लूका 22
22
ईशु चो हत्या चो खराप उआट
1अखमीरी रोटी चो परब जोन फसह बलाया जाऊ आय, लगे रये; 2आउर परधान याजक आउर शास्तरी ऐ गोठ चो डगर ने रवत कि हुनके कसन ने मारूदें, मान्तर हुनमन लोगमन ले डरते रवत।
यहूदा इस्करियोती चो बिश्वासघात
3तेबे शयतान यहूदा थाने भिड़ली, जोन इस्करियोती बलाया आउर बारा चेलामन थाने गेना जाते रलो। 4हुन जाऊन भाती परधान याजकमन आउर पाहारा करूमन चो सरदारमन संगे गोठ बात करलो कि हुनके कसन परकार हुनमन चो हाथे धरावां। 5हुनमन हरिक होला, आउर हुनके रूपया देतोर बचन दिला। 6हुन मानलो, आउर मवका डगराऊक मुरयालो कि जिदलदाय भीड़ नी रओ तेबे हुनके हुनमन चो हाथे धराये दे।
फसह चो तिआर
7तेबे अखमीरी रोटी चो परब चो दिन ईली, जोन थाने फसह चो मेमना पुजतोर जरूरी रये। 8ईशु पतरस आउर यूहन्ना के ऐ बोलुन भाती पठालो, “जाऊन भाती आमचो खातो काजे फसह तिआर करा।” 9हुनमन हुनचो ले पचारला, “तुय काहां मन कर सीस, कि आमी ऐके तिआर करूं दे?” 10हुन हुनमन ले बल्लो, “दका, नंगर ने ओलते ची गोटक माने पानी चो हांडी उठालोर तुमके मिरे दे; जोन घर ने हुन जाये दे तुमी हुनचो पाट-पाट जाहा, 11आउर हुन घर चो मालिक ले बोला, ‘गुरू तुचो ले बले से कि हुन धरमशाला काहां आसे जोन थाने मय आपलो चेलामन चो संगे फसह खायें दें?’ 12हुन तुमके गोटक सजालोर बड़े बाकरा दकाऊन देये दे; हुनी थाने तिआर करा। 13हुनमन जाऊन भाती, जसन हुन हुनमन ले बोलु रलो, असने ची पावला, आउर फसह तिआर करला।”
परबु चो आखरी भोज
14जिदलदाय समया ऐऊन अमरली, तेबे हुन पठालोबितामन चो संगे खाऊक लाय बोसलो। 15आउर हुन हुनमन ले बल्लो, “मोके बड़े लालच रली कि दुख उठातोर ले पयले ऐ फसह तुमचो संगे खायें दें। 16कसनबल्लोने मय तुमचो ले बलें सें कि जिदलदाय ले हुन माहापुरू चो राज ने पुरा नी होये हुदलदाय ले मय हुनके केबीई नी खायें दें।” 17तेबे हुन बटका धरून भाती धन्यबाद करलो आउर बल्लो, “ऐके धरा आउर आपस ने बाटा करा। 18कसनबल्लोने मय तुमचो ले बलें सें कि जिदलदाय ले माहापुरू चो राज नी ऐये हुदलदाय ले मय अंगुर रस अदायं ले केबीई नी पियें।” 19फेर हुन रोटी धरलो, आउर धन्यबाद करून टुटालो, आउर हुनमन के ऐ बोलते-बोलते दिलो, “ऐ मोचो देंह आय जोन तुमचो काजे दिआ जाये से: मोचो सुरता काजे असने ची करते राहा।” 20ऐई रीति ले हुन भात चो पाचे बटका बले ऐ बोलते-बोलते दिलो, “ऐ बटका मोचो हुन लऊ ने जोन तुमचो काजे बहाया जाये से, नवा बायदा आय। 21मान्तर दका, मोचो धरातो बितामन चो हाथ मोचो संगे टेबुल थाने आसे। 22कसनबल्लोने माने चो बेटा तो जसन हुनचो काजे ठेबाया गेली जाऊ ची आय, मान्तर हाय हुन माने उपरे जेचो दुवारा हुन धराया जाये से!” 23तेबे हुनमन आपस ने पुच-पचार करूक मुरयाला कि आमचो थानले कोन आय, जोन ऐ काम करे दे।
कोन बड़े समजा जाय दे?
