M. Marko 13
13
1LOMBA penzofuma mchipupilo umo wa asambili ŵake emnenera, Msambizi, ŵonani, ati myala, ŵati! ati mamangiwilo! 2Naye Yesu emnenera, Waŵona kansi mamangiwilo aŵa akuru? nteuti usiiwe pano mwala umo pamulu pa uyake wamene utukanogodobolewa.
3Lomba penzenkezi pa lupiri lwa Elaya poteezyana na chipupilo Petro na Yakobo na Yohana na Andreya emkonsha kunsei kuti, 4Tiuzyeni, ivi viŵepo zuŵanji? nga chiziŵikwilo chiŵe syani chakuti ivi vyonse viri pafupi nosilizika? 5Yesu naye eyambonena naŵo, Nkochenjerani muntu asamluvisyani. 6Anyinji aaze mzina langu azati, Ne nine wamene, noŵaluvisya anyinji. 7Mkazakumvwa zya nkondo na mbili zya nkondo msafipa mitima: ivi vuingonkalapo, sembe posila posali lomba. 8Pakuti mtundu uzoukirane na mtundu, nofumu na ufumu: kuze kuŵe kuteng'endeka kwa charo mmalo mmalo; kuze kuŵe vilala: ivi ni chiyambi cha mazuzyo.
9Molichenjezya mwaŵene: chifukwa azampelekeni kwa akuru a nsaka, namwe mze mkwapuliwe mmasunagoge; soti pa menso pa anduna na pa mafumu mze mpaname mlandu wa neo, kuŵa untoni kwaŵo. 10Evangelo tangaiŵirizyiwe ku mitundu yonse. 11Pamene akamuulani ku upinguzi nomvumbulani msafipiratu mitima na chimti mkanene: chiri chonse chimti mkapewe pa kansita ako mkanene chamene: pakuti mulaŵira nti mweo sembe Mzimu Mtuŵa. 12Naye mkwaŵo azamvumbule mkwaŵo ku imfwa, na awisi mwana wake, na ŵana azaŵaukire oŵavyala na kwapaisya. 13Namwe mze mtinkiwe na ŵantu ŵonse mlandu wa zina langu: sembe wamene ati aŵokoselela kuza na kumpezyo uyo azapuzumushiwe.
14Sembe apo mkazoŵona mapasuliwe a tanta alupaname pasawamila (wamene openda naziŵe), pamene apo aŵo ali mu Yudaya nautukire ku malupiri: 15uyo naye ali pa mtenje wa nanda asaseluka kano kuloŵa kufumyamo kantu mnanda mwake: 16uyo naye ali pa munda asawera kuzoula mwinjira wake. 17Malilo kwa aŵo ana vumo na aŵo onyonsya pa masiku ŵala! 18Mweo msenge kuti kusaŵa pa mwela. 19Pakuti mmasiku ŵala paze paŵe matamano, ŵotetyo akaliyoŵapo chitatikile popoza vyaro vyechipoza Mlungu kuza na lero, soti ntati azaŵepo nsita zyonse. 20Angati Asikuru aliyochefya aŵo masiku, sembe uliye nopuzumukako muŵili uli wonse: lomba pa mutu wa ŵosaluliwa aŵo ŵechisalula ni pechichefya aŵo masiku. 21Pamene apo kati ali wonse akazomnenelani, Ŵona, Kristo ali pano; kano, Ŵona, uko; msazomerezya: 22pakuti azauke ŵolipazya Kristo na aŵirizi achipazyo, amene azalangizye viziŵikwilo na vyozizwisya vyakuti aŵaluvisye, kati kukakumika, ŵosaluliwa. 23Chenjerani mweo: ŵonani, namuuzizyani katera vyonse nsita paikaliyekuza.
24Pa masiku ŵala akaza kuti sile aŵo matamano zuŵa lize lisanguke mfinzi, na mwezi nteuti uzolangizye kutuŵa kwake, 25na ntandara zize zipone kumulu, na mpamvu zya kumulu zize zisung'unzikiwe. 26Pamene apo azamuŵone Mwana wa muntu akuza mmikumbi na vizo na mtupo ukuru. 27Nipo pamene apo azaŵatume malaika noŵalonganika ŵosaluliwa ŵake kufumila mmpepo zine, kunsilililo kwa charo cha pansi kuza na kunsilililo kwa kumulu.
28Lomba sambilani pa chimuti cha chiku linganizyo la chine: pamene msambo wa chine ukayamba kuŵa uŵisi notumba matepo a wine muziŵa kuti chisalo chafwikila; 29soti namwe tetyo pamene mkazoŵona ivi vintu vuchitika, ziŵani kuti yeve ali pafupi, pa milyango. 30Lezee numnenelani, Luko ulu silingapitepo mpaka ivi vyonse paviti vize vichitiwe. 31Charo cha kumulu na cha pansi vize vipite: sembe malizu ŵangu ntapita. 32Sembe zya siku ilo kano zya kansita ako palive muntu oziŵa, chukanga malaika a kumulu, chukanga Mwana, sembe Awisi niye. 33Chenjerani, iŵani tuni nosenga: pakuti ntemuziŵa pairi nsita yake. 34Nga ni muntu elaluka mcharo chimbi, akasiye nanda yake, noŵapa ŵazya ŵake vizo, ku muntu ali wonse mulimo wake, empanga soti wa pa mulyango kuŵa tuni. 35Tetyo mwakuŵa tuni, pakuti ntemuziŵa pati awerere mwine wa nanda, kano mchingulo, kano pakati posiku, kano kombwe polila, kano mmawa; 36angaze kovurumukizya nomfwangani mtulo. 37Ichi chinunena namwe ni chinunena na ŵonse, Iŵani tuni.
Currently Selected:
M. Marko 13: MA23
Highlight
Share
Copy
Want to have your highlights saved across all your devices? Sign up or sign in
Mapangano Alomba © Bible Society of Zambia, 1923.
