M. Marko 12

1NAYE etatikolaŵira naŵo mmalinganizyo. Muntu ezikila munda wa mipesya, euzungulusya lusito, ekumba chisengu chokandiramo mvinyu, nomanga ndala nouyapuzisya ku ŵolima munda, na kuya ku charo chimbi. 2Nipo pa nyengo yochera etuma kapolo ku ŵolima aŵo kuti akapokeko ku ŵolima vyotwala vya mmunda wa mipesya. 3Naŵo emuula nomnyata nomuŵinga tyala. 4Nipo etuma soti kapolo muyakwene kwaŵo; wechifwaya luma nommvwisya vyankanza. 5Soti etuma muyakwene; uyo lomba empaya, soti na ayakwene anyinji, ŵambi eŵanyata, ŵambi eŵapaya. 6Lomba enze naye umo, mwana wotemweka: wechituma posalilila kwaŵo echiti, Akamlemekezye mwana wangu. 7Sembe ŵala ŵolima elaŵira ŵekaŵeka, Uyu ni mpyani; tiyeni timpaye, chipuna ichi chiŵe chasu. 8Nipo emuula empaya, nomtaya kunja kwa munda uyo wa mipesya. 9Nga lomba azachitenji mwine wa munda? aaze noŵacheneka aŵo ŵolima, azaupe ŵambi uyo munda. 10Mkaliye nopenda kansi chukanga malembo aŵa:

Mwala wechikana ŵomanga ng'anda,

Wamene ula ni wichishiwa mutu wa mngondya:

11Ichi chifumila kwa Asikuru,

Ni chozizwisya mmenso mwasu?

12Naŵo esakomkata; lomba eliyopa liumba, pakuti eliziŵisya kuti walaŵira linganizyo ili koŵasusya ŵeve: naŵo emsiya eimako.

13Naŵo eŵatuma kwake ŵambi a Afarisayo na ŵene Herode kuti amkate pa malizu. 14Lomba ŵeve akaze enena naye, Msambizi, tuziŵa kuti nimwe a chendi ŵosapwerera ŵantu, pakuti ntemulola chinso cha ŵantu, lomba musambizya chendi njira ya Mlungu: Kansi chuwamila kumsonkera Kaisari msonko, kano ntemo? 15Tosonka, kano tisati tosonka? Naye pochiziŵa chiŵepeko chaŵo eŵanenera, Muniyezizyanji? ndetereni kobiri niliŵone. 16Naŵo eliula. Naye enena naŵo, Nga ichi chimvwirimvwiri na malizu alulembewepo ni vya ŵani? Emnenera, Vya Kaisari. 17Yesu echiti kuli ŵeve, Pelekani kwa Kaisari vintu vya Kaisari, na kwa Mlungu vintu vya Mlungu. Naŵo ezizwa naye ngako.

18Lomba echiza kwake Asaduki, amene akuti kuzyuka soti palive, emkonsha kuti, 19Msambizi, Musa etilembera, Kati muntu mkwaŵo akafwa akasiya mkazi pavuli pake, wosasiyapo mwana, mkwaŵo nampyane mkazi wake nomvyalila mbuto mkwaŵo. 20Lomba enzepo pokwaŵo asano na aŵiri: wotatika elingula mkazi echifwa wosasiya mbuto; 21na wakaŵiri empyana, naye echifwa wosasiya mbuto pavuli pake; na wakatatu ni tetila: 22naŵo asano na aŵiri aliyosiya mbuto. Posila pake ŵonse na mwanakazi naye echifwa. 23Nga pozyuka soti akaŵe mkazi wa ŵani kwa aŵo? pakuti ŵonse asano na aŵiri emchisya mkazi waŵo. 24Yesu eŵanenera, Kansi nte chifukwa ichi ni pamuluvya, pakuti simuŵaziŵa malembo kano mpamvu ya Mlungu? 25Chikomo apo pati azazyuke kwa akufwa ntolingula kano kulinguliwa; ali nga ni malaika kumulu. 26Sembe zya akufwa zyakuti oushiwa, mkaliyopenda kansi mbuku la Musa, pa malo pa Chimpuza, kuti Mlungu enena naye echiti, Ne nine Mlungu wa Abrahamu, na Mlungu wa Isake, na Mlungu wa Yakobo? 27Nte Mlungu wa akufwa, sembe wa amoyo: muluvya kwene kantu.

28Lomba echiza umo wa alembi, eŵamvwa ŵenzokonshana pamo, naye poziŵa kuti waŵayasuka paweme emkonsha, Ni tetulo lanji likuru kupula ŵonse? 29Yesu eyasuka, Likuru ni ili, Imvwa, Israeli; Asikuru Mlungu wasu, Asikuru ni umo: 30nawe womtemwa Asikuru Mlungu wako na mtima wako wonse, na moyo wako wonse, na nzeru zyako zyonse, na vizo vyako vyonse. 31Lakaŵiri ni ili, Womtemwa muyako nga ni muulitemwera wamwine. Paliye tetulo limbine likuru kupula aŵa. 32Mlembi naye emnenera, Ni chendi, Msambizi, mwanena paweme kuti ni umo, na kuti paliye muyake sembe yeve yeka: 33soti kumtemwa na mtima wonse, na nzeru zyonse, na vizo vyonse, na kumtemwa muyake nga ni mwakulitemwera mwine yeka, ni kupulamo ngako vyotilila vyoshoka vyamsuma na nsembe zyonse. 34Nipo Yesu akaŵone kuti wayasuka na nzeru emuuzya, Seuli kutali nofumu wa Mlungu. Pavuli pake penzeve yeka umo ekaŵalala kumkonsha lizu liri lonse.

35Yesu naye penzosambizya mchipupilo eyasuka echiti, Onena syani alembi kuti Kristo uyo ni mwana wa Davide? 36Davide mwine echiti mwa Mzimu Mtuŵa,

Asikuru echiti kwa Asikuru ŵangu,

Nkala ku kwanja kwangu kwendi,

Mpaka penti nituchisye tupondo twako mseko wa malwayo ŵako.

37Davide mwine omtula Asikuru; kansi ni mwana wake syani? Naŵo maumba aŵo anyinji esangalala pemumvwa.

38Naye echiti mmayeruzyo ŵake, Chenjerani naŵo alembi, amene opangwoyendayenda na mitopola itali, nopewa malonje pa malo pa makweo, 39na vilimba vyolemo mmasunagoge, na vifuto vyolemo pakulya: 40amene aŵo okhamula ng'anda zya anakazi ŵofwilwa, nokakasya kulomba kolipazya na malizu anyinji; aŵa azakonweshewe ngako.

41Naye enkala pansi pafupi na motilila nsembe, eŵona liumba lenzopoza ndalama motilila: na anyinji asambazi epozamo zinyinji. 42Nipo echiza mwanakazi wofwilwa mkavu, epozamo tundalama tuŵiri tutonto tukufwa kakobiri. 43Naye eŵaita kwake asambili ŵake enena naŵo, Ng'aleze numuuzyani, Uyu wofwilwa mwanakazi mkavu wapozamo zinyinji kupula ŵonse aŵo opozamo motilila: 44pakuti ŵonse aŵo apozamo zyampuzyo; sembe yeve pokavu wake wapozamo vyonse vyenze navyo, vyonse vyakuchila navyo.

Currently Selected:

M. Marko 12: MA23

Highlight

Copy