लूका 23

पिलातुस बाटले ईशु ले सवाल

1तेबे पुईतराय सभा उठून भाती हुनके पिलातुस चो लगे धरून गेला। 2हुनमन ऐ बोलुन भाती हुनचो उपरे दोष लगाऊक मुरयाला, “आमीमन ऐके लोगमन के हुच-हुचाते, आउर राजा के कर देतोर ले मना करते, आउर आपन खुद के मसीह, राजा बोलतोर सुनलु से।” 3पिलातुस हुनचो ले पचारलो, “काय तुय यहूदीमन चो राजा आस?” हुन हुनके जबाप दिलो, “तुय खुद बोल सीस।” 4तेबे पिलातुस परधान याजकमन आउर लोगमन ले बल्लो, “मय ऐ माने ने काई दोष नी पाये।” 5मान्तर हुनमन आउर बले जमखम ले बोलुक मुरयाला, “ऐ गलील ले धरून भाती ऐथा ले पुईतराय यहूदिया ने उपदेश देऊन-देऊन भाती लोगमन के भड़काऊ आय।” 6ऐ सुनुन भाती पिलातुस पचारलो, “काय ऐ माने गलीली आय?” 7आउर ऐ जानुन भाती कि हुन हेरोदेस चो अधिकार चो आय, हुनके हेरोदेस चो लगे पठाऊन दिलो, कसनबल्लोने हुन दिनमन ने हुन बले यरूशलेम ने रये।

ईशु चो हेरोदेस लगे पटाय जातोर

8राजा हेरोदेस ईशु के दकुन भाती खुबे ची हरिक होलो, कसनबल्लोने हुन खुबे दिनमन ले हुनके दकुक चाहते रलो; ऐईकाजे कि हुनचो बारे ने सुनु रलो, आउर हुनचो ले काई चिना दकतोर आशा संगाते रलो। 9हुन हुनचो ले खुबे असन गोठमन पचारते रये, मान्तर हुन हुनके काई बले जबाप नी दिलो। 10परधान याजक आउर शास्तरी उबा होला जीव जान ले हुनचो उपरे दोष लगाते रला। 11तेबे हेरोदेस आपलो पलटनमन चो संगे हुनचो बेईजित करून मजाकमन ने उड़ालो, आउर भड़कीला फटीई पिंदाऊन भाती हुनके पिलातुस चो लगे बाहड़ाऊन दिला। 12हुनी दिने पिलातुस आउर हेरोदेस मीत होऊन गेला; ऐचो पयले हुनमन गोटक दुसर चो बयरी रवत।

पिलातुस बाटले ईशु के मरना डण्ड

13पिलातुस परधान याजकमन आउर सरदारमन आउर लोगमन के हाग देऊन भाती हुनमन ले बल्लो, 14“तुमी ऐ माने के लोगमन चो हुच-हुचातो बिता ठेबाऊन भाती मोचो लगे आनलासास, आउर दका, मय तुमचो पुरे हुनचो जाच करले, मान्तर जोन गोठमन चो तुमी हुनचो उपरे दोष लगायसास हुन गोठमन चो बारे ने मय हुन थाने काई बले दोष नी पावले; 15ना हेरोदेस, कसनबल्लोने हुन हुनके आमचो लगे फिरान दिलो से: आउर दका, हुनचो ले असन काई नी होली कि हुन मरना चो डण्ड चो लायक ठेबाया जाओ। 16ऐईकाजे मय हुनके पेटाऊन भाती छांडुन देये से।” 17पिलातुस परब चो समया हुनमन चो काजे गोटक बंदी के छांड़ तो थाने विवश रये। 18तेबे सपाय मिसुन भाती चिचयाऊन उठला, “ऐचो काम निपटाव, आउर आमचो काजे बरअब्बा के छांडुन देस!” 19हुन कोनी बवाल चो कारन जोन नंगर ने होऊ रली, आउर हत्या चो कारन जयलघर ने डाला जाऊ रये, 20मान्तर पिलातुस ईशु के छांड़तोर इच्छा ले लोगमन के फेर समजालो, 21मान्तर हुनमन चिचयाऊन भाती बल्ला, “हुनके कुरूस थाने चेगाव, कुरूस थाने!” 22हुन तीसर हार हुनमन ले बल्लो, “केंव, हुन असन काय गलती करलो से? मय हुनचो थाने मरना चो डण्ड लायक कोनी गोठ नी पावले। ऐईकाजे मय हुनके पेटाऊन भाती छांडुन देयें सें।” 23मान्तर हुनमन चिचयाऊन-चिचयाऊन भाती पाटे पड़ला गेला कि हुन कुरूस थाने चेगाया जाओ, आउर हुनमन चो चिचयातोर असर होली। 24आउर पिलातुस हुकुम दिलो कि हुनमन चो गुहार चो अनुसार करा जाओ। 25हुन-हुन माने के जोन बवाल आउर हत्या चो कारन जयलघर ने डाला जाऊ रलो, आउर जेके हुनमन मांगते रवत, छांडुन दिला; आउर ईशु के हुनमन चो इच्छा चो अनुसार सोपलो।

ईशु के कुरूस उपरे चेगाय जातोर

26जिदलदाय हुनमन हुनके धरून जाते रवत, तेबे हुनमन शिमोन नाव चो गोटक कुरेनी के जोन गाँव ले ऐते रये, धरून भाती हुनचो उपरे कुरूस लातुन दिला कि हुनके ईशु चो पाट-पाट धरून जाओ। 27लोगमन चो बड़े भीड़ हुनचो पाटे होली आउर हुन थाने खुबे असन बायले लेकीमन बले रला जोन हुनचो काजे छाती पेटते आउर बिलाप करते रवत। 28ईशु हुनमन चो बाटे उलटुन भाती बल्लो, “हे यरूशलेम चो बेटीमन, मोचो काजे नी गागा; मान्तर आपन आउर आपलो लेकामन चो काजे गागा। 29कसनबल्लोने दका, हुन दिन ऐये से, जोन थाने लोग बोल दे, ‘धन्य आत हुन जोन बांजीन आत आउर हुन गरब जोन नी जनमा ये आउर हुन थन जोनमन गोरस नी पिआला।’

