लूका 2

यीशुन जल्मो

(मत्ती 1:18-25)

1ता दिहामाय आगुस्त कैसर यान उगेरीन आज्ञा आवी कि आखा जग माय वाला माणहान नाव लिखाय जाणे. 2जिच पेल्ली नावनिशानी ता टायीमा एनी, तेवी क्विरीया सिरीयान सूर्यान सभेदार एतो. 3ताहेरया माणहे नाव लेखणेन केरता आप आपणाह नगराम आवा. 4सेवट योसेफ पुण ज्यानकेरता कि तो दाविदान घेरामायवालू, एने वंशान एतो, गलीलातमाय नासरेथ गावाम यहूदियामाय दाविदान गावाम बेथलेहेमामाय गीयो. 5कि आपणी मांगणी एईल मरियम हेरी जी पेटावाली एती नावे लेखली, 6तान न्या रेथे येतो तान जेल्मो आपणेन दिह पुरो एय गीयो, 7एने तिने आपणो पोयलोच सोरा जेल्मो आपील एने ताह फाडकाम वेटाळीन गव्हाणीत मिलील; कारण तान केरता धर्म शाळेम जागो नाहां एती.

स्वर्गदूता द्वारा गोवाल्याह संदेश

8एने ता देशाम कोलाक मेंढपाळ एता, जे राती मैदानाम रेयीन आपणो कळपाचे होमालताला. 9एने प्रभुन एक दूत आवीन तान उगे उबरील रेणू, एने प्रभुन तेज तान चारू बाजूमाय चोमेकना, एने ते जुलुम बियीन गीया. 10तेवी स्वर्गदूत तांह केयील, “बिवू मां; देखू काहाकाय मी मोठली आनंदन सुवार्ता होमलाड थु जी आखां माणहान केरीन हि 11का आज दाविदान नगरामाय तुमरीकेरता एक उद्धार केरता जन्मो लीईल हि, एने ज्योस यीशु प्रभु हि.” 12एने ज्यान तुमरीकेरता जिच खुन कि तुमूह एक सोराह फाडकाम गुंडालेल एने गव्हाणीत नाहील देखणे.

13तेवी उचकाहूस ता स्वर्गदूता हेऱ्या स्वर्गदूतांन टोलो बोगवानान स्तुती केरतीन लागो, एने ज्यो केताला देखाना, 14“आकाशामाय बोगवानान महिमा एने पृथ्वीपोर ता माणहामाय जां से तो प्रसन्न हि, शान्ति एय.”

गोवाल्यान बेथहेमाय जाणो

15स्वर्गदूत ताफायरीन स्वर्गाम निकलीन गीया, तेवी मेंढपाळानी आपसामाय कियील, “आवो आपु बेथलेहेम ला जावू हि वात जी एनी हि, एने ज्याह प्रभुन आमूह कियील हि, देखहु.” 16एने ते लागीच जाइन मरियम एने योसेफाह, एने ता सोराह दोरकोठा मेलील देख्या. 17ताह देखीन तास हि वात जी ज्याह सोरान विषयी ताह केदाह गीयी एती प्रगट एनी, 18एने आखा होमलणारे ता वातूस जी मेंढपालानी ताह कियील आश्चर्य किरील. 19पुण मरियम हे आखा वातू आपणो मोनाम मेलीन विचार केरतीन रेणी. 20एने मेंढपाळाने जोहलो ताह केदाह गीया एता, तोहोलोच आखा होमलीन एने देखीन बोगवानान महिमा एने स्तुती केरतीन निकलीन गीया.

यीशुन नावकरण

21ताहेरया आठ दिह पुरो एय गीयो एने तान खतनान दिह आविलपोर, तर तान नाव यीशु मिलील गीया जे स्वर्गदूतांन तीन पेटामरीन आवणारा पेलूच कियील एता.

मंदिर मा यीशुन अर्पण

22ताहेरया मुसान व्यवस्था तान शुद्ध ला दिह पुरो एय गीयो, तेवी तो ताह यरूशलेमाय लीन गीया, कि प्रभुन सुमोर आवी, 23जोहलो कि प्रभुन व्यवस्था माय लिखील हि: “प्रत्येक पेल्लो प्रभु केरता पवित्र ठेरणू.” 24एने प्रभुन व्यवस्था वचनामाय, “आलणेन एक जोड, नाहं तर कबुतर चे दुय पिल्ले” लीन बलीदान केरुहू.

