Fagsigadan 14
14
Abram Deyud Ngayu, Igbabo tuwa at ngay Fabarangyan, Teway Diyus Gufud tuwa
1-3Ay bandi nu glugo wan, sik ngay fun gananbarangyanun ayuwayu. E sik fun daul at ngayan Kidulawmir. Nu gmagurang, sis talun Elam. Ay sik sayginan, kanya nataban at fatarabangan fag tuluk fun. At ngayan, Amrapel, Ariyuk, ay Tidal. Amrapel nu gmagurang, sis talun Sinar. Ay Ariyuk nu gmagurang, sis talun Ilasar. Ay Tidal nu gmagurang, sis talun Guyim. Ay Kidulawmir nataban wa kanya fag tuluk fun, anggan at ngay sundalu. Ay glo wan. Nanfabarangyan at fabarangyan fag limak fun. Kanya fag limak fun nu gbanwan, sis datag Urdan.
Ay sis datag Urdan fag ngay fun nu nadungug te, Kidulawmir fag fulan kadasug mangaro, nadiyuganan te, “Mangamam, katsi tam ngay fabarangyan kadasug wan. Nanfamasadan watam. Lumo watam sa sik liskung at ngayan Sidim. Sanya fag liskung, e lino, at ngayan Lino Mayat. Sanya wan dewa gina nu antam gladlagan, teway sanya ban nu antam gfabarangyan.” Ay kanya fag ngay fun sis datag Urdan nalo wa fiya sanya fag liskung, gtaban at ngay sundalu.
Ay kanya fag ngay fun at ngayan, at sadi Bira. Kanya at fun sis fulan Suduma. Ay at sadi, Birsa. Kanya at fun sis fulan Gumura. Ay at sadi, Sinab. Kanya at fun sis fulan Adma. Ay at sadi, Simibir. Kanya at fun sis fulan Sibuyim. Ay at sadi, at fun sis fulan Suar. Ebi at taw nu gngayan sanya fag fulan, fulan Bela yay. Ay katsi, at ngay taw nu gngayan sanya fag fulan, fulan Suar. Ay kanya wa fag limak fun, Kidulawmir fagnanfabarangyanun.
4At fanlonganan ka fag ngay fun fagnanbarangyanun, teway ebi ataw mangaro, Kidulawmir nababo ka fag limak fun sis datag Urdan. Ay siginan nababo, kanya wan tagsugu sanya fag ngay fun. Ay roro nut si was fa-13k banwa nu gasuguwan, sis datag Urdan fag ngay fun nafamabo wa Kidulawmir at ngay suguwan. Katanya at fanlonganan fagnanbarangyanun. 5Ay siginan nafamabo, nu nlangfe wan sik banwa, Kidulawmir nataban at fatarabangan fag tuluk fun siginan at ngay talun. Ay kanya fagayu nalo wan, nanfabarangyan sat nafamabo fag ngay fun.
Ay Kidulawmir fag fulan nu kakbang wan talun Kanaan, igdalan yadi sa sangay fulan. Ay gfabarangyan wa at nadalan mandi. Taguna, Kidulawmir fag fulan indasug sa sik fulan at ngayan Astirut-Karnaim. At taw sanya, taw Refaim. Ay taw Refaim nalabawan wan. Ay taw Refaim nu nalabawan wan, Kidulawmir fag fulan nafabarangyan yangay sas fadogan fag fulan, fulan Am. At taw sanya fag fulan, taw Sus. Taw Sus nalabawan wan. Ay Kidulawmir fag fulan igfatunglus yadi nu glo sat fadogan. Ay indasug sa sik datag daul. Ka fag datag at ngayan, Kiryatayim. Ay at taw sanya, taw Em. Kanya fag ngay taw Em sigon nalabawan wan. 6Ay taw Em nu nalabawan wan, Kidulawmir fag fulan gtunglus yadi. Ay ndasug sa sik lungud talun at ngayu at muyud. At ngayan, Sir. Ay at taw sanya, taw Kur. Ay taw Kur nalabawan wan. Ay Kidulawmir fag fulan nu glo wa gugat, indasug wa sas taw Kur at tigyangan talun. Sanya fag lungud talun, taw nu gngayan, El-Paran. Ay sat dayu baliwa, anwa talun at yud e taw.
7Ay Kidulawmir fag fulan nu glo, inrabing wa sas fulan Kadis baliwa. Ebi at taw nu gngayan ka fag fulan, fulan En-Mispat yay. Ay at taw sanya, taw Amalek. Ay Kidulawmir fag fulan nafabarangyan taw Amalek. Ay nababo wan. Ay taw Amalek nu nalabawan wan, Kidulawmir fag fulan gtunglus yadi nu glo, sas fulan Kasasun-Tamar. Taw Amur, at taw sanya. Taw Amur nalabawan wan.
8-9Ay at ngay taw sis fulan Asasun-Tamar nu nalabawan wan, Kidulawmir fag fulan gtunglus yay nu glo. Ay nu glo wa gugat, indasug wa sas liskung Sidim, sas ke Lino Mayat. Ay manlag di, sanya wan ebi at nafamabo anya fag limak fun, tagbanwan sis datag Urdan. Anggan at ngay sundalu ayuwayu, sanya wan. Mafamasadan wa nanfabarangyan. Ay roro, kanya sigon fag ngay fun sis datag Urdan nalabawan wan. 10Ay sis datag Urdan fag ngay fun anggan at ngay sundalu, nafantarungan wan nafanlagyuwan. Ay roro sanya fag lungud talun anwayay gatabyuun, tiba intong wan. Ay nus tuwa ma, sanya fag ngay tabyu, madafut dawdaw. Ay tiba at ngay sundalu nalagyu wa sam buwid. Nasuksuwan wa sa sangay muyud.