24हुनमन ने ऐ बहस बले होली कि हुनमन थानले कोन बड़े समजा जाये से। 25हुन हुनमन ले बल्लो, “दुसर जातिमन चो राजा हुनमन उपरे हुकुम चलाऊ आत; आउर जोन हुनमन उपरे अधिकार संगाऊ आत, हुनमन उपकार करू बलाया जाऊ आत। 26मान्तर तुमी असन नी हुआ; मान्तर जोन तुमनमन ने बड़े आय, हुन नानी चो असन आउर जोन परधान आय, हुन सेवक चो असन बनो। 27कसनबल्लोने बड़े कोन आय, हुन जोन भोज थाने बसलो से, नाहले हुन जोन सेवा करू आय? काय हुन नुआय जोन भोज थाने बसलो से? मान्तर मय तुमचो मंजी ने कमया चो असन आंय।
28“तुमी हुन आस, जोन मोचो परीक्षामन ने सरलगा मोचो संगे राआस; 29आउर जसन मोचो बुआ मोचो काजे गोटक राज ठेबालो से, असने ची मय बले तुमचो काजे ठेबायें से, 30बल्ले तुमी मोचो राज ने मोचो टेबुल थाने खाआ-पिआ, मान्तर सिंघासनमन थाने बसुन भाती इस्राएल चो बारा गोत्रमन चो नियाय करा।
पतरस चो इन्कार चो अगम गोठ
31“शिमोन, हे शिमोन! दक, शयतान तुमनमन के मांगलो से कि गऊँ चो असन आपटो, 32मान्तर मय तुचो काजे गुहार करले कि तुचो बिश्वास जाते नी रओ; आउर जिदलदाय तुय फिर से, तेबे आपलो भाईमन के थीर कर।” 33हुन हुनचो ले बल्लो, “हे परबु, मय तुचो संगे जयल घरे जातो काजे, मान्तर मरतो काजे बले तिआर आंसे।” 34हुन बल्लो, “हे पतरस, मय तुचो ले बलें सें कि आजी कुकड़ा नी बासे जिदलदाय ले तुय तीन हार मोचो इन्कार नी कर से कि तुय मोके नी जानीस।”
यातना सहतो काजे तिआर राहा
35फेर हुन हुनमन ले बल्लो, “जिदलदाय मय तुमके बटवा, आउर झोरा, आउर पनही नाहलोर पटाऊन रले, तेबे काय तुमके कोनी तीज चो घाटा होऊ रली?” हुनमन बल्ला, “कोनी तीज चो नाई।” 36हुन हुनमन ले बल्लो, “मान्तर अदायं जेचो लगे बटवा आसे हुन हुनके धरो आउर असने ची झोरा बले, आउर जेचो लगे तलवार नी रओ हुन आपलो फटीई बिकुन भाती गोटक घेनो। 37कसनबल्लोने मय तुमचो ले बलें सें, कि ऐ जोन लिकलोर आसे, ‘हुन गुनेगार चो संगे गेना गेलो,’ हुनचो मोचो थाने पुरा होतोर जरूरी आय; कसनबल्लोने मोचो बारे ने लिकलोर गोठमन पुरा होतो थाने आसे।”
38हुनमन बल्ला, “हे परबु, दक, ऐथा दुय ठान तलवारमन आसे।” हुन हुनमन ले बल्लो, “खुबे आय।”
जैतून चो डोंगरी उपरे ईशु चो पारथना
39तेबे हुन बाहरे निकरून भाती आपलो रीति चो अनुसार जैतून चो डोंगरी उपरे गेलो, आउर चेलामन हुनचो पाट-पाट गेला। 40हुन जगा ने अमरून भाती हुन हुनमन ले बल्लो, “पारथना करा कि तुमी परीक्षा ने नी पड़ा।” 41आउर हुन खुद हुनमन ले अलगे गोटक ढ़ेला पकातोर लापी ने गेलो, आउर मांडी पाडून भाती पारथना करूक मुरयालो, 42“हे बुआ, अगर तुय मन कर सीस जाले ऐ बटका के मोचो लगले गुचाऊन देस, तेबले बले मोचो नाई मान्तर तुचीई इच्छा पुरा होओ।” 43तेबे सरग ले गोटक दूत हुनके दका दिलो जोन हुनके सामरत देते रलो। 44हुन घोर संकट ने बाय बिकाल होऊन भाती आउर बले मन दुख ले पारथना करूक मुरयालो, आउर हुनचो पसना माना लऊ चो बड़े-बड़े थिपामन चो असन भूईं थाने घसरते रये। 45तेबे हुन पारथना ले उठलो आउर आपलो चेलामन चो लगे ऐऊन भाती हुनमन के मुरमुरा होऊन भाती सोहतोर दकलो 46आउर हुनमन ले बल्लो, “काय काजे सोयसास? उठा, पारथना करा कि परीक्षा ने नी पड़ा।”
ईशु के बन्दी बनातोर
