यूहन्ना 3

यीशु एने निकुदेमुस

1फरीसीम निकदेमस नावान एक माणुह एतो, तो यहूदीयान सरदार एतो. 2ता तो राती यीशुन आहने आवीन ताह कियील, “हे गुरुजी, आमूह मालूम हि कि बोगवाना फायरीन गुरु एय आवा हि, काहाकाय आवो चिन्हान जे तू देखाड्थू, जर बोगवान तान हेरी नाहं तर नाहं हिकाडू शकत.” 3यीशु ताह उत्तर आपील, “मी तुमूह खेरी खेरीच किथे कि, जर कूण नवालान जेन्मोलेदो नाहं तर बोगवानान राज्य देख नाहं सेकते.” 4निकदेम ताह कियील, “माणुह डावालु एय जाय, तर किहीकाय जेल्मो एहू शकणे? काय तो आपणो आईकने पेटामाय दिहरी वारीन प्रवेश केरीन एहू शकणे?” 5यीशु उत्तर आपील, “मी तुमूह खेरी खेरीच किथे, जेवीवोर कूण माणुह पाण्याकेरिन एने आत्मा फायरीन जन्मल्या वाचीन तर तो बोगवानान राज्यातम प्रवेश नाहं केरूह शकत. 6काहाकाय जो शरीरापासून जेन्मोलियेल हि, तो डील हि; एने जो आत्मा तारीन जेन्मोलियेल हि, तो आत्मा हि.” 7नवल मा केरूह कि ती तुमूह कियील, हि, “तुवाह नवालान जेल्मो लेणे केरता गर्जेन हि.” 8वारा जीन वोयताला तीन वोयताला एने तू तान शब्द होमलने, पुण नाहं होमजाडणे कि ती उगेरीन आवी एने कां जातेह? जो कूण आत्मा फायरीन जेन्मोलेदो हि तो ओहलोच हि. 9निकदेमन ताह उत्तर आपील, “आवो वातू केवी एहू केरसेक्तालू?” 10ज्यो होम्लीन यीशु ताह कियील, “तू इस्राएल ने गुरु एयीन भी ज्यू वातूह नाह होम्जीत?” 11मी तुमूह खेरी खेरीच केथु का आमु जे होमजथी तोज केतेह, एने ज्याह आमु देखील हि तान गवाही आपणु, एने तुमूह आमरी गवाही स्वीकार नाहं केरतीन. 12ताहेरया मी तुमूह पृथ्वीन वातू केदाह एने तुमूह आमरी गवाही स्वीकार नाहं केरतीन, जर मी तुमूह स्वर्गाची वात केहू तर ओवतो कोहलो विश्वास केरुहू? 13कूण स्वर्गापूर नाहं चडणे, फक्त तोच जो स्वर्गामाय रीन उतरना, म्हणजे माणहान सोरो जो स्वर्गाम हि. 14एने ज्या रीतीमाय मुसाहबी जेंगलामाय गेयळेक उचो किरील, तान रीतीमाय माहा हि कि माणहान सोरो पुण उपेर चेढील जाऊ; 15तान केरता कि जो कूण तापोर विश्वास मेलूह ताह अनंत जीवन प्राप्त एने जुवी.

16“काहाकाय बोगवान जगा पोर ओलोक प्रेम किरील कि, तो तान एकूलता एक सोरो आप दियील, ज्यानकेरता का जो कूण तापोर विश्वास मेली तो नाश नाय एय पुण ताह अनंत जीवन जुडी. 17बोगवान आपणा सोराह जगामाय मोकलील का जगान न्यायनिवाडू केरणेन केरता नाहं, पुण तान द्वारे जगान उद्धार एने जुवी केरीन मुक्लील 18जो तापोर विश्वास मेली, तान न्याय निवाडा नाहं एता, पुण जो तापोर विश्वास नाहं केरतीन, तो बोंगलाईन सापडणे; ज्यानकेरता कि तान बोगवानान सोरो एकूनएकुच एक नावापुर विश्वास नाहं केरतीन. 19एने न्याय निवाडा मुळे हे हि कि प्रकाश जगाम आवा हि, एने माणहेच आंधाराह प्रकाशापैकी जादा प्रिय जाणिल आवरी किरील कारण तान कामे वाईट एती. 20कारण जो कूण वाईट करने, तो उजालान द्वेष करने, एने प्रकाशमाय आहने नाहं आविह, नाहं इही मां होवो कि कामापुर दोष लागाडया जाहू. 21पुण जो सत्यापोर चालणे, तो प्रकाशा आहने आवथू, यानकेरीता कि तान कामे प्राप्त एने जुवी कि तो बोगवानानापूररीन इयील हि”

यीशुन विषयमा यूहन्ना गवाही

22ता ओवतो यीशु एने तान चेलो यहूदिया देश आवा; एने तो ताहारी तान हेरी रेयीन बाप्तिस्मा केरणे लागिल. 23यूहन्ना पुण शालीम आहनीवाला एनोन बाप्तिस्मा केरतीन एतो, कारण ताहारी मोक्तास पाणी एता, एने माणहे आवीन बाप्तिस्मा लेतेन होते. 24यूहन्ना तीबोखे ताहवोर जेलमाय नाहं टाकील गीयो एतो. 25ताहारी यूहन्ना चेला माय कायताहा यहूदी हेरी शुद्धी केरणे बाराम वादावाद एनो, 26एने ते यूहन्नाफाय आवीन ताह कियील, “हे गुरुजी, जो माणुह यर्दिनेन आहने तारो हेरी एतो, एने ज्यान गवाही आपील एती; देखू, ते बाप्तिस्मा आपतेन, एने आखा जन तान आहने आवते.” 27यूहन्नान उत्तर आपील, “जो ताहवोर माणहाह स्वर्गामाय रीन नाहं आपील जाहू, ताहउर तो कायीच नाहं मिळवू शकत. 28तुमूह तर स्वताच मारी गवाही हि कि मी कियील, मी मसीह नाहं, पुण तान ओगाण मुकलील जाईल हि.” 29ज्यान वोवडी हि, तोच उपेर हि, पुण वोवडान हेरी जो उबरीयेल रेयीन तान होमलने, ताह उपरल्या शब्दापुरनीन जुलुम आनंद एतो: ऐवी मारा हे आनंद पुरो एय गीयो हि. 30जरुरी हि कि तो वोदणार एने मी थोडो एय.

31“जो उपेर आवथू आखांन उपेर हि; जो पृथ्वीपोररीन आविह तो पृथ्वीन हि, एने पृथ्वीनबी वातू किथे: जो स्वर्गावरून आवथू तो, पृथ्वीन उपेर हि. 32जो कायतान देखील एने होमलेल हि, ताणुच गवाही आपथु; एने कूण तान गवाही स्वीकार नाहं केरतीन. 33जा-जा तान गवाही स्वीकार केरीन लीईल तान आवो वातीपुरी शिक्का लागाडील आपील कि बोगवानान सत्य हि. 34काहा ज्याह बोगवानान मोकलील हि, तो बोगवानान वातू किथे; काहाकाय तो आत्मा नाहं आपतेन. 35आबुक सोरावर प्रेम केरथू ज्यान आखा वस्तु तान आथे आपील हि. 36जो सोरा पोर विश्वास मेली, अनंत जीवन तान हि; पुण जो सोरान नाहं होमले, तो जीवनाह नाहं देखीह, पुण बोगवानान राग तापोर रेणे.”

Currently Selected:

यूहन्ना 3: NLXNT

Highlight

Copy