M. Yohana 8

1SEMBE Yesu echiya ku lupiri lwa Elaya. 2Lomba mawa na mpepo eloŵa soti mchipupilo, na ŵantu ŵonse emzila; naye enkala pansi noŵasambizya. 3Alembi naŵo na Afarisayo echiza naye mwanakazi wofwanikizyiwa pochende; emuŵika apo pakati 4emuuzya, Msambizi, uyu mwanakazi wafwanikizyiwa pochende, pamene penzochita. 5Lomba mdango Musa etipanga kwapozera myala ŵoteti: nga mweo munene tyani zyake? 6Elaŵira ichi momuyezya, aŵe nacho chompera mlandu. Sembe Yesu eŵerama nolemba pamsili na munwe wake. 7Lomba pechikakasyomkonsha eŵinuka noŵauzya, Uyo wa mweo aliye viipa natatikompozera mwala. 8Naye eŵerama soti nolemba pamsili na munwe wake. 9Naŵo pechimvwa efumamo umo umo, chitatikile mkuru kuza na wosililila: na Yesu esala yeka na mwanakazi apo penze pakati. 10Nipo Yesu eŵinuka enena naye, Mwanakaziwe, ali kuni aŵo? kansi paliye wakupa mlandu? 11Echiti, Paliye muntu, Asikuru. Naye Yesu echiti, Chukanga neo sinukupa mlandu: nkoya; chitatikile lero usaifya soti.]

12Lomba Yesu elaŵira naŵo soti echiti, Ne nine msaniko wa charo cha pansi: uyo onikonka sati ayende mu mfinzi, lomba azaŵe na msaniko wa moyo. 13Tetyo Afarisayo enena naye, Ulichitira untoni wamwine; untoni wako nte wendi. 14Yesu eyasuka eŵauzya, Chukanga nulichitira untoni namwine untoni wangu ni wendi, panuziŵa kwinifuma na kunikuya; sembe mweo simuziŵa kwinifuma kano kunikuya. 15Mweo mupingula mwa muŵili; neo sinupingula muntu. 16Inde, kati nupingula upinguzi wangu ni wendi, pinisali neka, sembe neo na Ŵata enituma. 17Inde, mdango lanu mwilembewa kuti untoni wa ŵantu aŵiri ni wendi. 18Neo nulichitira untoni namwine, na Ŵata enituma onichitira untoni. 19Tetyo enena naye, Ali kuni auso? Yesu eyasuka, Simuniziŵa neo kano Ŵata: angati muniziŵa neo sembe muziŵa Ŵata soti. 20Aŵa malizu eŵalaŵilila moŵikiramo mpango zya mchipupilo penzosambizyamo: paliye muntu emkata, paikaliye nakuza nsita yake.

21Lomba enena naŵo soti, Nuimapo, namwe mze munisake nofwilamo mviipa vyanu: kunikuya simngazeko. 22Tetyo Ayuda echiti, Kansi alipaye, paakuti, Kunikuya simngazeko? 23Naye eŵauzya, Mweo nimwe a pansi; ne nine wa kumulu: mweo nimwe a charo cha pansi; neo sinili wa charo cha pansi. 24Ni panamuuzyani kuti mufwile mviipa vyanu: pakuti mkakanozomera kuti nine wamene mufwile mviipa vyanu. 25Naŵo emkonsha, Niwe ŵani? Yesu eŵauzya, Nine chamene icho chinunena namwe soti chitatikile poyamba. 26Nili navyo vinyinji vyolaŵira nopingula vya mweo: sembe uyo enituma ni wendi; na vintu vinichimvwa kwake ni vinunena ku charo cha pansi. 27Ŵeve nteziŵa kuti enzonena naŵo zya Awisi. 28Nipo Yesu echiti, Apo mkazomuimya Mwana wa muntu ninga mziŵe kuti nine wamene, na kuti sinuchita kantu neka, sembe nga ni umo Ŵata mwechinisambizyira ni mnulaŵilila. 29Uyo enituma ali nane pamo; aliyonisiya neka; pakuti nuchita nsiku zyonse vila vumtemwesya. 30Penzonena ivi anyinji emmvwila.

