लूका 1
1
ओलखत
1जुलुम जाणा ती वातूह जी आमरा विचमाय घेडील हेत्यू, तीह लेखणे माय आथ लागाडील हेते, 2जीही ता जा पेलूच रीन ती वातूह देखाणारे एने वचनान दास एता. आमुफ वोर पोचाडील. 3तामुळे, हे सन्मानाचे योग्य थियपिला, सुरुवातीरीन ज्याह आखा वातू सावधानी पूर्वक एने बरोबर होदणे केरीन माहु हे हाजो समजील कि मी पुण तुवा क्रमाने लिखू. 4केरीन तू आवो वातू निश्चितपणे सेमजीन ले, ज्यान तुवाह शिक्षण जुडील हि, ती कोहली अटल हि.
यूहन्नान जल्मान घोषणा
5यहूदीयान राजा हेरोदेसाच्या टाइम जख-या नावान एक याजक एतो, जो अबीयान वर्गामायवालो एतो, एने तान लाडीन नाव एलीशीबा एतो, जी हारोनान कुळामाय वालो एती. 6ते दुयू बोगवानान राज्यातम धार्मिक एता, तान चाल चालणूक बोगवानान विधीने एने आज्ञा निर्दोष चालणारे एता. 7तान सोरो नाह एता, कारण एलीशीबा वांझ एती, एने दुयू डाया एय जायेल एता.
स्वर्गदूत द्वारा यूहन्नान जेल्मान भविष्यवाणी
8इही एय गीयो कि तो आपणो वर्गान नंबर आवा तेवी बोगवानान ओगाण याजक काम केरतालो. 9तर याजक रीतीन होस तो चिठी टाकीन निवडणेमाय आवा, कि बोगवानान मंदिरामाय जाइन धुण पेटाळणे. 10धुण पेटाळणेन टाइम आखा माणहा बाहेर उबरी रेयीन प्रार्थना केरताला. 11एने ताह धुपाच्या वेदीन जेवडी उगे बोगवानान एक स्वर्गदूत उबरील रीयेल देखानो. 12ताह देखीन जख-या बिय गीयो एने भयभीत एनो. 13पुण स्वर्गदूताने ताह कियील, “हे जख-या, भयभीत एहू मां कारण तारी प्रार्थना होमेलनेमाय आवी हि तारी लाडी एलीशीबा से तुवाह एक सोरो एय, एने तू तान नाव यूहन्ना मेलजी. 14तुवाह आनंद एने आनंद वाटहु एने तान जेल्मान एक दिह जुलुम माणहे आनंद केरती, 15कारण प्रभुने दृष्टीमाय तो मोठो एय; तो अंगूररस एने दारो पिनार नाह; एने आपणो आईकने पेटामाय तो पवित्र आत्मा माय वोडते जाय. 16तो इस्राएलान सोरा मायरीन तर कोल्लाकतेबी तो आपणो प्रभु बोगवाना उखेर लीन आवूह. 17एने तो तान ओगाण-ओगाण एलियान आत्मा माय एने सामर्थ्या माय बोरीन चालती, कि आबाकने हृदय सोरा सोराफाय लीन आवूह; एने आज्ञा मानणाराह धार्मिकान वाटी पुर लीन आवूह जोकेरिन तो प्रभु केरता योग्य ओहलो प्रजा तियार केरी.”
18जख-यान स्वर्गदूताह फुसील, “मी ज्याह कायतापूररीन होमजू शकणे? कारण मी तर डावाला हि; मारी लाडी पुण डावाली हि.” 19स्वर्गदूत उत्तर आपील “मी गब्रिएल हि, जो बोगवानान ओगांण उबरेणे; एने मी तुवां हेऱ्यो वात केरणे एने तुवाह जी सुवार्ता केणेन केरीन मुक्लेलं हि. 20देखू, ज्या दिहावोर हि वात पुरो एता नाहं तू मुक्का रेहू एने बोलहू शकणार नाहं, कारण तू मारो वातुपोर विश्वास किरील नाहं जी योग्य टाइम पुरो एय.” 21माणुह जख-यान वाट दिखिह एता एने ताह आश्चर्य लागणे एता कि ताह मंदिरामाय ओलोक टाइम काहा लागत हि? 22पुण ताहेरया तो बाहेर आवा, तेवी तो केहू शकील नाहं: एने ते समजून गीया, कि मंदिरामाय ताह काही तेभी दर्शन जुडील हि; तो खुन केरीन देखाडीन रेणू एने मुक्काच रेणू. 23एने इही एय गीयो, कि ताहेरया तान लेविन सेवा पुरो एय गीयो, तेवी तो आपणो गिर गीयो.
