यूहन्ना 4

यीशु एने सामरी बायकू

1ओवतो जेवी प्रभु मालूम एय गीयो का फरीसीन होमलील हि का यीशु यूहन्ना पेक्षा ज्यादा चेला बोणाविल एने ताह बाप्तिस्मा आपीह 2केवी तेभी यीशु जीवेच नाहं तान चेला बाप्तिस्मा आपतेन एता. 3तेवी तो यहूदयान सोडीन पोशा गलीलामाय निकलील, 4एने ताह शमरोना मायरीन निकलीन जाणुच लागिल. 5सुखार नावान एक शमरोनाच्या नगरामाय ताहुकवोर आवा, जे ता जोमनिन आहने हि ज्याह याकूबाने आपणो सोरो योसेफ ला आपील एतो; 6एने याकूबान वावडी ताच एती. यीशु वाटेमायबी थाकेल एतो ता वावड्यू आहने आहने बोह गीयो. हि वात सहाव्या तासा आहने आहने एनी.

7तोलाकमाय एक शमरोनी बायकू पाणी भोरनेन आवी. यीशु तीह केयेल, “माहु पाणी पिवाड.” 8काहाकाय तान चेला तर नगरात जेवण वेचातो लेणे केरता जाईल एता. 9ती शमरोनी बायकू ताह कियेल, “तू यहूदी असून मी शमरोनी बायकू फायरीन पाणी का मांगतेन हि” काहाकाय यहूदीयान शमरोनी बरोबर काल्लूच प्रकारचा व्यवहार केरतीन नाहं. 10यीशुन उत्तर आपील, “जर तू बोगवानान दान ओलखणेस, एने ज्याह पुण ओलखणेस कि तो कूण हि जो तुवाह किथी हि, माहु पाणी पिवाड, तर तू तान फायरीन मांगेल, एने तो तुवाह जीवनाम पाणी आपुह.” 11बायकू नी ताह कियील, “हे प्रभु, तुवा फाय तर पाणी भोरणे केरता कायीच नाहं, एने वावडी उंडो हि; तर ओवतो तारो उगे जीवनाम पाणी कारीन आवा?” 12काय तू आमारो आबोक याकूब पेक्षा मोठू हि, ज्यान आमूह हि वावडी आपील; एने तुमूह आपणी सोरा, एने आपणो पशु बरोबर यामारीन पियील? 13यीशु ताह उत्तर आपील, “जो कूण ज्यो पाणी पिय ताह पोशा तीह लागी, 14पुण जो कूण ज्या पाणी मायरीन पिईल जे मी ताह आपण्यू, तो शेवेट च्या कालो ताहवोर; तिह्ल्यो एय नाहं; नापून जे पाणी मी ताह आपुहू, तो तामाय एक एर बोणीन जाह कि अनंत जीवनान केरता उकलतालो पाण्यान झिर इही एय.” 15बायकूने ताह कियील, “हे प्रभु ते पाणी माहु आप काहाकाय हु तीह लागणार नाहं एने पाणी भोरनेन कोलाकामाय सेटो आवी.” 16यीशु ने तीह कियील, “जा तारा एदम्या हादिन लाव.” 17बायकूने उत्तर आपील, मी शिवाय एदम्यान हि “यीशु ने तीह कियील, तू बरोबर किथी हि, मी बिना एदम्यान हि.” 18काहाकाय तू पाच लाडहेक बोणाविल हि, एने ज्यान आहने तू रेथे हि तो पुण तारो एदमी नाह सोतो तू खेरीच कियील हि. 19बायकूने ताह कियील, “हे प्रभु, माहु लागीह कि तू भविष्यवक्ता हि. 20आमरा पूर्वज ज्याच बोयडापुर भक्ति उपासना भजन केरील, एने तुमु केतेह का ती जागा तां भजन केरणे जुवी यरूशलेम माय हि.” 21यीशु तीह कियील, “हे बायकू, मारो वातू उपेर विश्वास केर का ती जिच टाइम हि कि तू नाहं आवो डोंगर उपेर आबाकने भक्ति केरणेन, नाहं यरूशलेमत. 22तुमूह ज्याह नाहं ओळखतेह, तान भक्ति केरणू; एने आमु ज्याह ओळखणे तान भोक्ताहा करने; काहाकाय उद्धार यहूदीयान विचमायरीन हि. 23पुण तो समय आविह, एने ऐवी भी हि, जामाय खेरा भक्त पितान आराधना आत्मा माय एने सच्चाई माय केरती, काहाकाय पिता तानकेरीन ओहलाच आराधना केरणाराह होदिह. 24बोगवान आत्मा हि, एने गर्जेन हि कि तान भक्ति केरणारा आत्मा एने खेरो उपासना केरणू.” 25बायकूने ताह कियील, “माहु मालूम हि कि मसीह जो यीशु मसीह कियील जाथू, आवणार हि; ताहेरया तो आवी, आमूह आखा वातू केयीन आपुह.” 26यीशु ने ताह कियील, मी जे तारो हेरी बोलीह हि तोच हि.

