Fagsigadan 15
15
Abram nu Gafanud sas Yawi
1Ay Abram nu nauli wan siginan at fagfabarangyanan, kanya nadungug Yawi nu gelongan. Nu gdungug, kata igtaginfanan. Ay Yawi glong te, “Abram, lag kalimu, teway aw wan tagdingding emu galay e gfabarangyan emu. Ay glong kyangay emu te, igfamanyun ban aw sa emu sik ngay fagmabalanun ayuwayu.”
2-3Ay Abram nu nadungug Yawi nu gelongan, kanya gbalus te, “Yawi ku fun, nu gamatangan aw, wa ngap ban e fanambagun sa angku, dewa ban o gfon ayuwayu angku ngayuk famanyun. Teway wo e fon emi em unga. Satu, nu e fon di o emi em unga, gina ban aw kate, sanya tuwa nu gfon aw ku ngay fagmabalanun. Ay roro wo ay e fon emi em unga, nu gfon ban aw, sa way ngap ban em fanuguwan, sas Eliyeser. Laman, kanya bunwa em kalongan. Sik taw way Damasku kanya.”
4Ay Yawi nabalus Abram te, “Katsi glong aw emu te, umke baguwama wa ban o fiya. Ay sanya tuwa ban nu gfon o am ngay fagmabalanun. Bundi sanya fag fanuguwan.”
5Ay Yawi nu nalong katanya sas Abram, nataban yay sasad talun. Ay glong sas Abram te, “Tangdai nu kin, sas banwa. Go mafatap ro o nin fag ngay galeme ayuwayu? Wa long ro o siring mafatap at kayuwan. Ay glong aw emu te, katanya yangay ban am fufu sat dagat daga. We mangatap at kayuwan.”
6Ay Abram nu nadungug Yawi longan, gafanud tuwa sas Yawi. Ay Yawi nu glinggat Abram, kata wa sik taw at yud e asalanan, teway Abram gafanud tuwa sas Yawi.
7Ay Yawi glong sas Abram te, “Ste fag talun, gfon kwa ban sam ngay fufu sat dagat daga. Katanya ku longan, mafanud tuwa, teway aw wan Yawi. Aw wan at nabul emu siginans fulan Ur, siginans taw Kaldu at talun.”
8Ay Abram nu nadungug Yawi at longan, ginto yay te, “Ku fun, tain ro nu sumaful aw te, gfagurungan wa ban o fiya am longan te, gfon wa ban o ste fag talun sa ku ngay fufu?”
9Ay Yawi gbalus Abram te, “Kin nu gdi, laman umke fagsafulan tuwo, nanbul o tuluk balan. Sik baka tina ay sik kambing ay sik tupa tama. Kanya fag ngay balan, at banwa, tulu. Ay nanbul yangay o duwak manuk, sik linatad ay sik amukun.”
10Ay Abram nananbul wa fiya kanya fagayu. Ay at fagbulun, nabaltak kanya fag ngay balan. Ay nu nabaltak wan, gfatungkud wan. Fagayu balan nu matungkud, gfaludlungudan si at balyu mandi, laman ro e dalan sad buknga. Ay at nabul fag duwak manuk, wa nabaltak. Nafatungkud way nafaludlungudan at sadi. 11Ay Abram nu nabaltak wan ka fag ngay mangimut, rodi ataw sik ngay manuk mela indasug wa ayuwayu. Satu ro nansinduk. Ay roro Abram nafalimu wan ka fag ngay manuk.
12Ay rodi at menit nu kafalyu wan, Yawi nafaimata Abram matukba. Ay nu matukba wan nu gtiyug, inke fakalimuun dawdaw sat amatanganan. Roro mangaro fakalimuun dawdaw, Yawi kakbang anya.
13Ay Yawi glong sas Abram te, “Am ngay fufu ban sat dagat daga, nu gbanwan, sa ways tibak fulan taw at talun. Ay kanya fag fulan taw igfanuguwanan way ban am ngay fufu sat dagat daga, yap ngay umkufat sandank banwa, am ngay fufu nu gatakan ay nu gafanuguwanan. Katanya ku longan, mafanud wa fiya. 14Ay roro nu nkufat sandan wak banwa, am fufu nu gafanuguwanan, nanfaurianan aw sanya fag ngay taw tagfanuguwanan am ngay fufu. Ay am ngay fufu malin wan sanya ginan fag talun. Ay ngayu wa ban dawdaw at ubanan ginanya.
15“Ay o Abram, glugo tuwa ban dawdaw nu gleleg o. Ay nu kate ban o, manabayan tuwa. Ay tagsandig ban emu am ngay kalongan tuwa. 16Ay katsi, ste fag talun, kya gfon emu. Igfanya akyay ste fag taw dan at asalanan nu kasakan laman famin aw. Ay kadugenya ban, am ngay fufu sat dagat daga maloan yay sa tibak talun. At kadugayan nu maloan sanya, umlangfe yay 400k banwa. Ay nu nlangfe wan kadugenya, gfafoli kwa ban am ngay fufu sat dagat daga stiye fag talun.” Katanya Yawi at longan sas Abram.
17Ay rodi, at menit infalyu wan. Marum wa dawdaw sasad talun. Ay nu katanya wan, Abram manlag di, e nsure daw sik bisu daga kanus.#15:17 Ebi Abram fag fulan taw nu gfatama tinafay, nabul sik bisu daga daul. Ay nafadafut at fangawat tinafay sangaba bilug sad basad baliwa. Ay sanya way sad bangsi bisu at afuy. Ay at anus kalfas sad bibig. Katanya ro fag bisu daga, Abram nalag ginanya. Ay sik salung gigang. Ay kanya fag duwa, fag bisu ay fag salung, nadalan sas Abram at nabaltak fag ngay balan at buknga. 18Ay roro mangaro kanya at masuwad, Yawi igfatvngvd at fatuyanan sas Abram te, “Gurungan, tuy fag daga mon kwa ban fiya sam ngay fufu sat dagat daga. Ku fon ban fag daga, gbiya tuwa. At sadi at tigyangan, Safa Iyupratis. Ay at sadi, at safa sis taw Iptu tigyangan talun. Sanya at buknga, ku fon emu. 19Kayu tuy fag taw katsi tagdagaan sanya: taw Ken, taw Kenis, taw Kadmun, 20taw Kit, taw Peres, taw Refaim, 21taw Amur, taw Kanaan, taw Girgas, ay taw Yebus. Kanya fag ngay fulan taw at daga, mon kwa ban fiya sam ngay fufu sat dagat daga.”
Currently Selected:
Fagsigadan 15: TAWEAST
Highlight
Share
Copy
Want to have your highlights saved across all your devices? Sign up or sign in
Copyright © 2023 by OMF International, Philippines
