M. Yohana 9

1LOMBA penzopita yeve eŵona muntu mpofu chivyalikwilo. 2Naŵo asambili ŵake emkonsha kuti, Rabbi, ni ŵani eifya, uyu muntu kano emvyala, pechivyalikwa mpofu? 3Yesu eyasuka, Na uyu aliyoifya na emvyala, sembe ni kuti milimo ya Mlungu ivunduluke muli yeve. 4Tokata milimo ya uyo enituma pamkali mzuŵa: ukuza usiku wasakatiramo muntu milimo. 5Apo panikali mcharo cha pansi nine msaniko wa charo. 6Akalaŵire teti etaya mata pansi, nokanda matika na mata, nomzoleka matika ku menso 7nomuuzya, Nkoya ukasambe mtenga la Silowamu (ni kuti kulongosolewa Lotumiwa). Teti echiyosamba ewera noŵona. 8Teti enekwaŵo na ŵala emuŵona chomba kuti ni mkavu echiti, Kansi nti uyo enzonkala pansi nosengasenga? 9Ŵambi echiti, Ni wamene: ŵambi echiti, Yai, olingana naye tyala. Yeve echiti, Ne nine wamene. 10Naŵo emkonsha, Nga menso ŵako atwanuka syani? 11Eyasuka, Uyo muntu woitiwa Yesu wakanda matika nonizoleka ku menso noniuzya, Nkoya ku Silowamu ukasambe: teti nayosamba, nane nalola soti. 12Enena naye, Ali kuni uyo? Echiti, Nuziŵa lini.

13Emtwala kwa Afarisayo uyo enze mpofu kale. 14Lomba penze pa sabata Yesu pechikanda matika notwanusya menso ŵake. 15Tetyo Afarisayo naŵo soti emkonsha, Walola tyani soti? Naye eŵauzya, Waniika matika ku menso, nane nasamba nolola. 16Tetyo ŵambi Afarisayo echiti, Uyu muntu ntefuma kwa Mlungu pasasunga sabata. Sembe ŵambi echiti, Nga muntu muŵipa angachite syani viziŵikwilo vyoteti? Penze kapatukano pali ŵeve. 17Naŵo enena soti na mpofu, Unenanji zyake, pakutwanusya menso? Ichiti, Ni muŵirizi. 18Tetyo Ayuda aliyozomera zyake zyakuti enze mpofu noŵona soti, mpaka pechiita emvyala a uyo eŵona soti 19noŵakonsha kuti, Kansi uyu ni mwana wanu umkuti ni mpofu kavyalikwilo? nga oŵona tyani lomba? 20Emvyala eyasuka echiti, Tuziŵa kuti uyu ni mwana wasu na kuti evyalikwa mpofu: 21lomba mwalolera soti situziŵa, kano ni ŵani wamtwanusya menso situziŵa; ni mkuru; nanene yeka. 22Emvyala enena teti poŵayopa Ayuda: pakuti Ayuda epangana kale kuti kati ali wonse akamzomera kuti ni Kristo afumyiwe msunagoge. 23Tetyo emvyala ni pechinena, Ni mkuru; mkonsheni yeve. 24Naŵo emuita soti pakaŵiri muntu mpofu emuuzya, Mchinzike Mlungu: tuziŵa kuti uyu muntu ni muŵipa. 25Naye eyasuka, Kati ni muŵipa sinuziŵa: nuziŵa chimo, chakuti nenze mpofu, lomba nuŵona. 26Enena naye, Wakuchitiranji? wakutwanusya syani menso? 27Eŵayasuka, Namuuzyani na lomba, namwe muliyekumvwa: ni chinji pamsaka kumvwa soti? nga namwe soti musaka kuŵa asambili ŵake? 28Naŵo emtukana echiti, Niwe msambili wake, sembe seo nise asambili a Musa. 29Tuziŵa kuti Mlungu elaŵira na Musa: sembe uyu situziŵa kwechifuma. 30Muntu eyasuka eŵanenera, Nga tyani, chamazuzu ni ichi, chakuti simuziŵa kwechifuma, naye wanitwanusya menso. 31Tuziŵa kuti Mlungu ntomvwila aipa: sembe kati ali wonse akaŵa chilambila wa Mlungu nochita chipangwilo chake ommvwila wamene uyo. 32Chitatikile kuyamba charo kukaliyomvwika kuti ali wonse otwanusya menso a mpofu chivyalikwilo. 33Angati uyu muntu sefuma kwa Mlungu sembe sokumochita kantu. 34Ŵeve eyasuka emuuzya, Weo ng'aleze wivyalikwila mviipa, nawe kansi utisambizya seo? Naŵo emfumizya kunja.

35Yesu echimvwa kuti amfumizya kunja; naye pomfwana echiti, Kansi uzomera pa Mwana wa Mlungu? 36Eyasuka echiti, Ni ŵani nakale, Asikuru, nimzomere? 37Yesu emuuzya, Wamuŵona na olaŵira nawe ni wamene. 38Echiti, Asikuru, nuzomera. Naye emlambila. 39Yesu echiti, Ku upinguzi ni kwinichiza mcharo cha pansi, kuti ŵala asaŵona aŵone, na ŵala oŵona aŵe mpofu. 40Afarisayo ŵala ŵenze naye pamo echimvwa ivi nonena naye, Nase kumo nise mpofu kansi? 41Yesu eŵauzya, Angati nimwe mpofu sembe muliye viipa: sembe lomba pamkuti, Tuŵona, viipa vyanu viri kankalilo.

Currently Selected:

M. Yohana 9: MA23

Highlight

Copy