M. Mattayo 15

1PAMENE apo echiza kwa Yesu Afarisayo na alembi kufumira ku Yerusalemi, echiti, 2Asambili ŵanu olumpiranji chisiilano cha akuru? pakuti ntosamba ku manja akausyakulya. 3Yeve eyasuka eŵanenera, Nga mweo soti mulumpiranji tetulo la Mlungu chikomo cha chisiilano chanu? 4Pakuti Mlungu echiti, Wolemekezya auso na anyoko: soti, Wamene omnena awisi kano anyina chiŵichiŵi naafwe chendi. 5Sembe mweo mkuti, Ali wonse ati anene kwa awisi kano anyina, Icho chimusakoshuka nacho kwangu chipewa nsembe kwa Mlungu, 6wamene uyo samlemekezya awisi. Mulichisya latyala lizu la Mlungu chikomo cha chisiilano chanu. 7Mwaŵolipazya mweo, Isaya elosya wino zya mweo zyakuti,

8Mtundu uyu unilemekezya na milomo yaŵo,

Sembe mitima yaŵo iri kutali na neo.

9Lomba onilambila tyala,

Posambizya kwa mayeruzyo matetulo a ŵantu.

10Nipo eliitira kwake liumba eŵanenera, Imvwani mziŵe: 11Nte icho chuloŵa mkanwa chumfifya muntu; sembe chamene chufuma mkanwa ni chumfifya muntu. 12Pamene apo echiza asambili emnenera, Mwati muziŵa kuti Afarisayo apilingishiwa paamvwa lizu ili? 13Eyasuka echiti, Mmera wonse wamene waliyokomera Ŵata ŵangu wa kumulu uzonyuliwe. 14Ŵalekeni: aŵo ni asululi ŵotulika menso. Kati mpofu ikatangulila mpofu zyonse ziŵiri ziziwe mchisengu. 15Petro eyasuka enena naye, Mtilululire ili linganizyo. 16Naye echiti, Kansi na lomba mkali ŵopululila? 17Simuziŵa kuti chiri chonse chuloŵa mkanwa chikuya mmala, notaiwa ku chungu? 18Sembe ivyo vufuma mkanwa vutulila mu mtima; ni vumfifya muntu. 19Pakuti mu mtima mutulila malingililo aipa, kupaya ŵantu, mauchende, tuchenche, wivi, untoni wa wenye, msiyakuŵi: 20ivi ni vumfifya muntu: sembe kulya wosasamba ku manja ntekumfifya muntu.

21Nipo Yesu efumako kulakwa, epatuka kuya ku chitwa cha Turo na cha Sidoni. 22Lomba ŵonani, mwanakazi Mkanane efuma ku mpaka ula elila kuti, Munichitile chifundo, Asikuru, mwe mwana wa Davide; mwana wangu mwanakazi ozuzika ngako na chiŵanda. 23Sembe yeve ntemyasuka lizu leka limo. Asambili naŵo echiza empapatira kuti, Msuzuleni; chikomo okuwa pavuli pasu. 24Naye eyasuka echiti, Sinitumiwa ku ŵambi sembe ku mbelele zyotaika zya chiŵanza cha Israeli. 25Yeve echiza emlambila kuti, Asikuru, muniyavye. 26Naye eyasuka echiti, Ni chosawamila kuula mitanda ya ŵana nopozera tumponda. 27Lomba yeve echiti, Inde mwandi, Asikuru; chukanga tumponda tulyako manyenyenswa opona pa cholyerapo cha Asikuru ŵaŵo. 28Pamene apo Yesu eyasuka emnenera, Mwanakaziwe, mvwano wako nukuru: nachichitiwe kwako nga ni muupangwila. Naye mwana wake epola chitatikile kansita kamene ako.

29Lomba Yesu eimako kwamene kula epanamila ku chimana cha Galilaya; ekwera ku lupiri nonkala pansi kulakwa. 30Nipo wichiza kwake winji ukuru, wenze naŵo pamo ŵopintya na ŵotulika menso na asilaŵira na ŵopunduka vizo na ŵambi anyinji; eŵankazika mnkonde mwake, naye eŵapozya: 31tetyo liumba ni pelizuzuka poŵona asilaŵira kulaŵira, na ŵopunduka vizo kupola, na ŵopintya kuyendayenda, na ŵotulika menso kuŵona: naŵo emchinzika Mlungu wa Israeli.

32Lomba Yesu eŵaitira kwake asambili ŵake echiti, Mtima wangu ulichitira chifundo liumba ili, pakuti lomba ankala nane nsiku zitatu alive kantu kakulya: sinupangwa kwasuzula na njala yaŵo, kano angalenguke pa njira. 33Asambili emnenera, Tiiŵone kuni muno mmalambo mitanda inyinji teti yokutisya winji woteti wa ŵantu? 34Yesu echiti kwaŵo, Mitanda ingani imuli nayo? Echiti, Isano na iŵiri, na tumasaŵi topendeka. 35Nipo eliuzya liumba kunkala pansi; 36eula mitanda iyo isano na iŵiri na masaŵi, eyamika esuna echipa asambili, na asambili echipa maumba. 37Naŵo ŵonse elyako ekuta: naŵo efusa manyenyenswa esalako ezuzya vitundu visano na viŵiri. 38Ŵala ŵechilya ŵenze analume myanda makumi ŵane, kuza na anakazi na ŵana ni mpuzyo. 39Naye eŵasuzula maumba, eloŵa mu wato echiza ku mpaka wa Magada.

Currently Selected:

M. Mattayo 15: MA23

Highlight

Copy