M. Mattayo 16

1LOMBA echiza Afarisayo na Asaduki, emuyezya emsenga kwaŵonesya chiziŵikwilo chofumila kumulu. 2Sembe yeve eyasuka eŵanenera, Mchingulo mkuti, Kuŵe ngwee, pakuti mikumbi yasweta. 3Soti mmawa, Lero kuŵe bii, pakuti mikumbi yasweta kobiriŵisya. Muziŵa kulosya chinso cha mikumbi, sembe viziŵikwilo vya nsita ino vumkangani. 4Luko luŵipa na lochende lusakasaka chiziŵikwilo; lomba ntechiti chipewe kwaŵo chiziŵikwilo sembe chiziŵikwilo cha Yona. Naye eŵasiya efumapo.

5Lomba asambili ŵala efwika kusilya liyake eluŵa kuula mitanda. 6Yesu eŵanenera, Ŵonani, chenjerani na chizamba cha Afarisayo na cha Asaduki. 7Naŵo ekonshana ŵekaŵeka echiti, Ni patiliyoula mitanda. 8Yesu eziŵa echiti, Aa mwatonto mvwano, ni chinji pamukonshana mwekamweka payumsoŵani mitanda? 9Kansi na lero simuziŵa nokumbuka mitanda isano ila ya ŵala myanda makumi asano na maluŵango angani emwifusa? 10Pambi mitanda isano na iŵiri ila ya ŵala myanda makumi ŵane na vitundu vingani vimwifusa? 11Nga pamsaziŵa kuti niliyonena namwe zya mitanda? Lomba chenjerani na chizamba cha Afarisayo na cha Asaduki. 12Pamene apo ŵeziŵisya kuti aliyoŵauzya kuchenjera na chizamba cha mitanda, sembe na chiyeruzyo cha Afarisayo na Asaduki.

13Lomba akaze Yesu ku chitwa cha ku Kaisariya wa Filipo eŵakonsha asambili ŵake echiti, Nga ŵantu akuti Mwana wa muntu ni ŵani? 14Naŵo echiti, Ŵambi akuti ni Yohana Mbatizi; ŵambi Eriya; ŵambi Yeremiya, kano umo wa aŵirizi. 15Enena naŵo, Nga mweo mkuti ne nne ŵani? 16Naye Simoni Petro eyasuka echiti, Nimwe Kristo uyo, Mwana wa Mlungu wamoyo. 17Yesu naye eyasuka emnenera, Wina shuko weo, Simoni Bar‐Yona: pakuti muŵili wa nyama na wa mlopa uliyokuvundululila ichi, sembe Ŵata ŵangu wa kumulu niye. 18Nane soti nukuuzya kuti niwe Petro: pa luŵambe ulu ni penti nimange eklezya yangu; na milyango ya Hade nteiti itang'e kwisusya. 19Nize nikupe vyozulila vyofumu wa kumulu: chiri chonse chiuti umange mcharo muno chiŵe chomangiwa na kumulu, na chiri chonse chiuti umangulule mcharo muno chiŵe chomangululiwa na kumulu. 20Nipo eŵapanga asambili kuti asauzya muntu kuti ni Kristo.

21Chitatikile nsita yamene ila Yesu eyamba kwalululira asambili ŵake kuti sangalekekuya ku Yerusalemi, kuyozuzika na vinyinji kwa akuruakuru na akuru a ansembe na alembi, nopaiwa nozyushiwa siku la mazo. 22Nipo Petro emuula eyambomchinsa kuti, Paŵe lusungu panu, Asikuru: ichi sichiŵa teti kwanu. 23Sembe yeve echeuka echiti kwa Petro, Pita kuvuli kwangu, we Satana: niwe chonipilingisya: pakuti sulukanira vya Mlungu sembe vya ŵantu. 24Pamene apo Yesu eŵanenera asambili ŵake, Kati muntu opangwa kuza kuvuli kwangu naŵolilesya noula msalaba wake nonikonka neo. 25Chifukwa ali wonse opangwa kuupuzumusya moyo wake azautaye: naye ali wonse ati azautaye moyo wake pa mutu pangu azaufwange. 26Kansi muntu ashuke tyani akapoka charo chamsuma nolipa moyo wake? kano muntu apelekenji kusintanisya na moyo wake? 27Pakuti Mwana wa muntu aaze nolemo wa awisi pamo na malaika ŵake; ninga pamene apo azawezye ku muntu ali wonse mwa milimo yake. 28Lezee numuuzyani, Alipo ŵambi a aŵa alipeneme pamene pano amene ntati alaŵe imfwa peka patonto mpaka pati amuŵone Mwana wa muntu akuza mu ufumu wake.

Currently Selected:

M. Mattayo 16: MA23

Highlight

Copy