24आवो दिहा बादमाय तान लाडी एलीशीबा पेटावाली रेणी; एने तिने हे केयीन स्वताह पाच मोरना लीकाडीन मिलना. 25ता दिहामाय “मारपुर कृपा दृष्टी केरीन माणहामाय मारी बदनामी सेटो केरनेकेरताच प्रभु बोगवानान मारहे-या ओहलो व्यवहार किरील हि.”
यीशुन जल्मान घोषणा
26सहाव्या मोयनाम बोगवानारीन गब्रिएल स्वर्गदूत नासरेथ नावान गलील नगरात, 27एक कुवारी आहने मोकलील गीया. तीन मांगणी एक योसेफ नावान माणहा हेऱ्यो एनी एती तो दाविदान वोचन एतो: एने तिकुवारीन नाव मरियम एता. 28एने माय आवीन तीह स्वर्गदूतान कियील, “हे प्रभुन कृपा पावलेली बायकू नमस्कार आनंद एने जय तोरो एय, प्रभु तारहेऱ्यो हि.” 29आवो अभिवादनाह होम्लीन ती बियीन गीयी, एने विचाराम पोडीन गीयी कि हे कायताहा विषयान अभिवादन एहू शकते? 30तेवी स्वर्गदूत तीह कियील, “हे मरियम; बिऊ मां, कारण तारपोर बोगवानान कृपा एनी हि. 31देखू, तू पेटावाली एय, एने एक सोरा जेल्मो आपण्यू एने; तू तान नाव यीशु मेलणेन. 32तो थोर एय; एने परमप्रधानान सोरो केयेल जाहो; प्रभु बोगवान तान आबुक ताह दाविदान सिंहास ताह आपण्यू. 33एने तो याकूबान घेरणापोर कायम काळापर्यंत राज्य केरुहू; एने तान राज्यान अंत एय नाहं.” 34मरियम स्वर्गदूताह कियील, “हे केवी एहू शकते? कारण मी तर कुवारी हि.” 35स्वर्गदूताने तीह कियील, “पवित्र आत्मा एने परमप्रधान सामर्थ्य तारपोर सावुलू केरूह; ज्यानहोस जो उत्पन्न एय, तो बोगवानान सोरो केयेल जाहो. 36देखू, तारी घेरल्या एलीशीबा पुण आवो डावाला पणाम सोरो एय, हि एने ती, जी वांझ कियील जात एती तीन सहावा महिमा चालू हि. 37काहाकाय बोगवानान केरता कायीच अशक्य नाहं.” 38मरियम ने कियील, “देखू, मी तर प्रभुन दासी हि, तारो वचनाप्रमाणे मारहे-या एहू.” आप तेवी स्वर्गदूत तीन तारेन निकलीन गीयो.
मरियम एने एलीशीबान मिलाणो
39तेवी तान दिहामाय मरियम उठीन जल्दीस बोयडान भागाम यहूदा नगरांम गीयी. 40एने जख-यान घेराम जाइन तिने एलीशीबेला नमस्कार किरील. 41इही एय गीयो कि जोहलो मरियम ने एलीशीबान भेट लीईल, तीन पेटाम सोरो उठना एने एलीशीबा पवित्र आत्मा माय परिपूर्ण एनी. 42तान मोठला आवाजामाय ती बोलिल, “तू बायकू माय धन्य एने तारो पेटामायवाला सोरो पुण धन्य हि. 43मारपुर हि कृपा कोहली एनी कि मारो प्रभुन आहाक माहफाय आवी?” 44देखू, तारो नमस्कारान शब्द मारो कानाम पोडील एने मारा सोरो उठना. 45धन्य हि ती बायकू जिने विश्वास किरील कि जे काही बोगवानान तीह कियील हि ते पुरो एय.
मरियम ने स्तुतीन गाणो
46तेवी मरियम ने कियील, “मारो जीव बोगवानान महिमा केरतीन हि 47एने मारी आत्मा मार उद्धार केरणे वाला बोगवान से आनंद एनी, 48काहाकाय तान आपणो दासीन गरीबान परिस्थितीम दया केरील हि; तामुळे देखू, एविरीन पिढ्यानपिढ्या तुवाह धन्य केती, 49काहाकाय पारात्पराने मारकेरीन मोठा काम किरील हि एने. तान नाव पवित्र हि, 50एने तान दया पिढ्यानपिढ्या ताहवोर तापोर, जे तान बिय होमोलनु तां पोर रेहू 51तान आपणो बाहूने पराक्रमाचे काम किरील हि, एने ताह मोना माय केरीन आपील, जे आपणो विचाराम गर्विष्ठ एता. 52तो अधिकारीह राजसना पोररीन पाडीन आपील; एने गारीबांह मोठा केरीन आपील. 53तान बुखल्या हाजो हाजो वस्तून तृप्त किरील हि, एने जे श्रीमंत ताह बुंदे आथा केरीन काडीन आपील. 54तो आपणो दास इस्राएलाह होम्बाल लियील का आपणी ती दयाह एर केरी, 55जो अब्राहाम एने तान वंशा पोर कायम रेय, जेही तो आपणा बाप दादाह केयील एतो.” 56मरियम बरोबर तीन मोयना ताहेरी रीन आपणो गिर पोशा आवी.