31Lomba Yesu enena naŵo Ayuda ŵala emmvwila, Kati munkalilila mmalizu ŵangu nimwe chendi asambili ŵangu, 32namwe moziŵa vyendi, na vyendi vikamchisyeni wanoŵene. 33Ŵeve emyasuka, Se nise mbuto ya Abrahamu, tiliyonkalapo ukapolo ku muntu nsiku zyonse: muneneranji kuti mkachishiwe wanoŵene? 34Yesu eŵayasuka, Lezee lezee numuuzyani, Ali wonse ochita viipa ni kapolo wa viipa. 35Na kapolo ntonkalave mng'anda: mwana onkalilila mperampera. 36Teti kati Mwana akamchisyani wanoŵene mwakuŵa ŵanaaŵene ŵendi. 37Nuziŵa kuti nimwe mbuto ya Abrahamu; lomba musakonipaya, pakuti malizu ŵangu aliye malo muli mweo. 38Nulaŵira vila viniŵona kwa Ŵata: namwe soti muchita vila vimwichimvwa kwa ausu wanu. 39Ŵeve eyasuka nomuuzya, Ausu wasu ni Abrahamu. Yesu enena naŵo, Mngati nimwe ŵana a Abrahamu sembe muichita milimo ya Abrahamu. 40Sembe lomba musakonipaya neo, na muntu numuuzyani vyendi vinichimvwa kwa Mlungu, chamene chiliyochita Abrahamu. 41Mweo muchita milimo ya ausu wanu. Ŵeve enena naye, Sitivyalikwa mkachenche; tiri naŵo Ausu wasu ŵamo, ni Mlungu. 42Yesu eŵauzya, Angati Mlungu ni Ausu wanu sembe munitemwa neo, penichiza kufuma kwa Mlungu; pakuti niliyekuza neka, lomba enituma niye. 43Ni chinji pamsaziŵisya kunena kwangu? Ni pakuti simkuma kumvwa malizu ŵangu. 44Mweo ausu wanu ni muŵepeki ula, na makumbwilo a ausu wanu ni amupangwochita. Uyo enze chipaya maŵeromaŵero, aliyonkazikika mvyendi, pamuliye vyendi muli yeve. Yeve akatala wenye otala vyake mwine, pakuŵa nyambweka na awisi wake. 45Lomba panulaŵira vyendi simunimvwila. 46Ni ŵani wa mweo onipa mlandu wa viipa? Kati nunena vyendi ni chinji pamsanimvwila? 47Uyo ali wa Mlungu oŵamvwila malizu a Mlungu: mweo pamsali a Mlungu ni pamsaŵamvwila. 48Ayuda ŵala eyasuka enena naye, Kansi situnena chendi kuti nimwe Msamariya na kuŵa na chiŵanda? 49Yesu eyasuka, Sinina chiŵanda; sembe neo numlemekezya Ŵata, namwe munichitira mperu. 50Sinusaka mchinzi wangu namwine: alipo umo osaka nopingula. 51Lezee lezee numuuzyani, Kati muntu akasunga malizu ŵangu sati azaŵone imfwa vyaka. 52Ayuda enena naye, Lomba tuziŵa kuti mwina chiŵanda. Abrahamu echifwa, na aŵirizi ŵala; namwe mkuti, Kati muntu akasunga malizu ŵangu sati azalaŵe imfwa vyaka. 53Kansi nimwe akuru kwapula ausu wasu Abrahamu echifwa? na aŵirizi echifwa: mulilinganji? 54Yesu eyasuka, Kati nulichinzika neka mchinzi wangu ni watyala: onichinzika ni Ŵata, umkuti ni Mlungu wanu, 55lomba mkaliyomziŵa. Sembe neo numziŵa; angati nikuti sinumziŵa sembe nupalana na mweo, anyambweka: lomba numziŵa nosunga malizu ŵake. 56Ausu wanu Abrahamu esangalala kuŵona siku langu; eliŵona notemwa. 57Teti Ayuda enena naye, Mkaliyofwika msinku wa virimika makumi asano, kansi mwimuŵona Abrahamu? 58Yesu eŵauzya, Lezee lezee numuuzyani, Apo Abrahamu pakaliyovyalikwa nenzepo neo. 59Pamene apo etola myala ampozere nayo: sembe Yesu ezyeŵa nofuma mchipupilo.

Currently Selected:

M. Yohana 8: MA23

Highlight

Copy