लूका 23

पिलातुस द्वारा यीशुह प्रश्न

(मत्ती 27:1-2,11-14; मरकुस 15:1-5; यूहन्ना 18:28-38)

1तेव्ही आखी सभा उठीन ताह पिलातुसन ओगांण ली गीया. 2हे केयीन तापोर दोष लागाडणे लागिल: “आमु ज्याह माणहाह बहकवताना, एने कैसराला केर आपणेन नाहं नकार कातांना एने आपणो जीवाह मसीह, एने राजा केतालून होमलील.” 3पिलातुसान यीशुह फुसील, “काय तू यहूदीयान राजा हि? तो ताह उत्तर आपील, आपु केणु तोहोलोच.” 4तेव्ही पिलातुसान मुख्य याजकान एने माणहाह कियेल, “माहु ज्याह माणहामाय दोष देखायील नाहं.” 5पुण ते उन्जू दृढ तेणे केणेंन लागिल, “हा गलील तारीन न्या ताहवोर, आखाच यहूदया माय उपदेश केयीन माणहाह बोडकावीह.” 6जो होमलील पिलातुसान फुसील, “काय तो माणुह गलीली हि.” 7एने हे होमजाडीन कि तो हेरोदेसान राज्यान हि, ताह हेरोदेसा उगे मोकलीन आपील केरीन ता दिह माय तो पुण यरूशलेम माय एतो.

यीशुह हेरोदेसा फाय मोकेलणो

8हेरोदेस यीशुह देखीन जादा प्रसन्न एनो, कारण ताह जादा दिह तारीन यीशुह देखणे एता ज्ञान केरता कि तान विषयातमाय होमलील एता, एने तान तान उगेरीन काही चिन्ह देखणेन आशा मेलतांलोन एतो. 9तो ताहेर्यो जादा वातू फुसतालो, पुण तो ताह काणलोच उत्तर आपील नाहं. 10मुख्य याजक एने शास्त्री उबरीयेल रेयीन तान मोनामरीन दोष लागाडते रेणा. 11तेवी हेरोदेस आपणा चेलाह हेरी तान अपमान केरीन थट्टा उडावली, एने भडक फाडका पेरावीन ताह पिलातुसाफाय मोकली दियील. 12तान एक दिह पिलातुस एने हेरोदेस हेरी बोणावीन गीया ज्ञान पेल्ला ते एक दिहरान शत्रु एता.

पिलातुस द्वारा यीशुह मोत दण्ड

(मत्ती 27:15-26; मरकुस 15:6-15; यूहन्ना 18:39-19:16)

13पिलातुसान सरदाराह मुख्य याजक एने अधिका-यान एने माणहाह हादाडळीन ताह कियील. 14“तुमूह आवो माणहाह बेहकाडणार ठेरावीन मारो उगे लावील हि, एने देखू, मी तुमरो ओगाण तान चौकशी केरील, पुण ज्या वातू चा दोष तुमूह तापोर लागाडया हि ता वातून विषय माय मी तान माय दोष देखील नाहं; 15हेरोदेसाने पुण नाहं, कारण तान ताह आपणो उगे मोकलीन आपील हि: एने देखू, तान फायरीन इही कायीच एय गीयो नाहं कि तो मृत्यू च्या दण्डा योग्य ढेहाराव्या जाह. 16ज्ञान केरता मी ताह मार आपणेह लागाडील सोडीन आपथु.” 17पिलातुसान पूर्वीवालो टायीमा तान केरता एक बंदी केरेलाह्बी सोडील केरता मजबूर एतो. 18तेवी आखा मिलिन आयडी कियील, “ज्यान काम निवरावीन टाक, एने आमरे केरता बरब्बाह सोड दी” 19तो कुणी बलवे के कारण, जो नगरामाय एयेल एतो, एने हेत्यान कारण से बोन्दिखाणामाय टाकायेल इतू. 20पुण पिलातुसान यीशुह सोडतेन ने पोशा माणहाह होमजाडील. 21पुण ते आयडीन कियेल, “ताह क्रुस पोर चेढ, क्रुस उपेर” 22तान तिसरी वारीन ताह कियेल, “का, तान कालो वाईट किरील हि? माहु तामाय मृत्युन दण्डाचे, कारण काल्लीज वात देखील नाहं ज्ञान केरता योग्य मी ताह मार खावू रीगाडीन सोडीन आपथु.” 23पुण ते आयडीन आयडीन पासाण लागिन गीया कि तो क्रुस उपेर चेडायेल जाऊ एने तान आयडणे कामयाब एय गीयो. 24सेवट पिलातुस आज्ञा आपील तान विनंती नुसार किरील जाऊ. 25ता ताह माणहाह जो दंगा एने हेत्यान कारणाने बोन्दिखाणामाय टाकील एतो, एने ज्याह ते मांगतेन एता, ताह सोड दी एने यीशुह तान ईच्छा नुसार यीशुह होप देणु.