चेलान वापसी

27तोलाख माय तान चेला पोशा आवा, एने आश्चर्य केरणे लागिल कि तो बायकू हेरी वात केरतीन हि; तेभी कायीच फुसील नाहं, “तुवाह काय जुवी?” एने “कायतान केरता तीन हेरी वातू केरतीन हि?” 28तेवी बायकू आपणी घागर सोडीन नगरात निकलीन गीयी, एने माणहाह केणेंन लागिल, 29आवो एक माणहा ला देखू, ज्यान आखा काही जे मी किरील ते माहु केयीन आवेलकेदिह जोस तर मसीह नाहं? 30सेवट ते नगरामरीन निकलीन तान आहने आवणे लागिल. 31ज्यान माय तान चेला यीशुला हि विनंती केरील, “हे गुरुजी, काही खाइल ले.” 32पुण तान ताह केदा, “माहुफाय खाणेन केरता इही जेवण हि ज्याह तुमूह ओळखतेह नाहं. 33तेवी चेला आपसामाय केया, काय कूण तान केरता कूण खाणेन लेईन आवा हि?” 34यीशु ने ताह कियील, “मारा जेवण ज्याच हि कि माहु मोकलणारा च्या ईच्छा नुसार चालू एने तान काम पुरो केरूह.” 35काय तुमूह नाहं किथी, “काटणी एणेन केरता चार मोरना बाकी हि देखू, मी तुमूह किथे, आपणा डोला उगडीन खेत उगे दृष्टी देखू का ते कापणी केरता पाकीन गीया हि. 36काटणी केरणाराहा मोजरी जोवतेहे एने अनंत जीवनान केरता फळे जोमा करने, कारण पेरणार एने कापणी केरणार दुयू मिलिन आनंद केरूह. 37काहाकाय न्या हि म्हण बरोबर बुहही हि: पेरणी केरणार एने उन्जू हि काटणी केरणार उन्जू; 38मी तुमूह ते खेत काटण्या केरता मुकलेल ज्यामाय तुमूह काम नाहं किरील: दिहरान मेहनत एने तुमूह तान मेहणतीन फोलवामाय भागीदार एनो.”

शमरोनीन विश्वास केरणेन

39एने ता नगरामाय जादा ओला शमरोन्यांनी ता बायकून केणेन केरता यीशु उपेर विश्वास किरील; काहाकाय ती ने हि गवाही आपील एती; ती आखा काही जे मी किरील हि, माहु केईन आपील. 40ज्ञान केरता ताहेरया ते शमरोनी ताफाय आवा, तर विनंती केरणे लागिल कि आमरा फाय रीवू सेवट तो ताआ दुय दिह ताहुकवोर रेणू. 41तान वचनमाय कारणांनी एने जादा जाणाह विश्वास किरील. 42एने ता राती ला केयेल, “ऐवी आमु केणेसेच विश्वास किरील नाहं केरतीन; कारण आमु तारीच कानून होयलू लीईल, एने ओळखथू आवी कि हा खेरी खेरीच जगान उद्धार केरथू हि.”

43ओवतो ता दुय दिह ओवतो तो निकलीन गलीलामाय गीयो. 44काहाकाय यीशु आपणीच गवाही आपील कि भविष्यवक्ता आपणो देशाम आदर नाहं जुडणे. 45ताहेरया तो गलीलामाय आवा, तर गलीली आनंदिसे ताह मिलना; काहाकाय जोला कामे तान यरूशलेमत पूर्वीवालो टायीमा किरील एता, तास आवो आखान देखील कारण ते पुण पूर्वी गीया एता.

राजान कर्मचाऱ्यान सोराह होजो केरणेन

46तेवी तो पोशा गलीलान कानामाय आवा, जाहरी तान पाण्यान अंगूररस बोनाईल एतो तिथ कूण राजान एक कर्मचा-यान आवा एतो ज्यान सोरो कफर्णहुमामाय दुखारया एतो. 47तो हे एय कि यीशु यहूदीयान तारीन गलीलामाय आवीन गीयो हि, तान आहने गीयो एने ताह विनंती केरणे लागिल कि जाइन मारो सोरा हाजो केरणू; काहाकाय तो मोरणाह टेकणे एतो. 48यीशु ताह केयेल, “जो ताहुकवोर तुमूह चिन्ह एने अद्भुत कामे नाहं देखणार तो ताहुकवोर, केवी तेभी विश्वास केरुहू नाहं.” 49राज्यान कामकेरणारे ताह केयेल, “हे प्रभु सोरान मृत्यू एने पेल चाला.” 50यीशु ताह केयेल, “जा, तारो सोरो जीवतालो हि” ता माणहान कियील तो वातून विश्वास केरीन निकलीन गीयो. 51तो वाटीच एतो तान दास ताह आवीन जुडील एने केणेंन लागिल, “तारो सोरो जीवतालू हि.” 52तान ताह फुसील, “कायताहा टायीमा तो हाजो एहू लागिल?” तास ताह कियील, “काल सातवो टाईमान तान ताप उतरना.” 53जेवी पिता होमजाडीन लीईल कि ते ज्योच वेलान एय गीयो, कि यीशु ताहा कियेल, “तारो सोरो जीवतालो हि, एने तान एने तान आखा घेरल्या विश्वास किरील. 54हा दिहरो आश्चर्य काम एता जे यीशु ने यहूदिया मायरीन आवीन गलीलामाय आवा.”

Currently Selected:

यूहन्ना 4: NLXNT

Highlight

Copy