Abakuk 3
3
Abakuk at Darangin
1Katatuy Abakuk, sik taglong, at darangin:
2“Yawi, nadungug aw am ngay nafagbulun ay nadulawan aw emu. Ay katsi fag lungud, dogi yangay fagbuluni kata ebi am nafagbulun. Ay ginanya yay ban fag menit nu gfalag o am fandotaman, afanyui tuwa emi.
3“O wan at malayun sat masine fag Diyus takadasug siginans fulan Teman ay Bugsul Paran. Ay am fagmadaragangun kalag sas banwa, nu katanya, at ngay taw sumeg emu sas fagdaul daga. 4Umdasug o kamayamag tam menit, ay e msure sik damlag siginan am duwa daluwap at masuksukan am fagmadaragangun. 5Umdasug o e ngay ba faurianan. 6Gina o umlindug at daga muwigan, ay gina o luminggat at ngay taw sa sangay talun kudkulugan kalimu ay umgubang wan taglugo fag ngay bugsul. Am ngay balyavtan sanya tuwa faggugat. 7Ay nalag aw sik ngay bale nu marasrasan sas fulan Kusan ay sas talun Midyan.
8-9“Yawi, kata o sik sundalu at masakayan sas karwai at ke famabo gina sas fagbarangyanan. Mafamasadan wan am ngay busuy. Roro dada am nadotaman? Go ngay safa ay ngay dagat? Nafaali o daga ay insure at safa. 10At ngay bugsul kata sik ngay taw nu kalimu ay kudkulugan gina lumag emu. Namoyan dawdaw ay dagat gbiya nu gbudburuk ay nu glumbak. 11Inragang at menit ay magdanun si at fagmatungkudan teway am busuy nu gfangalayugan ay am bangko ganuno.
12“Katvngvdan nu kadotama o nalodloan o sa sangaba daga ay nafansiyadan at ngay talun, 13laman nanfalangfe o am filian fag ngay taw. Nafate o at mauri fag fagmagurangan at tagmagurang ay namin wan fagayu at ngay taw. 14Ay nasuluy wo at tagfangguna ngay sundalu at alfuyu sit bangko mandi. Nafagbulun o katanya gina gafabarangyanun emi kata tagbaribungan at magong fag tagmara laman nanfarapyag emi. Anway guseganan nanfamin emi ami at mafanalo tagsuksuwan kalimu. 15Kata o sik sundalu at masakayan sis kabayu tagtarung sa sangaba dagat anggan wa ndaul at ngay lumbak.”
16Abakuk nalong te, “Nu nadungug aw katanya ayuwayu, kudkulugan fagdaul ku bilug ay anggan ku balat bibig teway kalimu aw. Ay inlukme akwan ay ku tud natigtigan. Anway katanya Yawi at longan, sumungatan akyay gfanya at fatuyanan fag lungud nu gfaurianan at ngay tagfabarangyan emi. 17Ay dewa gyud muwadan at ngay kayu igus, ubas, ulibu, ay dewa gyud e kabul siginans gamasun, ay dewa umkate at ngay balan sit fagtiyugan, 18guseganan akyay teway Yawi, ku Diyus, tagfalangfe angku. 19Kanya tagfon angku ku fagmabitsugun. Ay gfatud ku darafa kata arasyo at darafa, laman umdasug aw sat ngabat fag ngay lungud.”
Currently Selected:
Abakuk 3: TAWEAST
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines