दाँव टाकला आउर खुदेयार पठाला कि धरम चो भेष धरून भाती हुनचो कोनी ना कोनी गोठ धरो, बल्ले हुनके मुखिया चो हाथे आउर अधिकार ने सोपुन देओ। 21हुनमन हुनचो ले ऐ पचारला, “हे गुरू, आमी जानु कि तुय ठीक बोल सीस आउर सिकाऊ बले आस, आउर काचीई भेदभाव नी करीस, मान्तर माहापुरू चो बाट सत धरम ले सांगु आस। 22काय आमके राजा के कर देतोर नगत आय कि नुआय?” 23हुन हुनमन चो चलाकी के परकुन भाती हुनमन ले बल्लो, 24“गोटक दीनार मोके दकाहा। ऐ थाने काचो छाप आउर नाव आसे?” हुनमन बल्ला, “राजा चो।” 25हुन हुनमन ले बल्लो, “तेबे जोन राजा चो आय, हुन राजा के दिआस; आउर जोन माहापुरू चो आय, हुन माहापुरू के दिआस।” 26हुनमन लोगमन चो पुरे ऐ गोठ ने हुनके धरूक नी सकला, मान्तर हुनचो जबाप ले भक्याऊन भाती ओगाय रला।
मरलो थानले जीव उठतोर आउर बिहा
27फेर सदूकी जोन बोलु आत कि मरलो बितामन चो जीव उठतोर आसे ची नाई, हुनमन थानले कितलो हुनचो लगे ऐऊन भाती पचारला, 28“हे गुरू, मूसा आमचो काजे ऐ लिकलो से, ‘अगर काचीई भाई आपलो बायले चो रते-रते बिना बेटा चो मरो, तेबे हुनचो भाई हुनचो बायले ले बिहा करो, आउर आपलो भाई चो काजे बंश जनमा ओ।’ 29सात भाई रला, पयला भाई बिहा करून बिना बेटा चो मरलो। 30फेर दुसर, 31आउर तीसर बले हुन बायले लेकी ले बिहा होला। ऐई रीति ले सातो बिना बेटा चो मरला। 32आखरी ने हुन बायले लेकी बले मरली। 33ऐईकाजे जीव उठलो ने हुन हुनमन थानले काचो बायले होये दे, कसनबल्लोने हुन सातो चो बायले होऊ रली।” 34ईशु हुनमन ले बल्लो, “ऐई जुग चो पिलाझीलामन ने तो बिहा होऊ आय, 35मान्तर जोन लोग ऐ लायक ठेबदे कि हुन जुग के आउर मरलो बितामन थानले जीव उठतोर के पाओत, हुनमन ना बिहा कर दे आउर ना बिहा ने दिया जादे। 36हुनमन फेर मरू बले नुआत; कसनबल्लोने हुनमन सरग दूतमन चो असन हो दे, आउर नवा जनम चो बेटा होलो ले माहापुरू चो बले बेटा हो दे। 37मान्तर ऐ गोठ के कि मरलो बितामन जीव उठु आत, मूसा बले बुटा चो कहनी ने उजागर करलो से कि हुन परबु के ‘अब्राहाम चो माहापुरू, आउर इसाक चो माहापुरू आउर याकूब चो माहापुरू’ बले से। 38माहापुरू तो मरलोमन चो नुआय मान्तर जीवतामन चो माहापुरू आय: कसनबल्लोने हुनचो लगे सपाय जीव आसोत।” 39तेबे ऐ सुनुन भाती शास्तरीमन थानले कितलो ऐ बल्ला, “हे गुरू, तुय अच्छा बल्लीस।” 40आउर हुनमन के फेर हुनचो ले काई आउर पचारतोर हिम्मत नी होली।
मसीह दाऊद चो बेटा नाहले दाऊद चो परबु आय
41फेर हुन हुनमन ले पूछलो, “मसीह के दाऊद चो पिला कसन बोलु आत? 42दाऊद खुद भजन चो किताब ने बले से:
‘परबु मोचो परबु ले बल्लो,
43मोचो उजा बाटे बस,
जिदलदाय ले कि मय तुचो बयरीमन के तुचो पाँयमन चो खाले नी करून देंयें।’ 44दाऊद तो हुनके परबु बोलु आय; तेबे फेर हुन हुनचो बेटा कसन ठेबलो?”
शास्तरीमन चो बिरूद ईशु चो जनातोर
45जिदलदाय सपाय लोग सुनते रवत, तेबे हुन आपलो चेलामन ले बल्लो, 46“शास्तरीमन ले खबड़दार राहा, जोनमन के लाम-लाम फटीई पिन्दुन भाती बुलतोर अच्छा लागु आय, आउर जोनमन के हाटमन ने जुहार, आउर आराधना घरमन ने मुख्य आसन आउर भोज ने मुख्य जगा अच्छा लागु आय। 47हुनमन रान्डीमन चो घर खाऊ आत, आउर दकातो काजे बड़ दाय ले पारथना करते रऊ आत, ऐमन खुबे डण्ड पावदे।”
Currently Selected:
लूका 20: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