यूहन्ना बाप्तिस्मा आपणारान जल्मो
57तेव्ही एलीशीबान प्रसुतीचे दिह पुरो एय गीयो, एने तिई एक सोरा जेल्मो आपील. 58तान शेजारी एने घेर वाला ज्या होमलील तेवी प्रभुन तीपुर कृपा दृष्टी केरील हि, तर तान आनंद किरील, 59एने इही एय गीयो कि माणुह आठव्या एक दिह सोरान खतना केरणेन केरता आवा तेवी तान आबाकने नावानहोस तान नाव पुण जख-या मेलणे लागा. 60ज्यापूर तान आईकने कियील नाहं, तान नाव यूहन्ना मेलणेमाय आवी. 61तेवी तान तीह कियील, तुमरो नातलगामाय तर कुणीणुच इही नाव नाहं. 62तास तान आबाक निशान लेखीन फुसील कि तुवाह तान नाव काय मेलणेन हि? 63तान लेखणेन पाटी फाचन ज्यापूर लिखील “यान नाव यूहन्ना हि” एने आखा आश्चर्य लागनो. 64चालूच तान मूय एने जीभ उघाडील; एने तो बोगवानान स्तुती केरतीन बोलणे लागिल. 65जापोर ओरोपोरो रेणारे माणुह भयभीत एईन गीया एने यहूदान आखा बोयडान भागाम आवो आखा वातील चर्चा चालू लागिल. 66तान केरता हे आखा होमलील ता आखाच आप आपणाह मोनाम विचार केरीन कियील, “हा सोरो कोहलो एती?” कारण खेरी खेरीच प्रभुन आथ तापोर एतो.
जखऱ्यान स्तुतीन गाणो
67एने तान आबुक जखऱ्या पवित्र आत्मा माय जादा एनो एने हे केयीन भविष्यवाणी केरणे लागिल. 68“प्रभु इस्राएलान बोगवान धन्य हि, का तो आपणा माणहापूर दृष्टी किरील हि, एने तान सुटकारू किरील हि, 69एने आमरे केरता आपणो दास दाविदान घेरामाय उद्धार एक हिंग काढ्या हि.” 70जोहलो तान जगा सुरुवात पासून आपणो पवित्र भविष्यवक्ता मुया मायरीन केणेंन, लागाडील एता. 71कि आमरा शत्रुरीन, एने आमरेहेयो द्वेष केरणारान हातामायरीन आमरा उद्धार किरील हि; 72कि आमरा पुर्वापोर दया केर एने आपणी पवित्र वाचाह एर केरी केर. 73म्हणजेच ती शपथ जी आमारो आबुक अब्राहामाहे-यो केरील एती. 74कि आमूह हे वरदान आप, कि आमु आपणो दुश्मनान हातामायरीन सोडावील जाइन, 75तान ओगांण पवित्रता एने धार्मिकताहामाय जीवनभर निर्भय रेयीन ज्ञान सेवा केरतीन रीवू. 76एने तू हे सोरा, परमप्रधान भविष्यवक्ता कियेल जाहू, काहाकाय तू प्रभुन वाट तियार केरणेन केरता तान ओगाण ओगाण चालूह हि. 77कि तान माणहा उद्धारान ज्ञान आप, जो तान पापांन क्षमा प्राप्त एता. 78ज्यो आमरा बोगवानान तीच मोठली करूणा से एय; जान कारण से उपेररीन आमरे पोर पहाटने उजालो उगी, 79का आंधारो एने मोरणेन सावलामाय बोहनारा प्रकाश आपण्यू, एने आमरा पायांना शान्ति ने मार्गाम हास केरीन चालाडूहु.
80तो सोरो वोदनेन एने आत्मा माय शक्तीशाली एते गीयो एने इस्राएल माय प्रकट ला दिहावोर जेंगलामाय रेणू.
Currently Selected:
लूका 1: NLXNT
Highlight
Share
Compare
Copy
Want to have your highlights saved across all your devices? Sign up or sign in
Nahali (नाहाली) Bible by The Love Fellowship is licensed under Creative Commons Attribution-ShareAlike 4.0 License.
