Machitilo 5
5
1SEMBE muntu muyake zina lake Ananiya pamo na Safira mkazi wake esitisya chintu chaŵo, 2epungulapo chitema chake, mkazi wake ezomerezyana naye, eulapo chitwa nochiika mnkonde mwa apostolo. 3Lomba Petro enena, Ananiya, nga Satana ezuzyiranji mtima wako kuti umpempenyeke Mzimu Mtuŵa, nopungulapo chitema cha ula munda? 4Pewenze nawo kansi siwenze wako? positiwa siwenze pa mpamvu yako? Nga wipanga syani ichi mu mtima wako? uliyopempenyeka ŵantu sembe Mlungu. 5Nipo Ananiya poŵamvwa malizu aŵa echiwa pansi efwilatu: naŵo ŵonse ŵechimvwa ŵechita mwezo ukuru. 6Alumbwana naŵo eima, nomzeŵezya nomtwala kunja nomuŵika.
7Nipo yenzepo tukapitepo nga ni tunsita tutatu mkazi wake eloŵa wosaziŵa icho chachitika. 8Naye Petro emnenera, Uniuzye kati mwisitisya uyo munda ndalama mwakuti? Echiti, Inde, mwakuti. 9Lomba Petro enena naye, Nga pamwazomerezyana kumuyezya Mzimu wa Asikuru? ŵona, makasa a aŵo ŵaika alume ŵako ali pa mulyango, akutwale nawe kunja. 10Naye echiwa lombalomba mnkonde mwake efwilatu; na alumbwana poloŵa emfwanga wafwa, emtwala kunja nomuŵika pa alume ŵake. 11Chintente chikuru chiizila eklezya yamsuma na ŵonse amene ŵala echimvwa ivi.
12Nipo na manja a apostolo vichitiwa mu ŵantu viziŵikwilo na vizwezwe vinyinji; naŵo ŵonse enze na mtima umo mlukoro lwa Solomoni. 13Sembe mwa ŵala ŵesalapo mwenzeve yeka umo ekaŵalala kulikungumizya kwaŵo: sembe maumba eŵachinzika; 14naŵo ŵozomera eyangizyiwa kopulamo kwa Asikuru, winji wa analume na anakazi kumo, 15chukanga mpakotwala kunja ku miseo alilwele, noŵalalika pa malili na pa visampi, kuti popita Petro chukanga chimvwirimvwiri chake chisitike umo wa aŵo. 16Lilongana liumba nalo lofumila ku minzi yozunguluka Yerusalemi, eula ŵolwala na aŵo ŵozuzika na mizimu ya lunsa: naŵo ŵepoleshewa ŵonse.
17Sembe mkuru wa ansembe eima na ŵonse ŵenze naye pamo (ni ŵa chipatuko cha Asaduki), ezula ukwa, 18eŵakata apostolo noŵaika pomangiwa pa aipa. 19Sembe malaika wa Asikuru ezulapo visasa vya kambolimboli usiku, efuma naŵo kunja echiti, 20Nkoyani, mkapaname mchipupilo nolaŵira ku ŵantu malizu ŵonse a Moyo uno. 21Naŵo akamvwe eloŵa mchipupilo mmawa kukati ngwee, enzosambizya. Sembe mkuru wa ansembe echiza na aŵo ŵenze naye pamo, elonganika ansaka na akuru ŵonse a ŵana a Israeli, etuma malizu ku kambolimboli akuti aletewe. 22Sembe manjolinjoli amene eyako aliyoŵafwanga mkambolimboli, ewereramo elulula 23echiti, Tafwanga kambolimboli kaluzale kazalilo na achilindila enzepeneme pa milyango: sembe pamene patazulapo taŵona muliye yeka umo. 24Lomba pamene mkuru wa chipupilo na akuru a ansembe pechimvwa malizu aŵa enzokanganya naŵo kwene kantu umo ichi mchiti chikulile. 25Nipo echiza chite eŵauzya kuti, Ŵonani, analume ŵala emwiika mkambolimboli ali mchipupilo alipeneme nosambizya ŵantu. 26Pamene apo echiya mkuru pamo na manjolinjoli, echiza naŵo koŵanasisya, pakuti eŵayopa ŵantu angaŵapozere myala. 27Naŵo akaze naŵo eŵaika pa nsaka ya milandu. Nipo mkuru wa ansembe eŵakonsha 28echiti, Timchimulisyani msasambizya mzina ili; lomba ŵonani, mwazuzya Yerusalemi na mayeruzyo ŵanu nosakotiziisya na mlopa wa uyu muntu. 29Sembe Petro na apostolo eyasuka echiti, Tommvwila Mlungu kupula ŵantu. 30Mlungu wa ausu wasu eusya Yesu wimwipaya nompachika pa chimuti. 31Wamene uyo ni wechikwezeka Mlungu ku kwanja kwake kwendi aŵe Mfumu na Mpuzumushi koŵapa Israeli kulapa nolekelewa kwa viipa. 32Nase nise ntoni zya ivi, na Mzimu Mtuŵa naye, wakuŵapa Mlungu amene ŵala ommvwila.
33Naŵo akamvwe echontewa mitima echiti aŵapaye. 34Lomba epanama pa nsaka muyake, Mfarisayo, zina lake Gamaliyeli, msambizi wa dango, wozila ku ŵantu ŵonse, epanga kuti afumye apostolo kunja kansita katonto. 35Enena naŵo, Mwaŵantu mwa Israeli, chenjerani na ŵantu aŵa umo mumti mchitire. 36Pakuti pantanzi pa nsiku zino eima Teuda elitumfya; wamene wechizomerezyana naye ŵantu ŵayake nga ni myanda ine: naye uyo epaiwa, naŵo ŵonse amene emmvwila eng'ondoka sechishiwa muntu. 37Pavuli pa uyu eima Yuda wa ku Galilaya pa nsiku zyolembewa ŵantu, ekokako ŵantu amkonke: uyo soti echenekeka, naŵo ŵonse amene emmvwila emwazika. 38Lomba nunena namwe, Patukanani naŵo ŵantu aŵa, ŵalekeni ŵene: pakuti kati nzeru iyi kano mulimo uyu vufuma ku ŵantu vize viwishiwe: 39sembe kati vufuma kwa Mlungu simti mkumeko kuviwisya; mngaŵoneke chukanga akulwa na Mlungu. 40Ŵeve ezomerezyana naye: nipo akaŵaite apostolo kwaŵo eŵakwapula noŵapanga kusalaŵira mzina la Yesu, noŵasuzula. 41Teti eimapo pa menso pa nsaka nosangalala pakuti echishiwa ŵowamila kupuvuka pa mutu pa Zina ilo. 42Naŵo nsiku zyonse mchipupilo na mmang'anda nteleka kusambizya noŵirizya kuti Yesu ni Kristo.
Currently Selected:
Machitilo 5: MA23
Highlight
Share
Copy
Want to have your highlights saved across all your devices? Sign up or sign in
Mapangano Alomba © Bible Society of Zambia, 1923.