शिमोनान गाणो

25यरूशलेम माय शिमोन नावान एक माणुह एतो, एने तो माणुह धार्मिक एने भक्त एतो; एने इस्राएलान शान्तिन वाट दिखिह एतो, एने पवित्र आत्मा तापोर एतो. 26एने पवित्र आत्मा द्वारे ताह प्रकट एय गीयो एता कि जो ताहवोर तो प्रभुन मसीहान देखीन नाहं लेतेन, तो ताहवोर मारणार नाहं. 27तो आत्मान हिकाडणे मंदिरामाय आवा; एने ताहेरया आहाक एने आबुक ता सोरा यीशुह आहने लावील, कि तान केरता व्यवस्थान नुसार केरूह. 28तेवी तान ताह आपणो मांडीम लीईल एने बोगवानान धन्यवाद आपील कियील: 29हे स्वामी, ऐवी ताहवोर तू आपणो दासाला आपणो वाचणेन नुसार शान्ति से सोडीन आपथु,

30कारण मारो डोलाकेरिन तारो उद्धाराह देख लीईल हि,

31ज्याह तू आखा देशान माणाहान ओगाण तियार किरील हि,

32का तो अन्यजात्यूह सत्य प्रकट केरणेन केरीन एक ज्योती एय, एने तारा निवाडील माणहा इस्राएलान महिमा एय.

33तान आबुक एने ज्यान आहाक आवो वातूनकेरता जी तान विषयाम कियील जात एती, आश्चर्य केरतीन एता. 34तेवी शिमोनान ताह आशीर्वाद आपील, तान आहाक मरियम कियील, “देखू, तो तर इस्राएलमास जादा बुंदे पडणे, एने उठवणे केरता, एने एक इही चिन्ह एणेन केरता ठेरना गीया हि, तान विरोधामाय वातू केरील जाहो. 35नापून तारो जीव पुण ताल्वारीन आरपार छेदुन जातीमाय याफायरीन जादा हृदयाचे विचार प्रकट एती.”

हन्नान गवाही

36अश्शेरान वंशामाय वालो हन्ना नावान फनुएची सोरी एक भविष्यवाणी केरणारा एती. ती जुलुम वृद्ध एती, एने वाराड एईल ओवतो सात वर्ष आपणो वूवोडू हेरी रेय शकली एती. 37ती चौऱ्यांशी वोरीह रीन विधवा एती: एने मंदिराह नाह सोडताली पुण उपास एने प्रार्थना केरी-केरीन रात-दिह भक्ति (उपासना) केरताली 38एने ती ता तेवीच आवीन प्रभु बोगवानान धन्यवाद केरणे लागिल, एने ताह आखा, जा यरूशलेमान सुटकान वाट जोवताला, ताहारी जाइन तान बारामाय केणे लागिल.

नासरथमा वापस

39ताहेरया ते प्रभुन व्यवस्था पोर आखा काही पुरो केरीन एय गीयो गलील आपणो नगरामाय नासरेथाह पोशा निकलीन गीया.

40एने सोरा वोदणार, एने बलवान एते गीयो, एने बायहे परिपूर्ण एता गीयो; एने बोगवानान अनुग्रह उपेर एतो.

मंदिरामाय आत्योचने यीशु

41तान आहाक आबुक प्रत्येक वर्षी फसहनान तिवार ओवतो यरूशलेम माय जात एती. 42तेवी यीशु बारा वोरह्यान एनो, तेवी ते पूर्वीवालो रीतीन नुसार यरूशलेम माय गीया. 43तेवी ते ते दिह पुरो केरीन निकालणेन लागिल, तर सोरा यीशु यरूशलेम माय रेयीन गीयो; एने हे तान आहाक डायडायहा मालूम नाह एता. 44ते हे होमजाडणे एता कि तो दिहीरा प्रिनाशा बरोबर रेंय, एक दिहान प्रिनास ओगाण किरील: एने ताह आपणो घेरल्या माय एने ओलखातीन माणहामाय होदणेन लागिल. 45पुण तो जुडना नाहं, तर ते होदतेन होदतेन यरूशलेम माय पोशा निकलीन गीया, 46एने तीन दिह ओवतो तास ताह मंदिरामाय गुरुजनामाय बोहील तान होमेलतेन, एने ताह प्रश्न फुसतालोन देखील. 47जोलाक पुण तान होंबलेह एता, हे आखा तान बुद्धी उपेरीन एने तान उत्तरासे भोगलाईन एता. 48तेवी ते ताह देखीन भोगलाईन एय गीयो एने तान आईकने ताह बोलिल, “हे सोरा, तू आमरा हेरी ओहलो का वेवारो किरील? देखू, तारो आबुक एने मी तुवाह कष्टी एय होदणे लेतेन एतो?” 49तो ताह कियील, “तुमूह माहु काहा होदताला एता? काय तुमूह मालूम नाहं कि तुमूह माहु मारो आबाकने घेराम एय या मालूम नाहाकाय?” 50पुण जीवात तास ताह कियील, तान ताह होमजाली. 51तेवी तो तान हेरी गीयो, एने नासरेथ माय आवा, एने तान वंशामाय रेणू; एने तान आईकने हि आखा वातू आपणो मोनाम मिलील. 52एने यीशु बुद्धीसी एने डीलाकेरिन, एने बोगवानान एने माणहान अनुग्रहात वाढते गीयो.

Currently Selected:

लूका 2: NLXNT

Highlight

Compare

Copy