यीशुह क्रुस पोर चढावणो

(मत्ती 27:32-44; मरकुस 15:21-32; यूहन्ना 19:17-19)

26जेवी ते ताह लीनजाताला, तेवी ता शिमोन नावान एक कुरनेकर जो गावामरीन आविह एतो, ताह क्रुस लाद दियील का ताह यीशु पासाण पासाण जात रेणा. 27माणहान मटली गेर्दी तान पासाण आवी एने तामाय जादा बायकू पुण एता ज्या तान केरता छाती ठोकत एने शोक केरतीन एता. 28यीशु तान उगे देखीन कियेल, “हे यरूशलेमन जुवान्यू, मारो केरता रेडू मा पुण आपणो केरता एने आपणो सोराह केरता लेणेन. 29कारण देखू, ते दिह आविह हि तामाय माणहे केती, धन्य ते वांझ हि एणेन प्रसवलेली उदरे, एने ते स्तन तान केरता दुध पिवाळील नाहं.” 30ता टायीमा “ते बोयडान केणेंन लाकती कि आमरा उपेर पड़ा, एने टेकड्यान केती आमूह हाफू.”

31कारण ते नीला झाडांन हेरी इही केरणू तर ते हुकील हेरी काय केरूह? 32ते दिहरी दुय माणहा पुण जे कुकर्म केरतीन एता तान हेरी मारणे केरता लेईन गीया. 33जेवी ता ती जागे ज्याह कवटी केणु ताहारी पोचील, तेवी ताहारी ता उन्जू दुय सिनालो केरणाराह भी एता एकाह जेवडी उगे एने दिहीराह डाखरीउगे क्रुसांपोर चेढाविल. 34तेवी यीशु कियील, “हे आबोक न्याह क्षमा केर, कारण न्याह मालूम नाहं का ज्या काय केरतेह?” एने ता चिठ्या टाकीन तान फाडका वाट लीईल.

35माणहे उबरेय-उबरीन देखताला, एने अधिकारी भी थट्टा केरी-केरीन केताला, का ज्यो दिहीरा वोचाडील, जर ज्यो मसीह बोगवानान निवाडील हि ते जीवाह वोचाड ली. 36शिपाई भी आहनी आवील एने ताह स्पंज आपिन तान थट्टा केरीन केताला, 37तू यहूदीयान राजा हि ते, जीवाह वोचाड. 38एने तान मुंडीपोर एक दोषपत्र भी लागाडील एता: “ज्यू यहूदीयान राजा हि.”

क्रुस पोर मोन फिरावणार पापी

39जो अपराधी ताहेऱ्या टांगील एता, तान विचमाय एकजाण तान निंदा केरीन कियील, “काय तू मसीह हीच ने? ते जीवाह एने आमूह भी वोचाड” 40ज्ञान केरता दिहरो ताह जुलीन कियील “काय तू बोगवानाह बित नाहं? तू पुण तर तोच दण्ड भोगती हि, 41एने आमु तर न्याय नुसार दण्ड भोगती हि, कारण आपणो कर्माचेच फोल भोगती हि; पुण तान काही गुन्हो नाहं किरील.” 42“तेवी तान कियील, हे यीशु जेवी तू आपणो राज्यातम आवही, तर मारी इआवीह मेलही.” 43तो ताह कियील, “मी तुवाह खेरीच केथु का आज तू मार हेर्यो स्वर्ग लोकामाय रेहि.”

यीशुन जीव निकेलणो

(मत्ती 27:45-56; मरकुस 15:33-41; यूहन्ना 19:28-30)

44आहनी आहने दिहीरा सुमारास तिसऱ्या सुमारा ताहवोर आखा देशाम आंधारो पोडीन गीयो. 45एने सूर्यान उजालो नाहीसा एनो, एने मंदिराममाय वालो पोडदु विचमाय फाटीन दुय भाग एय गीयू, 46एने यीशु मोठली आवाजामाय आयडीन कियील, हे पित्या, मी मारो आत्मा तारो आथाम होपथू “एने हे बोलीन आपणो जीव सोडील.” 47अधिका-यान जो काय एनो तो देखीन बोगवानान महिमा किरील, एने कियेल “निश्चित ज्यो माणुह धार्मिक इतू.” 48एने गेर्दी जी हे देखणेन एक्ठाच जोमनि एती, आवो घेटनाह देखीन छाती ठोकत निकलीन गीयी. 49एने तान आखा ओलखातीन, एने ज्यू बायकू गलीलामरीन ता हेर्यू आवील एती, ती सेटा उबरीन ज्यो आखो देखताली.

अरिमतियाहने योसेफ हेरी यीशुह बुजणो

(मत्ती 27:57-61; मरकुस 15:42-47; यूहन्ना 19:38-42)

50ताहारी योसेफ नावान महासभान एक सदस्य एतो तो सज्जन एने धार्मिक माणुह इतू. 51एने तान योजना एने तान आखा कामांन प्रसन्न नाह एता तो यहूदीयान नगरात अरीमथीयान रेणार एने बोगवानान राज्यान वाट देखणार एतो. 52तान पिलातुसान आहनी आवीन यीशुन डील मांगील. 53एने ताह उतारीन मखमलीच्या चादराम गुंडालीन, एने एक माहणे माय मिलील, जी डोंगरापोर खोदेल एती; एने ज्यामाय केधीच कुणीहुच मिलील गीया नाहं. 54तो तियारी केरहू दिह एतो एने शब्बाथ सुरु ला एतो. 55ता बायुकू जे तान हेरी गलीलामाय आवील एता, पासाण पासाण जाइन ता माहु देखील, एने तान शरीर कोहलो प्रकारे मिलील गीया हि. 56तेवी ते जाइन सुगंधीत वस्तु एने सुगंधीत तेल तियार किरील; एने शब्बाथ एक दिह तास आज्ञा च्या नुसार विश्रांती लीईल.

Currently Selected:

लूका 23: NLXNT

Highlight

Copy