47हुन ऐ बोलते ची रलो कि गोटक भीड़ ईली, आउर हुन बारा झान ले गोटक जेचो नाव यहूदा रये हुनमन चो पुरे-पुरे ऐते रये। हुन ईशु चो लगे ईलो कि हुनचो चुमा धरो। 48ईशु हुनचो ले बल्लो, “हे यहूदा, काय तुय चुमा धरून भाती माने चो बेटा के धराय सीस?” 49हुनचो संगवारीमन जिदलदाय दकला कि काय होतो बिती आय, तेबे बल्ला, “हे परबु, काय आमी तलवार चलाऊ आंव?” 50आउर हुनमन थानले गोटक माहायाजक चो दास उपरे खंडा चलाऊन भाती हुनचो उजा कान काट लो। 51ऐ थाने ईशु बल्लो, “ऐबे रऊक दिआस।” आउर हुनचो कान छिंऊन भाती हुनके अच्छा करलो। 52तेबे ईशु परधान याजकमन आउर मंदिर चो पाहारा रऊमन चो सरदारमन आउर पुरनिमन ले, जोन हुनचो उपरे ऐते रवत, बल्लो, “काय तुमी मोके डाकु जानुन भाती खंडामन आउर ठेंगामन धरून भाती निकरलासास? 53जिदलदाय मय मंदिर ने रोजे दिना तुमचो संगे रले, तेबे तुमी मोचो उपरे हाथ नी लगालास; मान्तर ऐ तुमचो समया आय, आउर अंधार चो अधिकार आसे।”
पतरस चो इन्कार
54फेर हुनमन हुनके धरून भाती गेला, आउर माहायाजक चो घर ने आनला। पतरस लापी ची लापी हुनचो पाट-पाट हिन्ड़ते रलो; 55आउर जिदलदाय हुनमन दुआर ने आईग जराऊन भाती रूंड़ा बसला, तेबे पतरस बले हुनमन चो मंजी ने बसलो। 56तेबे गोटक दासी हुनके आईग चो उजर ने बसलोर दकुन भाती आउर हुनचो बाटे दकुन भाती बोलुक मुरयाली, “ऐ बले तो हुनचो संगे रये।” 57मान्तर हुन ऐ बोलुन भाती इन्कार करलो, “हे बायले लेकी, मय हुनके नी जाने।” 58डण्डिक रऊन भाती पाचे कोनी दुसर हुनके दकुन भाती बल्लो, “तुय बले तो हुनीमन थानले आस।” पतरस बल्लो, “हे माने, मय नुआय।” 59कोनी घंटा भर चो पाचे गोटक आउर माने दावा ले बोलुक मुरयालो, “बिलकुल ऐ बले तो हुनचो संगे रये, कसनबल्लोने ऐ गलीली आय।” 60पतरस बल्लो, “हे माने, मय नी जाने कि तुय काय बोल सीस!” हुन बोलते ची रलो कि तुरते कुकड़ा बासली। 61तेबे परबु किन्दरून भाती पतरस चो बाटे दकलो, आउर पतरस के परबु चो हुन गोठ सुरता ईली जोन हुन बोलुन रये, “आजी कुकड़ा चो बासतोर पयले, तुय तीन हार मोचो इन्कार कर से।” 62आउर हुन बाहरे निकरून भाती हुमारून-हुमारून गागलो।
ईशु चो अपमान
63जोन माने ईशु के धरून रवत, हुनमन हुनके मजाक उड़ाऊन भाती मारूक मुरयाला; 64आउर हुनचो आँईक के ढ़ाकुन भाती हुनचो ले पचारला, “अगम गोठ करून सांग कि तुके कोन मारला!” 65आउर हुनमन खुबे असन आउर बले निन्दा चो गोठमन हुनचो बिरूद ने बल्ला।
पुरनिमन आउर माहासभा चो पुरे ईशु
66जिदलदाय दिन होली तेबे लोगमन चो पुरनिमन आउर परधान याजक आउर शास्तरी रूंड़ा होला, आउर हुनके आपलो माहासभा ने आनुन भाती पचारला, 67“अगर तुय मसीह आस, तो आमचो ले बोलुन देस!” हुन हुनमन ले बल्लो, “अगर मय तुमचो ले बलें दें, तो बिश्वास नी करा से; 68आउर अगर पचारें दें, तो जबाप नी दिआ से। 69मान्तर अदायं ले माने चो बेटा सर्वशक्तिमान माहापुरू चो उजा बाटे बसुन रये दे।” 70ऐ थाने सपाय बल्ला, “तेबे काय तुय माहापुरू चो बेटा आस?” हुन हुनमन ले बल्लो, “तुमी खुद ची बलेसास, कसनबल्लोने मय आय।” 71तेबे हुनमन बल्ला, “अदायं आमके गोहई चो काय जरूरत आसे; कसनबल्लोने आमीमन खुद हुनचो मुंह ले सुनलु से।”
Currently Selected:
लूका 22: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