30हुन समया

‘हुनमन डोंगरीमन ले बोलुक मुरयादे कि आमचो उपरे घसरा,

आउर ढिपकामन ले कि आमके ढ़ापुन संगाहा।’

31“कसनबल्लोने जिदलदाय हुनमन काचा रूक चो संगे असन करू आत, तो सुकलो चो संगे काय काई नी करा जाय दे?” 32हुनमन दुसर दुय मानेमन के बल्ले जोन कुकरमी रवत हुनचो संगे घात करतो काजे धरून नीला। 33जिदलदाय हुनमन हुन जगा जेके खोपड़ी बोलु आत अमरला, तेबे हुनमन हुता हुनके आउर हुन कुकरमीमन के बले, गोटक के उजा आउर दुसर के डेबरी बाटे कुरूस उपरे चेगाला। 34तेबे ईशु बल्लो, “हे बुआ, ऐ मन के छमा कर, कसनबल्लोने ऐ नी जानोत कि काय कर सोत।” आउर हुनमन चिठ्ठीमन डालुन भाती हुनचो फटीई बाटला।

35लोग उबा-उबा दकते रवत, आउर सरदार बले मजाक करून-करून बलते रवत, “ऐ दुसरमन के बचालो, अगर ऐ माहापुरू चो मसीह आय, आउर हुनचो चुनलो बिता आय, तो आपन खुद के बचा ओ।” 36पलटन बले लगे ऐऊन भाती आउर बीस देऊन भाती हुनचो मजाक करून बलते रवत, 37“अगर तुय यहूदीमन चो राजा आस, तो आपन खुद के बचाव!” 38आउर हुनचो उपरे गोटक दोष पतर बले लगु रये: “ऐ यहूदीमन चो राजा आय।”

कुरूस उपरे मन फिरातो बिता कुकरमी

39जोन कुकरमी लटकाया जाऊ रवत, हुनमन थाने ले गोटक हुनचो निन्दा करून बल्लो, “काय तुय मसीह नुआस? तो फेर आपन खुद के आउर आमके बचाव!” 40ऐ थाने दुसर हुनके खिजुन भाती बल्लो, “काय तुय माहापुरू ले बले नी डरीस? तुय बले तो हुनी डण्ड पाय सीस, 41आउर आमी तो नियाय अनुसार डण्ड पाऊ से, कसनबल्लोने आमी आपलो काममन चो ठीक फल पाऊ से; मान्तर ऐ कोनी गलत काम नी करलो।” 42तेबे हुन बल्लो, “हे ईशु, जिदलदाय तुय आपलो राज ने ऐ से, तेबे मोचो सुद्धि धर।” 43हुन हुनचो ले बल्लो, “मय तुचो ले सते बलें सें कि आजी ची तुय मोचो संगे सरग लोग ने हो से।”

ईशु चो जीव छांडतोर

44लगभग दुय पाहार ले तीसर पाहार तक सपाय देश ने अंधार छाऊन रये, 45आउर बेर चो उजर जाते रये, आउर मंदिर चो परदा मंजी ले फाटली, 46आउर ईशु बड़े जोर ले चिचयाऊन भाती बल्लो, “हे बुआ, मय आपलो आत्मा तुचो हाथ ने सोपें सें।” आउर ऐ बोलुन भाती जीव छांडलो। 47सुबेदार जोन काई होऊ रये दकुन भाती माहापुरू चो बड़ाई करलो, आउर बल्लो, “बिलकुल ऐ माने धरमी रलो।” 48आउर भीड़ जोन ऐ दकतो काजे रूंड़ा होऊ रली, ऐ घटना के दकुन भाती छाती पेटते-पेटते बाहडून गेली। 49मान्तर हुनचो सपाय जान पयचान, आउर जोन बायले लेकीमन गलील ले हुनचो संगे ऐऊ रवत, लापी उबा होऊन ऐ सपाय दकते रवत।

अरिमतियाह चो यूसुफ बाटले ईशु के माटी देतोर

50हुता यूसुफ नाव चो माहासभा चो गोटक सदस्य रये जोन सियान आउर धरमी माने रये, 51आउर हुनमन चो उआट आउर हुनमन चो ऐ काम ले हरिक नी रये। हुन यहूदीमन चो नंगर अरिमतिया चो रतो बिता आउर माहापुरू चो राज चो बाट दकतो बिता रये। 52हुन पिलातुस चो लगे जाऊन भाती ईशु चो लाश मांगलो; 53आउर हुनके उतराऊन भाती मलमल चो चदर ने गुन्ड़ीयालो, आउर गोटक कबर ने संगालो, जोन पकना ने खोड़लोर रली, आउर हुन थाने कोनी केबीई नी संगालोर रली। 54हुन तिआर चो दिन रये आउर सब्त चो दिन आरम होतो थाने रये। 55हुन बायले लेकीमन जोन हुनचो संगे गलील ले ऐऊ रवत, पाट-पाट जाऊन भाती हुन कबर के दकला, आउर ऐ बले कि हुनचो लाश कसन ढंग ले संगाला से। 56तेबे हुनमन फिरून भाती बास देतो बिती तीजमन आउर इतर तिआर करला; आउर सब्त चो दिने हुनमन हुकुम चो अनुसार आराम करला।

Currently Selected:

लूका 23: HLBNT

Highlight

Copy