11-12Ay nu katanya wa long, Kidulawmir fag fulan natunglus wa sas fulan Suduma ay sas fulan Gumura. Ay nu ndasug wa sanya fag fulan, nabul wan fagayu at nalabianan sanya, fag ngay fakonun ay fag ngay fagnuwan ay fag ngay taw. Ay anggan Abram mangwayi Lut, igbanwan wayay sis fulan Suduma, natabanan wan. Ay anggan at ngay fagnuwan, Kidulawmir fag fulan nauba wan.
13Ay roro ginanya, siginan sad fulan tibak taw nalagyu yangay. Ay roro at sadi at nalagyu siginans fulan Suduma, kanya natunglus wan sas sik taw Ebriyu. Roro kanya fag taw Ebriyu, Abram wan. Ay kanya fag taw at nalagyu, nafansulit sas Abram te, “Am mangwayi natabanan wan.”
Ay Abram ginanya gbanwan yay sit usama Mamri at daga. Mamri, sik taw Amur. Ay kanya e fadugsay yay duwa. At ngayan Iskul ay Aner. Ay siginan ngay ebi ataw, Abram fag fulan ay Mamri fag fulan e namasadi tuwa sik longan, te, “Dewa gina, nus nga sinu tam, galay e gfabarangyan tam sadi, tumarabangan tuwa tam.”
14Ay Abram nu nasaful te, at mangwayi intaban wan, kanya nafafali nafaful at ngay fanuguwan tagsaful igfabarangyan. Ay nu fagayu wan at kinful, 318k taw. Kanya fagayu, we nabul siginan tibak fulan. Sanya wa sis Abram fag fulan at ngay unga at kindaul. Ay nu nful wan, kanya fagayu nalo wan, nan-guyan at ngay fabarangyan. Ay ndasug sa sik lungud talun, at ngayan Dan.
15Ay sad yabi, Abram fag fulan inkafud duwa. Ay gfabarangyan wa long. Ay ka fag ufat fun at madaragang nalabawan wan. Nafanlagyuwan way sigad, Kidulawmir fag fulan. Ay Abram fag fulan galo yadi, anggan nafadasug sa sik lungud daga at ngayan Kuba. Kanya roro makbang sas fulan Damasku, ka fag lungud talun.
16Ay nu sanya wan, Abram fag fulan nafabul yay fiya Kidulawmir fag fulan at ubanan fagayu. Dewa at nataban fag ngay mangama ay fag ngay mangena ay at ngay fagnuwan fagayu, Abram nafaago yadi. Anggan at mangwayi Lut, nafabul yay.
Melkisidik nu Gdarangin Abram
17Ay nu nafaago wan, Abram guli wan. Kafoli sat guyan ebi ataw. Ay kaduge glo sangaba dalan, indasug sa sik liskung. Ebi, gina yay Abram fag fulan, at ngay taw nu gngayan ka fag liskung, Sabe. Ay nu katsi wan, at taw nu gngayan, anwa Emek-Amelek.#14:17 Sis Fangebriyu, galay glong te, Emek-Amelek, at masuwad, fun daul at liskung.
Ay Abram gina kadasug sanya fag liskung, duwak fun nafablang anya. At sadi, fulan Suduma at fun. 18Ay at sadi, fulan Salem at fun. At ngayan, Melkisidik. Ay kanya sik tagfon tiba famanyun sas Diyus, sa tam Tiba Tungud. Ay kanya gina nalag Abram, nafon anya fakonun ay fanginum. 19-20Ay nadarangin Abram. Glong te, “Fadi fadi sa tam Diyus, tam Tiba Tungud, at naawat banwa ay daga. Kanya wan at natarabang emu nu gfabarangyan o am ngay fabarangyan ebi daw. Ay katsi ban baliwa, kanya nangus tumarabang yangay emu.”
Ay Abram nu nadungug Melkisidik longan, kanya nafon sik afud at nafabul fag ngay fagnuwan siginan at fagnanfabarangyanan. Fagayu nus nge wain at nafabul sanya ginan, kayu ginan insafulu, Abram nafon at sadi sas Melkisidik.
21Ay rodi ataw, fulan Suduma at fun kakbang yangay sas Abram. Ay glong te, “Faulii wa sa emi ay nafaago ku ngay taw fagayu. Ay em ngay fagnuwan long, ayu wan.”
22-24Ay Abram gbalus te, “E, toyap. Dungugani ku longan emu. Mafanud tuwa, tuy ku fagalongunun, teway bunwa sa emu fagtvngvd nu glong aw. Anggan tuwa sa ku fagsegan fag Diyus, sas Yawi. Kanya wan at Tiba Tungud at madaragang, at naawat banwa ay daga. Glong aw te, fagayu em nafaago fag ngay fagnuwan, kwa gbul, dasday em naon kaduge ami gfabarangyan. Kanya long nabul wami. Ay tiba fagayu kwa gbul. Dewa sirut sik lifung fansiyuk, ay ate sik sinilas uban, kwa gbul, teway nu mul kway ro kanya am ngay fagnuwan, moyung ro o am iba te, o at nafaayu ku fagnuwan. Nu katanya, emu wan, kanya fagayu. Ay si long ku ngay ibama, ku fagwes Mamri ay at fadugsay fagduwa, kanya gbul tuwa unu at ngay nalufuyan.” Katanya Abram nu gbalus fulan Suduma at fun.
Currently Selected:
Fagsigadan 14: TAWEAST
Highlight
Share
Copy
Want to have your highlights saved across all your devices? Sign up or sign in
Copyright © 2023 by OMF International, Philippines
