Fagsigadan 17
17
Diyus nu Gsugu Abrayam te, “Tulii Fagayu Mangama Laman E Gfaamatang Ayu Ku ngay Fatuyanan”
1Ay bandi, Yawi gdog yangay insure sas Abram. Ginanya Abram at kadugayan, anwa 99k banwa. Ay Yawi glong sas Abram te, “Aw wan Diyus. Aw wan at Tiba Tungud. Nu katanya, faningi tuwa gugat angku. Ay masinei tuwa gugat am ugali. 2Ay nu glag aw emu, katanya wa fiya am fagbulun. Nu katanya, katsi nanfatvngvd akyay ku fatuyanan sa emu. Ebi, nafatuyanan aw emu te gfaayu ban aw dawdaw am ngay fufu sat dagat daga. Ay katsi, kanya fag fatuyanan, nanfatvngvd kyay.” 3Abram nu nadungug Diyus at longan, kanya natudan ay namalub. Igfababaun.
Ay Diyus glong sas Abram te, 4-6“Katatuy ku fatuyanan sa emu: Igfaayu kwa ban ayuwayu am ngay fufu sat dagat daga anggan wa umsik ngay fulan taw ayuwayu. Ay tiba ban am ngay fufu sik ngay fun daul tuwa ban. Ay nu katanya, katsi gfabali kyay am ngayan, teway o wa ban at tama, kanya fag ngay taw ayuwayu. Katsi ban am ngayan bundi Abram, antuwa Abrayam, teway kanya fag ngayan at masuwad, sik mangama at ke unga ayuwayu.
7-8“Ay kanya ku fatuyanan sa emu, e balyu yay. Glong aw emu te, katsi deyud o e daga ste fag talun, bandi ban nu glugo wan, ste fag talun fagdaul, gfon kwa ban sam ngay fufu sat dagat daga. Kanya wa ban tagdagaan iste fag talun, faggugat. Ay katanya ku fatuyanan sa emu, kanya dakdi ban igfainbalian. Gtunglus wa fiya. Anggan wa ban sat dagat daga am ngay fufu, gtunglus tuwa ku fatuyanan. Ay siginan emu anggan wa sam ngay fufu sat dagat daga, aw wan ay Diyus. Aw wa ban ay Diyus, faggugat faggugat.
9-11“Ay nu katanya ku fatuyanan sa emu, e suguwan aw emu. Katsi ban, fagayu mangama si ayu, matuliani tuwa, laman kanya ban fag nafagbulun sa ay bilug tagfaamatang ayu ku fatuyanan sa emu katsi. Katanyai wa ban ay fagbulun anggan sat dagat daga ay ngay fufu sik ama.
12-13“Nu katanya, katsi ban baliwa, dewas nga ginain nu mke ngenge am sik ama, ay ndasug was fawaluk menit, kanya tulii. Katanya yangay ay fanuguwan galay inke ngenge sik ama. Ay anggan galay am nabili ay fanuguwan sik ama ay ya batang e natuli anya, kanya tulii yap. Ay fagayu mangama si ayu fag fulan, tulii laman kanya fag nafagbulun si ay bilug gfaamatang ayu ku nafatuyanan aro sa emu. Katanyai wa ban ay fagbulun, katsi ban baliwa. 14Ay roro galay sik ama kauri nanfatuli, faloi wa fiya anya siginan ku wa taw, teway at masuwad, kanya wa gfaning ku suguwan.
15“Ay anggan si am mangena at ngayan, gfabali kyangay. Katsi ban am mangena ngayan bundi Saray. Antuwa Sara. 16Fakatanyaun, teway e fasadan kyangay masine sa anya. Ku fasadan, umke ngenge am sik ama. Ay kanya ban ay ngenge at ngay fufu sat dagat daga, ngayu ban dawdaw fag taw. Sik ngay fulan taw tuwa ayuwayu. Ay tiba ay ngay fufu, sik ngay fun tuwa ayu daw madaragang.”
17Ay Abrayam nu nadungug Diyus at longan, kanya natudan ay namalub. Roro kadugenya kase wadi, teway gafayudun te, “Yaya, wa ban siring umgurungan Diyus at fatuyanan sa emi duwa, madyay magurang wami. Angku ku banwa 100 wan, arvs. Ay si ku mangena 90 wan.” 18Ay Abrayam gafayudun wayay, glong sas Diyus te, “Yaya, fatunglusi way ngap tarabangi em unga Ismael. Sanyai wa ban nu gtarabang o.”
19Ay Diyus igbalus Abrayam te, “Yaya, wa sas Ismael nu kagurungan ku ngay nalong. Umke ngenge wam fiya sik ama. Am mangena Sara umke ngenge wa fiya. Ay sanya ginan ban fag unga nu gfasigad aw gfagurungan ku nafatuyanan ayuwayu sa emu. Anggan ban sat fufu sat dagat daga, sanya yay nu kagurungan, tiba ku nafatuyanan sa emu. Ay dewa ban glugo dawdaw, kwa gfabali ka fag fatuyanan. Katanya wa fiya.
“Ay dewa gina nu e unga wa ban am, fangayani anya te, Isaak. Kanya wan ay ngenge at ngayan.
20“Ay anggan am unga Ismael, gtarabang aktuwa, kata aro am fagetun. Anggan ban anya at ngay fufu sat dagat daga, igfaayu kyangay. Ay anya ban sigon at ngay fufu, madaragang yangay fag ngay taw. At ngay baguwama ban, labi duwak fun tuwa. Ay at ngay unga sat daga, madaragang yangay fag fulan taw.
21“Ay dewa aw gtarabang Ismael, fagayu ban ku ngay fatuyanan sa emu ebi ginan, wa ban sa anya nu kagurungan. Ismael fag fulan wa gataipan. Nu kagurungan ban, sa tuwa am baguwama Isaak ay sat ngay fufu sat dagat daga, ku ngay fatuyanan sa emu ebi ginan. Ay fadogan fag banwa, kaduge yangay katsi fag lungud, am mangena gfasalug wa Isaak.”
22Ay nu ntabu wan Diyus nu gelongan, kanya nalo wan. 23-27Ay rodi ataw, Abrayam gfaning wan Diyus at suguwan anya, te tulii fagayu mangama. Nu katanya, Abrayam at fagbulun, nafaful wa fiya fagayu at fagmagurangun fag ngay mangama. Ay natuli wan kata Diyus suguwan anya. Nu sik ama yap ngay, natuli wan. Dewa Abrayam, dewa at unga Ismael, dewa at nabili fag ngay fanuguwan, ay dewa at ngay fanuguwan at kindaul sanya fag fulan. Sadik menit way Abrayam fag fulan nu gfagbulun katanya. Ginanya, Abrayam at banwa anwa 99. Ay at unga Ismael, 13k banwa.
Currently Selected:
Fagsigadan 17: TAWEAST
Highlight
Share
Copy
Want to have your highlights saved across all your devices? Sign up or sign in
Copyright © 2023 by OMF International, Philippines
